¹ Ádãmũ icí kíru ũkû Ị́vã be, ịsụ́ dó ꞌa tị dó sĩ Kãyị́nị̃ ꞌi, jọ, “Átị dó ꞌbá ꞌbo, Ãdróŋá ꞌbã áma ãzã kojó rĩ sĩ.” ² ꞌDã ꞌbã ũngúkú gá tị Hãbị́lị̃ ꞌi, ĩꞌdi ꞌbá kãbĩlõ ucélépi la, Kãyị́nị̃ ĩꞌdi ꞌbá ámvụ́ sõlépi la.

³ Ụ́ꞌdụ́ ãlu Kãyị́nị̃ ají ũri kalépi ĩꞌdidrị́ ámvụ́ agá rĩ Ãdróŋá ní uwiŋá ru, ⁴ Hãbị́lị̃ nga vâ kãbĩlõ mvá tịlé drị̃drị̃ kãbĩlõ ũꞌbí rĩ kí agá rĩ ꞌbã ãzí mũlũkũdũ la uyalé ãzíla ajílé úsã la abe Ãdróŋá ní uwiŋá ĩꞌdidrị̂ abe rá.

⁵ Wó Kãyị́nị̃ uwiŋá ĩꞌdidrị̂ abe Ãdróŋá ãꞌị̃ kí ku, Kãyị́nị̃ ásị́ acá dó sĩ ãzá-ãzá mịfị́ la ngụ̃ dó sĩ ị̃rị́ ádrị́pị̃ nî. ⁶ Úpí Ãdróŋá zị ĩꞌdi, “Ími mịfị́ nị íni ãꞌdu sĩ yã? ⁷ Ídrĩ ị́jọ́ múké idé áyụ má icó mi ãꞌị̃lé ku yã? Wó ídri ị́jọ́ múké idé ku, ị́jọ́ ũnzí la uvá ími agá ꞌdĩ, lẽ ími izalé rá ꞌbo, mí arụ́ ĩꞌdi drị̃ índẽ sĩ ĩꞌdi rá.”

⁸ Kãyị́nị̃ jọ ádrị́pị̃ Hãbị́lị̃ní, “Ãmụ ꞌbání acị̂ trũ ámvụ́ agâlé.” Ĩꞌbã kí adru agá ámvụ́ agâlé, Kãyị́nị̃ zõ ádrị́pị̃ drị̃ gá ꞌdị dó ĩꞌdi rá. ⁹ Úpí Ãdróŋá zị Kãyị́nị̃ ꞌi, “Mî ádrị́pị Hãbị́lị̃ íngõlé yã?” Kãyị́nị̃ umvi ĩꞌdiní, “Ánị̃ ĩꞌdi íngõlé yã rĩ ku, wó má adru vâ ꞌbá ĩꞌdi tãmbalépi rĩ ꞌi ku, mi áma zị íni mí ũrã ma ĩꞌdi tãmba ma ꞌi?” ¹⁰ Ãdróŋá jọ, “Mí idé ãꞌdu? Mî ádrị́pị ꞌbã ãrí la ími tõ áma bị́lẹ́ gá angájó vụ̃rụ̂lé ꞌdã.

¹¹ “Mi dó úꞌdîꞌda ꞌbá wãlé rá la ãzíla drolé ãngũ drị̃ gá ꞌdâ rá ị́jọ́ vũ ꞌbã tị afujó mgbọ mî ádrị́pị ꞌbã ãrí mvụjó ími drị́ gá ꞌdâ rĩ sĩ. ¹² Ídrĩ ámvụ́ sõ, icó dó míní ãkónã kalé ku, mi dó adru ꞌbá acị́lépi ngoro rilépi ãngũ ãlu gá avị́jó ku la.” ¹³ Kãyị́nị̃ jọ Úpíní, “Ị́jọ́ mî lịlé áma drị̃ gá ꞌdĩ ambamba ndẽ ma ꞌdụ agá rá.” ¹⁴ Ãndrũ ídro dó ma ãngũ drị̃ gá ꞌdâ rá, má icó dó ími mẹ́lẹ́tị ndrelé ị̃dị́ ku, ma dó mụ adrulé ꞌbá acị́lépi ngara ávị́ŋâ kóru ụ̃nọ́kụ́ drị̃ gá ꞌdâ la, ꞌbá cí áma ịsụ́lépi rĩ la áma ꞌdị rá.

