¹ Nakʋyʋ wiye Mooyiizi yɩtɩ Yetiroo, Maadiyaanɩ ɛjaɖɛ taa cɔjɔ kɔm ɛnɩɩ pɛkɛdaɣ mbʋ mbʋ KƖPAƔLƲ Ɛsɔ labɩ Mooyiizi nɛ Izirɛɛlɩ ñɩma, ɛ-samaɣ yɔ. Ɛnɩ ɖɔɖɔ ɛzɩma KƖPAƔLƲ lɩzɩ-wɛ Ejipiti ɛjaɖɛ taa yɔ. ² Pʋwayɩ lɛ, Mooyiizi yɩtɩ Yetiroo kpaɣ ɛ-pɛlɛ Ciporaa, Mooyiizi halʋ weyi ɛ́lɛ ñaaɖɔɔnaa yɔ, ³ nɛ ɛ-pɩyalaa mba pa-naalɛ. Mooyiizi ya sɔsɔ se, Gɛɛrɩsɔɔnɩ, pʋ-tɔbʋʋ se, ɛgɔm peeye. Toovenim lɛ, ɛtɔŋaɣ se, ɛnʋ wobi ɛcaɣ caɣyɩtʋ ɛjaɖɛ ɛgɔm naɖɩyɛ taa. ⁴ Mooyiizi yaa cikpelu se, Eliyɛzɛɛrɩ, pʋ-tɔbʋʋ se, ɛnʋ Ɛsɔ woki ɛ-sɩnaʋ. Se, ɛlɩzɩ ɛnʋʋ nɛ ɛɖaŋ ɛnʋ yɔɔ nɛ Ejipiti wiyaʋ takʋ ɛnʋ.

⁵ Pʋwayɩ lɛ, Yetiroo ɖɛɛ ɛ nɛ Mooyiizi piyaa nɛ ɛ́lɛ halʋ nɛ powolo Mooyiizi cɔlɔ lakʋ taa, ɖenɖe Izirɛɛlɩ ñɩma kekpeɣli Ɛsɔ pʋʋ ^a cɔlɔ yɔ. ⁶ Mbʋʋ Yetiroo tiyaa peheyi Mooyiizi se, ɛnʋʋ ɛ-yɩtɩ wɛɛ ewoki ɛ-cɔlɔ, ɛ nɛ ɛ-halʋ nɛ ɛ-pɩyalaa mba pa-naalɛ. ⁷ Peheyi Mooyiizi mbʋ lɛ, ɛkʋyɩ se ɛkatɩɣ-ɩ. Ɛkatɩ-ɩ lɛ, eluzi ɛ-tɩ ɛ-yɩtɩ tɛɛ nɛ ɛ nɛ ɩ pekpikini ɖama. Pɔpɔzɩ ɖama alaafɩa yɔɔ nɛ pɩtɛ wyɩ lɛ, Mooyiizi kpaɣ-wɛ nɛ ewoni e-kizinziku tɛɛ. ⁸ Ɖɩnɛɛ, Mooyiizi kɛtɩ ɛ-yɩtɩ ɛzɩma KƖPAƔLƲ labɩ Farawɔɔ nɛ Ejipiti ñɩma, Izirɛɛlɩ ñɩma yɔɔ yɔ. Ɛkɛtɩ-ɩ ɖɔɖɔ ɛzɩma KƖPAƔLƲ lɩzɩ ɛ-samaɣ kʋñɔmɩŋ tɩŋa taa yɔ, nʋmɔʋ taa yɔ. ⁹ Peeye, Yetiroo taa labɩ leleŋ nɛ kɩbandʋ ndʋ KƖPAƔLƲ labɩ Izirɛɛlɩ ñɩma yɔ, nɛ ɛlɩzɩ-wɛ Ejipiti ñɩma nesi taa yɔ, tɩ-tɩŋa tɩ-yɔɔ ¹⁰ nɛ ɛtɔ se, pʋwɛɛ se pɛsɛɛ KƖPAƔLƲ weyi ɛlɩ-wɛ Farawɔɔ nɛ Ejipiti ñɩma, pe-nesi taa yɔ ^b. ¹¹ Se, lɛɛlɛɛyɔ lɛ, ɛnʋ tɛzɩ naʋ se KƖPAƔLƲ kɩlɩ agɔlɩma tɩŋa payɩ. Se, eyebi nɛ pana-tʋ alɩwaatʋ ndʋ Ejipiti ñɩma nazaɣ Izirɛɛlɩ ñɩma yɔ.

¹² Pʋwayɩ lɛ, Yetiroo láa KƖPAƔLƲ kɩlaʋ ŋgʋ pɔhɔkɩ nɛ pɩñaɣ yɔ nɛ kʋɖʋm kpɛndʋʋ kɩlaŋ. Ɖɩnɛɛ, Aarɔɔnɩnɩnɩ nɛ Izirɛɛlɩ Sɔsaa powoba nɛ pa nɛ Mooyiizi yɩtɩ pɔtɔɔ kɔtaɣ taa tɔɔnaɣ.

