¹ Ụ́ꞌdụ́ ꞌdã sĩ ị̃nị̃ ĩꞌdi ãnãkpá úlétáŋá ambamba la ndẽ ãnãkpá Úpí Ãdróŋá ꞌbã ꞌbãlé ásé agá rĩ kí pírí. Ị̃nị̃ zị ũkú ꞌi, “Ãdróŋá jọ ãndá ãndáru ĩna ife ífí ámvụ́ agá ꞌdĩ ꞌbã ãzí kí ku yã?” ² Ũkú umvi ĩꞌdiní, “Ãma icó ife ífí ámvụ́ agá ꞌdĩ kí nalé pírí rá. ³ Wó Ãdróŋá jọ ife ámvụ́ agá ágágá rĩ ãna jõ ku, ãma aló vâ ụrụꞌbá la ku, ãdrĩ na la rá ãma ũdrã rá.”

⁴ Ị̃nị̃ jọ, “Ĩmi ũdrã ku fôó. ⁵ Ãꞌdusĩku Ãdróŋá nị̃ rá ĩdrĩ na la rá ĩmi mịfị́ larú kpẹ̃ rá ị́jọ́ ũnzí kí nị̃jó ị́jọ́ múké rĩ be.”

⁶ Ũkú la mụ ndrelé la ife ífí ĩꞌdi ũnĩ-ambambarú ãzíla múké najó la ãzíla ĩꞌdi ꞌbã lẽjó acájó úŋmĩrú rĩ sĩ, ãtĩ ífí la na rá, fẽ vâ ágôní nalé rá. ⁷ Mịfị́ la kpẹ̃ kí dó rá, ịsụ́ kí ru pílílí ru. Ce kí dó mị́lị́ bị́ sĩru ụrụꞌbá atrịjó drị̃nzá sĩ.

⁸ Ágọ́bị́ ꞌdã kí ũkû be are kí Ãdróŋá acị́ agá ámvụ́ agá ị̃tọ́lọŋá sĩ, ụ̃zị̃ kíru ámvụ́ agá ꞌdãá ụ́bụ́bị́ agá ụ̃rị̃ Úpí Ãdróŋá drị̂sĩ. ⁹ Úpí Ãdróŋá umve ꞌbá ꞌdĩ kí, “Ĩmi íngõlé yã?” ¹⁰ Ágọ́bị̂ umvi, “Má are ími ụ́ꞌdụ́kọ́ rá, ma pílílí ru, drị̃nzá sĩ ázị̃ dô sĩ ma rá.” ¹¹ Ãdróŋá zị, “Ãꞌdi jọ mi pílílí ru rĩ gá nĩ yã? Ína ife ífí mâ jọlé úna ĩꞌdi ku rĩ rá yã?” ¹² Ágọ́bị̂ jọ, “Ũkú mî ãfẽlé mání rĩ fẽ mání ife ífî ꞌi ána ĩꞌdi rá.” ¹³ Úpí Ãdróŋá zị ũkû ꞌi, “Ị́jọ́ mî idélé íni rĩ ãꞌdu yã?” Ũkú umvi, “Mání jõ najó la ị̃nị̃ ulé ma nĩ.” ¹⁴ Úpí Ãdróŋá jọ ị̃nị̃ní, “Mî ị́jọ́ ꞌdĩ idéjó íni rĩ sĩ áwãtáŋá mídrị̂ ndẽ ãnãkpá lị́cọ́ gá rĩ ꞌba drị́ ásé agá rĩ trũ rĩ pírí mi ími use ꞌa drị̃ sĩ, mi pụ́trụ́ mvũ. ¹⁵ Ma mũkẽrẽ ꞌbã ĩmi drĩdríŋĩ gá ũkú be, ũri mídrị̂ kí drĩdríŋĩ gá ũri ũkú drị̂ be, ĩꞌdirú ími drị̃kã gbã, mi ĩꞌdi ĩníŋâ ga rá.” ¹⁶ Jọ ũkú nî, “Ma ũcõgõ mídrị̂ ĩjãlã drị̃ gá anzị tịŋá sĩ. Mi anzị tĩ cãndí sĩ, ị́jọ́ mî lẽlé rĩ ꞌbã ũkpó la adru ágọ́bị́ drị́, ĩꞌdi dô sĩ adru úpíru ími drị̃lẹ́ gá.”

¹⁷ Jọ Ágọ́bị̂ní, “Mi ũkú mídrị̂ tị arejó rĩ sĩ, mî ife mâ jọlé ína ífí la ku rĩ najó ꞌbo rĩ sĩ, áwã ụ̃nọ́kụ̂ rá ími ị́jọ́ sĩ, mirú kaŋá la na ũcõgõ sĩ ụ́ꞌdụ́ mî adrujó ídri rĩ sĩ pírí, ¹⁸ ụ̃cị́kị́ la dụ míní ãváŋâ trũ mi dó ũri ãfũlépi ámvụ́ agá rĩ na áyụ. ¹⁹ Mirú íná na ụ́rị́ ãfũlépi ími mẹ́lẹ́tị gá rĩ sĩ ịsụ́ ífi drĩ ꞌbụ́ gá ku, ála ími idéjó ũdrí sĩ rĩ sĩ, mi ũdrí; mi vâ gõ vúlé ũdrí agâlé.”

²⁰ Ágọ́bị̂ ꞌda ũkú ĩꞌdidrị̂ rụ́ Ị́vã ꞌi ĩꞌdi ꞌbã adrujó ꞌbá pírí ídri trũ rĩ ꞌbã andre rĩ sĩ. ²¹ Úpí Ãdróŋá idé íníríkó bõngóru sĩ kí ụ̃sụ̃jó. ²² Úpí Ãdróŋá jọ, “ꞌBá acá kî dó ãmã áni, ị́jọ́ múké rĩ kí nị̃jó ũnzí rĩ be ꞌbo, lẽ úꞌdîꞌda ꞌba aló ife ídri drị̂ ku ãzíla ꞌbã na kí ĩꞌdi ku ĩꞌdi mụ uꞌálé ídrirú jã ꞌdâ ku.” ²³ Ị́jọ́ ꞌdĩ sĩ, Úpí Ãdróŋá dro ĩꞌdi ámvụ́ Édẽnĩ agá rĩ sĩ ãmvé. Fẽ dó ĩꞌdiní vũ ándrá ĩꞌdi aꞌdụ́jó rĩ sõlé. ²⁴ Ĩꞌdi mụ Ádãmũ drolé ꞌbo, ũꞌbã mãlãyíkã ãngũ aga tẽlépi rĩ ménéŋá dị̃lépi ãcí ru bẹ̃kụ̃-bẹ̃kụ̃ la trũ ámvụ́ ꞌdã aga tẽjó wókõ ị̃tụ́ ꞌbã agá agâlé ru ife ídri drị̂ tãmbajó.