15
‑Tɛ ʋ gba la 'lɩ ‑Yusu Pilatɩ ‑mɔ
1 'Tɩ‑ ‑nyrɛ 'mʋ ‑nyɛ, ‑ɛ ‑bɩ Nyɩsʋa a ‑cɔhlʋnpinyʋ* gbagbɩ 'kukue lɛ de, ʋ kɔ ‑Juukʋɛ* a naanyʋ, kɔ tetetɔɔnyʋ*, kɔ ‑gbolugbo a nyibli a pɛpɛ 'hʋɛn‑, ʋ 'mʋ ‑Yusu a ‑tɩ' lɛ ‑pʋpʋ ‑nɩ. ‑Ɛ ‑bɩ ʋ wɛn: «‑Ba lee nɛ ‑aan 'sɛyo, bʋ mʋa ꞊nɛ, ʋ 'mʋ 'lɩ꞊ɩ Pilatɩ ‑mɔ gba.» (Pilatɩ a 'mʋ, ɛ nɔ‑ mɔ ‑gʋlʋnʋma ‑mʋ', Romakʋɛ a 'kɩɩn gbagbʋ* ꞊tu la gbata kɩ bʋ.) 2 Bʋ gba 'kɩ 'lɩ꞊ɩ Pilatɩ ‑mɔ, ‑ɛ ‑bɩ ɛ ‑tʋa 'a lɛ'bɛtilɛ, ɛ wɛn: «꞊Bɩ ‑mɔ mɔ ‑Juukʋɛ a bodɩɔ?» ‑Ɛ ‑bɩ ‑Yusu wɛn: «Iin, 'mɔ ꞊nɩɔ.» 3 ‑Ɛ ‑bɩ Nyɩsʋa a ‑cɔhlʋnpinyʋ gbagbɩ ‑tʋa 'a ‑tɩ ‑hʋɔhʋɩ a yɛɛlɛ. 4 ‑Ɛ ‑bɩ Pilatɩ 'bɛti nɩ de, ɛ wɛn: «꞊Bɩ ‑tɩ a pɛpɛ ‑bʋ, ʋ yɩ ‑mʋ ‑yɛɛ ‑nɩ, ꞊yɩ ‑tɩ ꞊dʋ ‑kɔ, ‑bʋ hla?» 5 Kɛɛ, ‑Yusu 'yɩ꞊ɩ ꞊wɔn ꞊tu. Ɛ mɔ dɛ, ‑ɛ kɛɛ Pilatɩ a ꞊wlʋ lɛ.
‑Juukʋɛ* wɛn 'nɩ, bʋ kɔɔ 'ʋ ‑Yusu tugbɛ* 'yie, ɛ 'mʋ 'kʋ
6 'A ‑nɛ lɛ'mimle, ‑ɛ mɔ Pakɩ* a ti 'yri, Pilatɩ kɔ bʋ tɛ ꞊jɩklapi nɩ ‑do ‑mʋ', ‑Juukʋɛ di ‑hʋa bʋ. 7 Ti a 'mʋ 'yri, ɛ kɔ la ꞊jɩklapi ꞊dʋ. 'A 'nyrɛ mɔ Balabasɩ. Ɛ mɔ ‑balʋnyɔ ꞊nɩɔ. Balabasɩ a 'mʋ, ʋ pʋ la꞊a ꞊jɩ', ɛ kɔ 'a 'bio ‑balʋnyibli ‑bɩ 'hʋɛn‑, ‑ɛ nu꞊o, ti ‑bʋ, ‑ɛ kɔ 'yri 'blʋgba yɩ mɔ ꞊gbʋgblɔ ‑nɩ, 'kɩ ʋ 'la mɔ nyiblo. 