3 मनेक मनेके पंटाता मोका वाता. अस्के देवुळतुह्‌क कोडिङ ईयलाह इनजि, काय्न तना पोलमता पंटाताहि उचुन पोस वातोग़. 4 हाबेल बारा तनाङ बेसताङ-बेसताङ गोरेपियोङ मुने पुटटविन अस्किसि, अविना बेसताङ कोळ्वुस्किन^b ततोग़. अस्के हाबेल ततदिन देवुळ एता. 5 मति काय्न ततदिनु देवुळ एनो. अस्के काय्न कमि ओङ आयोग़ इतेके! ओग़ ओङ आताह्‌कु ओना मोकम रेगता. 6 अदिन पुनजि देवुळ इता, “काय्न, नीक बाराह्‌क ओङ वाता रा? निमा बाराह्‌क मोकम रेहतिन? 7 निमा बेस बुदतोनिन इतेके निमा वाटटदिन नना एनोन आस मनेनना? इह केंजा, नीवा बुद बेस मनवाह्‌के नीक पापम आव्रे कीयलाह कोहतलाह आता, मति तान निमा आव्रे कीया पोयग़ा.”

8 पया उंद दिया बार आता, काय्न तनतमिन इतोग़, “दय माट पोलमतेके तिरियिस वायकल, अयो.” अह इतस्के वेर इर्वुर आसि अतोर.^c मति अद पोलमतगा एवतस्के काय्न तनतमिन पूटपूट ईसि हव्कतोग़. 9 पया देवुळ काय्ननगा वासि ओन ताल्ह्‌कता, “एय काय्न! नीवा तमोग़ हाबेल बेगा मन्ह्‌तोग़ रा!” अस्के काय्न इतोग़, “बारायो नाक एर्का इले, नना बह नावा तमोना राका कीय्‍ह्‌नना? ओग़ बेके अतोग़ो!” इनजोर इतोग़. 10 मति देवुळि ओन इता, “इह केंजा, नीवा तमोना नेतुरि नेयम ताल्ह्‌कलाहि इद बूमतग्डाहि नाक केयलाह आता, निमा इद्रम बाराह्‌क कीतिन? 11 नीवा कयदे नीवा तमोना नेतुर इद बूमतगा अरताह्‌कु, इंजेके इद बूमताहि पिसमुळ दोर्को, इद्रमता सरप नीक दल्गता. 12 अदिह्‌क निमा इगा बेचोन कह्‌टेम कीतेकाय इद बूमते नीकु पंटा दोर्को आयग़ा, निमा इद बूमते बेगाने लोन-दुवर केविन आयकिन, मति पर्गेन लेह्‌का आसि वेलियसोर मंदकिन,” इता. 13 अस्के काय्न अळतप आसि इतोग़, “इचोन बेरा सिक्सातुन नना बह आपकन? 14 नेटाहि इद बूमतगा कास्तकारि कीया एविन, ओसो नना नीवा मोकम मुनेह‌ वाया पग़वोन आयकन, पर्गेना लेह्‌का वेलियसोर मनह कीतिन, नना अद्रम वेलियनेके बोग़ाय नाक कोदा पोस हव्कनोग़,” इतोग़.

15 अस्के काय्नुन देवुळ इह वेहता, “आयो, नीक बोरे हव्कोर आयनुर. नीक बोग़ाय हव्कतेके नीवा उंद जीवाता बद्ला ओना लोताङ एळुङ जीवाङ दायनुङ,” इता. अह इनजोरे ओन बोग़े हव्कनायो इनजि ओनगा उंदि सीना तासता. 16 अस्के पया काय्नु देवुळता मुनेहतुह्‌क पेसिसि नोद (इतेके वेलियनदु) इनदनद देसेमतगा अनजि मनदलाह आतोग़. अद एदेन पटटा पोळ्‍द पेसेङ अंगुमतेके मन्ह्‌ता.

17 अद देसेमतगा मनेके काय्नु तना मुतेना संगे आंचाळ-कोय्तोग़ आसि, अद नेलाङ हव्किसि ओर्वोग़ पेकाल पुटटोग़, ओना पेदिर ओरु हनोक तासतोर. मनेक मनेके काय्नुना उंदि नाग़ उदता, अद नाटेना पेदिरि तना पेकाना पेदिरते ‘हनोक’ इनजि तासतोर. 18 काय्नुना पुळ्गता लेका इह मन्ह्‌ता इतेके, हनोकिह्‌कु इरद इनवाल पेकाल पुटटोग़, इरदिया मग़ि महुयहेल, महुयहेलिना मग़ि मतुसहेल, पया मतुसहेलिना मग़ि लामेक. 19 वेग़ लामेक इनवाल रेंड मुतेस्किन तासिस मतोग़, मुनेता मुतेना पेदिर आदा, पयाडदिया पेदिर सिला. 20 आदाह्‌क इर्वुर पेकोर पुटटोर, ओराङ पेदिर्क इसि याबल, युबाल इद्रम मताङ. मुने मुने इद दुनियाते गुळ्सेङ पंड बोटटोग़ु, कोंदाङ एर्मिङ अय कीया बोटटोग़ु याबले आंदोग़. 21 ओना तमोग़ मतोग़ युबाल, इद दुनियाते मुने मुने जेतुर्क-तुर्स्क पंडिसि एचना, ऊरना, पायना कीतोग़ु ओग़े. 22 लामेकना दुस्रा मुते सिलाह्‌क वेने ओर्वोग़ पेकाल मतोग़, ओग़ पेकाना पेदिर तुबलकाय्न, ओग़े सबेटोरिह्‌क मुने इतुळ्किन, कचिनु कोल्सिसि वाय्विना सामन पंडवाल कोल्से आतोग़, ओन्क उंद एलाळ मता, ताना पेदिर नामा.

23 मनेक मनेके उंद दिया बार आता इतेके, लामेक तनाङ मुतेस्किन केयिस इद्रम बोळ्सलाह आतोग़.

25 काय्नुना-हाबेलना कट्‌लाता पया आदम-अवाह्‌कु ओसो ओर्वोग़ पेकाल पुटटोग़. अस्के अवाल इता, “काय्न तनतमोग़ हाबेलिन हव्कतोग़, अदिह्‌के डोलतोना जागाते ओसो ओर्वोग़ पेकानु देवुळि नाक ईता,” इनजि ओना पेदिर ‘सेत’ तासतोर.^e 26 ओग़ सेत बेरोग़ आसि, ओन्क ओर्वोग़ पेकाल पुटटोग़, ओना पेदिर ‘आनोस’ तासतोर. अद तूकने लोकुर देवुळतुन यहोवा पेदिर इनजि मोळ्कलाह बोटटोर.