B bual Yiesu k wan tien yaalidug bonn
16
1 *Farisiɛn-nba yen *Sadusien-nba nagn Yiesu buol.
B bo bua ban bign’o i g bual’o,
k wan tien yaalidug bonn,
g ŋɔn k u paalu nya Yendu buol i.
2 G Yiesu ŋmiɛn’m :
" Siŋaaɔg n polu po gii fan,
i tu maad g dinne daal baa ŋan ;
3 tawalgband gii be,
yin maad g dinne taag bu baa.
I tu yaad g diid polu po,
g ŋɔn daal n baa tie nand,
g yen ji kan fid g bann bona nba tie mɔlane niimn ii ?
4 Nibiid,
yab kpiɛd Yendu sɔnu kal g miɛd yaalidug bonn.
B yen kan la siɛl yaa yaalidug bonn,
l gii g tie Yendu n bo tien yal u *sogni *Sonas po i kaa.
" Lann i k u ŋaa’b l buol g paan g saa.
Jie man Farisiɛn-nba yen Sadusien-nba tundl
5 Yiesu *ŋuantieb bo puod bɔngbanliel po g sunn g g tug kpanu.
6 G Yiesu maad’b :
" Ŋanm g suol man i kua yen *Farisiɛn-nba dibina yen *Sadusien-nba dibina. "
7 K u ŋuantieb ji mali k ban yaan g tug kpanu nyan i k u maad nnyan.
8 G Yiesu bann b maalm g maad :
" I *dindann g yab baa waam nne,
bɛ po i k i mali nnyan i,
k yin g tug kpanu po i ?
9 I daa g gbiɛ bona niimn ii ?
I g tiɛn kpanu ŋanmu n daan din niib tuda ŋanmu k l tenn kpanu jena k i wod g gbien kpancubd k l ja nand ii ?
10 Bii i g tiɛn kpanu ŋanlile n daan din niib tuda ŋanna k l tenn kpanu jena k i wod g gbien kpancubd k l ja nand i ?
11 Bɛ po n te k i g ban k l g tie kpanu po kaa k n maad i ?
N maad’i,
jie man Farisiɛn-nba yen Sadusien-nba dibina. "
12 L youg u k b ji gbad,
k u bo g maad k ban jie dibina nba k b tu tien kpanu n ninŋ lan fiil kaa,
k u bo maad Farisiɛn-nba yen Sadusien-nba tundl i.
Piɛr maad g Yiesu tie Kristo
13 Yiesu yen u *ŋuantieb pund doug nne ninŋ k b yi Filiip Sesaare,
k u bual u ŋuantieb :
" Niib maad g *Nifosaal Bija tie ŋmaa i ? "
14 K b ŋmiɛn’o :
" Yenm tua k a tie San *Nyunwultua i,
lieb tua k a tie *Eli,
lieb mɔ tua k a tie Seremi lann i kaa Yendu *sogni-nba nba tenn ninŋ yend. "
15 K u guan g bual’b :
" K yinm i,
i mali k n tie ŋmaa i ? "
16 G Simɔn Piɛr maad :
" A tie *Kristo i,
Yendu nba fo Bija. "
17 G Yiesu ŋmiɛn’o g maad :
" I be pamann n,
Simɔn,
Sonas bija,
g dugn yal nyiɛ a mɔb n ne g tie nifosaal banm kaa,
n Baa nba be polu po n ŋɔn’a.
18 To,
min maad’a,
fin Piɛr,
a tie tantiɛɔg u,
l tantiɛɔg po i k n bu sen n *Tintaanu niib.
Kuum yen u paalu kul kan fid g tien’o siɛl.
19 N bu te’a Yendu *ŋaag gann pieni.
A gii yed g yal tie kual tinŋ po ne,
l tie kual i Yendu buol,
a gii cab yal mɔ,
Yendu mɔ n cab l bonn. "
20 Lann i g Yiesu kpaa u ŋuantieb k ban daa ŋaa g sua ń gbad k u tie Kristo.
Yiesu muand u kuum yen u yiedu
21 L youg u g Yiesu ji cil g ŋɔnŋ u *ŋuantieb k l tie k wan gad Serusalɛm,
g doug n nikpela yen Yendu *salg-yidkab ciɛnm yen Yendu Kadaaɔg *gbanbanda ń daan cagn’o bonciɛnn,
g tan kpi’ug,
k wan yied daa ŋantaa daal.
22 G Piɛr yiin’o b banle buol g ji fu yen’o g maad :
" N Yonmdaan,
Yendu ń wuon,
l yaa bonn kan ban g baal’a. "
23 G Yiesu gbeg g maad Piɛr :
" Sud ne,
*Sitaan,
a panŋ n sɔnu,
g dugn a maalm ne g nyiɛ Yendu buol kaa,
l tie niib maalm i. "
24 Lann i g Yiesu maad u ŋuantieb :
" Yua bua wan ŋuan’n,
wan sunn u kua po,
g bug u *dapunpɔnn gii ŋua’n.
25 Yua nba bua wan fiel u miɛl u tan bu buon l miɛl.
Ama yua lu u miɛl g dugn n po,
u bu la miɛl.
26 Nil gii mɔg ŋanduna bona kul g yen buon u miɛl,
n liɛ l nyuad i ?
Lann i kaa nil bu tug bɛ i g guan g daa l miɛl i ?
27 *Nifosaal Bija tan bu guan yen u Baa yudand,
yen u *malɛg-nba,
l youg u k u bu pa nil kul nyan u bontitied n bual nand nyan.
28 Yen mɔni n maad’i,
Nifosaal Bija bu baal g kal u badkog po g sua g yab nba be ne siɛb daa g kpe. "