2 𖼷𖽑𖽻𖾐 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼊𖽑𖽺 𖼀𖽦𖾐 𖼊𖽑𖽧 𖼺𖽪𖾐 𖼮𖽻𖾐： “𖽃𖽙𖾑 𖼄𖽺𖾐 𖼽𖽡 𖼺𖽴𖾑 𖼖𖽡𖽦𖾑 𖼺𖽪𖾐 𖼷𖽑𖽻𖾐 𖼦𖽑𖽺𖾑 𖼠𖽻𖾐 𖼖𖽻𖾐，𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼞𖽑𖽶 𖼮𖽑𖽕 𖼐𖽦𖾐 𖼦𖽑𖽻𖾐．” 3 𖼽𖽺𖾐 𖼖𖽡𖾑 𖼠𖽜𖾐 𖼖𖽪𖾐 𖼞𖽳𖾐 𖼈𖽪𖾐 𖼍𖽦 𖼷𖽑𖽻𖾐 𖼹𖽡𖾐 𖼖𖽔𖾐 𖼦𖽴 𖼞𖽳𖾐 𖼖𖽻𖾐，𖼀𖽦𖾐： “𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼖𖽻𖾐 𖼺𖽪𖾐 𖼷𖽑𖽻𖾐 𖼊𖽑𖽺 𖼦𖽳 𖼊𖽚𖾐 𖼖𖽻𖾐．𖼞𖽪𖾐 𖼮𖽡𖽺𖾐，𖼽𖽻 𖼈𖽳𖾐 𖼦𖽑𖽺𖾑 𖼄𖽡𖾐 𖼊𖽺𖾐 𖼊𖽑𖽺 𖼞𖽑𖽶 𖼮𖽑𖽕 𖼐𖽦𖾐 𖼖𖽻𖾐 𖼺𖽪𖾐 𖼣𖽻𖾐．”

4 𖼦𖽑𖽻𖾐 𖼊𖽑𖽻𖾐，𖼖𖽔𖾐 𖼦𖽴 𖼷𖽑𖽻𖾐 𖼞𖽶𖾑𖽑 𖼐𖽑𖽡 𖼽𖽚𖾐 𖼊𖽑𖽺 𖼰𖽳𖾐 𖼍𖽪𖾐 𖼦𖽑𖽙𖾐 𖼺𖽺𖾑，𖼦𖽑𖽺𖾑 𖼻𖽻𖾐 𖼊𖽻 𖼞𖽑𖽚 𖼀𖽦𖾐： “𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼦𖽑𖽺𖾑 𖼠𖽻𖾐 𖼖𖽻𖾐 𖼠𖽚 𖼊𖽑𖽻𖾐，𖼽𖽻 𖼈𖽳𖾐 𖽃𖽔 𖼊𖽻𖾑 𖼮𖽑𖽻𖾐 𖼖𖽻𖾐 𖼺𖽪𖾐 𖼣𖽻𖾐 𖼣𖽙𖾐 𖼄𖽔 𖼺𖽝𖾑． 5 𖼄𖽶 𖼮𖽑𖽧 𖼖𖽪𖾐 𖽃𖽔𖾑 𖼊𖽪 𖼂𖽡𖾑 𖼊𖽻𖾐 𖼞𖽑𖽶𖾑 𖼮𖽶𖾐，𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽚𖾐 𖼽𖽡𖾐 𖼦𖽑𖽙𖾐，𖼽𖽻 𖼈𖽳𖾐 𖽃𖽔 𖼊𖽻𖾑 𖼽𖽡𖾐 𖼦𖽑𖽙𖾐 𖼣𖽙𖾐 𖼄𖽔 𖼺𖽝𖾑，𖼐𖽑𖽡𖾐 𖼈𖽳𖾐 𖼐𖽕 𖼐𖽕𖾐 𖼞𖽕 𖼽𖽡𖾐，𖼷𖽑𖽜𖾑 𖼷𖽑𖽜𖾐 𖼽𖽻 𖼈𖽳𖾐 𖼊𖽑𖽺 𖼞𖽕 𖼄𖽳𖾐 𖼊𖽙𖾐．” 