¹ ‑Tɛ ‑wuwle‑nyrɔwɔ* ‑hi, 'sɔɔndɩ a ‑nyragblɩ, ‑ɛ ‑bɩ nʋgbɩ a 'mʋ, ʋ 'du ye', ‑dawinninyra ‑mʋ', ʋ ‑wɛ la ‑mɔ, 'ʋ gba 'lɩ꞊ɩ ‑Yusu a 'dabio yɩ. ² ‑Tɛ ʋ nyre 'lɩ, ‑ɛ ‑bɩ ʋ 'ye꞊e nɩ, ‑ɛ mɔ, kʋanɩhɩɔ ‑mʋ', nyibli nu la, 'ʋ ka la 'dabio yɩ, ʋ blike꞊e lɛ, 'ʋ ‑ha 'ʋ꞊ʋ 'ʋ. ³ Ɛ nɔ‑ mɔ bʋ pa 'lɩ 'dabio a 'mʋ 'kwli, kɛɛ, ʋ 'yɩ 'lɩ Kʋkɔnyɔ ‑Yusu a ‑plahʋɩ bʋ ‑yɛɛ ‑nɩ. ⁴ 'Waa ꞊wlɩ kɛɛ lɛ, ‑tɛ ʋ 'yɩ 'lɩ꞊ɩ 'dabio 'kwli bʋ ‑yɛɛ ‑nɩ. 'A ‑tɩ, dɛ bʋ di 'lu ‑mɔ lɛ ‑hie, ʋ 'yɩ꞊ɩ ‑yi. 'Kɩ ʋ nɩ 'kɩ 'ʋ bʋ, ‑ɛ ‑bɩ nyɩbɛpʋ nɩ 'hʋɛn ꞊dʋ, nʋ‑ 'hrɩɩ 'ʋ ꞊nʋ 'hʋɩ. Nyɩbɛpʋ nɩ 'hʋɛn a 'mʋ, ʋ pʋ wlawlɩ pʋɔpʋɩ, 'ɛ yɩ wlɩn. Nyɩsʋa a lɛlenyʋ* ꞊nɩɔ. ⁵ ‑Tɛ ʋ 'ye nyibli nɩ 'hʋɛn a 'mʋ, ‑ɛ ‑bɩ hʋannʋ bi 'lɩ ꞊nʋ 'kwli, 'ʋ pʋ 'li ‑wlu lɛ. ‑Ɛ ‑bɩ kɛ‑ nyibli nɩ 'hʋɛn a 'mʋ, ʋ pɩ ꞊nʋ yɩ: «A 'nɩ 'mʋɔ 'nɛ꞊ɛ 'kʋkʋnyibli 'nyɩ lɛ. Ɛ nɩ 'klɔ. ⁶ Ɛ 'yɩ 'nɛ‑ ‑nɩ. Nyɩsʋa ‑ha 'lɩ꞊ɩ 'kʋkʋnyibli 'nyɩ nɩ, 'ɛ ‑ha꞊a 'klɔ. ‑Tɛ ɛ 'tɩɛ nɩ la 'lɩ Galileblʋgba 'kwli, ‑tɩ ‑bʋ, ɛ lee la 'a mʋ, bʋ bi 'lɩ 'a mʋ 'kwli. ⁷ Kɛ‑ ɛ pɩ la 'a mʋ yɩ: Ʋ kɔ bʋ pʋ ‑tonyibli a pɛpɛ a Nyiblo* 'crɛkɔnyibli ‑jɩ', ʋ 'mʋ 'ʋ꞊ʋ tugbɛ* 'yie ‑kɔɔ ‑nɩ, ɛ 'mʋ 'kʋ. 