¹ जदे सबद् बितवा पे, मरियम मगदलीनी, याकूब की मेतारी मरियम अने सलोमी ने काया पे मळवा सरु मुसालो मोल ल्यो के अई के ईसु की लोथ पे मळे। ² अने हफ्ता का पेलां दन सबेरे-सबेरे दन हिटताज वी कबर पे अई। ³ वी माय-माय कई री थी, कुंण हमारा सरु कबर का मुन्डा से सिल्‍ला सरकायगा?" ⁴ जदे उणने नगे उठाड़ी के देख्यो के सिल्‍ला नरी मोटी होवा पे बी कबर पे से सरकी हुई हे। ⁵ कबर माय जावा पे उणने एक जुवान के धोळा लतरा पेर्‌यो सुदा हाताड़ी बेठ्यो देख्यो; अने वी दंग रई गी।

⁶ सरगदूत ने उणका से क्यो, "चोंको मती। तम ईसु नासरी के जो कुरुस पे लटकाड़्यो थो, ढुंडी री हो। उ जिन्दो हुई ग्यो हे। यां हयनी। देखो, याज वा जगा हे जां उणने उके धर्‌यो थो। ^7 a पण जाव, उका चेलाहुंण अने पतरस के बताड़ो के उ तमार से पेलां गलील जायगा अने तम उके वां देखोगा, जसो के उने तमार से क्यो थो।"

⁸ वी वां से हिटी अने कबर से पाटी दई, क्योंके धुजणी अने अचरज उणका पे छई ग्यो थो; अने उणने कइंका से बी कइंनी क्यो, क्योंके वी डरी गी थी।

[ ⁹ जिन्दा होवा का बाद हफ्ता का पेलां दन घणा सवेरेज, ईसु सगळा से पेलां मरियम मगदलीनी के जेका माय से सात बुरी आतमाहुंण हेड़ी थी नगे आयो। ¹⁰ उने जई के यो समिचार ईसु का चेलाहुंण के सुणायो, जो दुःख माय डुब्या होया था अने रोई र्‌या था। ¹¹ जदे उणने यो सुण्यो के उ जिन्दो हे अने उणके नगे आयो तो उणके बिसासज नी होयो।

¹² इका बाद उ दूसरा रुप माय उणका माय से दो के जदे वी गांम आड़ी जई र्‌या था, नगे आयो। ¹³ उणने जई के दूसरा के बी यो समिचार द्‍यो, पण उणने बी बिसास नी कर्‌यो।

¹⁴ बाद माय ईसु उना ग्याराहुंण के बी जदे वी जिमवा बेठ्या था, नगे आयो; अने उणका अबिसास अने हिरदा का काठापण पे उणके डांट्या, क्योंके उणने उको बिसास नी कर्‌यो थो जिणने उके जी उठवा का बाद देख्यो थो। ^15 c अने उने उणका से क्यो, "तम आखा जग माय जाव अने आखी धरती पे सुब-समिचार परचार करो। ¹⁶ जो बिसास करे अने बपतिसमो ले उ उध्दार पायगा, पण जो बिसास नी करे उ दोषी ठेराड़्यो जायगा। ¹⁷ अने बिसास करवा वाळाहुंण माय या सेलाणी नगे आयगा: म्हारा नाम से वी बायरबादाहुंण हेड़ेगा, अने नवी-नवी भासाहुंण बोलेगा; ¹⁸ वी सरपहुंण के उठाड़ी लेगा अने अगर वी पराण नासक जेर बी पी जावे तो इका से उणको नुकस्यान नी होयगा; वी बेमारहुंण पे हात धरेगा अने वी नज हुई जायगा।"

^19 d तो जदे परभु ईसु उणकासे बातहुंण करी चुक्यो, तो उके सरग माय उठई ल्यो, अने परमेसर का सुदा हाताड़ी बेठी ग्यो। ²⁰ अने चेलाहुंण ने जई के सगळी जगा परचार कर्‌यो। अने परभु उणका गेले काम करतो र्‌यो, अने बचन के उना अचरज का कामहुंण का गेलेज-गेल जो होता जई र्‌या था सच्चई कायम करतो र्‌यो।]

[ ⁹ अने झट बइराहुंण ने पतरस अने उका सातिहुंण के यो सगळो निरदेस सुणई द्‍यो। ¹⁰ अने उका बाद ईसु ने खुद अनन्त उध्दार का पवित्तर अने कदी खतम नी होवा वाळा सुब-समिचार के चेलाहुंण से उगणूं से आथणूं तक परचार करायो।]