6 𖼦𖽑𖽻𖾐 𖼊𖽑𖽻𖾐，𖼖𖽔𖾐 𖼦𖽴 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽑𖽺 𖼦𖽳 𖼺𖽺𖾑 𖼦𖽑𖽺𖾐 𖼀𖽶𖾐 𖼊𖽑𖽺 𖼊𖽦𖾐 𖼽𖽡𖾐，𖼀𖽑𖽨 𖼦𖽑𖽺𖾐 𖼀𖽶𖾐 𖼊𖽑𖽺 𖼍𖽙𖾑 𖼺𖽪𖾐 𖼄𖽪𖾐 𖼂𖽴𖾑 𖼞𖽑𖽶𖾐 𖼰𖽳𖾐 𖼍𖽪𖾐． 7 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼽𖽡𖾐 𖼮𖽨𖾐 𖼄𖽙𖾐 𖼊𖽑𖽺 𖼮𖽑𖽻𖾐 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽑𖽺 𖼞𖽕 𖼽𖽡𖾐 𖼺𖽺𖾑，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼈𖽡𖾐 𖼠𖽚 𖼊𖽪 𖼞𖽳𖾐 𖼮𖽑𖽡𖾐．𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽑𖽺 𖼞𖽕 𖼽𖽡𖾐 𖼺𖽪𖾐 𖼖𖽪𖾐 𖼞𖽑𖽶𖾐 𖼮𖽑𖽻𖾐 𖼊𖽚𖾐 𖼽𖽡𖾐 𖼦𖽑𖽙𖾐 𖼞𖽑𖽶𖾑 𖼮𖽶𖾐，𖼖𖽪𖾐 𖽃𖽔𖾑 𖼊𖽪 𖼂𖽡𖾑 𖼍𖽡 𖼦𖽑𖽙𖾐．

8 𖼞𖽑𖽶 𖼮𖽑𖽕 𖼐𖽦𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼄𖽔 𖼽𖽦 𖼺𖽺，𖼖𖽔𖾐 𖼦𖽴 𖼦𖽑𖽺𖾐 𖼀𖽶𖾐 𖼊𖽑𖽺 𖼊𖽦𖾐 𖼽𖽡𖾐 𖼽𖽻 𖼈𖽳𖾐 𖼞𖽳𖾐 𖼽𖽡𖾐， 9 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽙𖾐 𖼀𖽦𖾐：“𖼣𖽙𖾐 𖼺𖽝𖾑 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽪 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽜 𖼦𖽑𖽻𖾐，𖼐𖽑𖽡𖾐 𖼈𖽳𖾐 𖼖𖽙𖾐 