𖼠𖽺𖾐 𖼽𖽺 𖼐𖽺𖾐 𖼽𖽕𖾑 𖼂𖽚 𖼞𖽪𖾐 𖼮𖽡𖽺𖾐
4
1 𖼠𖽙𖾑 𖼍𖽻𖾐，𖼽𖽕𖾑 𖼍𖽗𖾐 𖼽𖽻 𖼄𖽳 𖼻𖽙 𖼳𖽡𖽕𖾑 𖽂𖽕 𖼖𖽙𖾐 𖼮𖽑𖽻𖾐 𖼦𖽑𖽦 𖼺𖽺𖾑，𖼳𖽡𖽕𖾑 𖽂𖽕 𖼄𖽺 𖼊𖽦𖾐，𖼠𖽺𖾐 𖼽𖽺 𖼊𖽑𖽺 𖼽𖽚𖾐．𖽃𖽔𖾐 𖼺𖽺𖾑 𖼽𖽻 𖼀𖽦𖾐：“𖼽𖽺𖾐 𖼦𖽴 𖼦𖽫 𖼂𖽻𖾐 𖼞𖽜 𖼺𖽺𖾑，𖼣𖽙𖾐 𖼻𖽙 𖼊𖽑𖽡 𖼽𖽚𖾐 𖼽𖽚𖾐．” 2 𖼳𖽡𖽕𖾑 𖽂𖽕 𖼦𖽑𖽔𖾐 𖼖𖽺𖾑 𖼠𖽺𖾐 𖼽𖽺 𖼞𖽳𖾐 𖼐𖽑𖽳𖾐 𖼄𖽻 𖼽𖽕𖾑 𖼂𖽚 𖼊𖽑𖽺 𖼽𖽚𖾐．𖼽𖽕𖾑 𖼂𖽚 𖼽𖽻𖾐 𖼖𖽚𖾑 𖼺𖽪𖾐 𖼣𖽻𖾐，𖼠𖽺𖾐 𖼽𖽺 𖼄𖽡𖾐 𖼄𖽪𖾐 𖼺𖽪𖾐 𖼣𖽻𖾐． 3 𖼊𖽑𖽡 𖼐𖽑𖽡𖾐 𖼮𖽻𖾐，𖼠𖽺𖾐 𖼽𖽺 𖼽𖽻 𖼄𖽡𖾐 𖼠𖽻𖾐 𖼮𖽑𖽻𖾐 𖼊𖽚𖾐 𖼺𖽪𖾐 𖼖𖽚𖾑 𖼄𖽚 𖼈𖽺𖾐 𖼂𖽻𖾐 𖼖𖽻𖾐，𖼍𖽡𖾐 𖼊𖽪𖾐 𖼂𖽺𖾐 𖼺𖽺𖾑 𖼦𖽑𖽙𖾐 𖼽𖽺𖾐 𖼦𖽴 𖼦𖽫 𖼊𖽑𖽺 𖼞𖽜． 4 𖼽𖽕𖾑 𖼂𖽚 𖼖𖽺𖾑 𖽂𖽙 𖼊𖽺𖾐 𖼽𖽚𖾐 𖼺𖽪𖾐 𖼽𖽻𖾐 𖼐𖽺𖾐 𖼦𖽑𖽔𖾐 𖼮𖽶𖾐 𖼹𖽳𖾐 𖼺𖽪𖾐 𖼽𖽻𖾐 𖼷𖽑𖽳𖾐 𖼈𖽺𖾐 𖼂𖽻𖾐 𖼖𖽻𖾐 𖼦𖽑𖽙𖾐 𖼍𖽡𖾐 𖼞𖽜，𖼽𖽺𖾐 𖼦𖽴 𖼦𖽫 𖼽𖽕𖾑 𖼂𖽚 𖼊𖽑𖽺 𖼐𖽺𖾐 𖼽𖽻 𖼍𖽡𖾐 𖼊𖽪𖾐 𖼊𖽑𖽺 𖼐𖽦𖾐 𖼊𖽑𖽝𖾐．
