Yoozuuwee Takayaɣ i

YOOZUUWEE

TAKAYAƔ

Tɔm kiheyitu

Yoozuuwee takayaɣ kanɛ ka-taa lɛ, pɛkɛdɩɣ-ɖʋ ɛzɩma mbʋ Izirɛɛlɩ ñɩma mʋ Kanaanɩ ɛjaɖɛ nɛ pɛwɛɛ ɖɩ-taa yɔ. Ɛjaɖɛ ńɖɩ ɖɩkpaɣnɩ Mediteraanee teŋgu, wɩsɩ ɖɩɖʋyɛ hɔɔlʋʋ taa nɛ ɖiwolo Yɔɔrɩdaŋ pɔɔ, wɩsɩ ɖɩlɩyɛ ñɩŋgʋ taa nɛ pɩtasɩnɩ tɛtʋ natʋyʋ natʋyʋ pɔɔ wayɩ. Kpaɣ hayo nɛ puwolo hadɛ kiŋ lɛ, ɖɩkpaɣnɩ Liibaɣ pʋŋ nɛ puwolo pɩsɩnɩ lakʋ egeetiye nɖɩ payaɣ se Neegɛɛvɩ yɔ.

Izirɛɛlɩ ñɩma kʋyɩ Ejipiti ɛjaɖɛ taa lɛ, Ɛsɔ ɖʋ se ɛhaɣ-wɛ Kanaanɩ ɛjaɖɛ ńɖɩ.

Yoozuuwee tɔm pakɩlɩ yɔɔdʋʋ takayaɣ ŋga ka-taa. Ɛ-hɩɖɛ paya-kɛ. Ɖɩ-tɔbʋʋ se, KƖPAƔLƲ yakɩ ñʋʋ .

Yoozuuwee sɩŋaɣnɩ Mooyiizi tʋmɩyɛ labʋ. Ɛ́lɛ sɩm wayɩ lɛ, ɛlɛɣzɩ e-lone taa. Pɩkpaɣʋnɩ alɩwaatʋ ndʋ yɔ́ɔ, ɛkɛ Izirɛɛlɩ ñɩma ñʋʋdʋ nɛ eɖiyiɣ-wɛ.

Kpaɣ ñʋʋ kʋɖʋmʋʋ nɛ puwolo hiu nɛ naalɛ (1-12) ñɩŋgʋ taa lɛ, pɛkɛdɩɣ-ɖʋ ɛzɩma mbʋ Izirɛɛlɩ ñɩma sʋ Kanaanɩ ɛjaɖɛ taa nɛ pamʋ-ɖɩ yɔ.

(.) Kpaɣ ñʋʋ hiu nɛ naadozo nɛ piwolo pɩsɩnɩ nɩɩlɛ nɛ naalɛ (13-22) ñɩŋgʋ taa lɛ, pɛkɛdɩɣ-ɖʋ ɛzɩma mbʋ Yoozuuwee tayɩ ɛjaɖɛ nɛ ɛcɛlɩ paa cejewiye nɖɩɩ ɖɩ-hɔɔlʋʋ, ɛzɩ Ɛsɔɖʋʋ yɔ.

(.) Kpaɣ ñʋʋ nɩɩlɛ nɛ naadozo ñɩŋgʋ nɛ piwolo pɩsɩnɩ nɩɩlɛ nɛ naanza (23-24) ñɩŋgʋ taa lɛ, pɛkɛɖɩɣ-ɖʋ ɛzɩma mbʋ Yoozuuwee tɛmnaa yɔ.

Yoozuuwee nɛ Mooyiizi pa-lakasɩ lɩ ɖama siŋŋ.

Mooyiizi ɖiyi Izirɛɛlɩ ñɩma nɛ palɩɩ Ejipiti ɛjaɖɛ taa lɛ, kañɩŋgbala teŋgu taa lɩm ha nʋmɔʋ nɛ pɛɖɛɛ (Ejipiti Lɩʋ 14). Mbʋ ɖɔɖɔ alɩwaatʋ ndʋ Yoozuuwee ñeɖiyi-wɛ se pasʋʋ Kanaanɩ ñɩnɖɛ taa lɛ, Yɔɔrɩdaŋ pɔɔ taa lɩm ñeyele kpem (Yoozuuwee 3 nɛ 4).