'Tɩ‑ 'bʋ 'kʋ, ‑nyrɔwɩ nɩ 'hʋɛn, ta a ‑nyrɔwɔ, ɛ kɔ bʋ ‑hɔn 'lɩ 'kʋkʋnyibli 'nyɩ, bʋ 'hrɩ 'klɔ.» ⁸ ‑Tɛ ʋ 'wɩn 'kɩ ‑tɩ a 'mʋ, ‑ɛ ‑bɩ ‑tɩ ‑mʋ', ‑Yusu lee la ꞊nʋ, ɛ bi 'lɩ ꞊nʋ 'kwli. ⁹ ‑Tɛ ɛ bi 'lɩ ꞊nʋ 'kwli, ‑ɛ ‑bɩ ʋ ꞊hɩan ‑mɔ, 'ʋ mu 'lɩ ‑Yusu a ‑nagbopʋ* nɩ ‑pu ꞊tu 'ʋ ‑do ‑mʋ' ‑mɔ, ɛ kɔ nyibli a pɛpɛ ‑bɩ ‑mʋ', ‑ʋ nɛ la ‑Yusu ‑mɔ ‑wɛ, ‑tɛblɩ a pɛpɛ a 'mʋ, ‑ɛ mu 'lu ‑mɔ, 'ʋ na꞊a ‑mɔ lɛ. ¹⁰ Nʋgbɩ a 'mʋ, ‑ʋ nɛ ‑tɛblɩ a 'mʋ ‑mɔ lɛ, 'waa 'nyrɛ mɔ Madala a Mari*, kɔ Sanɩ, kɔ Mari ‑bɩ, ‑ɛ mɔ Sakɩ a 'dii. Nʋgbɩ ‑bɩ ‑mʋ', ‑ʋ kɔ ꞊nʋ 'hʋɛn, ‑ʋ mu 'lɩ 'dabio yɩ, ‑tɛblɩ nɩ ‑do a 'mʋ, ɛ nɔ‑ ʋ na ‑mɔ lɛ ‑wɛ, 'kɩ 'ʋ ‑Yusu a ‑mɔnanyʋ* ye'. ¹¹ Kɛɛ, ‑Yusu a ‑mɔnanyʋ a 'mʋ, 'kɩ 'lɩ 'waa 'lulɛ‑hihie 'kwli, ʋ yɩ꞊ɩ 'nɩ 'ye, ‑ɛ mɔ, ‑tɩ a 'mʋ, nʋgbɩ a 'mʋ, ʋ na ‑mɔ lɛ, ɛ 'yɩ 'lukɔ‑moko ‑kɔ, ʋ 'nɩ ‑pʋ꞊ʋ lɩ꞊ɩ ꞊haan‑tɩ. ¹² Ɛ nɔ‑ mɔ Piɛlɩ bʋ 'du ye', bʋ gba 'lɩ 'dabio cigbɛ yɩ. ‑Tɛ ɛ nyre 'ʋ, ‑ɛ ‑bɩ ɛ ꞊tɩ 'ʋ nɩ, 'ɛ ta 'lɩ꞊ɩ 'kwli lɛ, 'ɛ 'yɩ 'lɩ ꞊dedede 'lɩ 'ye, 'bʋ 'yɩ ‑jisɛi nɩ ‑do ‑mʋ', ʋ 'hɩnhɩan la꞊a lɛ 'pa‑. ‑Ɛ ‑bɩ ɛ ꞊hɩan ‑mɔ, 'ɛ mu 'lɩ 'kayu bʋ. 'A 'mumu, 'a ꞊wlʋ kɛɛ lɛ dɩakɩ, 'kɩ 'ʋ ‑tɛblɩ a 'mʋ, ‑ɛ mu 'lu ‑mɔ a ‑ta'.