¹³ Kifema lɛ, Mooyiizi caɣ nɛ samaɣ taa mba mba poyowa yɔ, powolo ɛ-cɔlɔ nɛ ɛhʋʋ pɔ-tɔm. Ɖooo tanaŋ halɩ ɖanaɣ ɖanɩ, ɛyaa kaɖaŋaa se pɩtalɩnɩ-wɛ nɛ papɩzɩ powolo ɛ-ɛsɩndaa. ¹⁴ Ɛ-yɩtɩ na ɛzɩma tʋmɩyɛ kɩlɩ-ɩ yɔ lɛ, ɛpɔzɩ-ɩ se, pɩlabɩ ɛzɩma nɛ ɛlakɩ mbʋ? Se, ɛbɛ yɔɔ ɛlakɩ tʋmɩyɛ nɖɩ́ e-ɖeke nɛ eyeki ɛyaa sɩŋɩɣ ɛ-cɔlɔ ɖooo tanaŋ nɛ kʋ-ñʋʋ halɩ ɖanaɣ nɛ kaɖanʋʋ se papɩzɩʒ powolo ɛ-ɛsɩndaa nɛ pɩnɩɣ-wɛ? ¹⁵ Mooyiizi cosi-i se, pʋwɛɛ se powolo ɛnʋ cɔlɔ nɛ panɩɩ ndʋ Ɛsɔ heyiɣ-wɛ nɛ ɛnʋ nɔɔ yɔ. ¹⁶ Se, tɔm natʋyʋ ɛwɛ pɛ-hɛkʋ taa se pɔñɔɔzɩ-tʋ yɔ, powoki nɛ pana-ɩ. Se, ɛnʋ ñɔɔzʋʋ tɔm ndʋ tuyozuu-wɛ yɔ, nɛ ɛnʋ wɩlɩ-wɛ Ɛsɔ paɣtʋ nɛ ndʋ ndʋ ɛ́lɛ́ ɖʋwa yɔ.

¹⁷ Ɖɩnɛɛ ɛ-yɩtɩ cosi-i se, pɩfɛyɩ camɩyɛ se ɛhʋʋ tɔm ɛzɩ ɛhʋʋ yɔ. ¹⁸ Se, ɛ nɛ samaɣ ŋga kowoki ɛ-cɔlɔ yɔ, pakʋʋ pa-tɩ kʋkʋʋ. Se, tʋmɩyɛ nɖɩ ɖɩpaɣlɩ pɩtɩɩfɛyɩ, ɛɛpɩzɩɣ nɛ ɛlabɩ-ɖɩ́ ɛ-ɖeke! ¹⁹ Se, ewelesi ɖeu ndʋ ɛnʋ heyiɣ-i yɔ nɛ Ɛsɔ ɛwɛɛ ɛ-cɔlɔ. Se, ɛ-tʋmɩyɛ lɛ se, ɛcaɣ samaɣ lone taa Ɛsɔ ɛsɩndaa nɛ ɛkpaɣ samaɣ kʋñɔmɩŋ ɛɖʋ ɛ́lɛ́ ɛsindaa. ²⁰ Se, ɖɔɖɔ lɛ, pʋwɛɛ se ɛwilɩ ɛyaa Ɛsɔ paɣtʋ nɛ ndʋ ndʋ ɛ́lɛ́ ɖʋwa yɔ. Se, pʋwɛɛ se ɛwɩlɩ-wɛ ɛzɩma mbʋ pɔɖɔ yɔ, nɛ mbʋ pʋmʋnaa se pala yɔ. ²¹ Se, pɩkazɩ mbʋ yɔ, ɛlɩzɩ samaɣ taa ɛyaa mba pɛwɛ yuŋ nɛ pañaŋ Ɛsɔ yɔ, ɛyaa mba pɔsɔɔlɩ toovenim nɛ paapɩzɩɣ paya pa-maɣzɩm yɔ. Se, ɛsɩɩ-wɛ ɛyaa kutoku (1000) yaa mɩnʋʋ (100) yaa nɩɩnʋwa (50) yaa hiu (10), pa-ñʋndɩnaa ^c . ²² Se, mba pɩwɛnɩ se paa efemiye nɖɩ lɛ, pacaɣ pahʋʋ samaɣ tɔm, nɛ powokini-i tɔm ndʋ tikili ɖoŋ yɔ. Se, tɔm ndʋ tɩfɛyɩ ɖoŋ yɔ, pa-maɣmaɣ pɔñɔɔzɩ-tʋ. Se, pʋbʋ, ɛ-tʋmɩyɛ pasɩɣ, mbʋ pʋyɔɔ yɔ, pa nɛ ɩ pakaɣnɩ tʋmɩyɛ labʋ. ²³ Se, ye ɛlabɩ mbʋʋ na yɔ nɛ pɩkɛ toovenim mbʋ Ɛsɔ pɔzʋʋ-ɩ yɔ yɔ, ɖɩnɛɛ lɛ, pɩɩtasɩ-ɩ nɩʋ. Ɖɔɖɔ lɛ, ɛyaa tɩŋa kaɣ pɩsʋʋ ^d pɛ-tɛ nɛ laŋhɛzɩyɛ. ²⁴ Mooyiizi nɩ mbʋ lɛ, ɛɖɔ lɔŋ weyi ɛ-yɩtɩ sɔzɩ-ɩ yɔ ɛ-yɔɔ. ²⁵ Ɛlɩzɩ Izirɛɛlɩ ñɩma taa ɛyaa mba pɛwɛ yuŋ yɔ nɛ ɛsɩɩ-wɛ samaɣ ñʋndɩnaa, ɛyaa kutoku (1000) yaa mɩnʋʋ (100) yaa nɩɩnʋwa (50) yaa hiu (10) yɔɔ. ²⁶ Ñʋndɩnaa mba, pɩɩwɛɛ se paa efemiye nɖɩ lɛ, pacakɩ nɛ pahʋʋ samaɣ tɔm. Powokinaɣ tɔm ndʋ tɩkɩlɩ ɖoŋ yɔ, piyele nɛ pa-maɣmaɣ pahʋʋ ndʋ tɩfɛyɩ ɖoŋ yɔ.

²⁷ Pʋwayɩ lɛ, Mooyiizi yele ɛ-yɩtɩ nɛ ɛ́lɛ́ pɩsɩ ekpe ɛ-ɛjaɖɛ taa.