¹ KƖPAƔLƲ heyi Mooyiizi se, ² kajalaɣ fenaɣ kɩyakʋ kajalaɣ ñɩŋgʋ wiye lɛ, ésiɣ ɛnʋʋ KƖPAƔLƲ ɛ-ɖɩcaɣyɛ, kɩɖanɖʋʋ kɩ-tɛɛ pakatɩɣ yɔ. ³ Se, pásɩ kɩɖanɖʋʋ ŋ́gʋ kɩ-tɛɛ aɖakaɣ ŋga ka-taa nɔɔ haʋ takayaɣ wɛɛ yɔ. Pasɩ-kɛ pɩsaʋ ŋgʋ kɩtayɩ kaɖɛ lonɛ nɛ nɖɩ ɖɩkɩlɩ kaɖɛ pɛ-hɛkʋ taa yɔ, kɩ-wayɩ se ɛyaa ɛtaana-kɛ. ⁴ Powoni Ɛsɔ taabɩlɩ kɩɖanɖʋʋ ŋ́gʋ kɩ-tɛɛ nɛ pɔñɔɔzɩ kpɔnɔnaa mba paha-ɩ nɛ pasɩɩ kʋ-yɔɔ. Pasɩ kɩ-tɛɛ ɖɔɖɔ mbʋ pʋ-yɔɔ paɖʋ kanɖʋnaa nɛ pɔsɔ kaŋɖʋnaa ḿba. ⁵ Se, pásɩɩ kɩ-tɛɛ ɖɔɖɔ kɩlaŋ ɖɩlayɛ nɖɩ palabɩnɩ sika yɔ. Ɖɩ-yɔɔ pɔhɔkɩ tulaaɖi nɔɔ haʋ aɖakaɣ ɛsɩndaa. Pʋwayɩ lɛ, paɖʋ pɩsaʋ nakʋyʋ Ɛsɔ ɖɩcaɣyɛ nɔnɔɔ taa. ⁶ Se, pásɩɩ kɩlaŋ ɖɩlayɛ nɖɩ ɖɩ-yɔɔ palaɣ kɩlaŋ yɔ, kɩɖanɖʋʋ ŋgʋ kɩ-tɛɛ pakatɩɣ yɔ, kɛ-ɛsɩndaa. ⁷ Se, pákpaɣ ñɩnaɣ ŋga ka-taa paɖʋʋ cɩɖɩ cɩɖɩ wɛtʋ sɔŋzɩ labʋ lɩm yɔ nɛ pasɩɩ-kɛ kɩɖanɖʋʋ ŋgʋ kɩ-tɛɛ pakatɩɣ yɔ nɛ kɩlaŋ ɖɩlayɛ pɛ-hɛkʋ taa. Se, páɖʋ lɩm ñɩnaɣ ŋ́ga, ka-taa. ⁸ Se, pʋwayɩ lɛ, pákpaɣ pɩsaŋ nɛ pɔcɔzɩ Ɛsɔ ɖɩɣa kadaɣ tɩŋa tɩnaɣ yɔɔ kpɛɛɛ, nɛ páɖʋ kadaɣ nɔnɔɔ yɔɔ, pɩsaʋ.