5 𖼦𖽑𖽻𖾐 𖼊𖽑𖽻𖾐，𖼠𖽺𖾐 𖼽𖽺 𖼊𖽑𖽺 𖼐𖽺𖾐 𖼽𖽻 𖼞𖽳𖾐 𖼍𖽡𖾐 𖼊𖽪𖾐 𖼊𖽑𖽺 𖼐𖽦𖾐 𖼄𖽔 𖼊𖽑𖽝𖾐．𖽃𖽔𖾐 𖼺𖽺𖾑，𖼠𖽺𖾐 𖼽𖽺 𖼦𖽑𖽔𖾐 𖼮𖽶𖾐 𖼀𖽶 𖼻𖽶，𖼮𖽑𖽻 𖼄𖽦𖾐 𖼀𖽑𖽚𖾐 𖼦𖽑𖽻𖾐．
6 𖼽𖽺𖾐 𖼦𖽴 𖼦𖽫 𖼠𖽺𖾐 𖼽𖽺 𖼖𖽙𖾐 𖼀𖽦𖾐：“𖼐𖽑𖽡𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼀𖽶 𖼻𖽶 𖼐𖽺𖾑？𖼐𖽑𖽡𖾐 𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼮𖽑𖽻 𖼄𖽦𖾐 𖼖𖽺𖾑 𖼀𖽑𖽚𖾐 𖼦𖽑𖽻𖾐 𖼐𖽺𖾑？ 7 𖼐𖽑𖽡𖾐 𖼂𖽺𖾐 𖼹𖽳𖾐 𖼊𖽑𖽡𖾑 𖼣𖽻𖾐，𖽃𖽔𖾐 𖼹𖽻𖾐 𖼞𖽪𖾐 𖼮𖽡𖽺𖾐 𖼣𖽙𖾐 𖼐𖽦𖾐 𖼄𖽔 𖼊𖽑𖽝𖾐 𖼠𖽸𖾑 𖼐𖽺𖾑？𖼐𖽑𖽡𖾐 𖼂𖽺𖾐 𖼄𖽔 𖼹𖽳𖾐 𖼊𖽑𖽡𖾑 𖼣𖽻𖾐，𖼽𖽺𖾐 𖼮𖽑𖽡𖽪𖾑 𖼐𖽑𖽡𖾐 𖽃𖽔𖾑 𖼊𖽪 𖼮𖽑𖽡𖽺 𖼞𖽳𖾐 𖼳𖽡𖽻𖾐 𖼍𖽳𖾐 𖼦𖽑𖽻𖾐，𖼽𖽻 𖼐𖽑𖽡𖾐 𖼊𖽑𖽺 𖼮𖽳 𖼍𖽡 𖼊𖽻𖾐．𖼦𖽑𖽻𖾐 𖼊𖽑𖽻𖾐，𖼐𖽑𖽡𖾐 𖼽𖽻 𖼊𖽑𖽺 𖽂𖽙 𖼊𖽙𖾐 𖼦𖽑𖽻𖾐 𖼖𖽡𖾐．”
8 𖼊𖽑𖽡 𖼐𖽑𖽡𖾐 𖼮𖽻𖾐，𖼠𖽺𖾐 𖼽𖽺 𖼽𖽻 𖼐𖽑𖽳𖾐 𖼄𖽻 𖼽𖽕𖾑 𖼂𖽚 𖼖𖽙𖾐 𖼀𖽦𖾐：“𖽃𖽔 𖼐𖽺𖾑 𖼄𖽡𖾐 𖼠𖽻𖾐 𖼽𖽡𖾐 𖼄𖽺！” 𖼽𖽻 𖼈𖽳𖾐 𖼄𖽡𖾐 𖼠𖽻𖾐 𖼮𖽻𖾐 𖼞𖽑𖽶𖾑 𖼮𖽶𖾐，𖼠𖽺𖾐 𖼽𖽺 𖼍𖽪𖾐 𖼖𖽻𖾐 𖼽𖽻 𖼐𖽑𖽳𖾐 𖼄𖽻 𖼊𖽑𖽺 𖼊𖽝，𖼽𖽻 𖼊𖽑𖽺 𖼺𖽦 𖼦𖽑𖽙𖾐．
