6 पया पिलाति इदिन केंजिसि, “वेग़ मन्कल गालिल पटटोग़ा?” इनजोर ताल्ह्‌कतोग़.

7 इंजेके गालिल पटटुन ताकिह केवाल एरोद अंतिपस राजाल अव दियाने येरुसलेम सहरतगान वास मतोग़. येसु गालिल पटटोग़ आंदोग़ इनजोर पिलाति पुतस्के, येसुन ओनगा ओयलाह वेहतोग़.

8 एरोद अंतिपस येसुना लोप्पा मुनेन केंजिसि मतोग़. अदिनेनाह्‌क ओग़ वेल्‍लाङे दियानाहि येसुन ऊळलाह विचर कीस मतोग़. ओसो येसुना कयदे बेदाय बामिह कीयनद सीना ऊळलाह आसा कीसोर मतोग़. अदिह्‌क ओग़ येसुन ऊळिस पका गिर्दा आतोग़.

9 पया ओग़ु येसुन वेल्‍लाङे पोल्‍लोङ ताल्ह्‌कतोग़, मति येसु तनेनाह ओन बाताले पोल्‍लो मल्होग़.

10 पेर्मालोर ओसो सास्त्रमगूरुर अगा निचि, तम्क विचर वातप येसुना पोग़ोन कसुर्क वाटिंदुर.

11 पया एरोद अंतिपस वने तनाङ सीपय्कना संगे येसुन पास्किस कवतोग़. ओन राजान कीतपु मिळ्स्कनद जगा केग़पिह कीसि, पिलाति गुमसिनेकेन मल्हच ओया वेहतोग़.

12 अदे दिया कोनि एरोद अंतिपस ओसो पिलाति वेर इर्वुर गूनम आतोर, ताना मुने इतेके ओर ओर्विह्‌क-ओर्वोग़ विरुदतेन मंदुर.

13 पया पिलाति पेर्मालोरिन, यहुदिराङ मुक्यालोरिन ओसो लोकुरिन केयतोग़.

14 केयिसि इद्रम इतोग़, “लोकुरिन लेवाङ-मताङ पोल्‍लोङ काग़्हचि, लेसिह केवाल आंदोग़ इनजोर मीट वेग़ येसुन इगा ततिर. इंजेक नना मीवा मुनेह वेन पर्ह्‌किस ऊळतन. मीट वेना पोग़ोन बेव पोल्‍लोना कसुर्क वाटटिर, अव पोल्‍लोनाङ कसुर्क इतेके वेना लोप्पा नाक बाताङे दिसोङ.

15 ओसो एरोद अंतिपसिह्‌क वने वेना बाताले कसुर दिसो, अदिनेनाह्‌क ओग़ु वेन ओन मयगा मल्स लोहचीतोग़. वेन्क हामुरता सिक्सा दोर्कना इद्रम वेग़ बाताले कसुर केवोग़.

16 अदिनेनाह्‌क वेन जेट्‌लाते नल्हता वेहचि विळ्सिस ईय्ह्‌नन,” इतोग़.

18 अस्के सबेटोर लोकुर कलियिसि, “वेग़ येसुन हव्कलाह वेहा! मयेनाह्‌क बरबसिन विळ्सा,” इनजोर रोदा पोयतोर.

19 (बरबसि इनवाल इतेके सहरता मन्कलोरिन सर्करता विरुदते ओङ तेग़्हच मतोग़ ओसो उय्तुरिन हव्किस वने मतोग़. अदिनेनाह्‌क ओन जेलते वाटिस मतोर.)

20 येसुन विळ्सिस ईयलाह, पिलाति ओसो उंद मल्का मुडा लोकुरिन वेहच ऊळतोग़.

21 मति ओरु, “ओन हव्कनागुटातगा मोलाङ कोटिस हव्काट, हव्कनागुटातगा हव्काट!” इनजोर पका रोदा पोयतोर.

22 अस्के पिलाति मुचा केपा ओसोवने लोकुरिन इतोग़, “बाराह्‌कु? वेग़ बाताल कसुर कीतोग़? वेन्क हामुरता सिक्सा ईयना लेह्‌का वेनगा नाक बाताले कसुर दोर्को. अदिनेनाह्‌क वेन जट्‌लाते नल्हता वेहच विळ्सिस ईय्ह्‌नन,” इनजोर इतोग़.

23 मति मुडा लोकुर, “येसुन हव्कनागुटातगा वेळ्हा,” इनजोर पका केयसोर रोदा पोयतोर. अद्रमे ओरा केयनद पका वीळता.

24 अदिनेनाह्‌क पिलाति पया मुडा लोकुर ताल्ह्‌कतपे आयि इनजोर इतोग़.

25 पया जेलते मतोग़ सर्करता विरुद मनवाल हव्के मन्कनु लोकुर ताल्ह्‌कताह्‌क ओन विळ्सिस ईया वेहतोग़. मति इंजेक तम्क विचर वातप बहे कीयिर इनजोर लोकुरा कयदे येसुन ईसीतोग़.

26 अस्के पया सीपय्क येसुन तना हव्कनागुटा कांजिह कीसि, पिलातिना लोताहि मोलाङ कोटना जागातगा ओनेके, नडुम अग़दे येसुह्‌कु हव्कनागुटा कांजलाह लाव वावो. अचोटेने कुरेने सहरतोग़ सिमोन इनवाल पोलमतेनाह येरुसलेमतेके अनजोर मतोग़^b. अस्के सीपय्क ओन पोसि, हव्कनागुटा कांजिस येसुना पेग़्के-पेग़्के दायलाह बीगर पोग़सिह कीतोर.