¹³ ‑Nyrɔwɔ nɩ ‑do a 'mʋ 'kwli, ‑Yusu a ‑nagbopʋ* nɩ 'hʋɛn ‑bɩ, nʋ‑ ‑hɔn 'lɩ Jrusrɛdɩɔ 'kwli, 'ʋ mi 'lɩ Emausɩdɩɔ 'kwli. ‑Hɔn 'lɩ Jrusrɛdɩɔ 'kwli, ‑bʋ mu 'lɩ Emausɩ, ɛ ‑wɛ 'lɩ ‑kilowɩ nɩ ‑pu ꞊tu 'ʋ ‑do nɩ. ¹⁴ ‑Tɛ ʋ nɩ 'hru wlɔn, ‑tɛblɩ a pɛpɛ ‑mʋ', ‑ɛ mu 'lu ‑mɔ, ɛ nɔ‑ kɔ ‑tɩ ʋ nɛ ‑mɔ lɛ. ¹⁵ Bʋ nɩ 'lɩ ‑tɩ a 'mʋ, 'a lɛpʋpʋlɛ 'kwli, ‑ɛ ‑bɩ ‑Yusu 'hrɩɩ 'ʋ ꞊nʋ 'hʋɩ, ɛ kɔ ꞊nʋ 'hʋɛn, 'ʋ ‑mu. ¹⁶ Kɛɛ, ɛ 'wɩ‑ ‑tɛ dɛ 'yɛ nɩ kaa nyibli a 'yii kɩ. Ɛ nɔ‑ kɔ ‑tɩ, 'ʋ 'yɛ nɩ yru꞊o. ¹⁷ ‑Ɛ ‑bɩ ‑Yusu 'bɛti ꞊nʋ nɩ, ɛ wɛn: «‑Tɩ a 'dɩ ‑bɩ a pɩpɩ' lɛ 'lɩ?» ‑Tɛ ɛ 'bɛti ‑tɩ a 'mʋ, ‑ɛ ‑bɩ 'a ‑nagbopʋ nɩ 'hʋɛn a 'mʋ, ʋ nyra bʋ, ‑ɛ nu꞊o, 'waa ꞊wlɩ 'mʋɛ bʋ. ¹⁸ Ti nɩ ‑do a ti 'yri, nyiblo ‑mʋ', ‑ɛ mɔ Klopasɩ, ɛ ꞊tu꞊o ꞊wɔn, ɛ wɛn: «'N pʋ꞊ʋ ꞊haan‑tɩ, 'kɩ 'lɩ Jrusrɛ a nyibli a pɛpɛ 'nyɩ, ‑mɔ nɩ ‑do, ‑mɔ 'yɩ dɛ ‑bʋ, ‑ɛ mu 'lu ‑mɔ a ‑tɩ 'wɩn.» ¹⁹ ‑Ɛ ‑bɩ ɛ wɛn: «‑Tɩ a 'dɩ ‑bɩ 'lɩ?» ‑Ɛ ‑bɩ ‑nagbopi a 'mʋ, ɛ wɛn: «‑Tɩ ‑mʋ', ‑ɛ mu 'lu ‑mɔ, 'kɩ 'ʋ Nasalɛtɩ a ‑Yusu ‑mɔ. Ɛ mɔ Nyɩsʋa winwlɔn‑hanyɔ* ꞊nɩɔ. 'Kɩ 'ʋ Nyɩsʋa kɔ ‑tonyibli 'hʋɛn‑ ‑gbati, 'a ꞊wlɩlɛkɛɛ‑tɛblɩ, ɛ ni la, ɛ kɔ 'a tɔɔwin 'hʋɛn‑, ʋ tʋɛ la꞊a ‑a mʋ nɩ, ‑ɛ mɔ, ɛ nɩ la 'klɩ kɩ dɩakɩ. ²⁰ Kɛɛ, Nyɩsʋa a ‑cɔhlʋnpinyʋ* gbagbɩ, ʋ kɔ ‑aan naanyʋ gbagbɩ 'hʋɛn‑, ʋ nʋ‑ pʋ꞊ʋ Romakʋɛ a 'kɩɩnpʋ ‑jɩ', 'ʋ pʋʋ ꞊nɛ ‑bati lɛ. 