9 𖼽𖽺𖾐 𖼦𖽴 𖼦𖽫 𖼠𖽺𖾐 𖼽𖽺 𖼊𖽑𖽺 𖼊𖽻 𖼐𖽙𖾐：“𖼐𖽑𖽡𖾐 𖼐𖽑𖽳𖾐 𖼄𖽻 𖼽𖽕𖾑 𖼂𖽚 𖽃𖽔 𖼊𖽺𖾑 𖼠𖽻𖾐 𖼮𖽻𖾐 𖼐𖽺𖾑？”
𖼽𖽻 𖼊𖽻 𖼞𖽑𖽚：“𖼣𖽙𖾐 𖼄𖽔 𖼺𖽝𖾑，𖼣𖽙𖾐 𖼣𖽙𖾐 𖼐𖽑𖽳𖾐 𖼄𖽻 𖼊𖽑𖽺 𖼐𖽦𖾐 𖼳𖽪𖾐 𖼺𖽪𖾐 𖼣𖽻𖾐 𖼖𖽔𖾑？”
10 𖼽𖽺𖾐 𖼦𖽴 𖼦𖽫 𖼀𖽦𖾐：“𖼐𖽑𖽡𖾐 𖼞𖽑𖽙𖾐 𖼂𖽺𖾐 𖼺𖽪𖾐 𖽃𖽔 𖼊𖽺𖾑 𖼳𖽶 𖼄𖽡𖽻 𖼣𖽻𖾐 𖼐𖽺𖾑？𖼐𖽑𖽡𖾐 𖼐𖽑𖽳𖾐 𖼄𖽻 𖼞𖽳𖾐 𖼺𖽶 𖼄𖽡𖾑 𖼐𖽦𖾐 𖼞𖽑𖽶𖾐 𖼮𖽑𖽻𖾐 𖼮𖽑𖽡𖽪 𖼀𖽺𖾐 𖼊𖽚𖾐 𖼊𖽑𖽧 𖼖𖽻𖾐，𖼐𖽑𖽧𖾐 𖼮𖽑𖽸 𖼄𖽙𖾐 𖼣𖽙𖾐 𖼊𖽑𖽺 𖽃𖽶𖾐．
11 𖼐𖽑𖽡𖾐 𖼐𖽑𖽡𖾐 𖼐𖽑𖽳𖾐 𖼄𖽻 𖼊𖽑𖽺 𖼺𖽦 𖼦𖽑𖽙𖾐，𖼽𖽻 𖼺𖽶 𖼄𖽡𖾑 𖼐𖽦𖾐 𖼊𖽑𖽺 𖼦𖽜 𖼈𖽪𖾐 𖼦𖽑𖽻𖾐．𖽃𖽔𖾐 𖼺𖽺𖾑，𖼐𖽑𖽡𖾐 𖼄𖽡𖾑 𖼐𖽦𖾐 𖼞𖽳𖾐 𖼮𖽑𖽻𖾐 𖼮𖽙 𖼰𖽪𖾑 𖼄𖽳𖾐 𖼊𖽻𖾐． 12 𖼐𖽑𖽡𖾐 𖼄𖽡𖾐 𖼄𖽪𖾐，𖼄𖽡𖾐 𖼖𖽚𖾑 𖼄𖽚 𖼄𖽔 𖼊𖽚𖾐 𖼊𖽻𖾐，𖼐𖽑𖽡𖾐 𖼞𖽜 𖼮𖽻𖾐 𖼻𖽺𖾐 𖼊𖽙𖾐 𖼞𖽳𖾐 𖼄𖽡𖾐 𖼊𖽺𖾐 𖼖𖽺𖾑 𖼄𖽔 𖼮𖽻𖾐 𖼊𖽻𖾐．”
