3 पया याकुबि तना दादाल एसानेके कबुर वेहतलाह लोहतोग़. अद वेलाते एसाल एदोम देसेमते सेईर इनदनद पटटे मतोग़. 4-5 याकुब कबुरतोरिन इद्रम वेहाट इनजोर लोहतोग: “नावा माल्‍काल एसाह्‌कु नीवा सेवक लेह्‌काडोग़ याकुबनेनाह्‌चि जोहर! नना इचोक वर्साङ मावा मामाल लाबाननगा मनजि कबळ कीतन. इंजेके नयगा इव कुराङ-पडाङ, गाळ्‍दिङ, ऐर्रेङ-गोरेङ ओसो ओर्युल आस्‍क-कोय्तोर वने मन्‍ह्‌तोर. नना इंजेके मावा बाबाना जागा-बूमतेके दायलाह पेसतन. निमा नयगा गूनमते कलियकिन इनजोरे इद आसाते कबुर लोहतह्‌नन इद्रम ओन वेहाट,” इतोग़.

6 ओर कबुरतोरु एसान कलियिस मल्‍स वातस्‍के याकुबिन इद्रम वेहतोर: “माटु मीदादाल एसान कबुर वेहतोम. ओसो ओग़ वने नीक कलियलाहि वायलाह आतोग़. अहे तनाङ नालुङ नूह्‌क मन्‍कालोरिन वने पोस वास्‍तोग़,” इतोर.

7 इद्रम केंजतस्‍के याकुब पका रेयतोग़. रेयिस आलिह कीतोग़. पया ओग़ु तना संगता लोकुरिनु, एर्रेङ-गोरेनु, कुर्राङ-पडानु ओसो रुटुह्‌किनु वने रेंड-रेंड गोह्‌डिङ कीया वेहतोग़. 8 बाराह्‌क इतेके पया एसाल वासि मुनेह्‌टा गोह्‌डटोरिन हव्‍कनेके पेग़्केडा गोह्‌डटोर आयि अग्डाह वितनुर इनजोर अह कीतोग़.

9 अह कीसि पया याकुब देवुळतुन ताल्ह्‌क बोटटोग़, “ए यहोवा सामि! नावा तादो अब्रहमना, नावा बाबाल इसकना देवुळतिन! निमा नाक वेहच मतिन, ‘नीवा पुटटा बूमते नीवा जीवा-तलातोरेके मल्‍स अन, नना नीवा तोळ मह्‌नन,’ इनजोर इतिन. 10 नना नीवा सेवकनन, मति निमा नाकु बेचोनो दया कीय्‍ह्‌निन, सेतेम तोहतह्‌निन, ताना लायक वने नना इलेन! नना मुने योर्दन बेरेग़ वेंडिस वानेके वेट दुडिय पोस वातन. मति निमा इसि नावा मालसोम वेल्‍लाय बोल्‍गनाह कीतिन, अदिह्‌क इंजेके नयगा रेंड तुंगानोर मन्‍कलोर मन्‍ह्‌तोर. 11 मति नना इंजेके रेयिह्‌नन! नावा दादाल वासि नाक हव्‍कनोग़, ओसो तलिस्‍कना संगे पेकोरिन वन हव्‍कनोग़ बहे! अदिनेनाह्‌क ए सामि, माकु ओना कयदग्डाह पिसिह कीम! 12 निमा नाकु वेहच मतद करलता पोल्‍लोतुन इंजेके सीता कीम! ^a'नना नीक बेस ऊळकन, ओसो नीवा जालपिलतुन सम्‍दुरता उस्‍को लेह्‌का वेल्‍लाटोर बोल्‍गनाह कीकन, ओरिन लेक पग़मुळ आयो आयग़ा अचोन आयनुर’ इनजोर निमा इतिन,” अह इनजोर याकुब देवुळतुन कोळ्‍व कींदोग़.

13 अद नग़्का याकुबि अगान उंजतोग़. इमा दिया सकरिन तेदिसि ओग़ु तनगा बाताङ-बाताङ मताङ अविस्‍कनग्डाह उचुक दादाह्‌क ईकन इनजोर आचिसि वेगुर कीतोग़. 14 अव रेंड नूह्‌क (200) एर्रे पाटुह्‌कु ओसो वीसा बोक्‍ळाङ, अद्रमे रेंड नूह्‌क (200) गोरेपाटुह्‌कु ओसो वीसा गोरेबोक्‍ळाङ मताङ, 15 अद्रमे पाल उनडनाङ पियोना संगे डेडा वीसा (30) रूटुह्‌कु, रेंड वीसाङ (40) कोंदामुरेङ, ओसो दहा (10) कुर्राङ, अद्रमे वीसा (20) तलोग़ गाळ्‍दिङ ओसो दहा (10) पोत गाळ्‍दिङ इचोक मताङ. 16 अविस्‍किन ओग़ु गोह्‌डिङ-गोह्‌डिङ कीसि, तना ओर्युलतोरगा ईसि इद्रम वेहतोग़, “मीट नावा मुनेह पेसाटु. दायह्‌पा कलियिस बह अनमाटु, मति गोह्‌डिना नडुमि पैंदा तासाटु,” इतोग़. 17-18 ओसो मुनेह दायनद गोह्‌डटा कोपान इद्रम वेहतोग़, “बेस्‍के नावा दादाल एसाल नीक कलियिस ताल्‍ह्‌कनोग़ ‘निमा बोना मन्कनिन? बेके दाय्‍ह्‌निन? इद गोह्‌ड बोना?’ इद्रम ताल्ह्‌कतस्के निमा इनु ‘इद गोह्‌डि नीवा सेवक याकुबनाये! इव सबे नियेनाह्‌के लोहतोग़. तना वन मावा पयाह-पयाह वायलाह आतोग़’ इनजोर वेहाट,” इतोग़.