Pɛkɛdɩɣ-ɖʋ Mooyiizi kɛdɛzaɣ tɔm nɛ ɛ-sɩm ñɩndʋ Paɣtʋ tɔzʋʋ takayaɣ ɖɩtɛnɖɛ taa kpaɣ ñʋʋ niidozo nɛ kʋɖʋmʋʋ nɛ piwolo pɩsɩnɩ niidozo nɛ naanza (31-34) ñɩŋgʋ taa. Mbʋ ɖɔɖɔ pɛkɛdɩɣ-ɖʋ Yoozuuwee kɛtɛzaɣ tɔm nɛ ɛ-sɩm ñɩndʋ Yoozuuwee takayaɣ ɖɩtɛnɖɛ taa, kpaɣ ñʋʋ nɩɩlɛ nɛ naadozo nɛ piwolo pɩsɩnɩ nɩɩlɛ nɛ naanza (23-24) ñɩŋgʋ taa. Pʋcɔ nɛ Yoozuuwee sɩkɩ lɛ, eheyi Izirɛɛlɩ ñɩma se, palɩzɩ KƖPAƔLƲ nɛ eɖeke ɛkɛ pɛ-Ɛsɔ. Eyeba nɛ Nɔɔ Haʋ nakɛyɛ wɛɛ samaɣ nɛ Ɛsɔ pɛ-hɛkʋ taa ɛzɩ Mooyiizi kalabʋ yɔ.

Pɔyɔɔdɩ you tɔm sakɩyɛ Yoozuuwee takayaɣ kanɛ ka-taa. Ḿbʋ pɩzɩɣnɩ pɩcɛyɩ mba pakɩlɩɣ-kɛ sɔnɔ yɔ, pa-taa sakɩyɛ. Pɛkɛdɩɣ-dʋ hɔɔlɩŋ lɛŋ taa ɛzɩma mbʋ Ɛsɔ ha Izirɛɛlɩ ñɩma nɔɔ nɛ pakʋ Kanaanɩ ñɩma naŋa naŋa nɛ pɛwɛɛkɩ pa-ñɩm tɩŋa payɩ yɔ. Patɩŋnɩ tɔm ńdʋ tɩ-yɔɔ se pawɩlɩ-ɖʋ se KƖPAƔLƲ liu fɛyɩ se Izirɛɛlɩ ñɩma esidi lɛlaa taa yaa paɖʋ ɛsɩyɛ pa-ñɩm yɔɔ. Pɩtɛkɛ mbʋ pɔkɔŋ paha-ɩ siɣye. Ɛsɔ haɣnɩ ɛ-samaɣ ɛjaɖɛ. Pɩtɛkɛ ŋga mʋnɩ-ɖɩ nɛ ko-ɖoŋ. Toovenim lɛ, Izirɛɛlɩ ñɩma nɛ Kanaanɩ ñɩma mba pɩkazaa yɔ, pɛwɛɣ ɛjaɖɛ taa mbʋ nɛ pileɖi. Ye Izirɛɛlɩ ñɩma ɛñɩnɩɣ se pɛwɛɛ ɛzɩ mba pɩkazɩ mbʋ yɔ nɛ poluŋuu agɔlɩma agɔma tɛɛ yɔ́ɔ yɔ paba kɛɣnɩ-wɛ kpaca. Izirɛɛlɩ ñɩma pʋwɛɛ se palɩzɩ se KƖPAƔLƲ Izirɛɛlɩ Ɛsɔ ɖeke koŋ tɛɛ poluŋuu. Ye palabɩ mbʋʋ yɔ, paa weyi ɛwɛɣnɩ tɛtʋ natʋyʋ ɛjaɖɛ taa nɛ ɛcaɣ. Ɛsɔ paɣtʋ yɔɔ ɖɔm wɛnɩ wazaɣ pɩtɛkɛ you. Toovenim lɛ, takayaɣ kanɛ ka-ɖɩpazɩyɛ taa lɛ, Ɛsɔ kam Yoozuuwee ñʋʋ taa se, ɛtaayele paɣtʋ ńdʋ tɩ-yɔɔ ɖom kaʋ (1.7). Ka-ɖɩtɛzɩyɛ taa lɛ, Yoozuuwee kam Izirɛɛlɩ ñɩma ñʋʋ taa se, pañaɣ pana nɛ pala ɛzɩ pamaʋ Mooyiizi paɣtʋ takayaɣ taa yɔ, pataayele tɩ-yɔɔ ɖɔm kaʋ (23.6).