𖼀𖽙𖾐 𖼺𖽺𖾑 𖼣𖽙𖾐 𖼈𖽳𖾐 𖼞𖽜 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐，𖼖𖽪𖾐 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐 𖼷𖽑𖽻𖾐 𖼖𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽡𖽮𖾐． 10 𖼣𖽙𖾐 𖼈𖽳𖾐 𖼊𖽻 𖼮𖽨 𖼐𖽑𖽡𖾐 𖼈𖽳𖾐 𖽃𖽦𖾐 𖼰𖽧 𖼄𖽡𖾐 𖼊𖽺𖾐 𖼮𖽑𖽻𖾐 𖼊𖽚𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼽𖽺𖾐 𖼦𖽴 𖼦𖽫 𖽃𖽔 𖼊𖽺𖾐 𖼦𖽜𖾐 𖼄𖽙𖾐 𖼐𖽑𖽡𖾐 𖼞𖽜 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼮𖽑𖽻𖾐 𖼦𖽡𖽳𖾐 𖼦𖽑𖽙𖾐，𖼣𖽙𖾐 𖼈𖽳𖾐 𖼦𖽑𖽔𖾐 𖼖𖽺𖾑 𖼺𖽝𖾑 𖼐𖽑𖽡𖾐 𖼈𖽳𖾐 𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼮𖽡𖾐 𖼊𖽚𖾐 𖼄𖽡𖾐 𖼀𖽳，𖼽𖽕𖾑 𖼄𖽚 𖼖𖽡𖾑 𖼮𖽑𖽪𖾐 𖼳𖽶 𖼷𖽑𖽻𖾐 𖼞𖽳𖾐 𖼈𖽪𖾐 𖼍𖽦 𖼳𖽡𖾐 𖼦𖽚 𖼐𖽺𖾐 𖽃𖽴𖾑 𖼊𖽑𖽺 𖼺𖽦 𖼦𖽑𖽙𖾐 𖼦𖽑𖽻𖾐． 11 𖼣𖽙𖾐 𖼈𖽳𖾐 𖼊𖽻 𖼮𖽨 𖼺𖽺𖾑，𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐，𖼷𖽑𖽻𖾐 𖼊𖽑𖽡 𖼽𖽚𖾐 𖼖𖽺𖾑 𖼐𖽑𖽧𖾐 𖼈𖽳 𖼺𖽺𖾑 𖼐𖽑𖽡𖾐 𖼈𖽳𖾐 𖽃𖽙𖾑 𖼄𖽺 𖼮𖽑𖽡𖽺 𖼦𖽑𖽡𖽚 𖼻𖽺𖾐 𖼊𖽙𖾐 𖼺𖽪𖾐 𖼄𖽔 𖼮𖽻𖾐．𖼞𖽪𖾐 𖼮𖽡𖽺𖾐，𖼐𖽑𖽡𖾐 𖼈𖽳𖾐 𖼞𖽳𖾐 𖽂𖽙 𖼺𖽙𖾐 𖼂𖽙𖾐 𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽶 𖼠𖽻𖾐 𖼄𖽡𖾑 𖼐𖽦𖾐 𖼞𖽳𖾐 𖼺𖽡𖾐 𖼠𖽕𖾐 𖼰𖽶𖾐 𖼣𖽻𖾐．

