<<    <     योहन     19     >    >> 
येसुनु हव्‍कनागुटाता सिक्‍सा ईस्‍तोर
19
1 पया पिलाति येसुन पोसि सोग़्‍पाते नल्हता वेहतोग़. 2 पया सीपय्‍कु कोयेना गीळ पंडिसि ओना तलातगा गळ्‍म कीतोर, पया डुंगा पंड रंगता जगा (राजाल केग़तपु) ओन केग़्‍पिह कीतोर. 3 अह कीसि ओर पास्कलाह आतोर, “जोहर यहुदिरा राजानिन!” इनजि ओन मोकमतुह्‌कु नल्‍ह्‌न्‍दुर. 4 पया पिलाति ओसो पलत पेसिसि लोकुरिन इतोग़, “ऊळाट, ओनगा नाक बातय कसुर दोर्को, इद मीक तेळियना इनजि नना ओन मियके पलत पेहच ततह्‌नन.” 5 अस्‍के येसु कोयेना गीळ ओसो डुंगा पंडलेह्‌काडा जगा केग़सि पलत पेसतोग़. अस्‍के “वेन ऊळाट, पापम-बिचरानु!” इनजि पिलाति ओरिन इतोग़.
गुमसि यहुदिरा मुनेह येसुन निल्‍पिह कीस्‍तोग़ (19:5)
6 ओन ऊळिस पेर्मालोर ओसो मंदिरताङ पह्‌रातोर “ओन हव्‍कनागुटातगा वेळ्हा, हव्‍कनागुटातगा वेळ्हा!” इनजोर केयतोर. अस्‍के पिलाति ओरिन इतोग़, “आयो, मीटे ओसि ओन वेळ्‍हाटु, बाराह्‌क इतेके नाक ओनगा बेदे कसुर दोर्को,” इतोग़.7 अस्‍के यहुदिर ओन इतोर, “माक ओन हव्‍कलाह अदिकर इले इनजि निमा पुतिन, मति माक सास्‍त्रमताङ अडोङ मन्ह्‌ताङ, अव अडोङ वेहतपु, वेग़ु ‘नना देवुळता मग़नन,’ इनजोर इताह्‌कु वेग़ हायनाय गावले.”8 इद पोल्‍लोतुन केंजिसि, नना येसुन हव्‍क वेहतेके, नाकु बेदाय सिक्‍सा दोर्कग़ा बारा, इदिन आलिह कीसि पिलाति पकाय रेयतोग़.9 अस्‍के पिलाति ओसो तना लोता लोप्पा येसुन पोसि ओन इतोग़, “निमा बेग्‍डाहि रेगतिन, बह पुटटिन, डा?” इनजि ताल्ह्‌कतोग़. मति येसु इतेक बातय वळ्ह्‌कोग़.10 “निमा नावा संगे वळ्‍ह्‌कविना? नीक विळ्सनद अदिकर नाके मन्ह्‌ता, ओसो हव्‍कनागुटातगा वेळ्‍हतनद अदिकर नाके मन्ह्‌ता, इनजोर बह निमा पुनविना?” इनजि पिलाति येसुन इतोग़.11 येसु ओन इतोग़, “नीकु देवुळताहि ईतद अदिकर लेवेके, नावा पोग़ोन नीवा बेदे अदिकर इले आस मनालि. अदिनेनाह्‌कु बोग़ पेर्माल पुन्जि-वेन्जि नाक नीवा कयदे ईतोग़, ओग़े नीकाय वीळिसि वेल्‍ला पापम कीतोग़.”12 इदिन केंजिसि, पिलाति येसुनु विळ्सलाह ऊळसोरेन मतोग़. मति यहुदिर इतेके कियोग़-मोयोग़ केय बोटटोर, “निमा वेन विळ्सतिन इतेके रोम राजेमता कय्सर राजाना अडम आतिन, ओनगा माट नीवा रिपोट कीकोम. बोग़ ‘नना राजानन,’ इन्ह्‌तोग़, ओग़ कय्सरना अडमतोग़ु,” इनजोर इतोर.13 इव पोल्‍लोन केंजिसि पिलाति येसुन पलत पेहच ततोग़, तचि नेयम कीयनद कुर्सते ओग़ उदतोग़. इद कुर्स गोळा इनदनद जागातगा मता (तान इब्रि पोल्‍लोते गब्‍बता इन्ह्‌तोर).14 अद दिया आवना पंडुमतेनाह्‌क तयर आयनद दिया मता, जोक-जोक नेक निच मता. अस्‍के पिलाति यहुदिरिन पास्‍कतप इतोग़, “ऊळाट, वेग़ मीवा राजाल!”15 अस्‍के ओर केयतोर, “वेन ओम! वेन ओम! हव्‍कनागुटातगा वेळ्हा!” इनजोर इतोर, अस्‍के पिलाति ओरिन इतोग़, “नना मीवा राजानु हव्‍कनागुटातगा वेळ्‍हतलाह उकुम ईकना?” अस्‍के पेर्मालोर इतोर, “कय्सर राजान विळ्‍सिसि माक बोग़े राजाल इलेग़!”16 ओरा पोल्‍लो केंज पग़वाह्‌कु आक्रिते, पिलाति येसुन हव्‍कनागुटातगा वेळ्‍हतलाह ओरा कयदे विळ्‍सिसीतोग़.