13 𖼠𖽺𖾐 𖼽𖽺 𖼽𖽺𖾐 𖼦𖽴 𖼦𖽫 𖼖𖽙𖾐 𖼀𖽦𖾐：“𖼣𖽙𖾐 𖼊𖽑𖽺 𖽂𖽙 𖼇𖽕 𖼳𖽶 𖼄𖽳𖾐 𖼺𖽪𖾐，𖼣𖽙𖾐 𖼷𖽳𖾑 𖼍𖽪𖾐 𖼄𖽔 𖼊𖽙𖾐． 14 𖽃𖽔𖾑 𖼄𖽳𖾐 𖼐𖽑𖽡𖾐 𖼣𖽙𖾐 𖼊𖽑𖽺 𖼦𖽑𖽺𖾑 𖼄𖽡𖾐 𖼊𖽺𖾐 𖼮𖽑𖽻𖾐 𖼞𖽕 𖼊𖽑𖽧 𖼽𖽡𖾐，𖼐𖽑𖽡𖾐 𖼀𖽑𖽡𖽻 𖼊𖽑𖽺 𖽂𖽙𖾐 𖼄𖽡𖽻𖾐 𖼄𖽔 𖼊𖽙𖾐．𖼣𖽙𖾐 𖼷𖽑𖽜𖾑 𖼷𖽑𖽜𖾐 𖼮𖽻𖾐 𖼻𖽺𖾐 𖼊𖽙𖾐 𖼞𖽳𖾐 𖼄𖽡𖾐 𖼊𖽺𖾐 𖼄𖽔 𖼮𖽻𖾐，𖼣𖽙𖾐 𖼊𖽑𖽺 𖼞𖽑𖽙𖾐 𖼷𖽶𖾐 𖼄𖽳𖾐 𖼺𖽪𖾐，𖼣𖽙𖾐 𖼊𖽑𖽺 𖼺𖽦 𖼊𖽻𖾐．”
15 𖼽𖽺𖾐 𖼦𖽴 𖼦𖽫 𖼠𖽺𖾐 𖼽𖽺 𖼖𖽙𖾐 𖼀𖽦𖾐：“𖼐𖽑𖽡𖾐 𖼊𖽑𖽺 𖼺𖽦 𖼺𖽪𖾐，𖼳𖽶 𖼍𖽻𖾐 𖼠𖽳𖾐 𖽂𖽙 𖼇𖽕 𖼳𖽶 𖼄𖽳𖾐 𖼊𖽻𖾐．” 𖽃𖽔𖾐 𖼺𖽺𖾑，𖼽𖽺𖾐 𖼦𖽴 𖼦𖽫 𖼠𖽺𖾐 𖼽𖽺 𖼊𖽑𖽺 𖼺𖽙 𖼊𖽑𖽡 𖼊𖽝𖾐 𖼍𖽴𖾑，𖼽𖽻 𖼊𖽑𖽺 𖼷𖽶𖾐 𖼄𖽳𖾐 𖼺𖽪𖾐 𖼞𖽜 𖼽𖽻 𖼊𖽑𖽺 𖽂𖽙𖾐 𖼺𖽦 𖼄𖽔 𖼊𖽙𖾐． 16 𖼠𖽺𖾐 𖼽𖽺 𖼽𖽺𖾐 𖼦𖽴 𖼦𖽫 𖼊𖽑𖽺 𖼰𖽡𖾑 𖼦𖽑𖽙𖾐 𖼊𖽚𖾐 𖼽𖽡𖾐 𖼺𖽺𖾑，𖼽𖽡𖾐 𖼍𖽡𖽦𖾑 𖼮𖽑𖽨𖾐 𖼖𖽪𖾐 𖼞𖽪𖾐 𖼞𖽳𖾐 𖼮𖽡𖾐 𖼊𖽚𖾐 𖼄𖽡𖾐 𖼀𖽳 𖼐𖽚 𖼍𖽴 \fr 4．16 \ft “𖼐𖽚 𖼍𖽴 ” 𖼦𖽑𖽺𖾑 “𖼳𖽡𖽻𖾐 𖼰𖽻𖾐 𖼺𖽜，𖼰𖽳𖾑 𖼽𖽡𖾐 𖼰𖽳𖾑 𖼖𖽻𖾐 ” 𖼀𖽦𖾐 𖼈𖽪𖾐 𖼣𖽻𖾐． 𖼄𖽡𖾐 𖼊𖽺𖾐 𖼮𖽻𖾐．