12 𖽃𖽔𖾑 𖼄𖽳𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼮𖽑𖽡 𖼮𖽡𖽺𖾐，𖼽𖽺𖾐 𖼦𖽴 𖼦𖽫 𖼄𖽡𖾐 𖼊𖽑𖽺 𖼊𖽑𖽪 𖼍𖽳𖾐 𖼣𖽙𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐 𖼞𖽜，𖼣𖽙𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾑 𖼹𖽳𖾐 𖼂𖽺𖾐 𖼞𖽜 𖼺𖽪𖾐 𖼣𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼖𖽺𖾑 𖼣𖽙𖾐 𖼐𖽺𖾐 𖼣𖽙𖾐 𖽃𖽔 𖼀𖽙 𖼈𖽴 𖼊𖽑𖽺 𖼹𖽳𖾑 𖼹𖽳𖾐 𖼂𖽺𖾐 𖼞𖽜 𖼖𖽡𖾐．𖼦𖽑𖽔𖾐 𖼖𖽺𖾑，𖼣𖽜𖾐 𖼻𖽺𖾐 𖼊𖽙𖾐 𖼺𖽪𖾐 𖼮𖽨 𖼄𖽡𖽻𖾐 𖼊𖽑𖽡 𖼊𖽝 𖼣𖽙𖾐 𖼊𖽑𖽺 𖼞𖽜 𖼖𖽡𖾐． 13 𖼣𖽙𖾐 𖼞𖽳𖾐 𖽃𖽔 𖼀𖽙 𖽃𖽔 𖼄𖽙𖾐、 𖼈𖽧 𖼄𖽻 𖼐𖽑𖽳𖾐 𖼄𖽻、 𖽃𖽔 𖼷𖽶𖾐 𖼐𖽑𖽳𖾐 𖼄𖽙𖾐 𖼐𖽺𖾐 𖼽𖽻 𖼈𖽳𖾐 𖼞𖽳𖾐 𖼈𖽧 𖼐𖽑𖽡𖾐𖽳𖾐 𖼐𖽳 𖼦𖽙𖾐 𖼊𖽑𖽺 𖼀𖽑𖽨 𖼦𖽑𖽙𖾐 𖼞𖽜 𖼖𖽡𖾐，𖼣𖽙𖾐 𖼈𖽳𖾐 𖼈𖽪𖾑 𖼠𖽻𖾐 𖼊𖽑𖽺 𖼰𖽨𖾑 𖼺𖽺𖾑 𖼊𖽑𖽔 𖼳𖽶𖾐 𖼄𖽶𖾑 𖼞𖽜．”

14 𖼞𖽑𖽶 𖼮𖽑𖽕 𖼐𖽦𖾐 𖼺𖽪𖾐 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼦𖽑𖽺𖾑 𖼊𖽑𖽡 𖼂𖽦𖾑 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻 𖼄𖽔 𖼦𖽑𖽺 𖼊𖽑𖽧 𖼽𖽡𖾐 𖼊𖽑𖽡𖾑 𖼣𖽻𖾐，𖼣𖽙𖾐 𖼈𖽳𖾐 𖼽𖽻 𖼄𖽳𖾑 𖼈𖽪𖾑 𖼠𖽻𖾐 𖼊𖽑𖽺 𖼊𖽑𖽪 