⁹ Ɛtɛma lɛ, ɛ́kpaɣ num mbʋ palakɩnɩ sɔnzɩ yɔ nɛ ɛpɩyɩ-pʋ Ɛsɔ ɖɩcaɣyɛ nɛ mbʋ pɩ-tɩŋa payɩ pʋwɛ ɖɩ-taa yɔ, pɔ-yɔɔ. Se, mbʋʋ ɛlakɩ nɛ Ɛsɔ ɖɩcaɣyɛ nɛ ɖi-wondu lɛɛtʋ tɩŋa, pɩkɛ Ɛsɔ pʋyʋ. Se, toovenim lɛ, pɩkpaɣ nɛ mbʋ yɔ ɖɩcaɣyɛ-ɖɩ ɖɩkɛ ɛnʋ ñɩŋɖɛ. ¹⁰ Se, pápɩyɩ ɖɔdɔ num mbʋ palakɩnɩ sɔnzɩ yɔ kɩlaŋ ɖɩlayɛ nɛ ɖi-wondu lɛɛtʋ tɩŋa pɑyɩ, pɔ-yɔɔ. Se, ɛ́la mbʋ nɛ kɩlaŋ ɖɩlayɛ ńɖɩ ɖɩkɛ ɛnʋ ñɩnɖɛ nɛ palakɩ ɖɩ-yɔɔ, ɛnʋ tʋmɩyɛ ɖeke. ¹¹ Se, pápɩyɩ ɖɔɖɔ num ḿbʋ ñɩnaɣ ŋga ka-taa paɖʋʋ cɩɖɩ cɩɖɩ wɛtʋ sɔŋzɩ labʋ lɩm yɔ nɛ mbʋ pʋ-yɔɔ pasɩɣ ñɩnaɣ ŋ́ga yɔ, pɔ-yɔɔ nɛ pɩkɛ Ɛsɔ pʋyʋ.

¹² Se, ewoni Aarɔɔnɩnɩnɩ nɛ ɛ-pɩyalaa kɩɖanɖʋʋ ŋgʋ kɩ-tɛɛ pakatɩɣ yɔ kʋ-nɔnɔɔ taa, nɛ eyele nɛ pala cɩɖɩ cɩɖɩ wɛtʋ sɔnzɩ nɛ pɛwɛɛ cɩɖɩ cɩɖɩ. ¹³ Pɛtɛŋ cɩɖɩ cɩɖɩ sɔnzɩ labʋ lɛ, ɛ́kpaɣ cɔjɔtʋ wondu nɛ esuu Aarɔɔnɩnɩnɩ nɛ ɛpɩyɩ ɛ-ñʋʋdaa num nɛ ɛlabɩ-ɩ sɔnzɩ nɛ ɛkɛ cɔjɔ nɛ ɛwɛɛ ɛnʋ tʋmɩyɛ taa. ¹⁴ Se, ɛ́yaa Aarɔɔnɩnɩnɩ pɩyalaa nɛ powolo ɛ-cɔlɔ lɛ, esuu-wɛ pɔ-kɔdaɣ tʋmɩyɛ tokonaa. ¹⁵ Se, ɛ́kpaɣ num nɛ ɛlabɩ-ɛ sɔnzɩ ɛzɩ ɛlabʋ pa-caa Aarɔɔnɩnɩnɩ yɔ, nɛ pɛkɛ cɔjɔnaa nɛ pala ɛnʋ tʋmɩyɛ. Se, pɩtɩŋnɩ num pɩyʋʋ sɔnzɩ yɔɔ lɛ, pa nɛ pɛ-sɛyɩnaa pɛkɛɣ cɔjɔnaa tam yɔɔ.

¹⁶ Mooyiizi labɩ tʋma tɩŋa ɖeyi ɖeyi ɛzɩ KƖPAƔLƲ keheyuu-i yɔ. ¹⁷ Palɩ Ejipiti ɛjaɖɛ taa nɛ pɩkɔɔ pɩla pɩnaɣ lɛ, pesiɣ Ɛsɔ kɩɖanɖʋʋ. Pɩɩkɛ kajalaɣ fenaɣ kɩyakʋ kajalaɣ ñɩŋgʋ wiye, pesiɣ Ɛsɔ kɩɖanɖʋʋ ŋ́gʋ.

¹⁸ Mooyiizi yeba nɛ pesiɣ Ɛsɔ kɩɖanɖʋʋ. Nesi tɛɛ tʋmlaɖaa ɖʋ mbʋ pʋ-yɔɔ pesiki tilima yɔ, pesiɣ tilima nɛ paɖʋ kpooŋgbolonaa nɛ pɑkaɣ ɖasɩ. ¹⁹ Poposi pɩsaŋ nɛ pohuuzi kɩɖanɖʋʋ yɔɔ. Pɩtɛma lɛ, pakpaɣ kuntu ŋgʋ pohuuzuu kɩɖanɖʋʋ tɩŋa yɔɔ yɔ, nɛ paɖʋ kɩɖanɖʋʋ yɔɔ ɛzɩ KƖPAƔLƲ keheyuu Mooyiizi yɔ.

