3 इद्रम आनेके उंद दिया देवुळि याकुबिन इता, “निमा नीवा तादोर-बाबोरा देसेमते, निमा पुटटद जागा-बूमतेके मल्‍स अन. नना नीवा तोळ मंदकन,” इनजोर वेहता.

4-5 अद्रम इतस्‍के याकुब पोलामतेके तमाङ एर्रेङ-गोरेङ मेहचोर मतोर, अद जागाते तनाङ मुतेस्‍किनु केयिसि इद्रम वेहतोग़, “मिय्माल मुनेट लेह्‌का नाक इंजेके बेस ऊळोग़ इद नाक एर्काये. मति नावा बाबाना देवुळि अमेसाये नावा संगे मन्‍ह्‌ता. 6 नना मिय्मनगा बेचोनो कह्‌टेम कीतन, तान इतेके मीट पुह्‌निरे. 7 मति मिय्माल नाक नाळेह कीसि, नावा बूततुन दहा मल्‍काङ मिळ्‍ह्‌तोग़. तेला मति नाक बूळे कीयलाहि देवुळि ओन्‍क अग़ एवो.

8 मुने मिय्माल इतोग़, ‘चित्रल बोट्‍कनाङ पियोङ पुटटेके, अव नीवा बूतताङ आयनुङ.’ अस्‍के अव सबे एर्रेङ-गोरेङ चित्रल-बोट्‍कनाङे पियोङ वाट बोटटाङ. पया ओसो ओग़ इतोग़, ‘आयो! विर्गल-वर्गलताङ पियोङ नीवा बूतताङ आयनुङ,’ इतोग़. अस्‍के अव सबे एर्रेङ-गोरेङ अहे वाटलाह आताङ. 9 इद्रमलेह्‌का देवुळिये मिय्मना मालसोमतुन ऊंदिस नाक ईता.

10 उंद मल्‍का, एर्रेङ-गोरेङ ऊल आयना वेलाते, नना इद्रमता कला कळ्‍स्‍कतन इतेके, बेव बोक्‍ळाङ पाटुह्‌किनु वेदा पोयंदुङ अव कार्यस्‍क-पांड्रिङ, चित्रल बोट्‍कनाङ, विर्गल-वर्गलताङ इद्रमलेह्‌काडाङ मताङ. 11 पया अद कलाते देवुळता देवतुलि नाक केयिसि ‘ए याकुबि!’ इता.

नना इतन, ‘बाताल सामि!’

12 अद देवतुलि इता ‘निमा बेस ऊळा, पाटुह्‌किन वेदा पोयानव सबे बोक्‍ळाङ विर्गल-वर्गलताङ, चित्रल बोट्‍कनाङ, ओसो कार्यस्‍क-पांड्रिङ इद्रमताङे मन्‍ह्‌ताङ. इद कबळ ननाने कीतन. बाराह्‌क इतेके, लाबान नीवा संगे बह इतेक अह कीयनदिन नना ऊळतन’ इनजोर इता.

13 अद ओसो वने नाक इता, ‘मुने बेतेल नाटे नीक दिसिस वळ्‍ह्‌कतन, अदे देवुळतन ननान आयो. अगा निमा नावा सीतातेनाह्‌क गुटा ओग़्सिसि मोळ्‍ह्‌किसि किरिया वने कीतिन. इंजेके निमा इग्डाह पेसिस नीवा पुटटा बूमतेके दय’ इनजोर इता.”

इद्रम इनजोरेने याकुब तनाङ मुतेस्‍किन वेहतोग़.

14 अस्‍के अव रेंड आसि ओन इताङ, “इंजेके मावा बाबाना लोते मयेनाह्‌कु बातय तूस दोर्को आयग़ा. 15 ओग़ माकु इंजेके बेवो दुस्रान लेह्‌का ऊळिह्‌तोग़. माक नियगा वमतोग़, ओसो मावा कर्सातुन तिनजि मारिह कीतोग़. 16 अदिह्‌के बहे देवुळि मावा बाबाना बेचोनो समसारमतुन ऊंदिस माकु ओसो मावाङ पिलाङ-पेकोरिह्‌क ईता. अदिनेनाह्‌क इंजेक, देवुळ नीवा संगे बाताङ वळ्‍ह्‌कता अद्रमे कीम,” इताङ.

