येसु पूना करलता पेर्माल आंदोग़
8
1 इचानाह वेहचोर वातदिना मोदुल पोल्लो इदे: बोग़ पोग़ोन बेरा डीसाता देवुळता तिनळ बाजे राजेम कीयलाहि उदतोग़, ओग़े मयेनाह्क पेर्माल मन्ह्तोग़. 2 बेद रावुळतुन देवुळि मोसा मुय्तोन पंड वेहता, अद इद बूमतगा मन्कलोरा कयदे पंडटदु.
मोसाना कालमते इस्रयेलतोरा रावुळि (8:2)
4 बूमतगा पया मोसानाङ अडोङ वेहतप लेह्का कोड वाटलाहि वेल्लाटोर बूमयालोर मन्ह्तोर. अदिनेनाह्क येसु इंजेके बूमते मन्ज मतेके, बूमयाल वने आयोग़ आवेग़. 5 मोसाल देवुळता रावुळतुन निल्पिह कीयनामुने देवुळि ओन वेहच मता, “निमा नावा संगे मेटातगा मतिन, अस्के नना नीक बाताल-बाताल तोहतन, बराबर अद्रमलेह्काने नावा रावुळतुन पंडकिर,”a इनजोर इता. इतेके इद बूमतगा पेर्मालोर सेवा कीयनद जागा, पोग़ोन देवुळदीपते मनदनद रावुळ बेद्रम मन्ह्ता इनजि तोहतह्ता; ताना दळ्मता लेह्कान मन्ह्ता. 6 मति इंजेके देवुळता पूना करलते माक कलियिह केवाल येसुये आंदोग़. इद करल इतेके मुनेता करलतुह्काय पका बेसतल आंदु. बह इतेके इद पूना करलते देवुळि विळ्सिस मतव पोल्लोङ मुनेता करलताङ पोल्लोह्काय एक्वा बेसतल. इद्रमलेह्का इद बूमतोर पेर्मालोरिह्काय येसुह्कु पका बेसतल सेवा दोर्कता.
7 मुनेता करलतगा बाताले तप इलवेक अचोन, पूना करलता बाताले गर्ज मनो आवालि. 8 मति देवुळि तना मन्कलोरगा तप ऊळता इनजि सास्त्रम माक इद्रम वेहतह्ता:
“इदु! नना इस्रयेल राजेमता संगे, अहे यहुदा राजेमता संगे
पूना करल कीयनव दियाङ एवयलाह आताङ. b
9 ओराङ तादोर-बाबोरा कयदुन पोस, मिसर देसेमताहि नना तच मतन,
अस्केडा करलता लेह्कान इद पूना करल मनो.
पाळ्ना करल वेहतप ओर ताकोर; अदिनेनाह्क नना ओरिन सीता केवोन.
10 मति पेग़्के ओरा संगे इद्रमता करल कीकन:
नना नावाङ अडोनु ओरा सीतातगा तासकन;
ओरा जीवातगा अव अडोनु नना रासकन;
नना ओरा देवुळतन मनदकन; ओर नावाङ मन्कलोर मनदनुर;
11 उड्लोर आयिर बेरोर आयिर, सबेटोर नाक पुन्ज मनदनुर;
अदिनेनाह्क ओर तमा तमा नाटेनोर मन्कलोरिन,
तमा तमा जीवा-तलातोरिन,
देवुळतुन पुन्ह्ट इनजि काग़्हचीयनद गर्ज इले आयग़ा;
12 ओराङ लाग्वाङ कबस्किन नना मापि कीकन;
ओरा पापमतुन नना बेस्केन सीतात तासोन आयकन,” इनजोर सामि इता, c