'Ɛ mɔ ꞊han‑tɩ, ‑tɛ ʋ pʋʋ ꞊nɛ ‑bati lɛ, 'ʋ kɔɔ 'ʋ꞊ʋ tugbɛ* 'yie, 'ɛ 'kʋ. ²¹ ‑A mʋ ‑mɔ ‑bɩ, ‑a kuo ꞊nɛ ꞊wlʋ yɩ, ‑ɛ mɔ, ɛ nɔ‑ mɔ ‑aan ‑nɛ Wanyɔ ‑mʋ', Nyɩsʋa ya la, ‑ɛ di Yisraɛkʋɛ* ꞊gblɛ, 'kɩ 'lɩ Romakʋɛ ‑jɩ'. ‑Tɛ ‑tɛblɩ a pɛpɛ a 'mʋ, ɛ mu 'lu ‑mɔ, 'a ‑nyrɔwɩ nɩ ta a ‑nyrɔwɔ ‑bʋ. ²² Ɛ mɔ ꞊han‑tɩ, nʋgbɩ ‑bɩ 'kɩ 'nɛ‑ ‑a mʋ 'nyɩ, ‑tɩ ‑bʋ, ʋ ‑hla, ɛ kɛɛ nɛ ‑aan ꞊wlɩ lɛ. ‑Nyragblɩ, nʋgbɩ a 'mʋ, nʋ‑ ‑tuo 'lɩ 'dabio yɩ, ²³ kɛɛ, ‑tɛ ʋ ‑mu, ʋ 'yɩ 'lɩ ‑Yusu a ‑plahʋɩ bʋ ‑yɛɛ ‑nɩ, 'ʋ di ‑a mʋ lee mɔ, ‑ɛ mɔ, Nyɩsʋa a lɛlenyʋ* 'hrɩɩ ꞊nʋ yɩ, 'ʋ lee ꞊nʋ, ‑ɛ mɔ, ‑Yusu ‑hɔn 'lɩ 'kʋkʋnyibli 'nyɩ nɩ, 'ɛ 'hrɩ 'klɔ. ²⁴ Ɛ kɔ nyibli ‑bɩ, 'kɩ 'nɛ‑ ‑a mʋ 'nyɩ, ‑tɛ ʋ 'wɩn ‑tɩ a 'mʋ, ɛ nɔ‑ mɔ bʋ mu 'lɩ 'dabio a 'mʋ yɩ. 'Ɛ mɔ ꞊han‑tɩ, ‑tɛ nʋgbɩ a 'mʋ, ʋ nu 'a hɩhla, kɛ‑ ɛ nu naalɛ, kɛɛ, ʋ 'yɩ 'lɩ ‑Yusu a 'mʋ bʋ ‑yɛɛ ‑nɩ.»

²⁵ Kɛ‑ ‑Yusu pɩ ꞊nʋ yɩ, ɛ wɛn: «'Hʋʋ‑, a 'yɩ 'lulɛ‑hihie ‑kɔ. ‑Tɩ a pɛpɛ ‑mʋ', Nyɩsʋa a winwlɔn‑hanyɔ hla la, ti ‑hi la ti 'yri, 'aan ꞊wlɩ 'nɩ ‑klɔ꞊ɔ lɩ꞊ɩ 'wʋwlɩ, kɔ, 'a 'yɩ꞊ɩ ꞊wlʋ yɩ ‑kuo ‑nɩ. ²⁶ Winwlɔn‑hanyʋ a 'mʋ, ʋ hla la꞊a nɩ, ‑ɛ mɔ, Wanyɔ a 'mʋ, Nyɩsʋa pʋ la lɛ, ɛ di la ya, ɛ blɛɛ yɩ bʋ 'ye ꞊hɩʋɛn, 'tɩ‑ Nyɩsʋa 'mʋ꞊ʋ ‑tɩ a 'yi'bʋbʋa ‑nyi.» ²⁷ ‑Tɛblɩ a pɛpɛ ‑mʋ', ʋ 'crɩɩ la, 'kɩ 'ʋ꞊ʋ kɩ, 'kɩ 'lɩ Nyɩsʋacrɩɛn 'kwli, ɛ ‑hɩhɩa ꞊nʋ klɛ, 'kʋɛ 'lɩ Moise* a 'crɩɛn 'kwli bʋ, ‑bʋ yɛ Nyɩsʋa a winwlɔn‑hanyʋ ‑bɩ a 'crɩɩn kɩ.