8 ‑Ɛ bɩ nyibli ‑hʋɔhʋɩ mu 'lɩ Pilatɩ ‑mɔ, 'ʋ lee ꞊nɛ, ʋ wɛn: «‑A ‑hʋɛ꞊ɛ nɩ, ‑bʋ ‑tɛ ꞊jɩklapi nɩ ‑do bʋ, ꞊wɩ yɩ, ‑tɛ ‑mʋ', ‑ni꞊e lɛ 'a ‑nɛ 'yrʋ, lɛ'mimle, ‑ɛ mɔ Pakɩ a ti 'yri.» 9 ‑Ɛ ‑bɩ Pilatɩ wɛn: «꞊Bɩ a ‑hʋɛ꞊ɛ nɩ, ꞊bʋ tɛ 'aan bodɩɔ, ‑ɛ mɔ ‑Juukʋɛ a bodɩɔ bʋ?» 10 Kɛ‑ Pilatɩ nu 'pʋplɛ, ‑ɛ nu꞊o, ɛ yi꞊e nɩ, ‑ɛ mɔ, 'kɩ 'lɩ ca 'kwli, 'kɩ Nyɩsʋa a ‑cɔhlʋnpinyʋ* gbagbɩ pʋʋ 'lɩ꞊ɩ ‑Yusu ‑jɩ', ‑ɛ di꞊e nu, ɛ 'mʋ꞊ʋ 'la. 11 Pilatɩ bʋ 'bɛti 'kɩ ꞊nʋ, ‑ɛ ‑bɩ ‑cɔhlʋnpinyʋ gbagbɩ ꞊tutuo nyibli ‑mʋ' nɩ, 'kɩ bʋ lee Pilatɩ, bʋ tɛ Balabasɩ bʋ, kɛɛ, ɛ 'nɩ 'tɛɛ 'lɩ ‑Yusu bʋ. 12 ‑Ɛ ‑bɩ Pilatɩ ꞊tu ꞊nʋ ꞊wɔn, ɛ wɛn: «'Bʋ mɔ, 'nɩ tɛ Balabasɩ bʋ, dɛ a 'dɩ ‑bɩ a ‑hʋɛ, ꞊bʋ nu nyiblo ‑bʋ, a dɛɛ nɛ 'aan bodɩɔ ‑mɔ 'lɩ?» 13 ‑Ɛ ‑bɩ ʋ 'yaa 'lɩ win, ʋ wɛn: «Kɔɔ 'ʋ꞊ʋ tugbɛ 'yie, ɛ 'mʋ 'kʋ!» 14 ‑Ɛ ‑bɩ Pilatɩ wɛn: «Dɛ ‑hʋan a 'dɩ ‑bɩ ɛ ‑nu, ‑kɔtɩ 'nɩ kʋɛ 'ʋ꞊ʋ tugbɛ 'yie 'lɩ?» Kɛɛ, ʋ 'yɛɛ 'lɩ win, ʋ wɛn: «Kɔɔ 'ʋ꞊ʋ tugbɛ 'yie, ɛ 'mʋ 'kʋ!» 15 ‑Tɛ Pilatɩ ‑hʋɛ bʋ blee nyibli a plɔ, ɛ nɔ‑ nu꞊o, 'ɛ tɛ Balabasɩ bʋ, 'tɩ‑ 'ɛ lee nɛ 'a 'sɛyo, bʋ bii ‑Yusu lɔkʋɛ. ‑Tɛ ʋ bi 'kɩ꞊ɩ, ‑ɛ ‑bɩ ɛ lee nɛ 'a 'sɛyo a 'mʋ nɩ, ɛ wɛn: «Ba gba꞊a, ba kɔɔ 'ʋ꞊ʋ tugbɛ 'yie, ɛ 'mʋ 'kʋ.»