19 ओसो याकुब पेग़्के मतोर सबेटोर कोपालोरिन वने अहे वेहतोग़, “नावा दादाल मीक कलियनोग़ अस्‍के मीट वने ओन इद्रमे वेहाटु. 20 बह आय मति ‘नीवा सेवक याकुबि मावा पयाह-पयाह वायलाह आतोग़’ इनजोर वेहाटु,” इतोग़. बाराह्‌क इतेके ‘नना नावा दादाह्‌कु इचोवेल्‍लाङ गोह्‌डिङ लोहताह्‌नन, अविस्‍किन ऊळिसि ओना ओङ रेगग़ा. ताना पया नना ओन कलियिनेके ओग़ु नाकु गूनमते वळ्‍ह्‌कनोग़’ बहा! इनजोर याकुब विचर कीतोग़. 21 इद्रमलेह्‌का अव सबे गोह्‌डिनोर पेसतोर, मति याकुब अद टमतगन रोमतोग़.

22 पया अद नग़्का ओग़ तेदिसि, तनाङ रेंडास मुतेस्‍किन, ओसो तनाङ रेंड ओर्युल आस्‍कु, अहे तनाङ अक्रा पेकोरिन पोसि यबोक इनदनद बेरेग़तुन वेंडिह कीसीतोग़. 23 ओरा संगे तना सबे समसारमतुन वने वेंडिह कीसीतोग़. अह कीसि याकुब अगा वग़ोग़े मतोग़.

24 ओग़ अगा वग़ोग़े मनेके इद्रम आता इतेके, बोग़ो ओर्वोग़ मन्‍कल ओनगा वासि ओन पोयतोग़, अस्‍के ओर इर्वुर पङवियनाह ऊक बोटटोर. 25 ओग़ मन्‍कल याकुबिन आरे कीया पग़वोग़. अदिह्‌क पया ओग़ु याकुबिना कोग़्क कादुन पोसि गुंजतोग़. अह आसि ओना कादा बोका बळ्‍स अरता.

26 तेला मति याकुब ओग़ मन्‍कन पोस विळ्‍सोग़. अस्‍के ओग़ मन्‍कल इतोग़, “नाक दायलाह ईम, इंजेक पोळ्‍द पेसलाह आता,” इतोग़.

याकुब इतोग़, “आयो! बेचानाह नाक बर्कत एविन, अचानाह नना नीक दायलाह एवोन,” इतोग़.

27 अस्‍के ओग़ मन्‍कल याकुबिन ताल्ह्‌‍कतोग़, “नीवा पेदिर बातालि?”

इद्रम ताल्ह्‌कतस्के ओग़ इतोग़, “नावा पेदिर याकुबि".

28 ओग़ मन्‍कल इतोग़, “देवुळतुन वने मन्‍कलोरिन वने निमा उकिस गेल्‍सतिन. अदिह्‌के इंजेटाहि नीवा उंद पूना पेदिरि इस्रयेल मनदग़ा,” इनजोर वेहतोग़.

29 पया याकुब ताल्‍ह्‌कतोग़, “नीवा वने पेदिर नाक वेहा.”

मति ओग़ मन्‍कल ओनु, “निमा नावा पेदिर ताल्‍ह्‌कमा,” इतोग़. पया ओग़ मन्‍कल याकुबिह्‌क बर्कतता पोल्‍लो वेहचि, अग्डाह अतोग़.

30 अस्‍के याकुब, “नना देवुळता मोकमतुन ऊळतन, ऊळिस आय मति नावा जीवा पिस‍ता,” इनजोर इतोग़. अदिनेनाह्‌क ओग़ अद जागाता पेदिर पनुवेल (इतेके ‘देवुळता मोकमि') इनजोर तासतोग़. 31 पया पोळ्‍द पेसनेके याकुब अग्डाहि पेसतोग़. ओना कोग़्क काल वावाह्‌कु ओग़ कूटिंदोग़. 32 (इद्रम आताह्‌कु ओना जालपिलतोर इस्रयेल लोकुर नेंड एवनाह सबे जन्वर्कनाङ कोग़्क कादाङ अविङ तिनदलाह नोमिह्‌तोर. बाराह्‌क इतेके ओग़ मन्‍कल याकुबना कोग़्क कादुन बोयिस मतोग़.)