𖼍𖽳𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼮𖽑𖽻𖾐 𖼄𖽳𖾐 𖼷𖽑𖽦𖾐，𖼽𖽺𖾐 𖼦𖽴 𖼦𖽫 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽪 𖼣𖽙𖾐 𖼈𖽳𖾐 𖼊𖽑𖽺 𖼞𖽜 𖼞𖽑𖽶𖾑 𖼮𖽶𖾐，𖼣𖽙𖾐 𖼈𖽳𖾐 𖼷𖽑𖽜𖾑 𖼷𖽑𖽜𖾐 𖼐𖽑𖽧𖾐 𖼐𖽪 𖼐𖽑𖽧𖾐 𖼻𖽺𖾐 𖼖𖽙𖾐 𖼮𖽑𖽻𖾐 𖼐𖽑𖽡𖾐 𖼈𖽳𖾐 𖼊𖽑𖽺 𖼹𖽳𖾐 𖼂𖽺𖾐 𖼊𖽻𖾐．

15 𖼖𖽔𖾐 𖼦𖽴 𖼞𖽳𖾐 𖼦𖽑𖽺𖾐 𖼞𖽑𖽶𖾑 𖼍𖽡𖾐 𖼖𖽪𖾐 𖼰𖽻𖾐 𖼖𖽙𖾐 𖼍𖽴𖾑 𖼺𖽪𖾐 𖼣𖽻𖾐，𖼽𖽻 𖽃𖽔𖾑 𖼞𖽑𖽶𖾐 𖼖𖽺𖾑 𖼖𖽪𖾐 𖼰𖽻𖾐 𖼊𖽑𖽺 𖼮𖽻𖾐．𖽃𖽔𖾐 𖼺𖽺𖾑，𖼽𖽻 𖼰𖽕𖾐 𖼈𖽝 𖼻𖽜 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼊𖽑𖽺 𖼀𖽜𖾐 𖼖𖽜𖾐 𖼳𖽡𖽪𖾐 𖼮𖽑𖽻𖾐 𖼀𖽑𖽨 𖼹𖽺𖾐 𖼽𖽡𖾐， 16 𖼽𖽻 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼖𖽙𖾐 𖼀𖽦𖾐：“𖼐𖽑𖽡𖾐 𖼈𖽳𖾐 𖽂𖽙 𖼰𖽡𖽺𖾐 𖼊𖽑𖽺 𖼽𖽡𖾐 𖼖𖽡𖾐，𖼄𖽔 𖼣𖽻𖾐 𖼊𖽑𖽡𖾑 𖼣𖽻𖾐 𖼐𖽑𖽡𖾐 𖼈𖽳𖾐 𖼖𖽙𖾐 𖼰𖽙𖾐 𖼺𖽪𖾐 𖼊𖽑𖽺 𖼷𖽶𖾐 𖼄𖽳𖾐 𖼠𖽸𖾑 𖼮𖽡𖽮𖾐．𖼐𖽑𖽡𖾐 𖼈𖽳𖾐 𖼞𖽑𖽶𖾑 𖼠𖽻𖾐 𖼺𖽙𖾐 𖼐𖽑𖽡𖾐 𖼀𖽑𖽻𖾐 𖼈𖽜 𖼖𖽡𖾐，𖼳𖽡𖽻𖾐 𖼺𖽺𖾑 𖼐𖽑𖽡𖾐 𖼈𖽳𖾐 𖼊𖽑𖽺 𖼞𖽕 𖼽𖽡𖾐 𖼺𖽪𖾐 𖼷𖽑𖽻𖾐 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼖𖽻𖾐 𖼺𖽺𖾑，𖼐𖽑𖽡𖾐 𖼈𖽳𖾐 𖼽𖽻 𖼄𖽳𖾑 𖼮𖽨𖾐 𖼄𖽙𖾐 𖼺𖽜 𖼽𖽡𖾐 𖼊𖽙𖾐．”