𖼠𖽺𖾐 𖼽𖽺 𖼞𖽳𖾐 𖼻𖽙 𖼮𖽑𖽡 𖼖𖽡𖾑 𖼖𖽦𖾐
17 𖼠𖽺𖾐 𖼽𖽺 𖼽𖽻 𖼄𖽳 𖼻𖽙 𖼖𖽙𖾐 𖼮𖽑𖽻𖾐 𖼦𖽑𖽦，𖼽𖽻 𖼄𖽳 𖼻𖽙 𖼄𖽺 𖼊𖽦𖾐 𖼺𖽺𖾑 𖼽𖽡 𖼐𖽚𖾑 𖼊𖽑𖽺 𖼽𖽚𖾐．𖼠𖽺𖾐 𖼽𖽺 𖼖𖽪𖾐 𖼊𖽑𖽡 𖼊𖽝𖾐 𖼊𖽴𖾐 𖼍𖽪𖾐 𖼖𖽻𖾐，𖽃𖽔𖾐 𖼺𖽺𖾑 𖼽𖽻 𖼻𖽙 𖼞𖽳𖾐 𖼄𖽡𖾐 𖼖𖽙𖾐 𖼮𖽑𖽻𖾐 𖼖𖽪𖾐 𖼞𖽑𖽶𖾑 𖼊𖽑𖽺 𖼽𖽡 𖼐𖽚𖾑 𖼄𖽡𖾐． 18 𖼽𖽡 𖼐𖽚𖾑 𖼞𖽳𖾐 𖼻𖽙 𖼽𖽡 𖼐𖽕 𖼣𖽻𖾐，𖼽𖽡 𖼐𖽕 𖼞𖽳𖾐 𖼻𖽙 𖼄𖽡 𖼦𖽪𖾑 𖼽𖽔 𖼖𖽡𖾑 𖼣𖽻𖾐，𖼄𖽡 𖼦𖽪𖾑 𖼽𖽔 𖼖𖽡𖾑 𖼞𖽳𖾐 𖼻𖽙 𖼄𖽔 𖼊𖽑𖽪 𖼺𖽔 𖼖𖽡𖾑 𖼣𖽻𖾐，𖼄𖽔 𖼊𖽑𖽪 𖼺𖽔 𖼖𖽡𖾑 𖼞𖽳𖾐 𖼻𖽙 𖼖𖽔𖾐 𖼄𖽦𖾑 𖼣𖽻𖾐．
19 𖼖𖽔𖾐 𖼄𖽦𖾑 𖼄𖽳 𖼻𖽙 𖼐𖽑𖽡 𖼽𖽚𖾐 𖼹𖽶𖾐，𖼊𖽑𖽡 𖼽𖽚𖾐 𖼽𖽕𖾑 𖼍𖽕𖾑 𖼄𖽡𖾐，𖼊𖽑𖽡 𖼽𖽚𖾐 𖼳𖽡 𖼖𖽔𖾐 𖼄𖽡𖾐． 20 𖼄𖽳 𖼈𖽪𖾑 𖼽𖽕𖾑 𖼍𖽕𖾑 𖼽𖽚𖾐 𖼺𖽪𖾐 𖼽𖽔 𖼂𖽕𖾐 𖼣𖽻𖾐，𖼽𖽔 𖼂𖽕 𖼞𖽑𖽶𖾑 𖼦𖽑𖽺𖾐 𖼠𖽴𖾐 𖼞𖽑𖽶𖾐 𖼈𖽶，𖼮𖽡𖽺 𖼰𖽡𖽺𖾑 𖼮𖽡𖽺 𖼖𖽚𖾑 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔𖾑 𖼄𖽻 𖼣𖽻𖾐． 