27 अस्के लोकुरा बेरा गोह्‌डि येसुना पेग़्के अनजोर मतोर. अद वेलाते अगा उचुक आस्कु ओनेनाह अर्युल पासोर अळ्न्दुङ.

28 अस्के येसु अव आस्कनके मिळ्न्दिसि, “ए येरुसलेमताङ आस्कनिर! नयेनाह्‌क अळमाटु, मति मियेनाह्‌क ओसो मीवाङ पिलाङ-पेकोरेनाह्‌क अळ्म्ह्‌टु.

29 बाराह्‌क इतेके इद्रमताङ तिपलताङ दियाङ वायना मन्ह्‌ताङ, अव दियाने ‘वंजो मनदनद आंचाळ देय्वाता, बस्केने नेलाङ हव्कवद आंचाळ देय्वाता, बेस्केन पाल ऊहवद आंचाळ देय्वाता,’ इनजोर लोकुर इनदनुर.

30 ओसो ‘मावा पोग़ोन अर्ह्‌म्टु’ इनजोर मेटान इनदनुर, ‘माक मिसाटु’ इनजोर गुड्रान इनदनुर.^c

31 वेरु नावा लेह्‌काडोग़ कसुरलेवोन्क इद्रम कीस्तोर, इतेके मीट कसुर मनवालोरिन बेद्रम केमुळ आयग़ा?” इनजोर येसु इतोग़.^d

32 अद्रमे येसुना संगे इर्वुर कलेरिन वने हामुरता सिक्सा ईयलाह ओतोर.

33 पया ओर, “तला टाप्रा” इनदनद जागातगा एवतोर. एवसि येसुन हव्कनागुटातगा मोलाङ कोटिसि वेळ्हतोर. ओनासंगे इर्वुर कलेरिन वने ओर्विन तिनळ बाजे, ओर्विन बार ओना दावळ बाजे वेळ्हतोर.

34 अस्के “ए देवुळबाबा! वेर नाक हव्कवालोर लोकुर बाताल कीस्तोर अदिन पुनोर, वेरिन मापि कीमु!” इनजोर देवुळतुन येसु पार्तना कीतोग़.

35 अगा मुडा लोकुर निचि मोलाङ कोटनदिन ऊळसोर मतोर. यहुदिराङ मुक्यालोर येसुन पास्कसोर इद्रम इतोर, “वेग़ दुस्रोरिन पिसिह कीतोग़, वेग़ देवुळ आचतोग़ पिसिह केवाल किर्स्तु आंदोग़ इतेके, तना जीवातुन तनाय पिसिह कीयेग़,” इतोर.

36-37 सीपय्क वने वासि, ओयतद अंगुर जोमा ओन्क उहचि, “निमा यहुदिरा राजानिन आंदिन इतेके, नीवा जीवातुन निमान पिसिह कीम!” इनजोर पास्कतोर.

38 ओसो “वेग़ यहुदिरा राजाल आंदोग़” इनजोर बलाते रासिसि, ओना तलापोग़ोन गुटातगा वेळ्हच मतोर.

39 येसुना संगे मोलाङ कोटिस वेळ्हच मतोरग्डाह ओर्वोग़ कले वने, “निमा देवुळ लोहतोग़ पिसिह केवाल किर्स्तुनिन इतेके, नीक ओसो माक पिसिह कीम,” इनजोर येसुन पास्कतोग़.

40 मति दुस्रोग़ कले बार अद्रम इतोन दगा ईसि, “वेन्क दोर्कतद सिक्सा नीक वने दोर्कता. मति निमा देवुळतुह्‌क वने बह रेयविन रा?

41 माट इतेक कले कबळ कीताह्‌कु, माक काय्दा मतपु बराबर सिक्सा दोर्कता. मति वेग़ इतेके बाताले कसुर केवोग़,” इनजोर इतोग़.

42 ओसो येसुन इतोग़, “ए येसु! निमा राजाल आतस्के नाक सीता कीमु.”

43 इतस्के येसु ओनु, “नना नीक सेतेम वेहतह्‌नन, नेंडे निमा नावा संगे सिंगर्दीपतगा मनदकिन,” इनजोर इतोग़.

44 अस्के पियलि नेक नितग्डाह इतेके, मूंड एगनाह्‌जोम पूरा बूममेंड ईकळ आता.

45 पोळ्दता वेह्‌च वने दिसो. अस्के येरुसलेमतग्डा मंदिरता लोप्पा मतद सबेट्‌क पवित्र गूडटा अग़दगा, अडह कीस मतद गेंदे रेंड तुक्ळेङ आनाह पग़्क वितता.^f

50-51 पया अगा यहुदा पटटा अरिमतेया नाटेनोग़ योसेप इनवाल ओर्वोग़ मन्कल मतोग़; ओग़ु यहुदिराङ तग्वाङ केवालोरग्डाह ओर्वोग़ मतोग़. ओसो तग्वाङ केवालोर येसुना नेयम कीतस्के, अगा तोळ आयोग़. बह इतेके ओग़ बेसतोग़ सेतेम मन्कल मतोग़. देवुळि बेस्के मावा इस्रयेल देसेमते तना राजेम निल्पिह कीयग़ा इनजोर केपिन्दोग़.

52 ओग़े योसेप पिलातिनगा अनजि येसुना सेत्तातुन गति कीय्ह्‌नन इनजोर ताल्ह्‌कतोग़.

53 ताल्ह्‌किस सेत्तातुन हव्कनागुटातग्डाह रेहतोर. पया वेल्‍ला दाराता हामुर-गेंदेते सेत्तातुन ऊर्हतोर. अह कीसि बेरा आद बंडातगा तर्विस मतदु, मुने बोने पोहवद पूना गुमयातगा येसुना सेत्तातुन तासतोर.