Sipaanm piig makpanjam
25
1 Yendu *ŋaag tan baa tie nyan makpanjam ne nyan i :
Sipaanm piig nne bo tug b kpam fida,
g saa g daan bu kal g guul puojua.
2 B siign ninŋ,
sipaanm banmu bo ceg,
g banmu mɔ g ceg.
3 G yab g ceg tug b fida g g tug kpam,
4 g yab ceg mɔ tug b fida g biɛ piɛg kpam g diɛ.
5 Puodaan n bo g baad tonm nyan,
k b tignd tignd g tan guan b kul.
6 G yɔug tan siid,
k b gbad g nil yign :
“ Puodaan baal o,
puodaan baal o,
fiil man g tuog’o. ”
7 L youg,
k l sipaanm kul fiil g ŋanm g bobn b fida.
8 G yab bo g ceg nyan maad yab ceg k ban te’b kpam k b fida bua ń junn.
9 G yab ceg ŋmiɛn’m :
“T kpam kan dagd g tien t fida n,
g biɛ tenn g tien i yal n,
gad man yab nba kuad kpam buol g daan daa g tien i fida n.”
10 Ban paan g saa yaa youg g daan bu daa,
g puodaan pund.
K wano yen sipaanm nba bo bobn g guu’ug nyan,
taan g kua ban bu di puokuanu jaanm naan,
k b luon gann.
11 G sipaanm nba bo tenn nyan tan guan g maad :
“ Canbaa,
canbaa,
luod gann tin kua. ”
12 G puodaan maad :
“ Yen mɔni,
n maad’i,
n g ban’i. ” "
13 G Yiesu ji guan g maad’b lann i :
" I ceg man i kua po g daa guand man,
g dugn i g ban youg g bual daal.
Tuonsunna bantaa makpanjam
14 Yendu *ŋaag biɛ tan baa tie nyan makpanjam ne nyan i :
Jua nne n bo saa doug,
g yiin u tuonsunna g tug u mɔgm g guun’m.
15 U bo tug dibala tuda ŋanmu g tie yend,
g tug dibala tuda ŋanle g tie lua,
g tug dibala tudl mɔ g tie yua tenn.
U bo tie yua kul yen u paalu n dagd’o nand i,
g fiil g gad.
16 G yua bo gaal dibala tuda ŋanmu nyan gad g tien kpinkpeonŋ g duo nyuad dibala tuda ŋanmu.
17 G yua bo gaal dibala tuda ŋanle mɔ duo nyuad dibala tuda ŋanle.
18 G yua bo gaal u canbaa buol dibala tudl gad g gbiil buoug g piin l ligli.
19 L wai yo,
k b canbaa ŋann tan kpen,
g yiin’m g yua kul ń ŋɔn wan tug ligli ŋann g sun yal.
20 G dibala tuda ŋanmu daan ŋann nagn g maad :
“Canbaa,
dibala tuda ŋanmu nba k a daan guun’n n nyan.
Min la nyuad dibala tuda ŋanmu nba mɔ n nyan.”
21 K u canbaa maad :
“ N faa,
a tie tuonsunmɔn i,
a sun lan bual nand,
n guun’a ŋalman waam nne k a ŋanm g kub.
N ji bu guun’a yal nba yab g cie lann.
N pal manŋ paaa,
baal t kul ń gii be pamann n. ”
22 G dibala tuda ŋanle daan ŋann mɔ nagn g maad :
“ Canbaa,
dibala tuda ŋanle nba k a daan guun’n n nyan,
min la nyuad dibala tuda ŋanle nba mɔ n nyan. ”
23 K u canbaa maad :
“ N faa,
a tie tuonsunmɔn i,
a sun lan bual nand,
n guun’a ŋalman waam nne k a ŋanm g kub.
N ji bu guun’a yal nba yab g cie lann.
N pal manŋ paaa,
baal t kul ń gii be pamann n. ”
24 Yua bo gaal dibala tudl nyan mɔ nagn g maad :
“ Canbaa,
n tu ban k a maam paa,
k a yend ŋan g bul naan,
g wo ŋan g den naan.