²⁸ ‑Tɛ ʋ mi 'lɩ Emausɩdɩɔ 'kwli nyre mɔ, ‑ɛ ‑bɩ ‑Yusu ‑hʋɛ꞊ɛ nɩ, bʋ gba 'a 'hru 'lu ‑mɔ. ²⁹ Kɛɛ, ʋ nyɛɛ ꞊nɛ lɛ, ʋ wɛn: «Pɛɛ mɔ ‑a mʋ 'hʋɩ, 'tɔ yɩ 'nɩ ‑wɔn,» ɛ kɔ ꞊nʋ 'hʋɛn‑, 'ʋ 'ya 'dɩɔ, 'ɛ pa 'lɩ ꞊nʋ ‑mɔ. ³⁰ ‑Tɛ ʋ ‑pa, ‑ɛ ‑bɩ ʋ nɩ blɛ, dididɛ a ‑tɩ. Bʋ nɩ 'ʋ dɛdi‑tuo kɩ, ‑ɛ ‑bɩ ɛ 'du 'flɔɔ ye', 'ɛ ‑nyi Nyɩsʋa 'wio, 'tɩ‑ 'ɛ 'bɛ꞊ɛ ꞊tɩɔ lɛ, 'ɛ ‑nyi ꞊nʋ꞊ʋ. ³¹ ‑Tɛ ɛ ‑nyi 'kɩ ꞊nʋ꞊ʋ, ‑ɛ ‑bɩ ʋ ‑tʋa 'a yuyruo. Kɛɛ, ti a 'mʋ 'yri, ‑ɛ ‑bɩ ɛ 'waan ꞊nʋ 'yi kɩ. ³² Kɛ‑ ʋ pɩpɩ yrɛ, ʋ wɛn: «Ɛ mɔ ꞊han‑tɩ ꞊nɩɔ, ‑tɛ ɛ ‑hɩhɩɛ wɛn ‑a mʋ Nyɩsʋacrɩɛn klɛ, dɔdʋ nɩ wɛn 'lɩ ‑aan ꞊wlɩ kɩ dɩakɩ.» ³³ ‑Ɛ ‑bɩ ti nɩ ‑do a ti 'yri, ʋ 'du ye', 'ʋ bi 'hru wlɔn de, 'ʋ mu 'lɩ Jrusrɛdɩɔ 'kwli. 'Kɩ ʋ yɛɛ 'ʋ ‑Yusu a ‑nagbopʋ nɩ ‑pu ꞊tu 'ʋ ‑do ‑mʋ' bʋ, ʋ kɔ 'waa 'bio 'hʋɛn‑. Nyibli a 'mʋ, ʋ 'kukue lɛ, 'kɩ 'lɩ 'kayu nɩ ‑do bʋ, ³⁴ 'ʋ lee nyibli nɩ 'hʋɛn ‑mʋ', ‑ʋ ‑di, ʋ wɛn: «Ɛ mɔ ꞊han‑tɩ ꞊nɩɔ, ‑aan Kʋkɔnyɔ ‑hɔn 'lɩ 'kʋkʋnyibli 'nyɩ nɩ, 'ɛ 'hrɩɩ Simɔ Piɛlɩ yɩ.» ³⁵ Ʋ nɩ 'hʋɛn a 'mʋ, dɛ ‑mʋ', ‑ɛ mu 'lu ‑mɔ, 'kɩ 'lɩ 'hru wlɔn, ʋ 'ye, ɛ nɔ‑ ʋ na ‑mɔ lɛ, ɛ kɔ ‑tɛ ʋ nu 'a yuyruo, ti ‑mʋ' ‑kɔ 'yri ɛ yɩ 'ʋ 'flɔɔ ꞊tɩɔ lɛ 'bɛɛ ‑nɩ.

³⁶ Bʋ nɩ 'lɩ ‑tɩ a 'mʋ a hɩhla 'kwli, ‑ɛ ‑bɩ 'kɩ ‑Yusu 'hrɩɩ 'lɩ ꞊nʋ 'nyɩ, 'ɛ pʋ 'waa 'wio bʋ, ɛ wɛn: «Nyɩsʋa bʋ nɩ 'ʋ 'a mʋ ‑mɔ!» ³⁷ ‑Tɛ ʋ 'ye꞊e, ‑ɛ ‑bɩ hʋannʋ bi 'lɩ ꞊nʋ 'kwli. Ʋ nʋ‑ ‑mɔ ‑bɩ, ʋ daa ꞊nɛ, 'ku* ꞊hrɩɩ 'lɩ ꞊nʋ 'nyɩ. ³⁸ ‑Ɛ ‑bɩ ɛ wɛn: «Dɛ a 'dɩ ‑bɩ ‑kɔ hʋannʋ a yɩ 'kɩ pie 'lɩ? Dɛ‑ kɔ ‑tɩ 'a 'yɛ nɩ pʋ꞊ʋ ꞊haan‑tɩ, ‑ɛ mɔ, 'mɔ ꞊nɩɔ 'lɩ? ³⁹ Ba 'ye 'na dabʋɩ a 'kwli kɔ 'na bʋɩ. 