Yiesu yied
24
1 Laad daal siŋapanpan,
g puob gad kakul buol,
g diɛ tilaali nba k b bo bobn,
2 g la g kakutann biid,
g bind g dua siɛl po.
3 K b kua l ninŋ,
g g la Yonmdaan Yiesu gbannand.
4 B ji bo g ban ban bu mali yal nba,
b sua g niib banle sie b buol,
k b liɛda nyili g tuud nyan tanyigdu nyan.
5 G jiwaani kua’b,
k b tibn.
K l niib maad’b :
" Bɛ n te k i kpaan kpienm siign ninŋ,
yua nba fo i ?
6 U g be ne buol ne.
U yied o.
Tiɛd man wan bo maad’i yal nba,
youg nba k u daa bo be Galile.
7 U bo maad k l tie k ban suol *Nifosaal Bija g mubn’o biiddanm nui n ninŋ,
k ban kpaa’ɔg *dapunpɔnn po,
k wan yied daa ŋantaa daal. "
8 K b ji tiɛd Yiesu n bo maad’b yal.
9 G nyiɛ kakul buol g guan g muand u *sundi piig yen yend yen lieb kul l kul ne.
10 L puob bo tie Magdala Mari,
yen Sann,
yen Mari yua nba tie Saak naa,
yen puolieb,
k b kul maad u sundi yal nba bo tien.
11 Ama k b g gaal l puob maam,
k l maa b yaa po,
l maam bo g mɔg yul.
12 Yen l yaa kul,
g Piɛr fiil g san g gad kakul buol,
g duand g la caba kua,
g guan g lebd,
k l yaa g lid’o yen yal nba tien ne.
Yal tien Emayus sɔnu po
13 L daal mɔno,
l sua g Yiesu *ŋuantieb banle saa doug nne k b yi Emayus.
L doug yen Serusalɛm bo tie nyan taabana tuda piig yen ŋanle nyan i.
14 B bo paa g maad b ŋmiɛl n ninŋ yal nba kul bo tien nyan po i.
15 Ban bo paa g pag yen lieb nyan,
g Yiesu mɔno nand’b g sonm yen’m.
16 K b nyuan’o yen b ninbina,
g siɛl yen legn’m k b g fid g bann’o.
17 K u bual’b :
" I sonm g pag yen lieb bɛ po i ?
" K b sed cɔga.
18 K b ninŋ yend,
yua k b yi’ug Kleyopas nyan,
ŋmiɛn g maad :
" Fin kukua n be Serusalɛm ne,
g g ban yal nba tien dana ne ninŋ ii ? "
19 K u bual’b :
" Bɛ n tien i ?
" K b ŋmiɛn’o :
" A g gbad yal nba baal Nasarɛt Yiesu ii ?
U bo tie Yendu *sogni i,
g ŋɔnŋ u paalu u bontitied n ninŋ,
yen u maam n ninŋ,
Yendu yen niib kul nunŋ n ninŋ.
20 K t *salg-yidkab ciɛnm yen t doug n yudanm suol’o,
g mubn’o *Rom gobna k wan jiɛl u buud g maad k u dagd yen kuum.
K b kpaa’ɔg *dapunpɔnn po.
21 K tinm yen bo daan k wano n bu fiel Israyɛl buolu b ninnanda nui n ninŋ.
Yal nba biɛ pugn tie g dinne ji tie daa ŋantaa n nyan,
k l bona tien.
22 K t siign ninŋ puosiɛb biɛ ŋmad t yam.
B gad kakul po siŋapanpan,
23 g g la Yiesu gbannand,
g guan g maad’ti,
k b la *malɛg-nba k b maad k u fo.
24 K t siign ninŋ siɛb mɔ gad kakul po,
g la nyan puob n yaan maad nand nyan.
Ama b yen g la wano Yiesu. "
25 Lann i g Yiesu maad’b :
" I yam g fo !
I g gaan tonm Yendu sogni-nba n yaan bo maad yal nba.
26 L bo g tie g *Kristo ń la fala ne kaa yo,
g fid g kua u yudand n ninŋ ii ? "
27 Lann i k u ji cil g ŋɔnŋ’b yal nba bo diɛn Yendu Kadaaɔg n u po yen l niimn.
U bo cil *Moyis n bo diɛn yal g daan pund Yendu sogni-nba kul n bo diɛn yal.
28 Ban yaan nag doug nba k b saa,
k u tien nyan u bu pend nyan,
29 ama k b niid niid’o g tan gɔgl’o g maad :
" I be yen tinm,
k l maa yendu baa k l ji bua n bɔnn i.
" G Yiesu kua yen’m ŋaag n.
30 Wan yaan kal g bu di yen’m,
k u juab kpanu,
g tien Yendu balg,
g jend jend g tie’b.
31 K b ninbina ji luod k b bann’o.
L youg k b kpaan g luol’o.
32 K b ji maad b ŋmiɛl n ninŋ :
" Youg nba k u bo pag yen tinm sɔnu po,
g ŋɔnŋ Yendu Kadaaɔg n diɛni niimn ninŋ,
t pala tien bo g paag ii ? "
33 L youg mɔno,
k b fiil g guan Serusalɛm,
g la u ŋuantieb piig yen yend ŋann k b taan g be yen b lieb.
34 K b kul maad l ŋuantieb banle :
" Yonmdaan l yied yen mɔni i,
Simɔn la’ɔg. "
35 K banm banle mɔ dugn’m yal nba bo tien sɔnu po,
g biɛ maad k b bann’o youg nba k u jend kpanu i.
Yiesu ŋɔn u kua u ŋuantieb
36 Ban yaan maad nnyan,
b sua g Yiesu sie b siign ninŋ,
g maad’b :
" Laafiɛ ń gii be yen’i. "
37 K b yam ŋmad,
g jiwaani kua’b,
k b mali k b la tinkpiil i.
38 Ama k u maad’b :
" Bɛ n te k i yam ŋmad,
k i mali munle-le i ?
39 Diid man n nui yen n titala.
Min i yen mɔni.
Sii man’n g diid.
Tinkpiil g mɔg gbannand,
g bual kpaba,
nyan yin nyuan k n mɔg nand ne. "
40 Wan yaan maad’b nnyan,
k u ŋɔn’m u nui yen u titala.
41 K u *ŋuantieb pala manŋ k l yaa g lid’b bonciɛnn.
B yen daa bo g gaal k l tie mɔni.
Lann i k u maad :
" Te’n man jied k n di. "
42 K b tie’og janpulgl,
43 k u gaal g ŋman b nunŋ n ninŋ,
44 g maad’b :
" Min daan tu be yen’i,
n daan maad’i g yal nba kul k b bo diɛn k l nyuan n po *Moyis kadaaɔg n ninŋ yen Yendu *sogni-nba kadaaɔg n ninŋ yen biɛyani n ninŋ,
k l tie k lan tien g gbenn i. "
45 Lann i k u fand’b,
k ban fid g bann Yendu Kadaaɔg n diɛni niimn.
46 G maad’b :
" L diɛn g *Kristo bu la fala g kpe,
g daa ŋantaa daal,
wan yied kpienm siign.
47 K lan cil Serusalɛm saa yen buoli kul n ninŋ,
k u sann po b bu muand g niib ń lebd b binbem,
Yendu ń piin b biid.
48 Yinm n tie l sieda-nba.
49 Min nuan bu sun n Baa n yaan puon yal nba g te’i.
Yinm,
i be man doug ne ninŋ saa yen daal nba k i tan bu gaal paalu nba nyiɛ polu po. "
Yiesu duo u Baa po