25 N daan jie i,
g gad g daan piin a ligli tinŋ n,
lan nyan,
gaal a bonn. ”
26 K u canbaa maad’o :
“ A tie fam i,
a tie tuonsunn nba g bua fala baa waam nne,
ŋan daan ban k n yend naan k n g bul,
g wo naan k n g den nyan,
27 a daan bo bu tug n ligli g bil ban bilg ligli naan i,
n tan gii kpen yaa daal min gad g gaal n ligli yen l nyuad.
28 Gaal man u dibala tudl ŋann g te dibala tuda ŋanmu daan.
29 Nnyan i k b bu pugn yua mɔg,
wan ŋanm g mɔgd,
yua g mɔg mɔ,
ban fiel wan mɔg yal mɔno.
30 Lann,
tug man tuonsunfam ne g lu’ug cincann,
bunbɔnn n,
naan g niib baa buud g ŋman nyina. ”
Ŋanduna buud daal
31 Daal nba g *Nifosaal Bija bu guan u yudand n,
yen u *malɛg-nba kul,
u bu kal u yudand kog po i.
32 Ŋanduna niib kul ń tigl u buol.
U bu paad’b caga ŋanle i,
nyan pekpaal n tu paad pei yen ŋuabi nyan.
33 U bu sen pei u nuujendu po i,
g sen ŋuabi mɔ u nuuganŋ.
34 L youg bad ŋann ń ji maad u nuujendu yab :
“ Baal man,
yinm nba k n Baa tie’i u *ŋalbalg.
Baal man,
ŋaag ne tie i faal i,
u bo bobn lann i,
i po,
g sua ŋanduna daa g cil.
35 G dugn kom bo mɔg’n k i tie’n jied k n dii,
g nyunnyuglu mɔg’n,
k i tie’n nyum k n nyuu.
N bo tie saan,
k i gaal’n.
36 N bo g mɔg tiɛd,
k i tie’n tiɛd k n liɛ,
n bo yiɛl k i baal g gɔnn’n,
k n be dansaldieog n,
k i baal g fuond’n. ”
37 L youg,
*nimɔnm ŋann ń bual’o :
“ T Yonmdaan,
bɛ youg u k t bo la’a,
g kom mɔg’a,
k t tie’a jied k a dii i,
g nyunnyuglu mɔg’a,
k t tie’a nyum k a nyuu i ?
38 Bɛ youg u k t bo la’a k a tie saan,
k t gaal’a ŋaag n i,
k a g mɔg tiɛd,
k t tie’a tiɛd k a liɛ i ?
39 Bɛ youg u k a bo yiɛl lann i kaa k a be dansaldieog n,
k t gad g fuond’a nii ? ”
40 L youg bad ń maad :
“ Yen mɔni n maad’i,
youg nba k i bo tien l bona g tod n naataani nba tie tali n ninŋ baa yend,
i bo tien min i. ”
41 L po gii pend,
Bad ń yuand g maad yab be u nuuganŋ po :
“ Sud man ne,
Yendu yie yinm i.
Gad g kua man muu nba so g kan ban g junn ne ninŋ,
Yendu bo baan lann i *Sitaan yen u malɛg-nba po.
42 G dugn kom bo mɔg’n,
k i g tie’n jied,
g nyunnyuglu mɔg’n,
k i g tie’n nyum.
43 N bo tie saan,
k i g gaal’n.
N bo g mɔg tiɛd,
k i g tie’n tiɛd k n liɛ.
N bo yiɛl,
k i g baal g fuond’n,
k n be dansaldieog n,
k i g baal g fuond’n. ”
44 L youg ban mɔ ń guan g bual’o :
“ T Yonmdaan,
bɛ youg u k t bo la’a g kom mɔg’a,
g nyunnyuglu mɔg’a,
k a bo tie saan,
k a bo g mɔg tiɛd,
bɛ youg u,
k a bo yiɛl lann i kaa k a bo be dansaldieog n,
k t g tod’a ni ? ”
45 L youg wan mɔ ń guan g ŋmiɛn’m :
“ Yen mɔni n maad’i,
yaa youg nba k i bo g tien siɛl g bu tod n naataani nba tie tali n ninŋ baa yend,
min i k i bo g tod. ”
46 Nnyan i k l nibiid bu kua cicagm nba g mɔg gbennu n ninŋ,
nimɔnm ń la *miɛl nba kan ban g gbenn. "