Yiesu *ŋuantua San n diɛn dɔgdu kadaaɔg ne. San ŋɔnŋ’ti l kadaaɔg n ninŋ wan bo gbie yen *Foŋanm g Yiesu Kristo dɔgd g ŋɔn’o bona nba tuago tuago. Wan bo da kadaaɔg ne youg nba, l bo sua k u ji tie nikpel i g be Asi nintual Patmɔs kpendegl po. U bo be l buol g dugn u bo muand Yendu *Laabamann youg nba g *Rom badciɛn bo te k b cagn Kristo-yab, k b suol’o g gad g daan ŋaa’ɔg l buol k wan la fala.

U bo diɛn l kadaaɔg g tie Kristo-yab *tintaancaga ŋanlile nba bo be Asi dingbann n ninŋ nyan i.

B bo cagn Kristo-yab g dugn b bo diɛ b pala n ninŋ g Yonmdanyeno kua n be : lan tie Yiesu Kristo. K l cicagm n ninŋ i, g San diɛn l kadaaɔg g tie’b k wan paan b pala k ban ŋanm gii sie dindann n k l paa. Wan diɛn yal nba po k l ŋanm g yab kadaaɔg ne ninŋ tie wan la bona nba yen Yiesu Kristo n dɔgd g ŋɔn’o bona nba i. Maninnaɔnŋ n yab San kadaaɔg ne ninŋ. Niib n bund l maninnaɔnŋ nand nba l g taa taa nuan, g nyaan yal tie majal l n ninŋ tie g Yiesu Kristo po, Yendu yen u niib bu paad kuum yen *Sitaan.

San daa cind g ŋɔn u kua kadaaɔg ne ninŋ k u tie *Kristo nba yied kpienm siign *sundu i (1.1-8). G guan g ŋɔn lan tien nand nba k u la bona, g Yiesu Kristo maad’o k wan diɛn kadaad g te Kristo-yab tintaancaga ŋanlile nba be Asi dingbann n ninŋ nyan (1.9-3.22). L puol po i k u ŋɔn ban tug wano San g don’o polu k u la bona bonciɛnn nba.

San juod u kaadaaɔg g kpaand kpaandi g biɛ ŋɔn yua yied kpienm siign n puon puoni nba, lan tie : “ N baad mɔlane ” (22.6-21).

L tie mɔni i g bonyena be kadaaɔg ne ninŋ g mɔg jiwaani waam, g nyaan San yen g diɛn l kadaaɔg k wan jien Kristo-yab kaa, u bua wan paan b pala i youg nba k l paa b po. San n la bona nba ne kul bua lan ŋɔn Yiesu Kristo tuona yen u yiedu n bu baal yen nyuad nba u niib po i.