Pɔl guan Efɛs doug n
19
1 Apolɔs n bo be Korɛnt yaa youg,
l bo sua g Pɔl paa sɔnu i.
U bo tɔgn doi nba be jɔa n ninŋ i,
g daan pund Efɛs.
U bo la Yiesu *ŋuantieb n ninŋ yenm l buol
2 g bual’b :
" Yin tuo g dug *Kristo po,
i gaal *Foŋanm ii ?
" K b ŋmiɛn’o :
" T g ban g gbad g Foŋanm be mɔno. "
3 K u biɛ bual’b :
" B wul’i nyunwullann po i ?
" K b mɔ ŋmiɛn’o :
" B wul’ti San *nyunwulu i. "
4 Lann i g Pɔl maad’b :
" San bo wuul niib nba bua ban lebd b binbem i.
U bo maad niib k ban tuo g gaal yua nba bu baal u puol po,
lan tie Yiesu. "
5 Ban cenŋ l lanbona g gbenn,
k b te k b wul’b nyum Yonmdaan Yiesu sann po.
6 G Pɔl maan nui b po g Foŋanm jiid b po,
k b maad mabuoli g biɛ sɔgn Yendu lanbona.
7 L niib kul bo taan g tie nyan piig yen niib banle nyan i.
8 Pɔl bo tien ŋmaali ntaa g saa *tintaann dieog n,
g tu gaal maam g maad yen papaal.
U bo muand’b Yendu *bal po i g kpaan g yab cenŋ’o ń gaal u maam.
9 Ama siɛb bo tien kangbadm i,
g yie g g cenŋ u maam,
g maad mabiid Yendu Sɔnu maam po niib kul nunŋ n.
Lann i g Pɔl yaad g ŋaa’b,
g tug Yiesu *ŋuantieb g gad yen’m Tiranus kalaatu ŋaag,
g pag yen’m daal kul Yendu maam po.
10 Pɔl bo tie nnyan i,
g daan biin bina ŋanle,
hal g *Suif-nba nba be Asi dingbana n ninŋ yen yab nba g tie Suif-nba kul,
tan gbad Yonmdaan maam.
Sefa bid maam
11 Yendu bo te g Pɔl tie yaalidug bona nba g mɔg l liel.
12 Hal g niib tan tugd Pɔl gbannand n sii ninfiɛni nba,
lann i kaa caba nba mɔno,
g saa g maand yiɛnm po k b paagd.
G yab nba bo mɔg *sanpola mɔ,
k l sanpola ŋaan’m.
13 L bo sua g *Suif-nba nne be g waa dingbana g biel g yaand sanpola nba bo ŋua niib.
B mɔ bo bign k ban gii taan Yonmdaan Yiesu sann g biel g yaand sanpola.
B bo maad sanpola :
" Yiesu nba g Pɔl muand u maam nyan sann po,
n maad’i ŋaa’b man. "
14 Sefa bid banlile n bo suun l tuonn.
Sefa mɔ bo tie Suif-nba *salg-yidkab ciɛn i.
15 Lann i g sanpola ŋmagd g maad’b :
" T ban Yiesu g biɛ ban Pɔl mɔ n tie yua,
k i mɔ i,
i tie b lɛ i ? "
16 G jua nba g sanpola bo ŋua’ɔg nyan yug g baa b po,
g pua g paad’b,
g janm’b hal k b san g nyiɛ niiyana l ŋaag n.
17 Yab bo kua Efɛs nyan kul,
Suif-nba yen yab g tie Suif-nba,
b kul bo gbad yal tien.
Jiwaani bo kua b kul,
k b ji dond Yonmdaan Yiesu sann.
18 Niib bonciɛnn nba bo tuo g gaal Yiesu bo baad g maad b biid niib kul nunŋ n.
19 G yab bo mɔg nyɔgu g tie palug nyan,
b ninŋ bonciɛnn baal yen b kadaada g juu niib kul nunŋ n.
K b kal g dugn g la k l kadaad daaɔg tie dibala tuda piinmu.
20 L bo tien nnyan i,
g Yonmdaan maam yad kaannaa kul,
g biɛ ŋɔnŋ k l mɔg paalu.