¹⁵ Úpí Ãdróŋá jọ ĩꞌdiní, “Adru íni ku! ꞌBá ãzí drĩ Kãyị́nị̃ ími ꞌdị rá ma ãrígó la ũfẽ pâlé ázị̂rị̃ ũkpó ru.” Ãdróŋá ꞌbã ícétáŋá Kãyị́nị̃ ụrụꞌbá gá ꞌbá ãzí drĩ sĩ ĩꞌdi ịsụ́ rá ꞌbã ꞌdịrú sĩ ĩꞌdi ku. ¹⁶ Ị́jọ́ ꞌdĩ sĩ, Kãyị́nị̃ ĩdã dóru Ãdróŋâ mẹ́lẹ́tị gá ꞌdãá rá, mụ dó uꞌálé ãngũ ĩꞌdi ꞌbã acị́jó ngara ꞌdĩ Édẽnĩ ꞌbã wókõ ị̃tụ́ ꞌbã ãfũ agâlé ru.

¹⁷ Kãyị́nị̃ icí kíru ũkû be, ũkû ịsụ́ ꞌa tị ngọ́tị́ ágọ́bị́ ꞌda rụ́ la Ínõkã ꞌi. Sị dó táwụ̃nị̃ ꞌda rụ́ la Ínõkã ngọ́pị̃ ꞌbã rụ́ sĩ. ¹⁸ Ụ́tị Ĩrádĩ Ínõkã nî, Ĩrádĩ tị Mẽhũyáẽlĩ ꞌi, Mẽhũyáẽlĩ ꞌbã ngọ́pị Mẽtũsãélĩ ꞌi, Mẽtũsãélĩ tị Lãmékĩ ꞌi.

¹⁹ Lãmékĩ ĩgbã ũkú kí ị̃rị̃. Kãyú rĩ ꞌbã rụ́ Ádã ꞌi ãzí rĩ ꞌbã rụ́ Zílã ꞌi. ²⁰ Ádã tị ngọ́tị́ ágọ́bị́ rụ́ la Yãbálĩ ꞌi ĩꞌdi ꞌbá ãnãkpá ucélépi bụ́rụ́jọ́ agá rĩ ꞌbã áyị́pị drị̃drị̃ rĩ ꞌi. ²¹ Áyị́pị ꞌbá úngó ngolépi rĩ ꞌba drị̂ Yũbálĩ ꞌi Yãbálĩ ꞌbã ádrị́pị ꞌi.

Yãbálĩ ꞌbã ádrị́pị Yũbálĩ ĩꞌdi áꞌbị́ ꞌbá úngó ngolépi jaligó sĩ ụ̃ꞌdị́ colépi rĩ ꞌba drị̂ ꞌi. ²² Zílã tị Tũbálĩ Kãyị́nị̃ Lãmékĩ nî, ĩꞌdi áꞌbị́ ꞌbá ãlị́gọ́ru úká dịlépi ãko pírí sị́ cilépi idélé aya ũkpó la sĩ rĩ ꞌba drị̂ ꞌi. Tũbálĩ Kãyị́nị̃ ꞌbã ámvọ́pị Námã ꞌi.

²³ Lãmékĩ jọ ũkúka Ádã ꞌbaní Zílã be, “Ĩmi are áma ụ́ꞌdụ́kọ́ mâ ũkúka, áꞌdị kãrị́lẹ̃ ꞌi ĩꞌdi ꞌbã áma ĩpẽŋãjó rĩ sĩ. ²⁴ Údrĩ Kãyị́nị̃ ꞌbã ãvũ ãrí ũfẽ pâlé ázị̂rị̃ Lãmékĩ drị̂ ála ũfẽ la pâlé kãlị́ ázị̂rị̃ drị̃ la ázị̂rị̃.”

²⁵ Ádãmũ icí kíru ũkû be tị kí ngọ́tị́ ágọ́bị́ ꞌda kí rụ́ la Sétĩ ꞌi. Ífí la Ãdróŋá fẽ mání ngọ́tị́ŋá Hãbị́lị̃ Kãyị́nị̃ ꞌbã ándrá ꞌdịlé rĩ ꞌbã kẹ̃jị́ gá. ²⁶ Sétĩ tị ngọ́tị́ ágọ́bị́ ꞌda rụ́ la Ínõsĩ ꞌi. Iꞌdójó ụ́ꞌdụ́ ꞌdã sĩ ꞌbá iꞌdó kí Ãdróŋâ rulé rũrũ.