पुटमुळि 9

देवुळि नोहाह्‌क बर्कत ईस्ता

1 पया नोहा मुय्तोन ओसो तनाङ मग़्किर्नु देवुळ इद्रमताङ बर्कतताङ पोल्‍लोङ इता: “मीट मग़-मियाळ आसि बूममेंड तेग़ आम्ह्‌टु. 2 इद बूमताङ जन्वर्क-पिटेङ, पोटाते बेङसोर-कोरियसोर दायनव, सम्दुरताङ मीन्कु, इव सबेटव मीक मन्कलोरिन रेयनुङ. सबेटविना पोग़ोन नना मीक अदिकर ईय्ह्‌नन. 3 बेद्रम मुने मीकु सबे जबाङ-जाळिङ तिनदलाह ईस मतन, अद्रमे इंजेक इद बूमते ताकनव सबेटविन मीवा कयदे ईय्ह्‌नन, इविस्किन मीट तिनदा पग़यकिर. 4 मति नेतुरतगा जीवा मन्ह्‌ता, अदिह्‌क जन्वर्कनाङ अविङ नेतुर अग़्के मीट तिनमाटु, नेतुरतुन पोहचि मीट तिनदा पग़यकिर.

5 बोग़ाय दुस्रोन हव्कतोग़ इतेके, ओग़ नावा मुनेह डोलतोना नेतुरतेनाह्‌क जबब नितनोग़, जन्वर इंका मन्कन हव्कतेके नावा मुनेह जबब नितग़ा.

6 देवुळता जीवा बेद्रम मन्ह्‌ता

अद्रमे अद मन्कह्‌क जीवा ईता.

अदिह्‌क बोग़ाय मन्कल दुस्रोना जीवा तितेके

ओन्कु हामुरता सिक्सा दोर्कग़ा.

7 मीट इतेके मग़-मियाळ आसि बूममेंड तेग़ आम्ह्‌टु,” इनजि देवुळ इता.

देवुळि नोहाह्‌कु करल कीस्ता

8 नोहा मुय्तोनु ओसो ओनाङ मग़्किर्नु देवुळ इद्रम इता, 9 “केंजाटु, नना मीकु ओसो मीवा पुटना जालपिलतुह्‌क करल कीय्ह्‌नन. 10 ओसो ओडाताहि बेचोक जन्वर्क पेसताङ, अय कीयनाङ जन्वर्क, गेळाताङ जन्वर्क, पेते-पोग़्वुल, पिटेङ, इव सबेटविह्‌क वेने नना इद्रमे करल कीय्ह्‌नन. 11 इद बूमतुन, बूमतगा मनदनव सबे नरुळतुन, ओसो वेन उड्रा तचि बेस्केन बूळे केवोन आयकन, अहे बेस्केन बूममेटा उड्रा तवोन आयकन इनजि मीक नना करल कीय्ह्‌नन.”

देवुळि तना विदा सीना नोहाह्‌क तोहतह्‌ता (9:13-17)

12 देवुळ ओसो इता, “नना मीकु, ओसो सबे नरुळतुह्‌क इद करल कीय्ह्‌नन. तेना सीना इद्रम मन्ह्‌ता इतेके,13 नना नावा विदुन मोयुदगा तासतन, नना इद दुनियात्क कीतद करलता सीना अमेसा-अमेसातुह्‌क आयग़ा.14 अदिह्‌क बेस्के नना बूमता पोग़ोन मोयुदुन विळ्सकन, ओसो मोयुदगा देवुळविल दिसग़ा,15 अस्के बेद करल नना मीकु, ओसो बूमता सबे नरुळतुह्‌क कीतन, अदिन नना सीता कीकन, अस्के सबे नरुळ बूळेम आयना इद्रमता उड्रा वावो आयग़ा.16 मोयुदगा मनदना देवुळविदुन ऊळिसि नना नावा बेस्केन मायवद करलतुन सीता कीकन.17 बेद करल नना बूमता सबे नरुळतुह्‌क कीय्ह्‌नन, अदिना सीना इदे आयग़ा.”

नोहा मुय्तोग़ कनानिह्‌क सरप ईस्तोग़

18 ओडाताहि पलते वातोरु नोहानाङ मग़्कु सेम, हाम, यापेत, वेर आंदुर. (हामिह्‌क नालवुर मग़्क मतोर, ओरग्डाहि वीस्रा पेकाल कनान इनवाल आंदोग़). 19 नोहानाङ मुवुर मग़्क वेरे आंदुर, वेरे मग़्किरग्डाहि इद बूममेंड लोकुर तेग़ आतोर.

अंगुर तोंडाना वाळुम इद्रमलेह्‌का दिसिह्‌ता (9:20)

20 नोहा मुय्तोग़ पोलमता कबळ कींदोग़, इद बूमते मुनेता अंगुर वाळुम ओग़्सवाल ओग़े आंदोग़. 21 अद अंगुर वाळुमता अंगुरकल उंद दिया नोहाल उटोग़, उंजि ओचिस तना गुळ्सेतगा कूळलिन उंजिस मतोग़. 22 तना मग़ि हाम (कनानना तपे) गुळ्सेतगा नेङिसि तनतपे कूळलिन उंतदिन ऊळतोग़, ऊळिसि पलते अनजि सेमिन, यापेतिन वेहतोग़, अह कीसि तनतपेना इजक रेहतोग़. 23 अस्के सेम, यापेत, वेर इर्वुर बाताल कीतोर इतेके, उंद गेंदे तमाङ अटानगा वाटिसि तपेनेके पेग़्के-पेग़्के गुचतोर, गुचिसि ओन मुचिसीतोर, इद्रम वेर तपेना मेंदुदगा गेंदे इलवदिन ऊळोर. 24 ताना पया नोहा मुय्तोना रिमा रेगतस्के, ओग़ तना उड्लोग़ मग़ि हाम तना संगे बाताल कीतोग़, अदिन पुतोग़. 25 पुनजि नोहाल हामना मग़ि कनानिह्‌क इद्रमता सरप ईतोग़ इतेके,

“कनानिह्‌क पीळा आयि

कनान सेमिरा, यापेतिरा पूरा कय इळ्न मनेग़.”

26 ओसो नोहाल इतोग़,

“सेम मोळ्कनद यहोवा देवुळतुह्‌क जोहर आयि

कनान सेमना कय इळ्न मनेग़.

27 यापेतना कूळतुन इंका देवुळ बेर्सिह कीयि.

ओरु सेमिरा संगे बेस गोतते मनिर.

कनान यापेतना वेने कय इळ्न मनेग़.”

इनजि नोहाल इतोग़.

नोहाना कालमतस्केडा गुळ्से (9:21)

28 उड्राता पया नोहा मुय्तोग़ ओसो 350 वर्साङ पिसतोग़, 29 ओना पूरा पिसमुळि 950 वर्साङ मनजि ओग़ डोलतोग़.