Foŋanm jiid yab dug Yiesu po
2
1 Jaanm nba k b yi *Pantekuot nyan daal bo pund g sua g yab dug Yiesu po kul taan lieb yenn buol i.
2 B tan gbad g fuug nne nyiɛ polu nyan faaciɛnu nyan g baal g begl ŋaag nba ninŋ k b bo kal.
3 K b la g siɛl nne tie nyan lani nyan g naan muukpaana g paad paad,
g maan nil kul po.
4 L youg k b kul gbie yen *Foŋanm g ji maad mabuoli.
Nil kul bo maad mabuolu nba g Foŋanm bo cab’o k wan maad i.
5 L bo sua g *Suif-nba nba ŋua Yendu yen b pal kul nyiɛ doi kul g baal g be Serusalɛm.
6 Ban gbad nyɔgl,
k b tigl g g mɔg dindin.
K l lid’b bonciɛnn yen nil kul n gbiɛ k b maad u maam n.
7 L bo yaa g lid’b bonciɛnn k b pala manŋ k b ji maad :
" Niib nba maad ne kul g tie Galile yab kaa aa ?
8 K l tien nle i k t ninŋ ne,
g yua kul gbiɛ k b maad u maam n i ?
9 T ninŋ ne,
niib be g nyiɛ Part g lieb nyiɛ Medi g lieb nyiɛ Elam.
Mesopotami yab be,
g Suude yab be,
g Kapadɔs yab be,
g Pɔn yab be,
k Asi yab be.
10 G lieb mɔ nyiɛ Frisi g lieb nyiɛ Panfili g lieb nyiɛ Esipt g lieb nyiɛ Libi dingbann nba k b yi Siirɛnn.
Lieb be g nyiɛ Rom :
11 siɛb tie Suif-nba g lieb tie *buolfanu yab nba kua Suif-nba jaandi.
G lieb be g tie Krɛt yab g lieb mɔ tie Arabi yab.
Yen l kul ne,
t kul gbiɛ k b maad t maam n,
Yendu n sun tuonŋana nba kul. "
12 L bo yaa g lid’b bonciɛnn k b ji g ban ban mali yal,
g ji maad b ŋmiɛl n ninŋ :
" Ne mɔ tie bɛ n ne i ? "
13 Ama g lieb yen laa’b g maad :
" B ne nyuu dimɔunŋ u g buo. "
Piɛr maad yen niwulug
14 L sua g Piɛr be yen Yiesu *sundi piig yen yend ŋann.
K u fiil g gaal maam,
g don niɛlu g maad niwulug :
" Yinm *Suif-nba yen yinm nba kul be Serusalɛm ne,
ŋanm g cenŋ man ne,
l tie k yin gbad bonn nba tien ne niimn i.
15 Niib nba k i nyuan’m ne,
daa mali man k b buo daam kaa.
T daa be siŋaaɔg n kud munwai i.
16 Ama Yendu *sogni Sowɛl n bo maad yal,
lann n ji tie ne.
U bo yed
17 g Yendu maad :
“ Dijijuog dani n,
n bu te n *Foŋanm ń paad paad g jiid nil kul po.
I bijabi yen i bipuobi baa maad min ŋɔn’m yal nba.
N bu ŋɔn i nipaaɔnŋ,
bona nba wuo.
I nikpela bu la bona danŋd n ninŋ.
18 Yen mɔni,
l dani n ninŋ,
n bu jiin n Foŋanm jab yen puob nba tie n tuonsunna po.
K ban gii maad min ŋɔn’m yal nba.
19 N bu tien yaalidug bona polu po
g tien palug tinŋ po :
sɔm tan baa be,
g muu be,
g munyinaajuaɔg be.
20 Yendu tan bu bɔnn,
ŋmaalg ń mɔnn peounŋ nyan sɔm nyan.
L kul ne bu tien yo,
Yonmdaan daal ń pund.
L daal baa tie digbenŋl i,
g tie yudand daal.
21 Nnyan,
yua nba kul taa Yonmdaan sann,
u bu la *fielu. ” "
G Piɛr pugn g maad :
22 " Israyɛl yab,
cenŋ man min bu maad yal ne.
Yendu bo ŋɔn’i wan tie Nasarɛt Yiesu yikod nba.
Yinm mɔno,
i ban Yendu n te g Yiesu tien palug yen yaalidug bona nba i buol.