'Mɔ ‑Yusu ꞊nɩɔ. Ba 'ye 'mʋ, 'n kɔ 'hʋɩ, 'n 'yɩ 'ku 'pa‑. 'Ku 'yɩ 'hʋɩ ‑kɔ, 'ɛ 'yɩ 'kla ‑kɔ. 'Bɩ 'aan 'mumu a 'mʋ, a yɩ꞊ɩ 'nɩ 'ye, ‑ɛ mɔ, 'n kɔ 'hʋɩ.» ⁴⁰ ‑Tɛ ɛ ‑wɛ ‑tɩ a 'mʋ a hɩhla ‑mɔ, ‑ɛ ‑bɩ ɛ tɔɔ ꞊nʋ 'a dabʋɩ kɔ 'a bʋɩ 'hʋɛn‑ yɩ, (ʋ 'mʋ ŋmaŋmɩ a 'hʋɛ 'ye, 'sɛyo ‑nu, 'ʋ kɔɔ 'ʋ꞊ʋ tugbɛ* 'yie.) ⁴¹ Dɔdʋ yɩ wɛn ꞊nʋ nɩ ni, 'waa ꞊wlɩ 'ɛ yɩ lɛ ‑kɛɛ ‑nɩ. Ɛ nɔ‑ nu꞊o, 'ʋ 'tɩɛ 'yɛ꞊ɛ ꞊wlʋ yɩ nɩ ‑kue ‑nɩ, ‑ɛ mɔ, ɛ 'hrɩ 'klɔ. Ɛ nɔ‑ kɔ ‑tɩ 'ɛ lee ꞊nʋ: «'Bʋ mɔ, 'ba kɔ 'nɛ‑ dididɛ ꞊dʋ, ba ‑nyi 'mɔ꞊ɔ, 'mʋ꞊ʋ di!» ⁴² 'ʋ ‑ha 'lɩ 'tɔpʋ‑hrin.yɛ a 'kʋtɩɔ, 'ʋ ‑nyi ꞊nɛ꞊ɛ, ⁴³ 'ɛ klɔ꞊ɔ bʋ, 'ɛ di꞊e, 'kɩ 'ʋ ꞊nʋ ye'. ⁴⁴ ‑Ɛ ‑bɩ kɛ‑ ɛ pɩ ꞊nʋ yɩ, ɛ wɛn: «‑Tɛ 'n 'tɩɛ nɩ la 'nɛ‑ 'a mʋ 'nyɩ, ‑tɩ ‑bʋ, 'n lee la 'a mʋ, bʋ bi 'lɩ 'a mʋ 'kwli. Kɛ‑ 'n pʋ la 'a mʋ yɩ: ‑Tɛblɩ a pɛpɛ ‑mʋ', ʋ na la ‑mɔ lɛ, 'kɩ 'ʋ 'mʋ kɩ, 'kɩ 'lɩ Nyɩsʋacrɩɛn 'kwli, ɛ kɔ bʋ nue ‑nɩ. Ɛ mɔ ꞊han‑tɩ ꞊nɩɔ, ɛ nue nɩ. ‑Tɛblɩ a 'mʋ, 'kɩ 'a dɛ ‑bɩ nɩ 'lɩ Moise* a tetecrɩɛn* 'kwli, 'a dɛ ‑bɩ 'ɛ nɩ 'lɩ winwlɔn‑hanyʋ* ‑bɩ a 'crɩɩn 'kwli, 'a dɛ ‑bɩ 'ɛ nɩ 'lɩ ‑wlablecrɩɛn* 'kwli.» ⁴⁵ Ɛ nu꞊o nɩ, 'ʋ yru Nyɩsʋa a ‑tɩ a 'mʋ lɛ, ‑ɛ nɩ 'lɩ Nyɩsʋacrɩɛn 'kwli. ⁴⁶ ‑Ɛ ‑bɩ ɛ wɛn: «Kɛ‑ Nyɩsʋa a win pɩ: Wanyɔ ‑mʋ', Nyɩsʋa pʋ la lɛ, ɛ di la 'a dakɔ yɩ ya, ɛ kɔ bʋ 'ye ꞊hɩʋɛn, kɔ, ɛ kɔ bʋ 'kʋ. 