‑Tɛ 'sɛyo 'cɛɛ la ‑Yusu
16 Pilatɩ bʋ pʋ 'kɩ lɛ, ‑ɛ ‑bɩ 'a 'sɛyo gba ‑Yusu nɩ, 'kɩ 'lɩ Pilatɩ a 'mʋ 'a ‑yaa 'kwli, ‑tɛ 'waa bʋnɩɩlɛ nɩ 'lɩ, 'ʋ da 'waa 'bio 'sɛyo a pɛpɛ. 17 ‑Tɛ ʋ ‑nyre 'kɩ, ‑ɛ ‑bɩ ʋ pʋ ‑Yusu wlawlʋ ‑jɔhʋn, 'ʋ hlaa ꞊nɛ 'witiklaʋn lɛ. 'Witiklaʋn a 'mʋ, ɛ nɔ‑ ʋ ꞊tu꞊o 'lu. 18 ‑Ɛ ‑bɩ ʋ ‑tʋa 'a 'wioblɛpʋpʋʋ, ʋ wɛn: «‑Na 'wio mɔ, ‑Juukʋɛ* a bodɩɔ,» 19 kɔ, 'ʋ pɩ 'ʋ꞊ʋ kotu 'lu lɛ, 'ʋ ‑gblɛ 'lɩ꞊ɩ hɩʋn 'yi lɛ, 'tɩ‑ 'ʋ 'gbla kwlɩ, 'kɩ 'ʋ꞊ʋ ye', 'ʋ ꞊tɩɔ 'ʋ 'li lɛ, 'kɩ 'ʋ 'a 'caalɛ a ‑ta'. 20 ‑Tɛ ʋ ‑wɛ 'kɩ 'a 'caalɛ ‑mɔ, ‑ɛ ‑bɩ ʋ ‑hɛ꞊ɛ wlawlʋ ‑jɔhʋn a 'mʋ nɩ, 'ʋ pʋ꞊ʋ 'a ꞊gbɛtʋ, 'a wlawlɩ, 'tɩ‑ 'ʋ ꞊tɩɔ ꞊nɛ 'dɩɔ, 'ʋ gbɛ 'lɩ꞊ɩ ‑tɩtɛ ‑mʋ', ʋ di 'lɩ꞊ɩ tugbɛ* 'yie ‑kɔɔ ‑nɩ.
‑Tɛ ʋ kɔɔ la 'ʋ ‑Yusu tugbɛ* 'yie, ɛ 'mʋ 'kʋ a ‑tɩ
21 Bʋ yɩ 'kɩ nɩ mi, ‑ɛ ‑bɩ ʋ kɔ nyɩbɛhɩan ꞊dʋ 'hʋɛn‑, ʋ ꞊ŋmee nɩ. Nyɩbɛhɩan a 'mʋ, 'a 'nyrɛ mɔ Simɔ. 'Kɩ ɛ kɔ 'lɩ Silɛnɩdɩɔ 'kwli. Ɛ nɔ‑ mɔ Alɛsadrɩ kɔ Rufusɩ 'hʋɛn‑ a 'baɩ. Nɔ‑ ‑hʋɛn ‑titi. Bʋ yɩ 'kɩ lɛ nɩ ‑hihi ‑nɩ, ‑ɛ ‑bɩ 'sɛyo klɔ꞊ɔ nɩ, 'ʋ nɩ 'ʋ꞊ʋ ke', 'ɛ 'ble tugbɛ ‑mʋ', ‑ɛ kɔ 'yie ʋ di 'ʋ ‑Yusu 'ʋ ‑kɔɔ ‑nɩ. 22 ‑Ɛ ‑bɩ ʋ gba 'lɩ ‑Yusu dʋgba ‑mʋ' 'lu, ʋ dɛɛ Gɔlʋgɔta, ‑ɛ ꞊hɛn 'nyrɛ 'Lukla. 23 ‑Tɛ ʋ nyre 'lɩ, ‑ɛ ‑bɩ ʋ ‑hʋɛ bʋ ‑nyi꞊e nɔ, ʋ pʋ 'lɩ ‑cɩ ‑mɔ, ʋ dɛɛ milɩ*, kɛɛ, ‑Yusu 'yɩ꞊ɩ 'na. 24 'Kɩ 'ʋ ‑tɩtɛ a 'mʋ, 'kɩ ʋ kɔɔ 'ʋ꞊ʋ tugbɛ 'yie, 'ʋ pʋ 'wla, ‑ɛ di꞊e nu, ʋ 'mʋ ‑Yusu a 'hʋɩlɛpʋ‑tɛblɩ, 'a ꞊glalɛ yi. 25 Muu 'yrʋ bʋ 'yaa 'ʋ a ti 'yie, 'kɩ ʋ kɔɔ la 'ʋ꞊ʋ tugbɛ 'yie, 26 'ʋ 'crɩɩ la 'ʋ 'plaɩnkɩbɩa kɩ, ‑tɩ ‑kɔ ‑tɩ ʋ kɔɔ 'ʋ꞊ʋ tugbɛ 'yie. ‑Tɩ a 'mʋ, ɛ nɔ‑ ‑bʋ: «Nyiblo ‑bʋ, ɛ nɔ‑ mɔ ‑Juukʋɛ* a bodɩɔ.» 27 Ti nɩ ‑do a 'mʋ 'yri, 'kɩ 'ʋ ‑Yusu 'hʋɩ, ʋ kɔɔ 'ʋ ‑balʋnyʋ nɩ 'hʋɛn, 'kɩ 'ʋ 'waa ‑nɛ ti 'yie, ‑do 'kɩ 'lɩ 'a diidɛkɩbɩa kɩ, ‑do ‑bɩ 'kɩ 'lɩ 'a kamlakɩbɩa kɩ. [ 28 ‑Ɛ ‑bɩ ‑tɩ ‑mʋ', ʋ 'crɩɩ 'la 'lɩ Nyɩsʋacrɩɛn 'kwli ti ‑hi la a ti 'yri, ɛ mu kɛ 'lu ‑mɔ. ‑Tɩ a 'mʋ, ɛ nɔ‑ ‑bʋ: «'Kɩ ʋ ‑hree 'lɩ꞊ɩ ‑balʋnyʋ 'nyɩ.»]
