Polupaann yen tinpaanŋ
21
1 Lann i k n la polupaann yen tinpaanŋ,
g dugn polukpel yen tinkpel bo bod g mɔgl ji g be.
2 K n biɛ la Yendu doug lan tie Serusalɛm-paann,
k l nyiɛ polu po Yendu buol g ji,
g tie nyan sikpenŋ nba ŋanm u kua,
g bobn g gbenn g bu kun u sal ŋaag nyan.
3 Lann i k n gbad g niɛlu nba paa nyiɛ badkog buol g tua :
" Mɔlane Yendu ji kua yen niib i.
U baa be yen’m k b tie u buolu,
k wano Yendu mɔno be yen’m g tie b Yendu.
4 U bu fiɛl b ninsiid kul,
kuum ji kan gii be,
kububuul ji kan gii be,
finfabni ji kan gii be,
fala ji kan gii be k l maa ŋandunkpel po juab o. "
5 G yua nba bo kal badkog po maad :
" Mɔlane n tien bonn kul bonpaann i.
" K u biɛ pugn g maad :
" Diɛn,
g dugn l maam tie mɔni i,
g dagd yen nil ń gii dug l po. "
6 K u biɛ maad’n :
" L kul tien g gbenn o.
Min n tie Alfaa g biɛ tie Omega,
g tie cilg g biɛ tie juog.
Yua nba g nyunnyuglu mɔg’o,
n bu te’og nyunbunbunn nyum nba tien miɛl k wan nyu faala.
7 Yua nba kɔn jad g paad,
l bona n baa tie u biinu nba k n bu te’og.
N baa tie u Yendu k u mɔ tie n big.
8 Ama jiwaandanm yen yab nba ŋaa g ji g dug Yiesu po yen yab suun yal kua yen nikpiila yen cuncona yen belbɔndanm yen yab pug yennaankad,
l faaɔgdanm kul nuan,
b bu lu’b buoug nba gbie yen celbilb g so muu nyan ninŋ,
lann n tie munle po kuum. "
Serusalɛm-paann
9 Lann i g *malɛg-nba banlile nba diɛ seni yinlile,
k l gbie yen yubɔnbuolu ŋanlile nba juod nyan ninŋ yend baal g maad’n :
" Baal k n bu ŋɔn’a sikpenŋ,
yua nba tie Pebig ŋaapuo. "
10 K n gbie yen *Foŋanm,
g malɛg tug’n g duo yen’n jual nba yab g biɛ kped yul po,
g ŋɔn’n Yendu doug,
lan tie Serusalɛm,
k l nyiɛ polu po Yendu buol g ji.
11 G Yendu yudand te k l nyili g tuud nyan tannyinyili nba k b yi sasp nyan.
12 G guonn nba kped g biɛ piɛ kaan g lind l doug,
g mɔg dimɔi piig yen ŋanle.
G malɛg-nba piig yen banle sie l dimɔi buol.
K Israyɛl cuga piig yen ŋanle sana diɛn l dimɔi po.
13 G dimɔi yintaa be puol,
g dimɔi yintaa be nintual,
g dimɔi yintaa be yaanŋ,
g dimɔi yintaa be yanbaɔnŋ.
14 K l doug guonn fiɛgl tua piig yen tana ŋanle po,
g Pebig *sundi piig yen banle ŋanm sana diɛn l tana po.
15 G malɛg nba bo maad yen’n nyan diɛ bonbignkal nba tien yen wula,
k l tie nyan kinkagl nyan,
g bu bign l doug yen u dimɔi yen u guonn.
16 L doug bo tie nyan deŋmabl nyan i,
k l fagnu yen l piɛnu kul ja.
G malɛg tug u kinkagl g bign l doug g la k l fagnu yen l piɛnu yen l kpedu kul ja,
g tie tuda piig yen ŋanlec.
17 G malɛg biɛ bign guonn g la k l tie kobg yen piinna yen ŋannad.
Malɛg bo bign nyan nifosaal n tu bigd nand nba nyan i.
18 B bo maa guonn yen tannyinyili nba k b yi sasp nyan i,
g nyaan g doug mɔno tie wula kua,
g fan nyan ninnyuandg nyan.
19 K b tug tanbuolu nba kul k l daaɔg paa bonciɛnn g tabn tabn doug guonn fiɛgl po,
k lan gii ŋan.
Cincinn tann bo yi sasp,
g munle po tann yi safiir,
g muntaa po tann yi agat,
g munna po tann yi emerod,
20 g munmu po tann yi oniks,
g munluob po tann yi sarduann,
g munlile po tann yi krisoliit,
g munniin po tann yi beril,
g munwai po tann yi topas,
g piig po tann yi krisopras,
g piig yen yenn po tann yi turkuas,
g piig yen munle po tann yi ametist.
21 K l gana piig yen ŋanle tien yen tanbuoli piig yen ŋanle nba daaɔg paa k b yi pɛrl nyan.
Gann kul bo tien yen pɛrl yenn i.
L doug n ninŋ bo mɔg finfanm g niib taand lieb l buol.
L finfanm bo tien yen wula nba g mɔg jɔgnd i,
g fan nyan ninnyuandg nyan.
22 L doug n ninŋ,
n g la ŋaag nba ninŋ k b pug Yendu k l maa t Yonmdaan Yendu Paaciɛnudaan yen Pebig mɔno n be l doug n k b pug’b.
23 Yendupudkaɔg yinyiem yen ŋmaalg yinyiem ji bo g be l doug n,
k l maa Yendu yudand yinyiem n bo fand’o,
g Pebig tie u fidl.
24 Ŋanduna ne doi kul niib baa sonm u yinyiem n i,
g tinŋ n batieb ń baal yen b mɔgm l doug n.
25 L doug gana kan ban g luon yendu n,
nyiɛɔg mɔ biɛ ji kan gii be.
26 B bu baal yen ŋanduna ne doi kul bonŋana yen b ŋalman l doug n.
27 Ama baa siɛl yaa jɔgnd kan kua l doug n,
g bual yua nba tug u yul g kun yen tuonbiid yen faaɔg.
Yab nba k b sana diɛn Pebig miɛl kadaaɔg n ninŋ kua n bu kua l doug n.