2 Ta yaꞌa̱ kuan ta chikóo̱ nonga seꞌe ña cha chikunañi̱ Abel. Ta ra saꞌá kuenda mbee kuví ra Abel kuan. Ta ra Caín, yañi ra, ra saꞌatyiñó chichi kuꞌu kuví ra.

3 Noo kɨvɨ keꞌe̱n ra Caín suꞌva chɨtɨ cha kita̱ nu ñuꞌún nu saꞌatyiñó ra, ta chaꞌa̱ ra chi Nyoo. 4 Ta chaꞌa̱ tuku ra Abel chi Nyoo, chaꞌa̱ ra seꞌe nuu mbee sana ra, kɨtɨ naꞌnu ka ta xaꞌan ka. Ta Nyoo Jehová nyeꞌe̱ ra chiꞌin cha vaꞌa chi ra Abel ta chiꞌin cha chaꞌa̱ ra. 5 Soko ña nyeꞌe̱ ra chiꞌin cha vaꞌa chi ra Caín ta nɨɨ ri cha chaꞌa̱ ra. Ta yukuan chaꞌa, ra Caín kuxaa̱n xaan ra, ta nyakua nya nuu ra ta ketuvi̱ cha kuxaán ra. 6 Ta Nyoo katyí ra chi ra: “¿Ñáá kuenda cha xaan xaan nyeꞌún, Caín? 7 Chitón tatu savaꞌún cha vaꞌa, kua kusɨɨ kuñún, ta tatu sakuvún kuatyi, kukuvi chasaꞌa kuatyi kuan chuun, soko tatu kuñún, kuvi chasaꞌun chi kuatyi kuan”, katyí ra Jehová chi ra.

8 Ta kuvi̱ noo kɨvɨ kuan, ra Caín chaka̱ ra chi ra Abel, yañi ra, na kuꞌun ra kukaka noo ra chichi kuꞌu. Ta kuꞌva cha nyikú ra chichi kuꞌu kuan, sana iñi ra Abel, tɨɨ̱n ra Caín chi ra, ta chaꞌñi̱ ra chi ra. 9 Yaꞌa̱ kuan, ta ndaka̱ tuꞌun Nyoo chi ra Caín:

—¿Nyá nyaá yañun, Caín? ―katyí Nyoo chi ra.

Ta nakaꞌa̱n ra Caín, ta katyí ra:

―Ña chité, ¿atu sɨki nyaá cha saꞌakuendé chi yañi? ―katyí ra.

10 Ta nakaꞌa̱n Nyoo:

—¿Ñáá cha chinyakuvu̱n? Vatyi nɨñɨ yañun cha chatɨ̱ nuu ñuꞌún, kaná chaa chi, ta chikán taꞌvi chi chii na sandai kuatyun. 11 Ta vityin cha katyi cha chaꞌñu̱n chi yañun, ñaꞌri cha vaꞌa kukuvun. Ta kua kiton nu ñuꞌún nu chatɨ̱ nɨñɨ yañun. 12 Ta nɨɨ ri maa saꞌatyiñón nu ñuꞌún kuan, ma kuvaꞌa tyiño saꞌún. Vityin kuꞌun kukaka noo ndoꞌun, ta kukuvun noo ra chiká noo ndaꞌvi sɨkɨ ñuꞌún ñayɨvɨ̱ ―katyí ra chi ra.

13 Ta nakaꞌa̱n ra Caín:

―Kaꞌnu xaan kuꞌva tachí tuñun chii, ta ma kunyee maa iñi yuꞌu. 14 Ta vityin tava̱ ñeꞌun chii, ta ma nyeꞌe ke chuun vatyi kua kaka noo ndaꞌvi, ta ñaꞌri nuu kua koi, ta yóó cha kua nañiꞌin chii, kua kaꞌñi ra chii.

15 Ta nakaꞌa̱n Nyoo Jehová chiꞌin ra ta katyí ra:

―Yóó cha kaꞌñi chuun, ucha taꞌan chaꞌa kutachi tuñi yuꞌu chi ra kukaꞌñi chuun —katyí ra.

Tyikuan ta Nyoo Jehová tyaa̱ ra noo tuñi chi ra, vatyi yóó cha nañiꞌin chi ra, ma kuvi kaꞌñi ra chi ra. 16 Ta cha yaꞌa̱ ndɨꞌɨ̱ ndatuꞌún Nyoo chiꞌin ra, kita̱ ra ta kuaꞌan ra ityi nu kuví Nod ityi nu kañá ñanyii Edén.

17 Ta chikoo̱ ra Caín chiꞌin ñasɨꞌɨ ra, ta chikoꞌo̱n seꞌe ña. Yaꞌa̱ kuan ta kaku̱ ra Enoc. Ta ra Caín savaꞌa̱ ra noo ñuu ta sakunañi̱ ra ñuu kuan “Enoc”, tari sɨvɨ seꞌe ra. 18 Ta seꞌe ra Enoc kuví chi ra Irad, ta seꞌe ra Irad kuví chi ra Mehujael, ta ra Mehujael kuví sutu ra Metusael, ta seꞌe ra Metusael kuví chi ra Lamec. 19 Ta uvi taꞌan ñasɨꞌɨ ra Lamec chikoo̱: noo ña chinañi̱ ña Ada, ta inga ña chinañi̱ ña Zila. 20 Ta kaku̱ noo seꞌe ku Ada, ta sakunañi̱ ña Jabal chi ra. Ta tata ra Jabal ikan kuvi̱ ra cha iyó chichi veꞌe ñɨɨ kɨtɨ. Ta sanakuña̱ ra tandɨꞌɨ nuu kɨtɨ vaꞌa. 21 Ta yañi ra Jabal kuví chi ra Jubal. Ta ra cha kakuvi̱ tata ra Jubal, kuvi̱ chi tandɨꞌɨ ra cha sakuakú arpa ta ra tɨvɨ́ tuyoo. 22 Ta inga ñasɨꞌɨ ra Lamec cha chinañi̱ Zila, chikoo̱ tuku seꞌe ña kuan ta sakunañi̱ ña Tubal-Caín chi ra. Ta ra kuan savaꞌa̱ ra tandɨꞌɨ nuu ndaꞌa tyiño chiꞌin kaa ta chiꞌin cha kuví bronce. Ta chiyo̱ noo kuꞌva ra cha chinañi̱ Naama.

23 Ta noo kɨvɨ kuan katyí ra Lamec chi nɨnduvi ñasɨꞌɨ ra:

25 Ta inga chaꞌa chikóo ra Adán chiꞌin ñasɨꞌɨ ra, ta chikoꞌo̱n seꞌe ña, ta kaku̱ nonga seꞌe ñu ta sakunañi̱ ñu Set chi ra. Ta katyí ña: “Nyoo chaꞌa̱ ra nonga seꞌi tyiño nuu ra Abel, cha chaꞌñi̱ ra Caín.”

26 Ta ra Set kuví sutu ra Enós. Ta kɨvɨ kuan kichaꞌa̱ chikán taꞌvi ñáyɨvɨ chi Nyoo chiꞌin sɨvɨ ra “Jehová”.