22
1 " N baa-nba yen n ninjanm,
cenŋ man min mɔg yal mɔlane g bu maad’i g kɔn n kua po. "
2 Ban gbad g Pɔl maad yen’m *Ebro-nba maam,
k b ŋanm g tien suoo.
Lann i k u maad’b :
3 " N tie *Suif i,
g mal Tars,
Silisi doug n.
Ama b ŋub’n Serusalɛm ne i.
G Gamaliɛl te n canbaa.
Wano n tund’n,
g ŋanm g ŋɔn’n t yaajanm bogda.
N pal bo siɛd Yendu po nyan lan tie i mɔ nand dinne nyan i.
4 N cagn yab nba bo tuag sɔnu nba k n tuag mɔlane,
g tan kpii’b mɔno.
N fid g suol jab yen puob g luon’m dansaldieog n.
5 *Salg-yidkab kul ciɛn yen Suif-nba nikpela bu fid g maad k n maad mɔni i.
N gaal kadaad mɔno b buol g bu te t ninjanm nba be Damas.
N bo saa l buol i,
g daan bu suol yab nba bo tuag l sɔnu g lol’b g gad yen’m Serusalɛm g te k ban dad b tubl.
6 Min bo paa sɔnu po g saa g tan nag Damas,
yensikpikpalg po,
n tan sua g yinyiem nyiɛ polu po g baal g fand n buol kul.
7 K n baa tinŋ n,
g gbad niɛlu nne,
k l maad’n :
“ Sɔl,
Sɔl,
laabaal k a cagn’n i ? ”
8 K n ŋmiɛn :
“ Yonmdaan,
a tie ŋmaa i ? ”
K l niɛlu ŋmiɛn’n :
“ Min n tie Nasarɛt Yiesu,
a cagn min i. ”
9 Yab nba bo be yen’n,
b bo la yinyiem nuan,
ama b bo g gbad yua nba bo maad yen’n nyan yaa niɛlu.
10 Lann i k n bual :
“ Yonmdaan,
a bua k n sun bɛ i ? ”
G Yonmdaan maad’n :
“ Fiil g gad Damas,
l buol b daan bu maad’a min bua ŋan sun yal nba kul. ”
11 Nyan l yinyiem n bo te k n juan nyan,
n lieb n ji bo suol n nuu g gad yen’n Damas.
12 L bo sua g jua nne be l doug n k b yi’ug Ananias.
U bo tie yua nba ŋua Yendu yen u pal kul i,
g cɔln *Moyis kadaaɔg n diɛni,
g biɛ mɔg sann *Suif-nba nba kul bo kua Damas nyan buol.
13 Wano n bo baal g maad’n :
“ N ninja Sɔl,
guan g nyuand. ”
L youg mɔno k n nyuand g ji la’ɔg.
14 Lann i k u biɛ maad’n :
“ T yaajanm Yendu n liid g lugd’a,
k ŋan bann u yanbuam,
g la Mɔnkundaan g biɛ gbad u mɔb n maam.
15 G dugn a tuonn tie k a gii tie u sieda gii maad niib kul ŋan la yal g biɛ gbad yal.
16 Lann ji daa taand kaa.
Baal g *wul nyum,
g taa u sann k a biid ń piin. ”
17 L puol po k n lebd Serusalɛm.
Diyenn k n tan jaand *jaanddeciɛɔnŋ n,
k l tan tie nyan danŋd nyan
18 k n la Yonmdaan k u maad’n :
“ Tien tonm,
g nya Serusalɛm doug n,
g dugn l doug n niib kan tuo g gaal maam nba k a bu maad g kun mɔni n po. ”
19 K n ŋmiɛn :
“ Yonmdaan,
banm mɔno ban k n bo tu saa *tintaann died n,
g so yab nba dug a po,
g puag’b g biɛ luond’b dansalg.
20 K ban biɛ bo kpii a sieda Etiɛnn,
n mɔ bo be l youg.
N bo taa yab nba bo kpii’ug nyan po i.
Min n bo guu b tiɛd. ”
21 Lann i g Yonmdaan maad’n :
“ Fiil,
n bu sun’a ŋan gad fagm,
yab g tie Suif-nba buol. ” "
Pɔl yen Rom sijenm kul ciɛn
22 Niwulug bo l cenŋ Pɔl maam i.
Wan tan maad yab g tie *Suif-nba maam yaa youg,
k b yign g maad :
" Biɛn man jua ne,
l ji g dagd yen wan gii mɔg miɛl ! "
23 B ji bo l yign i,
g lunn b tiɛd,
g yad tand polu po.
24 G sijenm kul ciɛn maad k ban tug Pɔl g kua yen’o sijekanŋ n,
g pua’ɔg gbana,
g niin’o k wan maad yal po te g niwulug yign u po nne.
25 Ama ban lol’o g bu pua’ɔg gbana,
k u bual sijenm ciɛn nba bo be l buol nyan :
" *Yiko cab k yin pua *Rom jua k b g bu’ug mɔno oo ? "
26 Sijeciɛn n gbad l maam k u gad g maad b canbaa :
" A ji bu tien nle i ?
Jua ne tie Rom jua i. "
27 Lann i g sijenm kul ciɛn gad g bual Pɔl :
" Maad’n,
a tie Rom jua yaa aa ?
" G Pɔl ŋmiɛn k ɛɛn.
28 Lann i g sijenm kul ciɛn maad’o :
" Min pa ligciɛnŋ yo,
g fid g te Rom jua.
" G Pɔl ŋmiɛn :
" Min nuan b mal’n k n tie Rom jua i. "
29 L youg mɔno yab bo bu niin Pɔl k wan maad nyan yad g ŋaa’ɔg.
G jiwaani kua sijenm kul ciɛn yen wan gbad g Pɔl tie Rom jua k u yen te k b lol’o yen kudsiseli.
Pɔl yen Suif-nba buuddanm
30 Lan fann,
g sijenm kul ciɛn l bua wan bann Suif-nba n jalg Pɔl yal nba po,
k u cab mɔb k b lod’o.
Lann i g te k b taan *salg-yidkab ciɛnm yen *Suif-nba buuddanm.
G biɛ te k b baal yen Pɔl g sen’o b kul nunŋ n.