5 “मीट बेस्‍के देवुळता संगे वळ्ह्‌कलाह दाय्ह्‌निर अस्‍के सोङ केवालोरा लेह्‌का मनमाटु. बाराह्‌क इतेके ओरु ‘माक लोकुर ऊळिस मान ईयनुर,’ इनजि सास्‍त्रम काग़्हतना लोह्‌कने ओसो अग़िनाङ मूलानगा निचि केयसोर पार्तना कीयलाह ओरिह्‌क गिर्दा वास्‍ता. इह केंजाट, नना वेहतह्‌नन, ओर तमा पाय्दातुन (इतेके सिरप लोकुराय मानतुन) पूरा दोर्किह कीतोरे. 6 मति मीट बेस्‍के देवुळता संगे वळ्ह्‌कलाह इनजोर दाय्ह्‌निर अस्‍के मीवा लोनलोप्पा नेङाटु, नेङिसि तेल्पतुन केहचि, मीट बोन्‍के दिसवा मीवा देवुळदीपतोग़ बाबाना संगे वळ्ह्‌काटु. अस्‍के मीवा दिसवद कबळतुन ऊळवाल बाबाल मीक बर्कत ईयनोग़. 7 ओसो मीट देवुळता संगे वळ्ह्‌कनेके देवुळतुन पुनवोरा लेह्‌का पिचुळ-पिचुळ वळ्ह्‌कमाटु. ‘माट वेल्‍लाङे वळ्ह्‌कतल, इतेके मावा कोळ्‍वतुन देवुळ केंजग़ा,’ इद्रम ओरिह्‌क आस्‍ता. 8 मीक बाताल गावले मन्ह्‌ता, तान मीट ताल्ह्‌कनामुनेन मीवा बाबाल पुनजिय मन्ह्‌तोग़. अदिह्‌के मीट देवुळतुन पुनवोरा लेह्‌का पिचुळ-पिचुळ वळ्ह्‌कमाट बह! 9 अदिनेनाह्‌क देवुळता संगे बाताङ वळ्ह्‌कनवु, अविन मोदुल कीसि मीकु पुन्‍पिह कीसीय्ह्‌नन, अव इहलेह्‌का मन्ह्‌ताङ: ‘जोहर सामि, मावा देवुळदीपतोग़ बाबानिन, सबेटोर नीवा पेदिरतुन मान ईयिर. 10 बेद्रम नीवा दीपते, अद्रम इद बूमते वने नीवा राजेम निल्‍पिह कीमु. बेद्रम नीवा दीपतोर नीवाङ केंजिह्‌तोर, अहे इद बूमतोर वने नीवाङ केंजिर इनजि माट नीक ताल्ह्‌किह्‌नोम. 11 मावा दिनमता तिंडि नेंड माक ईमु. 12 ओसो बहु माट मावा अडम मता कसुरतोरिन मापि कीतोम, अहु मावाङ कसुर्किन मापि कीमु. 13 ओसो कंदाता वेलाते माक पापमते अर्हमा, मति माक लाग्वदिनाहि पिसिह कीमु. (राजेमि, लावु, डीसाङ इव अमेसाताङ नीवाङे मन्ह्‌ताङ. माट ताल्ह्‌कतप आयि.)’^a”

14 “ओका वेला मीट लोकुरा कसुरतुन मापि कीतिर इतेके मीवा पोग़ोटोग़ बाबाल मीवा कसुरतुन वने मापि कीयनोग़. अदिह्‌कु मीट मीवा अडम मता कसुरतोरिन मापि कीयना गावले. 15 मति ओकावेला मीट लोकुरिन मापि केविर इतेके मीवा पोग़ोटोग़ बाबाल वने मीवा कसुरतुन मापि केवोग़ आयनोग़.

16 “मीट बेस्‍के उपस कीय्ह्‌निर इतेके सोङ केवालोरा लेह्‌का मीट मीवा मोकम सोळसोळ आयमाकि. ‘माट उपस कीसोर मह्‌नोम इद्रम लोकुर ऊळिस माक मान ईयनुर,’ इनजि ओरु तमाङ तोडिङ वाग़िह कीस्‍तोर. इह केंजाट, नना वेहतह्‌नन, लोकुरा मान, अचोने ओरा पाय्‍दा! 17 मति मीट बेस्‍के उपस कीय्ह्‌निर अस्‍के तितोरा लेह्‌का एग़ मीसि तला ऊळिस नेय ओकाटु. 18 बाराह्‌क इतेके मीवा उपस लोकुरिह्‌क दिसनायो, सिरप मीवा दिसवोग़ बाबाले ऊळना. अस्‍के मीवा दिसवा कबळतुन ऊळवाल बाबाल मीक बर्कत ईयनोग़.