17 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼽𖽻 𖼖𖽙𖾐 𖼀𖽦𖾐：“𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽑𖽙𖾐 𖼀𖽦𖾐 𖼺𖽪𖾐 𖼖𖽙𖾐 𖼮𖽑𖽻𖾐 𖼄𖽔 𖼳𖽪𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽜 𖼄𖽳𖾐 𖼷𖽑𖽦𖾐 𖼺𖽪𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼖𖽙𖾐 𖼮𖽡 𖼄𖽔 𖼠𖽳𖾐 𖼳𖽶 𖼣𖽻𖾐． 18 𖼐𖽑𖽡𖾐 𖼷𖽜𖾐 𖼍𖽳𖾐 𖼖𖽡𖾐，𖼣𖽙𖾐 𖼈𖽳𖾐 𖼹𖽦𖾑 𖼦𖽑𖽺𖾑 𖼄𖽡𖾐 𖼊𖽺𖾐 𖼖𖽻𖾐 𖼞𖽑𖽶𖾑 𖼮𖽶𖾐，𖼐𖽑𖽡𖾐 𖼰𖽕𖾐 𖼈𖽝 𖼐𖽑𖽡𖾑 𖼐𖽑𖽡𖾐 𖼦𖽑𖽺𖾑 𖼰𖽴𖾐 𖼀𖽑𖽳𖾐 𖼺𖽺𖾑，𖼣𖽙𖾐 𖼈𖽳𖾐 𖼊𖽑𖽺 𖼀𖽑𖽨 𖼹𖽺𖾐 𖼽𖽡𖾐 𖼞𖽳𖾐 𖼀𖽜𖾐 𖼖𖽜𖾐 𖼳𖽡𖽪𖾐 𖼊𖽑𖽺 𖼍𖽡 𖼖𖽡𖾐．𖼐𖽑𖽡𖾐 𖼦𖽑𖽔𖾐 𖼖𖽺𖾑 𖼐𖽑𖽡𖾐 𖽃𖽔 𖼀𖽙 𖽃𖽔 𖼄𖽙𖾐、 𖼈𖽧 𖼄𖽻 𖼐𖽑𖽳𖾐 𖼄𖽻 𖼐𖽺𖾐 𖼐𖽑𖽡𖾐 𖽃𖽔 𖼀𖽙 𖼊𖽑𖽡 𖼈𖽴，𖼄𖽳𖾑 𖼄𖽳 𖼊𖽑𖽺 𖼦𖽳 𖼐𖽑𖽡𖾐 𖼦𖽑𖽺𖾐 𖼞𖽑𖽶𖾐 𖼻𖽶𖾑 𖼖𖽻𖾐 𖼖𖽡𖾐． 19 𖽃𖽔 𖼊𖽺𖾑 𖼽𖽚𖾐 𖼐𖽑𖽡𖾐 𖽃𖽔𖾑 𖼞𖽑𖽶𖾐 𖼮𖽑𖽻𖾐 𖼊𖽦 𖼀𖽙 𖼊𖽚𖾐 𖼽𖽡𖾐 𖼊𖽑𖽡𖾑 𖼣𖽻𖾐，𖼽𖽻 𖼞𖽑𖽙𖾐 𖼷𖽶𖾐 𖼺𖽪𖾐 𖼳𖽶𖾐 𖼮𖽡𖽦 𖼦𖽑𖽺𖾑 𖼣𖽙𖾐 𖼈𖽳𖾐 𖼖𖽙𖾐 𖼮𖽡 𖼄𖽔 𖼠𖽳𖾐 𖼊𖽻𖾐．𖼐𖽑𖽡𖾐 𖼖𖽙𖾐 𖼮𖽑𖽻𖾐 𖼺𖽺𖾑 𖽃𖽔𖾑 𖼞𖽑𖽶𖾐 𖼞𖽑𖽙𖾐 𖼮𖽻𖾐 𖼺𖽪𖾐，𖼽𖽻 𖼊𖽑𖽺 𖼦𖽹𖾑 𖼀𖽑𖽧𖾐 𖼺𖽪𖾐 𖼮𖽻𖾐 𖼊𖽑𖽡𖾑 𖼣𖽻𖾐，𖼽𖽻 𖼊𖽑𖽺 𖼺𖽦 𖼽𖽺𖾐 𖼮𖽑𖽡𖽪𖾑 𖼦𖽑𖽺𖾑 𖼣𖽙𖾐 𖼈𖽳𖾐 𖼞𖽶𖾐 𖼮𖽑𖽶 𖼊𖽑𖽺 𖼊𖽦𖾐 𖼊𖽻𖾐． 20 𖼐𖽑𖽡𖾐 𖼣𖽙𖾐 𖼈𖽳𖾐 𖼦𖽑𖽺𖾑 𖼊𖽑𖽡 𖼂𖽦𖾑 𖼞𖽑𖽙𖾐 𖼂𖽺𖾐 𖼞𖽳𖾐 𖼄𖽡𖽻 𖼊𖽑𖽺 𖼦𖽑𖽺 𖼊𖽑𖽧 𖼽𖽡𖾐 𖼊𖽑𖽡𖾑 𖼣𖽻𖾐，𖼐𖽑𖽡𖾐 𖼣𖽙𖾐 𖼈𖽳𖾐 𖼞𖽜 𖼄𖽳𖾐 𖼷𖽑𖽦𖾐 𖼺𖽪𖾐 𖼦𖽑𖽺𖾑 𖼣𖽙𖾐 𖼈𖽳𖾐 𖼖𖽙𖾐 𖼮𖽡 𖼄𖽔 𖼠𖽳𖾐 𖼦𖽑𖽻𖾐 ．