Nyɔgl tien Efɛs doug n
21 L po n pend g Pɔl tug yanjagl k u bu gad Maseduann yen Akaayi doi n yo,
g fid g gad Serusalɛm.
U bo maad :
" N gii pund Serusalɛm,
l tie k min gad Rom i. "
22 Lann i k u sun u todkab Timote yen Erast Maseduann doug n,
g nyaan biɛ tien dana waam Asi dingbana n.
23 L youg,
g nyɔgl tien bonciɛnn Yendu Sɔnu maam po,
24 g dugn Demetriyus po.
Wano Demetriyus bo tie mamaal i.
U bo diɛ ligtana i g maal yendu Artemis dondl dieog bonninnana.
L tuonn n bo kuand wano yen u tuonsunna ligli nba bo g tie ligbig kaa.
25 Lann i k u taan mamaala kul yen yab nba bo suun l tuonbuolu kul g maad’b :
" N ninjanm,
i ban k t tuonn ne po n te k t be t yam n.
26 N tua i gbad g biɛ la Pɔl n tie yal a.
U maad g niib n tag yendui nba yen b nui g tie yendui kaa.
U te g niib bonciɛnn gaal u maam k l tie mɔni.
L g tie Efɛs doug n ninŋ ne kua kaa,
l tenn waam nne yen l maam ń yad Asi dingbana n ninŋ kul.
27 L maam g bua n biil t tuonn kukua kaa,
ama l bu yuan yenduciɛn Artemis dondl dieog mɔ g biɛ te wan juod fam ;
wano nba k Asi dingbana kul yen ŋanduna niib kul pug’o. "
28 Ban gbad l maam,
k b pala biil,
k b ji yign g maad :
" Efɛs yab yendu Artemis n tie yenduciɛn ! "
29 G nyɔgl yad doug n ninŋ kul.
K b suol Pɔl yegni Gaayus yen Aristark g gad yen’m doug n,
niib n bo tu tigi naan.
Pɔl yegni banle ŋann bo tie Maseduann yab i.
30 Pɔl bo bua wan gad niib n tigl naan nyan i,
g Yiesu *ŋuantieb bel’o.
31 K Asi tuonsungbenŋa nba bo tie u dɔnn-nba nyan,
mɔ sun g maad’o k wan di sugl g daa saa l buol.
32 L youg l sua g niib nba bo tigl nyan,
g ŋmadl tien b siign.
G yenm yign k nne,
g lieb yign k nne.
B ninŋ bonciɛnn bo g ban yal po te k b tigl monɔ.
33 Lann i g *Suif-nba tug Alɛksandr g nyan’o niwulug n g sen’o liig.
G niwulug n ninŋ siɛb ŋɔn’o yal po te k b yign.
K u don nuu g bu gaal maam g maad mɔni.
34 Ama niwulug n bann k u tie Suif,
k b yie,
g ji tand g maad k l g luol nyan kud munle nyan.
B bo tand g tua :
" Efɛs yab yendu Artemis n tie yenduciɛn ! "
35 Yua nba k u tuonn bo tie k wan gii diɛ b doug n kadaad nyan n bo tan fid g te g niwulug suon,
k u maad’b :
" Efɛs yab,
nil kul ban k Efɛs doug n guu yenduciɛn Artemis dondl dieog,
yen u ninnaɔnŋ nba nyiɛ polu g baa.
36 Baa sua kan fid g nai k l g tie nnyan,
lann suol man i kua,
g ŋanm g mali u,
g fid g sun yin bu sun yal nba.
37 I baal yen niib ne,
ne buol k b yen g biil baa siɛl t yendu dondl dieog n,
g bual k ban sugl t yendu.
38 L gii tie g Demetriyus yen u tuonsunlieb mɔg maam yen sua i yaa,
buuddanm be,
g mɔg ban bu niib daal nba.
Ban gad yen l maam b buol.
39 L biɛ gii tie k i mɔg siɛl g bu bual i yaa,
tintaanciɛɔnŋ nba mɔg yiko nyan n bu diid l maam.
40 Dinne tintaann nba k t tien ne,
b tan bu fid g jalg’ti k t tie niib nba g cɔlm i.
G dugn t kan fid g maad yal po te k t taan lieb ne buol ne. "
41 Wan maad nnyan g gbenn k u cab niwulug.