21 𖼽𖽔 𖼂𖽕 𖼞𖽳𖾐 𖼐𖽑𖽳𖾐 𖼄𖽻 𖼽𖽚 𖼂𖽕 𖼄𖽡𖾐，𖼽𖽚 𖼂𖽕 𖼞𖽑𖽶𖾑 𖼮𖽑𖽧 𖼀𖽝𖾐 𖼄𖽙𖾐 𖼄𖽸𖾐 𖼺𖽪𖾐 𖼷𖽑𖽻𖾐 𖼞𖽳𖾐 𖽃𖽔𖾑 𖼄𖽻 𖼣𖽻𖾐． 22 𖼄𖽳 𖼖𖽳𖾐 𖼳𖽡 𖼖𖽔𖾐 𖼽𖽚𖾐 𖼺𖽪𖾐 𖼊𖽑𖽪 𖼂𖽕 𖼠𖽺𖾐 𖼽𖽺 𖼣𖽻𖾐，𖼽𖽻 𖼞𖽑𖽶𖾑 𖼞𖽑𖽙𖾐 𖼣𖽻𖾐 𖼳𖽶 𖼮𖽡 𖼐𖽺𖾐 𖼦𖽜𖾐 𖼄𖽡𖽻 𖼐𖽑𖽡 𖼻𖽜 𖼊𖽪𖾐 𖼊𖽝 𖼖𖽦 𖼠𖽸𖾑 𖼣𖽻𖾐，𖼽𖽻 𖼐𖽜𖾑 𖼄𖽙𖾐 𖼐𖽕 𖼄𖽔 𖼣𖽻𖾐． 23 𖼖𖽔𖾐 𖼄𖽦𖾑 𖼽𖽻 𖼄𖽳 𖼻𖽙 𖼐𖽑𖽡 𖼽𖽚𖾐 𖼖𖽙𖾐 𖼀𖽦𖾐：
“𖼽𖽕𖾑 𖼍𖽕𖾑 𖼐𖽺𖾐 𖼳𖽡 𖼖𖽔𖾐， 𖼣𖽙𖾐 𖼮𖽑𖽡𖽪 𖼊𖽑𖽺 𖼊𖽻 𖼐𖽙𖾐 𖼖𖽡𖾐！
𖼖𖽔𖾐 𖼄𖽦𖾑 𖼞𖽳𖾐 𖼄𖽳 𖼻𖽙，𖼣𖽙𖾐 𖼊𖽻 𖼊𖽑𖽺 𖼊𖽻 𖼐𖽙𖾐 𖼻𖽻𖾐！
𖼷𖽑𖽻𖾐 𖼀𖽑𖽺𖾐 𖼣𖽙𖾐 𖼊𖽑𖽺 𖼮𖽑𖽡𖽪，𖼣𖽙𖾐 𖼽𖽻 𖼊𖽑𖽺 𖼺𖽦 𖼦𖽑𖽙𖾐．
𖼷𖽑𖽻𖾐 𖼖𖽦𖾑 𖼣𖽙𖾐 𖼊𖽑𖽺 𖼦𖽹𖾑，𖼣𖽙𖾐 𖼽𖽻 𖼊𖽑𖽺 𖼀𖽑𖽧𖾐 𖼦𖽑𖽙𖾐．
24 𖼷𖽑𖽻𖾐 𖼠𖽺𖾐 𖼽𖽺 𖼊𖽑𖽺 𖼺𖽦 𖼊𖽑𖽡𖾑 𖼣𖽻𖾐，𖽂𖽙 𖼺𖽙𖾐 𖼂𖽙𖾐 𖼽𖽻 𖼊𖽑𖽺 𖼳𖽶 𖼍𖽻𖾐 𖼠𖽳𖾐 𖽂𖽙 𖼇𖽕 𖼳𖽶 𖼊𖽻𖾐．𖼷𖽑𖽻𖾐 𖼖𖽔𖾐 𖼄𖽦𖾑 𖼊𖽑𖽺 𖼺𖽦 𖼊𖽑𖽡𖾑 𖼣𖽻𖾐，𖼣𖽙𖾐 𖼽𖽻 𖼊𖽑𖽺 𖼳𖽶 𖼷𖽑𖽡𖾐 𖼳𖽶 𖼍𖽻𖾐 𖼠𖽳𖾐 𖽂𖽙 𖼇𖽕 𖼳𖽶 𖼊𖽻𖾐．”
𖼺𖽦𖾑 𖼊𖽑𖽴𖾑 𖼐𖽺𖾐 𖼽𖽻 𖼻𖽙 𖼽𖽡 𖼐𖽚 𖼳𖽸𖾑