येसुन हव्‍कनागुटातगा वेळ्‍हतह्‌तोर
17 ओर पया येसुन पोसि ओतोर. येसु तना हव्‍कनागुटातुन कांजिसि तला-टाप्रा इनदनद जागातगा एवतोग़ (इब्रि पोल्‍लोते अद जागातुन गुल्‍गुता इन्ह्‌तोर). 18 अगा ओर ओनाङ केग़ताङ गेंदेङ कुळ्‍हचि, ओन हव्‍कनागुटातगा दोहचि, मोलाङ कोह्‌किसि वेळ्हतोर. ओसो येसुन वेळ्‍हतस्‍के इर्वुर कलेरिनु, येसुन नडुम कीसि, इके ओर्विन, अके ओर्विन, हव्‍कनागुटानगा वेळ्हतोर. 19 पया पिलाति, “वेग़ नासरेततोग़ येसु यहुदिरा राजाल,” इनजि इद्रमता कसुर तोहतनद बलाते रासिसि येसुन वेळ्‍हतद गुटातगा वेळ्‍हतलाह वेहतोग़. 20 येसुन वेळ्‍हतद जागा सहरता एरे मताह्‌कु, पंडुमतुह्‌क वातोरु वेल्‍लाटोर यहुदिर अद बलातुन अर्विंदुर. अदु इब्रि, युनानि ओसो रोमि, इव मूंड पोल्‍लोने रासतद मता. 21 अदिह्‌के यहुदिराङ पेर्मालोर पिलातिन इतोर, “ ‘यहुदिरा राजाल,’ इनजोर रासमा, मति ‘ “नना यहुदिरा राजानन,” इद्रम इतोग़,’ इनजोर रासा,” इनजि पेर्मालोर इतोर. 22 अस्‍के पिलाति इतोग़, “इंजेके नना रासतने, रासतन. अहे मनि!”
23 सीपय्‍क येसुनु हव्‍कनागुटातगा वेळ्हतोर अस्‍के ओनाङ गेंदेङ पोयतोर, अह कीसि वग़ोह्‌क-वग़ोह्‌क उंद-उंदि इद्रम नालुङ बाटाङ कीतोर. ओर ओना लोप्पाडा आङतुन वने पोयतोर. अद आङि कोटटद इले, मति पोग़ोटाहि काल्‍कनगा एवनाहि पूरा अर्हतद मता. 24 अदिह्‌क ओर सीपय्‍क तमतमाय इतोर, “तेन माटु अग़्‍हवल, मति इद आङि बोना नसिबते मन्ह्‌तायो, तेन माट सीटिङ वाटिस ऊळकल, रा!” इतोर, इनजि ओर अहे कीतोर. ओर अह कीतस्के सास्‍त्रमते मुने रासतद पोल्‍लो करल आता, अद सास्‍त्रम इह मन्ह्‌ता:
“ओर नावाङ गेंदेङ तमाय तूसतोर,
ओसो नावा आङतेनाह्‌कु सीटिङ वाटटोर.”
25 हव्‍कनागुटाता एरे येसुना तलोग़ि, ओसो तमकूचि, ओसो कोल्‍पाना मुते मरियालि, ओसो मग्डला नाटेनद मरियालि इव अगान निच मताङ. 26 अस्‍के नना येसुना तलिना बाजे निच मतन. माक इर्विरिन ऊळिसि, येसु तनतलिन इतोग़, “वेग़ ऊळा रि, इंजेटाह नि मग़ि!” 27 पया नाक इतोग़, “ऊळा, इंजेटाहि इद नीवा यायाल आंदु.” अस्केडाह पया येसुना तलिनु नना नावा लोन ओसि अय कीतन.
