Yiesu *sundu Pɔl nba diɛn kadaaɔg ne bo tie *Suif i k b mal’o Tars, Silisi diem n ninŋ. U kua Yendu maam kalaatu Serusalɛm i k u kalaatu gad fagm hal bonciɛnn. U pal bo man Yendu maam po yen Suif-nba danm bogda po bonciɛnn. Cilg youg, Yiesu sundi n bo gaal *Foŋanm g cil b tuonn, Pɔl bo g bua Kristo-yab nublu. U bo cagn’m bonciɛnn yo, g diyenn t Yonmdaan Yiesu Kristo tan cend’o g sun’o k wan gad dingbana n ninŋ kul, g muand yab nba g tie Suif-nba *Laabamann, k u tuo g ji waa g muand g kaand Kristo-yab *tintaanu.

L youg nyan, *Rom doug n bo tie dogbenŋl ŋanduna n ninŋ kul. Badciɛn Sesaar bo kal l po i. Kristo-yab tintaanu bo be Rom doug n mɔ, ama Pɔl kaa bo kaan l tintaanu. G nyaan u yen bo ban Kristo-yab bonciɛnn k b be l doug n ninŋ. U bo bobnd g bu gad g fuond banm i g diɛn kadaaɔg ne g tie’b. U bo bua k u gii baal g ŋanm g tund’b Laabamann g pugn, ban tod’o k wan pend g gad hal Ɛspany i, g daan muand l po yab mɔ Laabamann.

Pɔl kadaaɔg ne ninŋ, u cind g ŋɔn g Laabamann tie paalu i g Yendu diɛ g suun yen tuonn, g lebd niib pala yen b binbem k ban fid g la *fielu (1-8).

Munle po (9-11), Pɔl maad g Yendu n bo lugd Suif-nba k b tie u buolu nyan, k u kan ŋaa’b fam. G baa b ninŋ bonciɛnn gii yie Yiesu mɔno, g youg baad k b tan bu tuo’og, k banm yen *buolfanu yab kul tan bu taan gii tie buolyenu. Yendu jie Suif-nba yen buolfanu yab ninbaaɔg g dugn b kul tie biiddanm i.

Muntaa po (12-16) Pɔl maad Rom Kristo-yab k ban ŋanm gii tuag sɔnŋanu, gii paand lieb pala. U juod g fuond fuond’b i, g ŋɔn’m wan bu sun yal nba l gii tie k u baal b buol.