17-18 अस्‍के याकुब कनान देसेमते तना तपेनेके दायलाह पेसतोग़. तनाङ पिलाङ-पेकोरिनु ओसो आस्‍किनु रुटुह्‌कनगा उदिह कीसि मुनेह लोहतोग़. ओग़ अद जागाते (इतेके मेसोपोटामियाते) मनदह्‌पा बेचोन सामान जमा कीस मतोग़, अचोन सबे पोस ओतोग़. अहे तमाङ मुकोदोयोन वने रोसिस ओतोग़.

19 अद वेलाते लाबान तनाङ एर्रेङ-गोरेनाङ केल्‍किन कोग़यलाह अन्ज मतोग़. अदिनेनाह्‌क ओग़ लोन इलेग़ आसि, ओग़ इलवस्‍के रागो तपेना मोळ्‍कनद माविलतुन कलिस ओता.

20 याकुब तममामाल लाबानिनु ‘नना दाय्ह्‌नन’ इनजोर वेहवालेवा कुस्‍कनेन नाळेह कीस पेसिस अतोग़. 21 इद्रम आसि याकुब तना सबे समसारमतुन पोसि दरि-मरि विततोग़. पया ओग़ु अनेक-अनेके उंद परात इनदनद बेरा बेरेग़तुन वेंडिसि, गिलाद पेदिरता मेटाबूमतेके मुनेह कीस मतोग़.

22 याकुब विततोग़ इनजि मूंड दियाना पया लाबानिह्‌क एर्का आता. 23 अस्‍के ओग़ु तनाङ तमोग़-दादालोरिन तोळ कीसि, एळुङ दियाङ कोज पर्ह्‌कसोरे ओरा पयाह-पयाह अतोग़. अह कीसि गिलाद मेटाबूमतगा एवतस्‍के कोनि याकुबिर रोमिस मतदिन वेग़ जेकनाहे ऊळतोग़. 24-25 ओर अद मेटा पोग़ोटा जागातगा तमाङ टमिङ निल्‍पिह कीतव दिसताङ. अस्‍के लाबान ईकळ आताह्‌कु तना तोळतोरा संगे अदे मेटा कचुलि रोमतोग़. अद नग़्का देवुळि लाबानिन कलाते दिसिस वेहता, “निमा याकुबिह्‌क तिपल बह एमा ऊळा,” इनजोर इता. 26 पया पङवियतस्‍के लाबान याकुबिन कलियिस इतोग़, “निमा नाक नाळेह कीस वित वातिन अय! नीक अचोन लाव मता नावाङ पिलान गुंजिस ओयलाहि. 27 निमा इद्रम बाराह्‌क नाळेह कीसि, कलेन लेह्‌का कुस्‍कनेन वित वातिन डा? नाक वेहच मनेनिन इतेके मीक तीह्‌च-उहचि, बेस गिर्दा-वेळ्काते लोहच ईस मनेनन. 28 मति मीट कुस्‍कने पेसताह्‌कु नावाङ तमोरिनु-एलास्‍किनु, मयास्‍किनु लोंडलाह वने एविन! निमा इद बुदलेवप लेह्‌का कबळ कीतिन,” इनजोर तम अनेन कट्‍ला कीतोग़. 29 पया ओसो वने इतोग़, “नना इंजेके नीक बूळे कीया वने पग़यह्‌नन, मति मिय्माना देवुळि नावा संगे निने नग़्का वळ्‍ह्‌कता. ‘निमा ओनु बाताले केमा,’ इनजोर इता. 30 इंजेक निमा नीवा मिय्माना लोन दायलाह पका आलिह कीसि वाताय-वातिन, मति नावाङ माविस्‍किनु बार्किया कलिस ततिन डा?” इनजोर ताल्‍ह्‌कतोग़.