29 ‑Ɛ ‑bɩ nyibli ‑mʋ', ‑ʋ yɩ ‑hi, ʋ ‑hɛ꞊ɛ 'yri, 'ʋ ꞊gbɛpʋ 'lu lɛ, ʋ wɛn: «‑Mɔ ‑bʋ, ‑ɛ pʋ la lɛ, ‑ɛ di la Nyɩsʋa a 'kagbaʋ* 'wla, 'tɩ‑ ‑ɛ di la꞊a pʋ, 'kɩ 'lɩ ‑nyrɔwɩ nɩ ta 'kwli, 30 wa ‑dɩɔnʋ, ꞊mʋ 'ʋ tugbɛ ‑mʋ' 'yie ‑hɔn, ꞊mʋ ꞊tɩ.» 31 ‑Ɛ ‑bɩ Nyɩsʋa a ‑cɔhlʋnpinyʋ* gbagbɩ, ʋ kɔ tetetɔɔnyʋ* 'hʋɛn‑, ‑ʋ nɩ 'ʋ, ʋ ‑hɛ꞊ɛ 'yri lɛ ‑wɛ, ʋ wɛn: «Ɛ wa nyibli ‑bɩ nɩ, kɛɛ, ɛ 'yɩ 'lɩ 'a dɩɔnʋ a wʋwa 'lɩ ‑wɛ. 32 'Bʋ mɔ Wanyɔ, ‑ɛ mɔ Yisraɛkʋɛ* a bodɩɔ ‑wɛ, bʋ ‑hɔn 'ʋ tugbɛ ‑mʋ' 'yie, bʋ ꞊tɩ, ‑tɛ ti nɛ ‑bʋ. 'Bʋ mɔ, ꞊ba 'ye dɛ a 'mʋ, ‑a di pʋ꞊ʋ ꞊haan‑tɩ, ‑ɛ mɔ, ɛ nɔ‑ mɔ Wanyɔ.» Nyibli nɩ 'hʋɛn ‑mʋ', ʋ kɔɔ 'ʋ 'waa ti 'yie lɛ, 'kɩ 'ʋ ‑Yusu 'hʋɩ, ʋ 'cɛɛ ꞊nɛ nɩ ‑wɛ.