'Bʋ 'kʋ, ‑nyrɔwɩ nɩ ta a ‑nyrɔwɔ, ɛ kɔ bʋ ‑hɔn 'lɩ 'kʋkʋnyibli 'nyɩ, bʋ 'hrɩ 'klɔ. ⁴⁷ Wanyɔ a 'mʋ, ɛ nɔ‑ kɔ 'nyrɛ 'kwli, a di 'lɩ Nyɩsʋa a ‑tɩ ‑mɔ lɛ ‑naa ‑nɩ. Nyɩsʋa a ‑tɩ a 'mʋ, a di nyibli ‑lee ‑nɩ, ɛ nɔ‑ ‑bʋ: Bʋ hie 'ʋ 'waa dɛ 'kuku bʋ, bʋ ‑nyi 'waa 'klɔ a pɛpɛ Nyɩsʋa, ‑ɛ di꞊e nu, ɛ 'mʋ 'waa dɛ 'kuku* 'wʋwla ‑nɩ. 'Bʋ mɔ, 'ba yɩ Nyɩsʋa a ‑tɩ a 'mʋ ‑mɔ lɛ nɩ nɛ, 'kɩ ba kʋɛ 'nɛ‑ Jrusrɛdɩɔ 'kwli bʋ, kɔ, ba na ‑tɩ a 'mʋ ‑mɔ lɛ, 'kɩ 'ʋ dakɔ a pɛpɛ yɩ, ‑ʋ nɩ 'nɛ‑ 'klɔ kɩ. ⁴⁸ 'Bɩ ‑tɛblɩ a pɛpɛ ‑mʋ', ‑ɛ muu la 'lu ‑mɔ, a 'ye꞊e nɩ. 'A ‑tɩ, ba mu, ba na 'na ‑tɩ ‑mɔ lɛ, 'kɩ 'ʋ nyibli a pɛpɛ yɩ. ⁴⁹ 'Na 'Baɩ Nyɩsʋa pʋ la 'lɩ꞊ɩ nɩ, ‑ɛ mɔ, ɛ di ‑nyi la 'a mʋ 'a ‑Hihiu. 'Na ꞊gbɛtʋ, 'mɔ di 'a mʋ ‑Hihiu* a 'mʋ yɩ ya. 'A ‑tɩ, 'kɩ ba nɩ 'nɛ‑ 'dɩɔ ‑bʋ 'kwli bʋ, ‑Hihiu a 'mʋ, ɛ 'mʋ 'lɩ yɔ' ‑hɔn, ɛ 'mʋ 'ʋ 'a mʋ ke' bi, ɛ 'mʋ 'a mʋ 'klɩ ‑nyi.»

⁵⁰ ‑Tɛ dɛ a 'mʋ, ɛ ‑hi, ‑ɛ ‑bɩ ‑Yusu gba 'a ‑nagbopʋ* nɩ, 'ʋ ꞊tɩ Jrusrɛdɩɔ 'kwli, 'ʋ mu 'lɩ 'dɩɔ ‑mʋ', ʋ dɛɛ Betani ꞊hlɔn. ‑Tɛ ʋ nyre 'ʋ 'hru a 'mʋ, 'a ‑hɛyri', ‑ɛ ‑bɩ ɛ 'du dabʋɩ ye', 'ɛ pʋ ꞊nʋ wa ‑mɔ. ⁵¹ Ɛ nɩ 'lɩ win a pʋpʋʋ 'kwli, Nyɩsʋa 'ɛ nu꞊o, ‑Yusu 'ɛ ‑hɔn 'lɩ ꞊nʋ 'nyɩ, 'ɛ mu 'lɩ yakɔ 'kwli. ⁵² 'A ‑nagbopʋ ‑mɔ ‑bɩ, ʋ 'gbla kwlɩ, 'kɩ 'ʋ 'a ‑tɩ a 'yi'bʋalɛ a ‑ta'. ‑Tɛ dɛ a 'mʋ, ɛ ‑hi, ‑ɛ ‑bɩ ʋ ꞊hɩan ‑mɔ, 'ʋ mu 'lɩ Jrusrɛdɩɔ 'kwli, 'kɩ 'lɩ dɔdʋke 'kwli. ⁵³ 'Kɩ 'lɩ Jrusrɛdɩɔ a 'mʋ 'kwli, ʋ 'cibi 'lɩ Nyɩsʋa a 'kagbaʋ* bʋ nɩ, 'ʋ pɩ Nyɩsʋa 'nyrɛ lɛ.