2 मति अब्रम इतोग़, "हे यहोवा सामि, नाक निमा गिर्दा वानाह इनम ईसि बाताल पाय्‍दा? नाक इतेके मग़-मयाळ इलेर! इलवाह्‌कु, नना डोलता पया नावा सबे सम्सरम, दमिस्‍क सहरतोग़ एलियजरि इनवाल नावा सेवकिह्‌के आयग़ा. 3 ऊळा नाक इतेके, निमा ओर्वोग़ आय पेकान एविन, अदिनेनाह्‌कु नावा लोते पुटटोग़ सेवकिह्‌के नावा सबे सम्सरम दोर्कग़ा."

4 अस्‍के देवुळि अब्रमिन इता, “आयो नीवा सम्सरम नीवा सेवकिह्‌क दोर्को आयग़ा. मति नीक ओर्वोग़ पेकान ईकन, ओन्‍के नीवा सबे सम्सरम आयग़ा.” 5 पया देवुळि अब्रमिन तना टमताहि पलते ओसि ओन इद्रम इनदलाह आता,” निमा पोग़ोटा बूमताङ उकान ऊळिस अविन लेका. अव उकान लेक पग़यकिना? इह केंजा अद्रम लेह्‌काने, वायनाङ पीळिने, नीवा जालपिल इंका लेक पग़वप आङग़ा,” इनजि देवुळ ओन करल कीता.

6 इदिन केंजिसि अब्रम देवुळता पोल्‍लोतुन नमतोग़.^a ओग़ नमनदिन ऊळिसि देवुळि ओन सेतेमतोग़ इता.

7 ओसो इद्रम वने इता, “नीकु बेबिलोन देसेमता ऊर नाटेनग्डाह पेहचि ततद देवुळतन ननान आंदन. इद देसेम नीक आयग़ा इनजिये अग्डाह्‌चि नीक पेहचि ततन,” इनजि देवुळ इता.

8 मति अब्रम इतोग़, “हे यहोवा सामि, नावा देवुळतिन, इद देसेम नाक दोर्कग़ा इनजि नना बह पुनदकन?”

9 इतस्के देवुळ अब्रमिन इता, “माट उंद करल कीयिङ. निमा नाकु मूंड वर्साना उंद पडा पियो, मूंड वर्साना उंद एर्रे डाडि, ओसो मूंड वर्साना गोरे बोक्ळा इविन ताय. अद्रमे उंद पोनळ पिटे ओसो परेवा पिटे वने ताय,” इनजोर इता.

10 पया अब्रम इव सबे पोस देवुळतगा ततोग़. तचि अव सबेटविन हव्‍कतोग़. पया जन्वर्किन नडुमतुह्‌क अस्‍किसि रेंड-रेंड तुक्ळेङ कीतोग़. कीसि, बेदिना तुक्ळे अदिह्‌कु रेंड बतिङ अरसोय तासतोग़. मति पिटेन मात्रम तुक्ळेङ केवोग़. 11 गय्‍क मंज पया, अस्कतव अविन तिनदलाह पोग़ोटाहि गीदस्क रेगाताङ, मति अब्रम अविस्‍किन तिनदलाह एवोग़, पूंडटोग़.

12 पया पोळ्‍द अरयलाह आता, अस्‍के अब्रमिह्‌क बेरा गोड निद्रा वाता. वातस्के ओना सर्ने पका रेय वेसनाह मुर्गंगा पोयता. 13 अस्‍के देवुळि अब्रमिन लेकाते इद्रम वेहता: “निमा बेस पुनदना इनजि वायनद कालमताङ पोल्‍लोङ वेहतह्‌नन, केंजा. नीवा जालपिल दुस्रा देसेमते पर्गेरालेह्‌का आसि मनदनुर. अगा ओरु 400 वर्साङ अग्डोरा कय इळ्न बेरा तिपलते मनदनुर. 14 मति, बेद देसेमतोर ओरिन कय इळ्न तासिस तिपल कीयनुर, ओरिह्‌क नना सिक्सा ईकन. आक्रिते बह आयग़ा इतेके, मीवोर वेल्‍लाय मालसोम पोसि अद देसेमतग्डाह पेसिस इगान वायनुर. 15 (निमा मात्रम पका मुय्तोग़ आसि बेस सुकमते डोलिस मिंजकिन.) 16 मति 400 नूह्‌क वर्साना पया^b नीवा लोकुर ओसो इदे बूमते मल्‍स वायनुर. अस्‍के इगा मनवालोर एमोरि लोकुरिन नीवा लोकुरा कयदे आरे कीकिन. एमोरि लोकुरा पापम निंदनाहजोम नना ओरिह्‌क सिक्सा एवोन आयकन,” इनजोर देवुळ अब्रमिन वेहता.

17 पया पोळ्‍द अरतस्के पकाय ईकळ आता. अदे वेलाते अळ्कातग्डाह पका पोया पेसनदु ओसो पका मळ्गनद सोह्‌ळा ओन्क लेकाते दिसता. अस्के अव अस्कतव जन्वर्कनाङ तुक्‍ळेना नडुमतुह्‌क अद अळ्का, सोह्‌ळा अता.

18 इद्रमलेह्‌का अद दियाते देवुळि, अब्रमिन उंद किरियाता सीना ईसि, ओन्कु इद्रम करल कीस वेहता,^c “नना इद बूमतुन नीवा जालपिलतुह्‌कु ईतन, मिसर देसेमता बेरेटाहि बेरा युपरात बेरेग़ि एवनाहि इद पूरा बूमि नीवा लोकुरिह्‌के आयग़ा. 19 इतेके अद बूमि केनि, कनिजि, कदमोनि, 20 हिति, परिजि, रेपायि, 21 एमोरि, कनानि, गिर्गासि ओसो यबुसि^d वेर लोकुर मनदनद बूमि नीकु ईकन,” इनजि इता.