अब्रहमना पुळ्गि
25
1 साराल डोलतस्के पया अब्रहम ओसो उंदि मुतेन ततोग़. ताना पेदिर कटुरा इनदनद मता. 2 तानगह्कु आग़वुर पेकोर पुटटोर, ओराङ पेदिर्क इवु: जिम्रान, योसान, मदना, मिदयान, यिसबक ओसो सुह इनवाल वेरे आंदुर. 3 योसान इनवाह्कु इर्वुर मग़्क मतोर: सबा ओसो दादान वेर आंदुर. दादान इनवानाङ मग़्कु मुवुर मतोर: असुरि, लटुसि ओसो लुम्मि वेर आंदुर. 4 ओसो मिदयान इनवानाङ पेकोर एयवुर मतोर: एपा, एपेर, हनोक, अबीदा, एल्दा वेर आंदुर.5 अब्रहम तना सबे मालसोम तन मग़ि इसकिह्क इनजि तासतोग़. 6 मति तना तासिस मतव ओर्युल आस्कनाङ पेकोरिह्कु, तना जीवात मनदाह्पने, उचुन-उचुन सामन ईसि ‘इसकनग्डाहि जेक मन्ह्ट’ इनजोरे ओरिन पोळ्द पेसना बाजेतेके लोहचीतोग़.
7 अब्रहमि पूरा (175) वर्साङ एवनाह पिसतोग़. 8 ओना वय्स वेल्लाय वीळिस पया, ओग़ पकाय मुय्तोग़ आसि बेस सुकमते डोलतोग़. 9-10 पया ओनाङ पेकोर इसकि ओसो इसमल वेरु तपेन ओसि मकपेला पांजातगा पोहतोर. मुने बेद जागा सारान पोहतलाह हित्ति लोकुरग्डाह अब्रहम असिस मतोग़, अदे जागातगा ओसि ओन वने पोहतोर. अद जागा हित्ति जाततोग़ु सोहरना पेकाल एप्रोन वेनग्डाह असतद मता. इद्रमलेह्का अब्रहम साराल वेराङ गुमयाङ उंदिय जागाते मताङ. 11 अब्रहम डोलता पया, देवुळि ओना पेकाल इसकिनु बर्कत ईसि बेस तासता. ओग़ बीर-लहेरोयि पेदिरता चुवा मनदनद जागातगा जागा आस मतोग़.
इसमलना पुळ्गि
12 इसमलना लोतोरा पोल्लो इद्रम मता: साराना ओर्युल पिला आगरि, इद मिसर देसेमतद आंचाळि, तेन अब्रहम तासताह्कु इसमल पुटटोग़. 13 इसमलना कुट्मळतोराङ पेदिर्क इवु: मुनेटोना पेदिरि नबायोत, पयाडोना केदार, ओना पेग़्केडोरु अदबेल, मिबसाम, 14 मिस्मा, दूमा, मस्सा, 15 हदर, तेमा, यतूर, नापीस ओसो केदमा. 16 वेरे इसमलनाङ बारा पेकोर आंदुर. इवे पेदिर्कना लेह्का बारा नाटेनाङ पेदिर्क वने उदताङ. वेरे तमा लोकुरा बारा पेदल्क वने आतोर. 17 इसमलना वय्स 137 वर्साङ आतस्के ओग़ डोलतोग़. (पया ओनु तमा लोकुराङ गुमयानगा ओसि मिसतोर./डोलिसि ओग़ तमाङ तादोर-बाबोरगा अनजि कलियतोग़.) 18 इस्मालना कुट्मळतोरु हवीला नाटेनग्डाहि सुर देसेम एवनाह बिरोबटो आस मतोर. (सुर देसेमि मिसर देसेमता पोळ्द पेसना बाजे मता). ओर तमोग़-दादालोर कोटुल-कोटुल लेह्कान मंदुर
इसकना पुळ्गि
19 इसकना लोतोरा पोल्लो इद्रम मता: अब्रहमनगाह्क इसक पुटटोग़. 20 इसक-रिबकाल वेर मर्मिङ आतस्के ओना वय्स रेंड वीसाङ (40) मता. (रिबकाल इतेके मेसोपोटामिया देसेमतोग़ ओसो अरमि जाततोग़ बतुवेल इनवाना मयाळि, लाबनना बार एलाळ आंदु.) 21 इसकना मुते वंजो मताह्कु, ओग़ देवुळतुन अमेसा पार्तना कींदोग़. वेल्लाङे वर्साना पया देवुळ ओना पार्तनातुन केंजता! अस्के ओना मुते रिबकालि नेलाङ हव्कता.