23 B daan suol l jua i g tie’i,
nyan Yendu n bo liid g jag nand nyan.
Yendu bo liid g ban l po.
Yinm n daan te g yab g ban Yendu kpaa’ɔg *dapunpɔnn po k u kpe.
24 Ama g Yendu nyan’o kuum fala n,
g yied’o kpienm siign.
G dugn kuum yen u paalu kul,
u daan kan fid gii diɛ’ɔg.
25 *Dafiid mɔno bo maad u po k nne :
“ N daan tu nyuan Yonmdaan k u be yen’n youg kul
g be n nuujendu k min daa jie siɛl.
26 L po n te k n pal man k n yiin pamanyani kua
g ban g baa n gbannand tan gii be kakul n,
n baa dua g mɔg *dindann
27 g dugn n ban k a kan nyɔl’n tinkpiiug n,
k a kan ŋaa a niŋan gbannand ń bed kakul n.
28 A ŋɔn’n miɛl sɔni
g baa be yen’n,
k n pal man. ” "
29 Lann i g Piɛr biɛ maad :
" N ninjanm,
l dagd yen min maad’i mamɔni.
T yaaja Dafiid bo kpe k b pii’ug.
U kakul biɛ daa be yen dinne,
bii i ?
30 Dafiid bo tie Yendu *sogni i,
g ban g Yendu bo puon’o g pol,
k u yaabuona n ninŋ yend tan bu kal u badkog po.
31 L po n te k u bo liid g ban g *Kristo tan bu yied kpienm siign.
U bo maad u po k nne :
“ Yendu kan nyɔl’o tinkpiiug n,
u gbannand mɔ kan bed kakul n. ”
32 T kul tie sieda-nba g Yendu yied wano Yiesu kpienm siign,
33 g don’o polu po g kaan’o u jendu,
g tie’og *Foŋanm nba k u bo puon.
L Foŋanm i k u yad t po k i nyuan g biɛ gbiɛ ne.
34 Wano Dafiid mɔno bo g duo polu po,
ama g yen maad :
“ Yonmdaan Yendu maad n Yonmdaan :
kal n jendu,
35 saa yen min tan bu te
ŋan paad a ninnanda. ”
36 Lann l tie k Israyɛl buolu kul ń bann yen mɔni i :
Yiesu nba k i daan kpaa’ɔg dapunpɔnn po k u kpe nyan,
wano i g Yendu te k u tie Yonmdaan g biɛ tie yua nba k u lugd’oa. "
37 Ban gbad l maam,
k l siɛ b pala ;
lann i k b bual Piɛr yen u lieb :
" T ninjanm,
t bu tien nle i ? "
38 G Piɛr ŋmiɛn’m :
" Lebd man i binbem,
k ban wul’i nyum Yiesu Kristo sann po,
g Yendu ń piin i biid g te’i Foŋanm.
39 G dugn Yendu n bo puon’i puoni nba tie yinm yen i bid yal i,
yen yab nba kul be banfagl,
yab nba kul g Yonmdaan t Yendu bu l yiin’m k ban te u yab. "
40 G Piɛr biɛ maad maam bonciɛnn g kpaan k ban tuo,
g paan b pala g maad’b :
" Ŋaa man Yendu ń fiel’i g nyan’i biiddanm siign. "
41 L daal,
yab bo tuo g gaal Piɛr maam k b *wul’b nyum,
k b pugn yab dug Yiesu po bo g luol tuda ŋantaa.
42 B bo g ped yen Yiesu *sundi tundl,
g naataann be b siign,
k b taand g bɔgd kpanu g ŋman g biɛ taand g jaand.
Yab dug Yiesu po n bo be nand
43 Yiesu *sundi bo tie palug yen yaalidug bona bonciɛnn k l kuand nil kul jiwaani.
44 Yab bo dug Yiesu po kul bo taa mɔb i,
g yua kul n mɔg yal tie tintaanbonn.
45 B bo tu kuad b tini yen b mɔgm g biid yua kul yen u payiɛnu i.
46 B bo mɔg maalyenm i g taand lieb *jaanddeciɛɔnŋ n daal kul.
B ŋai n ninŋ,
b bo biid kpanu,
g di b jied yen pamann yen cɔlunŋ.
47 B bo dond Yendu,
g niib kul pal man b po.
Daal kul Yonmdaan n bo tu fiel yab nba,
u bo tu pugn’m Kristo-yab *tintaanu n ninŋ i.