21 𖼖𖽔𖾐 𖼦𖽴 𖼊𖽻 𖼞𖽑𖽚 𖼀𖽦𖾐：“𖼐𖽑𖽡𖾐 𖼈𖽳𖾐 𖼊𖽻 𖼂𖽪𖾑 𖼖𖽙𖾐 𖼮𖽑𖽻𖾐 𖼂𖽺𖾐 𖼻𖽻𖾐．” 𖽃𖽔𖾐 𖼺𖽺𖾑，𖼽𖽻 𖼈𖽳𖾐 𖼞𖽜 𖼺𖽜 𖼽𖽡𖾐 𖼦𖽑𖽙𖾐 ．𖼽𖽻 𖼈𖽳𖾐 𖼺𖽜 𖼽𖽡𖾐 𖼦𖽑𖽙𖾐 𖼠𖽙𖾑 𖼍𖽻𖾐，𖼽𖽻 𖼰𖽕𖾐 𖼈𖽝 𖼐𖽑𖽡𖾑 𖼐𖽑𖽡𖾐 𖼞𖽑𖽶𖾑 𖼰𖽴𖾐 𖼀𖽑𖽳𖾐 𖼺𖽺𖾑 𖼀𖽜𖾐 𖼖𖽜𖾐 𖼳𖽡𖽪𖾐 𖼊𖽑𖽺 𖼍𖽡．

22 𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖼞𖽑𖽶𖾑 𖼠𖽻𖾐 𖼰𖽡𖾑 𖼦𖽑𖽙𖾐，𖽂𖽙 𖼰𖽡𖽺𖾐 𖼊𖽑𖽺 𖼊𖽦𖾐 𖼽𖽡𖾐，𖼞𖽑𖽶𖾑 𖼠𖽻𖾐 𖼺𖽙𖾐 𖼐𖽑𖽡𖾐 𖼮𖽻𖾐 𖼦𖽑𖽙𖾐，𖼳𖽡𖽻𖾐 𖼺𖽺𖾑 𖼽𖽻 𖼈𖽳𖾐 𖼊𖽑𖽺 𖼞𖽕 𖼺𖽪𖾐 𖼀𖽑𖽚𖾐 𖼖𖽪𖾐 𖼞𖽑𖽶𖾐 𖼞𖽚 𖼖𖽻𖾐 𖼰𖽶𖾐 𖼮𖽑𖽡𖾐．𖼞𖽕 𖼽𖽡𖾐 𖼺𖽪𖾐 𖼷𖽑𖽻𖾐 𖼊𖽑𖽡 𖼮𖽨𖾐 𖼄𖽙𖾐 𖼽𖽻 𖼈𖽳𖾐 𖼊𖽑𖽺 𖼰𖽙𖾐，𖼦𖽑𖽻𖾐 𖼊𖽑𖽻𖾐 𖼰𖽙𖾐 𖼄𖽔 𖼄𖽡𖽻𖾐．

23 𖽃𖽔𖾐 𖼺𖽺𖾑，𖼷𖽑𖽻𖾐 𖼞𖽑𖽶𖾑 𖼐𖽑𖽡 𖼽𖽚𖾐 𖽂𖽙𖾐 𖼰𖽡𖽺𖾐 𖼊𖽑𖽺 𖼮𖽑𖽻𖾐 𖼹𖽺𖾐 𖼖𖽻𖾐，𖼽𖽱𖾐 𖼍𖽗𖾑 𖼖𖽻𖾐 𖼮𖽻 𖼠𖽚 𖼽𖽡𖾐，𖼀𖽑𖽚𖾐 𖼺𖽺𖾑 𖼐𖽜𖾑 𖼞𖽳𖾐 𖼻𖽙 𖼽𖽱𖾐 𖼳𖽪𖾐 𖼽𖽕𖾑 𖼞𖽳𖾐 𖼮𖽑𖽡𖾐，𖼽𖽻 𖼈𖽳𖾐 𖼞𖽑𖽙𖾐 𖼷𖽶𖾐 𖼄𖽳𖾐 𖼞𖽳𖾐 𖼄𖽡𖽻 𖼄𖽳𖾑 𖼄𖽳 𖼀𖽦𖾐 𖼽𖽻 𖼊𖽑𖽺 𖼊𖽑𖽧． 24 𖼽𖽻 𖼈𖽳𖾐 𖼹𖽦𖾑 𖼽𖽱𖾐 𖼳𖽪𖾐 𖼽𖽕𖾑 𖼖𖽙𖾐 𖼀𖽦𖾐：“𖼽𖽺𖾐 𖼦𖽴 𖼦𖽫 𖼠𖽕𖾐 𖼰𖽶𖾐 𖼞𖽑𖽶𖾑 𖼄𖽡𖾐 𖼊𖽺𖾐 𖼰𖽡𖽻𖾐 𖼺𖽺𖾑 𖽃𖽔 𖼐𖽺𖾑 𖼖𖽦 𖼀𖽑𖽦𖾐 𖼞𖽑𖽶𖾐 𖼰𖽡𖽺𖾐 𖼦𖽑𖽻𖾐，𖼞𖽑𖽶𖾑 𖼄𖽡𖾐 𖼊𖽺𖾐 𖼷𖽑𖽻𖾐 𖼄𖽳𖾑 𖼄𖽳 𖼖𖽺𖾑 𖽃𖽔 𖼐𖽺𖾑 𖼊𖽑𖽺 𖼦𖽑𖽔𖾐 𖼮𖽶𖾐 𖼮𖽡𖽮𖾐 𖼞𖽴𖾐．”