22 रिबकाल मेंदुदे मतस्के ताना पोटालोप्पाडोर पेकोर ओर्विह्क-ओर्वोग़ दोबिंदुर. अस्के अद इता, “नाक बाराह्क इह आयलाह आता?” इनजि आलिह कीसि यहोवा सामिन ताल्ह्कता. 23 अस्के यहोवा सामि तान इता:
“नीवा पोटातगा एमोह पेकोर मन्ह्तोर,
वेर रेंड देसेह्कनोरा पेदल्क आयनुर.
अव रेंड देसेह्कना नडुमि कोटुल मनदग़ा,
उंद देसेमतोर दुस्रा देसेमतोरिह्काय एक्वा पळयोर आयनुर,
मुने पुटवाल पेकाल पया पुटवाना सेवा कीयनोग़,” इनजोर इता.
24 पया रिबकालि रिकम आता अस्के तान्क इर्वुर एमोह पेकोर पुटटोर. 25 मुनेतोग़ पेकाल नेत्रललेह्का आसि पुटटोग़. ओना मेंदुलमेंड जोगुर्क मताङ. अदिनेनाह्क ओना पेदिर एसाa इनजोर तासतोर. 26 मुने पुटटोना काल माळ्ह्कातुन पोसि पयाडोग़ पुटटोग़. अदिह्कु ओना पेदिर याकुबb इनजोर तासतोर. वेर पुटटस्के इसकना वय्स मूंड वीसाङ (60) मता.
एसाल तना माळा तूसतुन पोहतह्तोग़
27 पया ओर पेकोर लेयोर आतोर. ओरग्डाहि एसा इनवाल गेळाते वेटाङ दायलाह पका उसर मतोग़. मति याकुब इसि सीदा-सादा मन्कल मतोग़, ओग़ नाटेनगान कबळ कींदोग़. 28 एसाल वेटा कीस ततव चित्रल अविङ तिनदलाह तपे इसक मर्सिस मतोग़, अदिनेनाह्क तपे एसानु पका जीवा कींदोग़. मति रिबकाल इसि याकुबिनु पका जीवा कींदु.
29 बेदो उंद दिया एसाल वेटा अनजि बागिस वातोग़. अस्के याकुब लोते मनजि कोळेगुग्राङ अटलाह आस मतोग़.
30 अस्के एसाल याकुबिन इतोग़, “नाक पका कग़्व वसता रा! नियव नेत्रल-नेत्रल दिसनव बाताङो अटलाह आतिन अव नाक उचुक तिनदलाह ईम रा,” इनजोर ताल्ह्कतोग़. (अदिनेनाह्क एसाना पेदिरि एदोम इनजोर वने उदता, एदोम इतेके ‘नेत्रल'.)
31 याकुब तमदादान इतोग़, “नावाङ कोळेगुग्राङ तिनदकिन मति, मुने निमा ताना बद्लातुह्क इनजि नीवा माळा तूसतुनc नाक ईम,” इतोग़.
32 एसाल पया, “नना कग़्विह्क आय्ह्नन डा! अद माळा तूसता संगे नाक बाताल पाय्दा?” इतोग़.
33 इतस्के याकुब, “अह इतेके, इंजेकेने किरिया कीम,” इनजोर इतोग़. अस्के एसाल, “किरिया रा, अद माळा तूस नीके आयि!” इनजि इतोग़. अह कीसि तना माळा तूसतुन अव नेत्रल कोळेगुग्रानेनाह्क कोनि तनतमिना कयदे वमतोग़. 34 पया याकुब तमदादाह्कु आरिङ ओसो अटटव कोळेगुग्राङ कीसि ईतोग़. एसाल तिन्ज-उंजि अग्डाह तेदिस अतोग़.
इद्रमलेह्का एसाल तना माळा तूसता बाताले सीता केवोङ.