‑Tɛ ‑mʋ', ‑Yusu nu la 'kʋkʋʋ
33 'Yrʋ bʋ yɩ 'ʋ 'lu a ‑hɛyri' nɩ nyre, ‑ɛ ‑bɩ halɔ ka ‑tʋtʋ a pɛpɛ kɩ. Halɔ a 'mʋ, ɛ nɩ 'ʋ ‑nɩnɩ, 'ɛ yɛ 'yrʋ‑hiilɛ a ti kɩ. 34 ‑Tɛ 'yrʋ‑hiilɛ a ti a 'mʋ, ɛ yɩ 'ʋ nyre, ‑ɛ ‑bɩ ‑Yusu 'yaa 'lɩ win, ɛ wɛn: «Eloi, Eloi, lama sabatani?» ‑ɛ ꞊hɛn 'nyrɛ, «Nyɩsʋa o, Nyɩsʋa o, dɛ‑ kɔ 'mɔ ‑ha 'yie ‑mɔ 'lɩ?» 35 Nyibli ‑mʋ', ‑ʋ nɩ ‑tuo kɩ, kɛ‑ 'waa dɛ ‑bɩ pɩ: «Ba 'ye kɛ, Nyɩsʋa a winwlɔn‑hanyɔ Eli* ɛ dɛ,» 36 'kɩ 'lɩ ꞊nʋ 'nyɩ, ‑ɛ ‑bɩ 'ɛ ‑mu, 'ɛ 'gba ci lɛ, 'ɛ 'du ‑sapoo ye', 'ɛ 'nyra 'lɩ꞊ɩ 'lipanɔ ‑mɔ, 'ɛ mʋa 'ʋ꞊ʋ tugbɛ blɔblʋ 'lu lɛ, 'ɛ ‑nyi꞊e ‑Yusu, ‑ɛ di꞊e nu, ɛ 'mʋ꞊ʋ 'na. Ɛ wɛn: «‑Ba pʋ 'ʋ 'yie bʋ, 'bʋ mɔ, Eli 'bʋ di di, ɛ 'mʋ 'ʋ꞊ʋ tugbɛ a 'mʋ 'yie ‑ha, ‑a 'mʋ꞊ʋ 'ye.» 37 Bʋ nɩ 'kɩ dɛ a 'mʋ ‑mɔ, ‑ɛ ‑bɩ ‑Yusu 'gbo nɩ, 'ɛ mla ‑hʋnhlʋn.
38 Ti a 'mʋ 'yri, 'kɩ 'lɩ Nyɩsʋa a 'kagbaʋ* bʋ, ‑ɛ nɩ 'lɩ Jrusrɛdɩɔ 'kwli, danʋ gbagbʋ ‑mʋ', ‑ɛ 'bɛ 'kayu a 'mʋ ꞊tɩɔ, 'ɛ ‑ki wlɔn pɛpɛ, kʋɛ 'lɩ 'a 'lu yɩ bʋ, ‑bʋ yɛ 'a ꞊hlɔndɛ kɩ. 39 'Kɩ 'ʋ ‑Yusu ꞊hlɔn, 'kɩ Romakʋɛ a 'sɛyo a nyiblo gbagbʋ ‑bɩ nyra 'ʋ bʋ. Ɛ nɔ‑ 'bɛ꞊ɛ 'yi. Bʋ 'ye 'kɩ, ‑tɛ ‑Yusu nu la 'kʋkʋʋ, ‑ɛ ‑bɩ ɛ wɛn: «Ɛ mɔ ꞊han‑tɩ, nyiblo ‑bʋ, ɛ mɔ la Nyɩsʋa a 'Yu ꞊nɩɔ.»
40 Nʋgbɩ ‑bɩ nɩ 'ʋ, 'ʋ hlɔɔ 'ʋ ‑tɛ a 'mʋ ‑mɔ lɛ dɛ gbe, 'ʋ yɩ ‑tɛblɩ a 'mʋ, ‑ɛ mi 'lu ‑mɔ 'ye. 'Kɩ 'lɩ ꞊nʋ 'nyɩ, Madala a Mari* nɩ 'lɩ, ɛ kɔ Mari ‑mʋ', ‑ɛ mɔ Sakɩ 'cɩmɩɛ kɔ Sosɩ a 'dii, kɔ Salome. 41 Nʋgbɩ a 'mʋ, ʋ nʋ‑ yɩ la ‑Yusu ꞊wien lɛ kʋɛ, ‑tɛ ɛ nɩ la 'lɩ Galileblʋgba 'kwli, 'ʋ yɩ la꞊a ‑hɛɛ ‑nɩ. Ʋ kɔ nʋgbɩ ‑bɩ 'hʋɛn‑, ʋ kɔ ‑Yusu 'hʋɛn‑, ʋ nʋ‑ di la Jrusrɛ.