31 अस्‍के याकुब इतोग़, “निमा नावाङ मुतेस्‍किन मुर्तिय दाया एविन आयकिन इनजि रेयिसि, नना कुस्‍कनेन पेसतन, अद निटमे. 32 मति नावाङ माविस्‍किन कलतिर इतिन. अव इंजेके बोनगायि दोर्कतेके, ओन निमा हव्‍का. अद्रमे नीवा बेदाय दुस्रा सामान नयगा मतेके मावा जीवा-तलातोरा मुनेह दोर्किह कीस ओम,” इतोग़. (रागो तना तपेनाङ माविस्‍किनु कलिस तता इनजोर इद पोल्‍लो याकुबिह्‌क एर्का इले आस मता.)

33 अस्‍के लाबान, याकुबना टमतगा अनजि पर्ह्‌कतोग़. ताना पया लेआनगा ओसो रेंडास ओर्युल आस्‍कनाङ टमिनगा अनजि पर्ह्‌कतोग़. मति बातय दोर्को. पया आक्रि रागोना टमतगा अतोग़. 34 अग्डा सामनतुनु पूरा मिळ्‍ह्‌च ऊळतोग़, तेला मति ओन्‍क दोर्कोङ. रागो अव माविस्‍किनु रूटुम पोग़ोन तासिस उदनव गेंदेना लोप्‍पा नेहचि ताना पोग़ोन उदिस मता. 35 नना तेद पग़वोन बाबा, ओङ आयमा.^a गेळातेके आतन” इनजि रागो इता. इद्रमलेह्‌का ओग़ पर्ह्‌किस-पर्ह्‌किस बागतोग़ मति ओन्‍क तनाङ माविस्‍क दोर्कोङ.

36 अस्‍के याकुब पकाय ओङ आसि तममामान जग्‍ळम कीया बोटटोग़, “नावा कसुर बातालि? निमा इचोन ओङ आसि नावा पयाह वातिन, नना बाताल पापम कीतन? 37 नावा पूरा सामनतुन मिळ्‍ह्‌च ऊळतिन, अग्डाहि नीवा लोता बातालय सामान दोर्कताया? बाताल दोर्कतेके तान पलत पेहच ताय, इगा नीवा-नावा जीवा-तलातोरा मुनेह तच तासा. पया वेरे मावा इर्वुरा नडुम नेयम कीयिर. 38 नना नियगा पूरा वीसा वर्साङ मतन; अस्‍केडाहि नीवाङ एर्रेङ-गोरेङ बेस्‍केने रेह्‌च पोहोङ. ओसो नना बेस्‍केन नीवाङ गोरेन हव्‍किस वने तिनोन. 39 बेस्‍के गेळा जन्वर्कु नीवाङ गोरेन तितेके, नियेके तवा-लेवा नावाय माल निहच ईंदन. अद्रमे नग़्का आयि पियल आयि कलेर ओतेके नाके निहच ईया पोयंदु. 40 नना बेचोनो तिपलते कबळ कींदन; पियदुह्‌क बार एपुरि नग़्काडक बार इंर्ङम नाक तिंदु. ओसो कोंडातुह्‌क उस्‍कंड इले. 41 इद्रमलेह्‌का वीसा वर्साङ एवनाह नना नीवा सेवा-साकुर कीतन. चोव्‍दा वर्साङ नीवाङ रेंड पिलानेनाह्‌कु कबळ कीतन, ओसो आरुङ वर्साङ नाक बूत दोर्कना इनजि नीवाङ एर्रेङ-गोरेङ मेहतन. मति निमा नाक बह कीतिन? नावा कह्‌टेमतुन दहा मल्‍काङ मिळ्‍ह्‌विना! 42 नावा तादो अब्रहमना देवुळि ओसो नावा बाबाल इसक रेयिस ताकनद देवुळि, अदे नाक तोळ मन्‍ह्‌ता. अद बार नावा तोळ लेवेक मात्रम निमा नाकु वेटाङ कय्‍क लोहच मनेनिन! मति देवुळ नावा तिपलतुन ओसो कय्‍कने कीतद कह्‌टेमतुन ऊळता. अदिह्‌के अद निने नग़्का नीक रेयपिह कीता,” इनजोर इतोग़.

