मन्कलोर देयमता पोल्लो केंजिह्तोर
3
1 इंजेके देवुळि पंडटव सबे रीतिनाङ जन्वर्कनग्डाहि तरसताa लेह्का सत्रल बेदे इले. अद तरसि आंचानगा वासि इद्रम ताल्ह्कता, “इद वाळुमतग्डा बेदे मराता पंडि तिनदनायो इनजोरे देवुळ मीकु वेहता अले! निटमे?” 2 “आयो, सबे मरानाङ पंडिङ माटु तिनदा पग़यह्नोम. 3 मति वाळुमतग्डा नडुमतद मराताङ पंडिङ तिनमाटु, अविन बोयमाट वेने, तितेके मीक हामुर वायग़ा, इनजोर देवुळ माक वेहता अले,” इनजि अद आंचाळि इता.4 अस्के अद तरसि आंचान इता, “चेचेयो उगसिन आयो, मीट हायविर बार आयविर मति. 5 बेद दिया मीट अद मराता पंडि तिनदकिर अद दिया कोनि मीक पूरा दिसग़ा, मीटु नेह्ना-लाग्वदिन पुनजि देवुळता लेह्का आयकिर इनजोर देवुळतुह्क एर्काय मन्ह्ता, अदिह्के अद मीकु इद मराता पंडि तिनदनायो इनजोर वेहताये, ऊळविन?” 6 इद पोल्लो केंजिसि आंचाळि मरातेके ऊळता. ऊळतस्के अद मरा ऊळलाहि सोबा, तानाङ पंडिङ तिनदलाह तोडटुह्क उस्कुल पेसतप आंदु. ओसो अद पंडि तितेके एक्वा बुद वायग़ा इनजोर गिर्दा आता. अह आसि अद मराता पंडि कोसि तना तिता, तिनजि तना मुजोनगा अनजि ओन्कवने ईता, अस्के ओग़वेने तितोग़. 7 अद पंडि तितस्के ओरिह्क एर्काता “चेह माट कूळल मह्नोम,” इनजि ओर लजा आतोर. अदिह्के ओरु बेदो उंदि मराताङ बेराङ आकिङ कोसि, पोळ्या-मुर्वेङ लेह्का कोटिसि उहतोर.
देवुळता नेयम
8 अस्के पया नुल्पे वेर्ह्काते देवुळि अद वाळुमतगा तिरियलाहि इनजोर वानेके, ताना चपुळ वेर केंतोर. देवुळता मोकम अरवोम इनजि, वाळुमता गेळा-टुटातगा ओर मकतोर. 9 अस्के देवुळि मान्वन केयता, “बेगा मह्निन रा, आदमि?” इता. 10 आदम इतोग़, “नीवा चपुळ केंजिसि नना मकतन, नना कूळल मह्नन इनजि नीवा मुनेह वायलाह रेयतन,” इनजि इतोग़.
11 अस्के देवुळ ओन इता, “निमा कूळल मह्निन इनजि नीक बोग़ वेहतोग़? नना बेद मराता पंडि नीक तिनमा इन्ज मतन, अदिन निमा तितिन एय?” इता. 12 अस्के ओग़ इतोग़, “निमा नाक तोळ मनदलाह ईतिन अद आंचाळि, अदे नाक तिनदलाहि ईता. अदिह्क नना तितन.” 13 आंचान ओसो देवुळ ताल्ह्कता, “निमा इद्रम बह कीतिन?” अस्के आंचाळ इता, “अद तरसि नाक नाळेह कीताये, अद वेहताह्के तानाय पोल्लोते नना तितन,” इनजोर इता.
14 अस्के देवुळि अद तरसतुन इद्रमता सरप ईता,
“निमा इद्रम कीताह्कु
इद दुनियाता सबे जन्वर्कनग्डाहि नीके पीळा दोर्कि.
नेटग्डाहि निमा नीवा पोटातेन बेङसोर तिरियकिन,
इद तोळ्योते दोळ्गसोर मंदकिन.
15 इंजेटाहि नीवा ओसो आंचाना नडुमि कोंटे मनदग़ा,
अद्रमे नीवा-ताना वायना पुळ्गता नडुमि वेने कोंटे मनदग़ा.
इतेके बोग़ ताना पुळ्गताहि पुट वायनोग़
ओना काल माळ्ह्कातुन निमा लप कस्ककिन,
ओग़ बार नीवा तलातुन विह्कनोग़,”
इनजि देवुळि अद तरसतुन इता.
16 पया आंचानेके ऊळिस देवुळ इता,
“नेलाङ हव्किस बेस आयह्पा नीक पकाय तिपल मनदग़ा,
निमा तिपल आस, तिपल आस, पिलाङ-पेकोरिन बेस आयकिन.
ओसो निमा नीवा मुजोन आव्रे कीयलाह ऊळकिन,
मति ओग़ नीक तना इळ्नु तासनोग़.”
17 पया देवुळि आदमिन इता,
“बेद मराता पंडि निमा तिनमा इनजि नना नीक वेहच मतन
तान निमा नीवा मुतेना पोल्लो केंजिसि तितिन.
अदिह्कु नियेनाहि इद बूमतुह्क पीळा अरता,
इंजेटाहि नीकु हानाह पिसनाह पकाय कह्टेम कीसि अनम पुटिह कीया पोयग़ा.
18 इद बूमते निमा कोये-जपिङ अकल रोंडा तह्किस निमा कास्तकारि कीकिन,
अह कीसि इद बूमता जबा-जाळि तिनजि पिसकिन.
19 एपुर पेसवालेवा नीक तिनदलाहि दोर्को आयग़ा,
हानाह्जोम नीक अदे सिक्सा आयि.
बह इतेके निमा बूमताह पुट वातिन
अहे बूमतगा मल्स मिंजकिन,
निमा तोळ्योताहि वातिन
अहे तोळ्योतेन ओसो कलियकिन,”
इनजि देवुळ मान्वन सरप ईता.
20 अद आंचाळि सबे मन्कलोरा मुनेटा तलोग़ इनजि आदमि ताना पेदिरि ‘अवालि’ तासतोग़. 21 देवुळि ओरेनाह्क जन्वर्कना तोलाताङ गेंदेङ पंडिसि ओरिह्क उहपिह कीता. 22 अस्के पया देवुळि इद्रम आलिह कीता इतेके, “इंजेक वेर मन्कलोरु नेह्नाङ-लाग्वाङ पापम-पुनेम पुनजि मावा लेह्का आतोर. इंजेके ओसो वेर अमेसाता पिसमुळ ईयनदु जीवाता मराता पंडिन कोसि तितोर इतेके बेस्केन डोलोर आयनुर, अद्रम आयनद आयो,” इता.
23 अद्रम आलिह कीस कोनि देवुळि अद एदेन वाळुमताहि ओरिन पलते पेहचीता. ओरिन नना बेद बूमतग्डाहि पंडटन, अगाने ओर कबळ कीस पिसिर, इता. 24 ओरिन पेहचीतापया बोग़े अमेसाता पिसमुळ ईयनदु मरातेके दायनद आयो इनजि पोळ्द पेसना अंगुमतेके राका कीयनाङ देवतुल्किन तासता, अद्रमे ओसो उंदि किसता तल्वर तासता, अद बोरिने अगा दाया-वाया एवा, नालुङ बाजेङ गरगर तिरियसोर मंदु.
एदेनता वाळुम अग़दग्डा किसता तल्वर (3:24)