²⁰ Ɖɩnɛɛ, Mooyiizi kpaɣ pɛ kpatanaa mba pɔ-yɔɔ pama Ɛsɔ paɣtʋ hiu yɔ, nɛ ɛsɩɩ-yɛ aɖakaɣ taa. Ɛkpaɣ ɖaŋ weyi pɔhɔɔlʋʋnɩ aɖakaɣ yɔ nɛ ɛtʋ-ɩ a-lona taa, nɛ posuli aɖakaɣ sulaɣ. ²¹ Pʋwayɩ lɛ, ɛkpaɣ aɖakaɣ nɛ ɛsʋnɩ-kɛ Ɛsɔ ɖɩcaɣyɛ taa. ɛsʋnɩ-kɛ lɛ, popuzi pɩsaʋ nɛ pikendiɣ kɔ-yɔɔ ɛzɩ KƖPAƔLƲ keheyuu Mooyiizi yɔ.

²² Pakpaɣ Ɛsɔ taabɩlɩ nɛ ɛsɩɩ-kʋ nɛ hayɔ kiŋ, kɩɖanɖʋʋ ŋgʋ kɩ-tɛɛ pakatɩɣ yɔ kɩ-tɛɛ, pɩsaʋ ŋgʋ popuzaa yɔɔ kɛ-ɛsɩndaa. ²³ Pɔñɔɔzɩ kpɔnɔnaa mba paha KƖPAƔLƲ yɔ, nɛ pasɩɩ-wɛ taabɩlɩ ŋ́gʋ kʋ-yɔɔ, ɛzɩ KƖPAƔLƲ keheyuu Mooyiizi yɔ.

²⁴ Piyele mbʋ pʋ-yɔɔ paɖʋʋ kanɖʋnaa yɔ, pasɩɩ-pʋ hadɛ kiŋ, kɩɖanɖʋʋ ŋgʋ kɩ-tɛɛ pakatɩɣ yɔ, kɩ-tɛɛ, Ɛsɔ taabɩlɩ ɛsɩndaa. ²⁵ Pɛtɛma lɛ, pɔsɔ kanɖʋnaa ḿba KƖPAƔLƲ ɛsɩndaa, ɛzɩ KƖPAƔLƲ keheyuu Mooyiizi yɔ.

²⁶ Pɩsaɣ kɩlaŋ ɖɩlayɛ nɖɩ palabɩnɩ sika yɔ lɛ, pasɩɩ-ɖɩ kɩɖanɖʋʋ ŋgʋ kɩ-tɛɛ pakatɩɣ yɔ kɩ-tɛɛ, pɩsaʋ ŋgʋ popuzaa nɛ kɩtayɩɣ kaɖɛ lone nɛ lone nɖɩ ɖɩkɩlɩ kaɖɛ, pɛ-hɛkʋ taa yɔ, ɖɛ-ɛsɩndaa. ²⁷ Kɩlaŋ ɖɩlayɛ ńɖɩ ɖɩ-yɔɔ pɔhɔkɩ tulaaɖi ŋgʋ paha Ɛsɔ yɔ, ɛzɩ KƖPAƔLƲ keheyuu Mooyiizi yɔ.

²⁸ Pʋwayɩ lɛ, popuzi pɩsaʋ Ɛsɔ kɩɖanɖʋʋ nɔnɔɔ taa, ²⁹ nɛ pasɩɩ kɩlaŋ ɖɩlayɛ nɖɩ ɖɩ-yɔɔ pakʋʋ kpɩna nɛ pɔhɔkɩ nɛ pɩñakɩ yɔ, Ɛsɔ kɩɖanɖʋʋ nɔnɔɔ cɔlɔ. Peeye, Mooyiizi la ɖɩ-yɔɔ kɩlaʋ ŋgʋ pɔhɔkɩ nɛ pɩñakɩ yɔ, nɛ paha hayɩm taa tɔɔnaɣ, ɛzɩ KƖPAƔLƲ keheyuu Mooyiizi yɔ.