19 “मीटु मियेनाह्‌कु इद बूमते वेल्‍ला मालसोम गुम केमाटु, इगा एल्म तिन्ह्‌ता, सिलुम पोयह्‌ता ओसो कलेर लोतुन विर्हचि कलिह्‌तोर. 20 मति इद बूमते मालसोम गुम केवा, देवुळतेनाह्‌कु इहे ताकना इनजि, अद देवुळदीपते मियेनाह्‌कु करयि-बर्कति गुम कीयग़ा. अगा एल्म तिनो, सिलुम पोयो, कलेर कलोर. 21 नना मीक बाराह्‌क वेहतह्‌नन इतेके, बेगा मीवा पाय्‍दा (देवुळदीपते मनि, इद बूमते मनि), अगाने मीवा सीता.

22 “मीवा कोंडा मीवा मेंदुदा वेह्‌चलेह्‌का आंदु. मीवा कोंडा देवुळता राजेमतके मतेके मीवा लोप्पा पूरा वेह्‌च मनदग़ा. 23 मति मीवा कोंडा इद दुनियाता मालसोमतके मनजि, मीट चिव्टम मतिर इतेके, मीवा लोप्पा पूरा ईकळे मनदग़ा. अदिनेनाह्‌कु मियगा मनदनद वेह्‌चि ओका वेला ईकळ बार आता इतेके अद ईकळि सिडापडाता मुर्गंगाता आयग़ा!

24 “बोग़ाय इर्वुर माल्‍कालोरा सेवा-साकुर कीया पग़वोग़. बाराह्‌क इतेके ओग़ु ओर्विन बार कोटुल कीयनोग़, ओर्विन बार जीवा कीयनोग़. इलवेके ओग़ु ओर्विना पोल्‍लो केंजनोग़, ओर्विना पोल्‍लो बार केंजोग़ आयनोग़. अद्रमे मीट वने मालसोमु ओसो देवुळि, इव रेंडिना सेवा मुर्तिय कीया पग़विर.

25 “अदिह्‌के नना मीक वेहतह्‌नन इतेके पिसमुळतेनाह्‌क ‘माट बाताङ तिनदकल, उनडकल,’ ओसो मीवा मेंदुलतेनाह्‌कु ‘माट बाताङ केग़यकल,’ इनजोरे मीट आलिह कीसोर मनमाटु. मीवा जीवा सिरप तिंदलाहे, मेंदुल सिरप गेंदेङ केग़यलाहे मन्ह्‌ताया? 26 पग़ियनाङ पिटेनके ऊळाट, अले! अव वीतोङ वने, कोयोङ वने, अहे डोमेने गुम केवोङ वने. तेला मति मीवा देवुळदीपतोग़ बाबाल अविस्‍किह्‌क तिंडि ईस्‍तोग़. देवुळता मुनेह अविस्‍किह्‌काय वीळिस मीट एक्‍वा मोलातोरिर आंदिर, इतेके निटमे देवुळि मीवा पिसवग़तुन सीता कीयग़ाये. 27 तिनदना-उनडना, इविनलोप्पा आलिह कीसोरे मीवा पिसना-पिसवग़ता उंद पूटावने मीट वीळिह कीया पग़विर. पग़यकिरा?^b

28 “अद्रमे मीटु गेंदेना लोप्पा बाराह्‌कु आलिह कीसोर मह्‌निर? इव सोबाताङ गेळापुंगेह्‌किन ऊळाट, अले, अव बहु वलियताङ! नना मीक वेहतह्‌नन, अव कह्‌टेम केवोङ, नूदे गेंदेङ अर्होङ वने. 29 तेला मति साल्‍मोन राजाल पका सोबाता राजजगा मलियतस्‍के वने अव पुंगेह्‌कना सोबाता बराबर बेस्‍केन एवोग़! 30 इंजेके गेळापुंगेह्‌क नेंड मन्ह्‌ताङ, नाळ बूळेम आस्‍ताङ. एय विस्‍वस इलवोरिर, इद्रमता रोंडातुन देवुळि इचोटा बेसताङ केग़यनाङ उहपिह कीसीस्‍ता इतेके मीक अदु बेचोन कास कीसि गेंदे केग़्‍पिह कीसीयग़ा! ईयग़ाया, एवो? 31 अदिह्‌के ‘बाताल तिंदकोम, उंडकोम, केग़यकोम?’ इविना लोप्पा मीट आलिह कीसोर मनमाटु. 32 देवुळतुन पुनवोर इसि इव कतमे दोर्किह कीयलाह वितापूंडा आस्‍तोर. मति इव सबेटव मीक गावले मन्ह्‌ताङ, तेन मीवा देवुळदीपतोग़ बाबाल पुनजिय मन्ह्‌तोग़. 33 देवुळि मीवा नडुमि राजेम कीयना इतेके ताना सेतेमतुन मीट सबेटविह्‌क मुने ‘इदे मोदुल पोल्‍लो,’ इनजि पर्ह्‌काटु. अह पर्ह्‌कतिर इतेके मीक बाताङ गावले मन्ह्‌ताङ, अव कतमे देवुळि मीक ईयग़ा. 34 नाळ बाताल आयग़ा, तेन आलिह कीसोर मनमाटु. नाळता सीता नाळि! नेटा रंदि, नेटुह्‌क वेल्‍लाय मन्ह्‌ता.