Mark n bo diɛn Yiesu *Laabamann nba n be kadaaɔg ne ninŋ. Mark bo sun yen Yiesu *sundi Pɔl yen Piɛr bonciɛnn. Lann n tod’o k u fid g diɛn kadaaɔg ne. Mark diɛn Laabamann ne g bua nil kul ń bann Yiesu n tie yua nba i. Laabamann cilg, Mark cil g maad g Yiesu tie Yendu Bija i : " Yendu Bija Yiesu Kristo Laabamann cilg " (1.1).

Kadaaɔg juog po, ban kpaa Yiesu *dapunpɔnn po yaa youg, *Rom sijeciɛn nba bo sie dapunpɔnn buol g la Yiesu n kpe nand nba mɔ maad lann n nyan : " Yen mɔni, jua ne tu l tie Yendu Bija i. " (15.39).

G nyaan Yiesu mɔno yen bo g bua g niib ń gbaa g bann k u tie Yendu Bija. Lan cil, u bo tu maad yab nba ban’o k ban daa daa maad sua wan tie yua nba. U bo bua g niib ń bann k l tie g Yendu Bija ń cagn i, k ban kpi’ug, k wan yied kpienm siign. U bo bua k ban la u yaalidug tuona, u binbem, u kuum yen u yiedu n ninŋ i g bann yen mɔni k wano n tie *Mɛsi. Mark kon ŋɔn kadaaɔg ne ninŋ g Yiesu n tie Mɛsi, *Fietua nba g *Suif-nba bo guu. U ŋɔn g Yiesu tie Yendu Bija, g biɛ ŋɔn g Yendu bua u Bija hal bonciɛnn.

Yiesu muand kadaaɔg ne ninŋ g Yendu *bal nag o. Wan tien bona nba kul n ŋɔnŋ k u maam tie mɔni. U teb yiɛnm, g bel g yaan *sanpola g biɛ maad yen yikod. Niib bo tu la l yaalidug bona kul, lan lid’b ban bual k u ne tie ŋmaa i ?

Mark bua g nil kul ń bual u kua l buali i, g Yiesu tie ŋmaa i, g lii kadaaɔg ne g bann yen mɔni Yiesu n tie yua nba.