³⁰ Pɩsa nɛ ɛyaa pɩzɩ pala cɩɖɩ cɩɖɩ wɛtʋ sɔnzɩ lɛ, paɖʋ lɩm cɩɖɩ cɩɖɩ wɛtʋ sɔŋzɩ labʋ lɩm ñɩnaɣ taa nɛ pasɩɩ-kɛ kɩɖanɖʋʋ ŋgʋ kɩ-tɛɛ pakatɩɣ yɔ nɛ kɩlaŋ ɖɩlayɛ, pɛ hɛkʋ taa. ³¹ Lɩm mbʋʋ, Mooyiizi nɛ Aarɔɔnɩnɩnɩ nɛ ɛ́lɛ pɩyalaa pasaŋɩɣ pe-nesi nɛ pa-nɩŋgbanzɩ. ³² Mbʋʋ palakaɣ cɩɖɩ cɩɖɩ wɛtʋ sɔnzɩ alɩwaatʋ ndʋ pasʋʋ kɩɖanɖʋʋ ŋgʋ kɩ-tɛɛ pakatɩɣ yɔ, yaa powoki kɩlaŋ ɖɩlayɛ taa, ɛzɩ KƖPAƔLƲ keheyuu Mooyiizi yɔ.

³³ Pʋwayɩ lɛ, Mooyiizi yelɛ nɛ paɖʋ pɩsaŋ kadaɣ tɩnaɣ yɔɔ nɛ pɩcɔɔ Ɛsɔ ɖɩɣa nɛ kɩlaŋ ɖɩlayɛ, kpɛɛɛ; nɛ popuzi pɩsaʋ kadaɣ nɔnɔɔ yɔɔ. Mbʋʋ, Mooyiizi tɛzɩ labʋ tʋma tɩŋa.

³⁴ Peeye, ñɔsɩ ^a ñɛyaa nɛ sihuuzi kɩɖanɖʋʋ ŋgʋ kɩ-tɛɛ pakatɩɣ yɔ, kʋ-yɔɔ, nɛ KƖPAƔLƲ koboyaɣ suni ɛ-kɩɖanɖʋʋ ɖo. ³⁵ Toovenim lɛ, ñɔsɩ kɛñɛyɩ pɩtiifɛyɩ kɩɖanɖʋʋ ŋgʋ kɩ-tɛɛ pakatɩɣ yɔ, kɩ-yɔɔ nɛ KƖPAƔLƲ koboyaɣ suni-kʋ ɖo, pʋyɔɔ Mooyiizi tapɩzɩɣ se, ɛsʋʋ kɩ-tɛɛ.

³⁶ Alɩwaatʋ ndʋ ñɔsɩ kɔŋ nɛ sɩkʋyɩ Ɛsɔ kɩɖanɖʋʋ yɔɔ lɛ, Izirɛɛlɩ ñɩma kʋyʋʋ nɛ papazɩ nɔmɔʋ kɩfalʋʋ ɖɔm. ³⁷ Ɛlɛ, ye ñɔsɩ ɛtɩkʋyɩ yɔ, paawoki ɖoli. Pacakɩ mbʋ nɛ paɖaŋ kɩyakʋ ŋgʋ ñɔsɩ kɔŋ nɛ sɩkʋyɩ yɔ, nɛ pʋcɔ pɛɖɛɛ.

³⁸ KƖPAƔLƲ yekaɣ nɛ ñɔsɩ mɩnʋʋ huuzuu Ɛ-kɩɖanɖʋʋ yɔɔ wɩsɩ taa nɛ ɖoo taa lɛ, ñalɩmɩyɛ naɖɩyɛ ñañandɩɣ, nɛ pɩwɩlɩɣ se Ɛwɛ ɛ-samaɣ Izirɛɛlɩ ñɩma hɛkʋ taa. Mbʋʋ pɩlakaɣ tam, pa-nʋmɔŋ tɩŋa payɩ, ɖɔm taa.