43 लाबान याकुबिन इतोग़, “इव पिलाङ इतेके नावाङे, ओसो वेर पेकोर वने नावाय पुटुदोर. अद्रमे इव एर्रेङ-गोरेङ इंका नावाङे. अहे ओसो निमा इगा बाताङ-बाताङ पोस वातिन, अव सबे नावाङे मन्‍ह्‌ताङ. इंजेक नना नावाङ पिलानु ओसो इविस्‍कनाङ पेकोरिन बह तिपल कीकना? 44 अदिह्‌क इंजेक माट इर्वल ओर्विह्‌क-ओर्वोग़ करल कीयिङ. कीसि अदिना साक्‍सि इनजोरे माट इगा बंडाना डग कीकल,” इतोग़.

45 अस्‍के याकुबि उंद बंडा तचि तान गुटा निल्‍पिह कीतोग़. 46 पया तना लोकुरिन, “बंडाङ जमा कीम्ह्‌ट रा!” इतोग़. इतस्‍के ओरु बंडाङ जमा कीसि, उंद डग वाटटोर. अह कीसि पया अदे डगता कचुलि उदिस गाटो तितोर. 47 लाबान अद डगता पेदिरि यग्र सहदुता^b इनजि तासतोग़, मति याकुब इसि ताना पेदिरि गलेद^c इनजोर तासतोग़.

48 पया लाबान इतोग़, “इद डगि नेटाहि नीवा नावा नडुमि इद करल कीतद साक्‍सि मनदग़ा,” इनजि इदे पोल्‍लोतेनाह्‌के ताना पेदिरि गलेद तासतोर. 49 ओसो ताना पेदिरि मिजपा (इतेके मचानि) वने मता. अद बाराह्‌क इतेके अगा लाबान इतोग़, “बेस्‍के माट ओर्विह्‌क-ओर्वोग़ जेक मनदकल, अस्‍के इद करलतुन निमा नना माळिह्‌नला माळवला इनजोरे देवुळिये माक ऊळावेचा कीसोर मनि! 50 ओकावेलाते निमा नावाङ पिलानु बातालाय कट्‍ला पुटिह कीसि, अविस्‍किन विळ्‍सिसि दुस्राङ आस्‍किन मर्मिङ बार कीतिन इतेके, नना ऊळवेक तेला मति देवुळ ऊळग़ा, तान सीतात तासा,” इनजोर इतोग़.

51 पया ओसो वने लाबान इतोग़, “इद ऊळा, नीवा नावा नडुमि इद उंदि डगि मन्‍ह्‌ता, ओसो नना निल्‍पिह कीतद गुटा वने मन्‍ह्‌ता. 52 इव मावाङ किरियानेनाह्‌क साक्‍सि मनि. बातालय नुकसन कीयना विचरते नना इद डगतुन आविसि नियेके वायनद आयो; अहे निमा वने इद डगतुन, गुटातुन आविसि नयेक वायनद आयो. 53 अद्रम बेदाय कट्‍ला पुटटा इतेके, नीवा तादो अब्रहम ओसो नावा तादो नाहोर वेरा देवुळि मन्‍ह्‌ता, अदे नीवा-नावा नडुमि नेयम कीयि,” इनजोर इतोग़. अस्‍के याकुब वने अद इवातेनाह्‌क तना तपे इसक माळनद देवुळता पेदिरते किरिया कीसि मानेम आतोग़.

54 पया याकुबि अद मेटा पोग़ोन देवुळतुन जोहर कीसि उंद मोक^d ईतोग़. अह कीसि अगा मतोर सबेटोरिन गाटो तिनदलाह केयतोग़. ओर अदे डगता सर्ने उदिसि गाटो तितोर. गाटो तिनजि अगाने पङवियनाह मतोर. 55 पया लाबान सकरिन तेदतोग़. अह कीसि तनाङ मयास्‍किनु, अविस्कनाङ पिलाङ-पेकोरिनु लोंडिसि बार कीसि अग्डाह पेसिस तना जागातेके मल्‍स अतोग़.