‑Tɛ ʋ pʋ la 'lɩ ‑Yusu 'dabio 'kwli
42-43 ‑Tɛ 'tɔ yɩ nɩ ‑wɛn, ‑ɛ ‑bɩ nyiblo ꞊dʋ nyre 'ʋ ‑tuo a 'mʋ kɩ. 'A 'nyrɛ mɔ Sosɛfʋ*. 'Kɩ ɛ kɔ 'lɩ Alimatedɩɔ 'kwli. Sosɛfʋ a 'mʋ, ɛ mɔ ‑Juukʋɛ* a ‑gbolugbo a nyiblo ‑bɩ ꞊nɩɔ. Nyibli ꞊tui 'ʋ꞊ʋ nɩ dɩakɩ. Ti ‑mʋ', Nyɩsʋa di nyibli win kɩ ‑kɔɔ ‑nɩ, ti a 'mʋ, ɛ nɔ‑ ɛ yɩ 'ʋ lɛ ‑plee ‑nɩ. Sosɛfʋ bʋ nyre 'ʋ ‑tuo a 'mʋ kɩ, ‑Juukʋɛ a ‑wuwle‑nyrɔwɔ* yɩ 'ʋ 'nɩ nyre, 'yrʋ bʋ pa a ti 'yri. Ɛ nɔ‑ nu꞊o, 'ɛ ꞊tu 'ʋ 'klɩ, 'ɛ 'yɩ 'yie ‑pie, 'kɩ bʋ mu 'lɩ Pilatɩ ‑mɔ, 'ɛ lee ꞊nɛ, bʋ wɛn꞊ɛ, ɛ 'mʋ 'ʋ ‑Yusu a ‑plahʋɩ tugbɛ* 'yie ‑ha, ɛ 'mʋ 'ʋ꞊ʋ ‑ha. 44 ‑Tɛ ‑Yusu 'yɩ 'ʋ tugbɛ 'yie ‑wlɛɛn ‑nɩ, 'ɛ 'kʋ, ɛ kɛɛ Pilatɩ a ꞊wlɩ lɛ. Ɛ nɔ‑ nu꞊o, 'ɛ da 'a 'sɛyo a nyiblo gbagbʋ, 'ɛ 'bɛti꞊e, 'bʋ mɔ, ‑tɛ ‑Yusu 'kʋ wɛn, 'a ti 'bʋ ‑wlɛn 'ʋ. 45 ‑Tɛ 'sɛyo a nyiblo gbagbʋ a 'mʋ, ɛ ꞊tu꞊o ꞊wɔn, ‑ɛ ‑bɩ Pilatɩ wɛn꞊ɛ kɩ, 'kɩ Sosɛfʋ bʋ ‑ha 'ʋ ‑Yusu tugbɛ 'yie. 46 ‑Tɛ ɛ ‑wɛn 'kɩ, ‑ɛ ‑bɩ Sosɛfʋ mu ‑jisɛ ‑tɔ mɔ, 'ɛ ‑di, 'ɛ ‑ha 'ʋ ‑Yusu tugbɛ 'yie, 'ɛ 'hɩnhɩan 'lɩ꞊ɩ ‑jisɛ 'a mʋ 'kwli lɛ, 'tɩ‑ 'ɛ gba 'lɩ꞊ɩ ‑tɩtɛ ‑mʋ', ɛ di 'lɩ꞊ɩ ꞊tuu ‑nɩ. 'Kɩ 'lɩ ‑tɩtɛ a 'mʋ, 'hɩɔ gbagbʋ nɩ 'ʋ, 'ɛ hlɔ yra, ‑wɛn dʋgba. 'Kɩ 'lɩ 'hɩɔ gbagbʋ a 'mʋ 'kwli, 'kɩ ʋ 'bluu la 'lɩ 'dabio, (ti ꞊dʋ a ti 'yri la, ‑ɛ 'wɩ‑ ‑wlukayu yɩ). 'Kɩ 'lɩ 'dabio a 'mʋ 'kwli, 'kɩ ɛ pʋ 'lɩ ‑Yusu a ‑plahʋɩ, 'tɩ‑ 'ɛ nu 'hɩɔ 'papɔ, ‑ɛ nɩ 'ʋ, ‑ɛ ꞊hɩan 'lɩ ‑mɔ lɛ, 'ɛ ka 'dabio a 'mʋ yɩ. 47 ‑Tɛ ‑mʋ', ʋ pʋ 'ʋ ‑Yusu bʋ, Madala a Mari*, kɔ Mari, ‑ɛ mɔ Sosɩ a 'dii, ʋ 'ye 'ʋ nɩ.