San n la yal nba polu po
4
1 L puol po k n biɛ diid g la g Yendu *ŋaag gann yaa.
G niɛlu nba k n bo gbad siɛnyoug k l do nyan naatunn n tu mɔ nand nyan maad’n :
" Do ne buol ne,
k n bu ŋɔn’a yal nba bu tien l puol po. "
2 L youg mɔno g *Foŋanm gbie n ninŋ,
k n la g badkog sie Yendu ŋaag n g sua kal l po,
3 g nyili g tuud nyan tannyinyili nba k b yi saspa yen sarduann nyan.
G yinyiem kaan g lind l badkog,
g nyili nyan tann nba k b yi emerod nyan.
4 G badkogi piinle yen ŋanna kaan g lind l badkog,
g nikpela piinle yen banna kal l po g liɛ tiɛpiend,
g biɛ yil wula fegli.
5 G tanyigdi yen fuug yen tatintandi nya l badkog buol.
G fida ŋanlile so l badkog nunŋ po,
lann n tie Yendu fuom banlile ŋann.
6 G bonn nne tie nyan mɔgl nyan,
g dua l badkog nunŋ po g fan cad cad cad.
G bonfuoda banna be sinsiign g kaan g lind badkog,
g mɔg ninbina b gbanu kul po.
7 Cincinn bonfuodl bo naan yen yanbɔl i,
g munle po yua naan yen naatonn,
g muntaa po yua yaa nunŋ po naan yen nifosaal nunŋ,
g munna po yua naan nyan kɔnbaciil nba yugl g be polu po nyan.
8 L bonfuoda banna bo mɔg yua kul kpinkpana ŋanluob i,
g biɛ mɔg ninbina b kpinkpana kul puol po yen l nuagn ninŋ.
G yendu n yen nyiɛɔg k b l yiin yanu ne g g buad :
" U ŋan,
u ŋan,
Yonmdaan Yendu Paaciɛnudaan ŋan,
wano nba bo be,
g biɛ daa be,
g biɛ baa be. "
9 Youg nba kul g bonfuoda banna ŋann tu yiin g dond,
g seln,
g tiend balg yua nba kal badkog po,
g biɛ fo youg kul nyan,
10 l youg u,
g nikpela piinle yen banna ŋann mɔ tu baa g gbaan u nintual n g pug yua nba fo youg kul.
B biɛ tu yid b fegli i,
g bil l badkog nintual n g maad :
11 " T Yonmdaan Yendu,
a dagd yen k a gaal yudand
yen sel yen paaciɛnu.
K l maa fin n tag bonn kul,
fin n bua k l kul ń gii be,
k l kul tag g be. "