येसुना हामुरि
28 अस्‍के पया, “नावा कबळतुन नना कतम मारिह कीतन,” इनजि येसु पुतोग़. अस्‍के, सास्‍त्रमते रासतद पोल्‍लो करल आयना इनजि “नाक एग़ उंडा वसता,” इनजोर इतोग़. (बाराह्‌क इतेके “नाक एग़ उंडा वसतस्के ओर नाक उनडलाह ओयतद अंगुर जोमा ईतोर,” इद पोल्‍लो देवुळताङ पाटाना सास्‍त्रमते रासतद मता.) 29 अगा ओयतद अंगुर जोमाते निहच मतद उंदि अळ्का मता. इनजोर ओरु अद अळ्‍कातगा दूदतुन मुळ्हचि, लाटटे कोडटगा तासिसि, येसुना तोड एरे ओसि उहतोर. 30 अस्‍के येसु तानु ऊतिसि, “नना नावा कबळतुन कतम मारिह कीतन!” इनजोर इतोग़. अह इतस्‍के, इळ्‍न तला वग़्‍हचि ओग़ हातोग़.
31 इमा दिया वारमता पोल्‍वादिया मता (अद पोल्‍वादिया इतेके आवना पंडुमता बेह्‌रा पोल्‍वादिया आंदु). यहुदिराङ अडोङ वेहतपु, पोल्‍वादियाते हव्‍कनागुटानगा सेत्ताङ मनदलाह पोलोङ, अदिनेनाह्‌कु ओराङ पेदल्‍कु पिलाति गुमसिनगा वासि, “ओर मुवुरा जीवा चट्‌पिट अनि इनजोरे ओराङ काल्‍किन ओग़्‍हचि, सेत्तान रेहता वेहा,” इनजि ताल्ह्‌कतोर. 32 अस्‍के गुमसि वेहताह्‌कु, सीपय्‍क वासि येसुना संगे वेळ्‍ह्‌च मतोर इर्वुराङ आसि काल्‍किन ओग़्‍हतोर. 33 मति येसुनगा एवतोर अस्‍के वेग़ हातदिन ऊळिसि, वेनाङ काल्‍किन ओग़्‍होर. 34 मति येसु निटम हातोग़, इनदलाहि ओर्वोग़ सीपय येसुना सेंकातुह्‌कु गोग़्‍काते कोटटोग़, अस्‍के चट्‌ने नेतुरि ओसो एग़ वाङता. 35 (नना कुदि अदिन ऊळतन, ऊळिसि मीट येसुन नमना इनजि वेहतह्‌नन. देवुळ लोहतोग़ राजाल येसुना लोप्पा इद नावा साक्‍सि करलताये आंदु, इनजि नाक एर्काये.) 36-37 “ओना उंदाय बोकातुन ओग़्‍होर आयनुर,”a ओसो “ओन कोटटोरु ओन ऊळनुर,”b इनजोर देवुळ लोहवाल पिसिह केवाना लोप्पा सास्‍त्रमते रासिस मनदनव इव पोल्‍लोङ करल आयना इनजि येसुह्‌क इह आता.
येसुन गुमयातगा तासिह्‌तोर
38 इव गोटिङ आतापया, अरिमतेया नाटेनोग़ ओर्वोग़ योसेपि इनवाल, पिलातिनगा अनजि, “येसुना सेत्तातुन पोहतलाह ओयकन,” इनजोर ताल्ह्‌कतोग़. (वेग़ योसेपि यहुदिराङ पेदल्‍किन रेयिसि येसुनु कुस्‍क्‍ने नमिंदोग़.) अस्‍के गुमसि पिलाति “ओम्‍ह्‌ट,” इनजोर इताह्‌कु, ओर पया येसुना सेत्तातुन ओतोर. 39 योसेपिना संगे निकोदेमि इनवाल येसुन पोहतलाह वातोग़. (वेग़े कोनि मुने उंद दिया नग़्‍का येसुन कलियलाह वास मतोग़.)c वेग़ु सेत्तातुन ओकलाह डेडा वीसा मूंडु (33) किलोङ गब एग़्स्कनद मराता पिंडि ओसो अतर्नेय काल्‍वा कीसि तच मतोग़. 40 यहुदिरा पोहतना उतुरते, हामुर-गेंदेनगा इद काल्‍वा कीतद अतर्नेयदुनु सलिसि येसुना सेत्तातुन ऊर्हतोर. 41 येसुन वेळ्‍ह्‌च मतद जागातगा मराना पेंदाता उंद वाळुम मता. अगाने उंदि बेरा आदतगा मन्‍कन पोहतलाह पूना पांजा तर्वतद मता, अद गुमयाते मुने बोने पोहवाय मतोर. 42 अद गुमया एरे मताह्‌कु, येसुन अगान पोहतोर, बाराह्‌क इतेके पोल्‍वादिया गय्‍क इतेके सुरु आयना मता, दुस्रा जागा पर्ह्‌कलाह मोका इले आसि.d येसुना सेत्तातुन अगान पोहचि, अग़दा अडम बेरा आदबंडा तिळ्‍प कीसि अतोर.