―¿Atu katyí Nyoo chi ndo, vatyi ma kuvi kachi ndo tandɨꞌɨ nuu chɨtɨ yutun cha iyó chichi yutun yuku vixi iꞌya? ―katyí koo kuan chi ña.

2 Ta nakaꞌa̱n ñaꞌan sɨꞌɨ kuan:

―Kuví kachi ndi tandɨꞌɨ nuu chɨtɨ yutun yuku vixi iꞌya, 3 soko chɨtɨ yutun cha nanyaá maꞌñu yutun yuku vixi iꞌya, katyí Nyoo chi ndi vatyi ma kuvi kachi ndi nɨɨ ri ma kuvi tɨɨn ndi, koto kúvi ndi ―katyí ña chi koo kuan.

4 Ta katyí koo kuan chi ña:

―Ña ndicha, ma kúvi ndo. 5 Vatyi chitó Nyoo vatyi kɨvɨ kachi ndo chɨtɨ yutun kuan, kunuña chɨtɨ nuu ndo ta koto ndo ñáá cha kuví cha vaꞌa ta ñáá cha kuví cha ña vaꞌa, tari kuꞌva chitó maa Nyoo ―katyi tɨ chi ña.

6 Ta nyeꞌe̱ ña chɨtɨ yutun kuan vatyi tyakɨ xaan, ta kuñí ña kachi ña, vatyi takuꞌva kuvi kutuñi iñi ña ñáá cha kuví cha vaꞌa ta ñáá cha kuví cha ña vaꞌa. Ta yukuan kuvi̱ nu toꞌo̱n ña chɨtɨ kuan ta chachi̱ ña. Ta chaꞌa̱ ña chɨtɨ kuan kachi yɨɨ ña, ta chachi̱ ndɨꞌɨ ra. 7 Ta kaa kuꞌva ri kuan, ta nuña̱ nuu ñu, ta nanyeꞌe̱ ñu vatyi vityiyaa nɨnduvi ñu. Ta tyikuan ta kiku̱ ñu ndaꞌa yutun higuera, ta chasɨ̱ ñu chi ñu.

8 Ta chiñi̱ ñu ndusu Nyoo Jehová chichi yutun yuku kuan, vatyi chiká noo ra yukuan nu kaá tatyi cha cha iñi kuan. Ta tixeꞌe̱ nuu ñu chi ra chichi yutun kuan. 9 Ta kana̱ chaa Nyoo Jehová chi ra:

―¿Nya ñoꞌún, Adán? ―katyí ra.

10 Ta nakaꞌa̱n ra Adán:

―Maa yuꞌu ñoꞌón iꞌya, chiñi̱ ndusun chichi yutun yuku iꞌya, ta yuꞌví xain kuvi̱ vatyi vityiyai, yukuan chaꞌa kɨꞌvɨ̱ xeꞌi ―katyí ra chi Nyoo.

11 Ta ndaka̱ tuꞌun Nyoo chi ra:

―¿Yóó cha sañaꞌa̱ chuun vatyi vityiyaun? ¿Atu chachu̱n chɨtɨ yutun cha katyi̱ chuun, cha ma kachun?

12 Ta nakaꞌa̱n ra Adán:

―Ñaꞌan sɨꞌɨ cha chaꞌu̱n chii, cha kutaꞌan chiꞌin, ikan ña chaꞌa̱ chɨtɨ kuan kachi, ta chachi̱ ―katyí ra.

13 Ta katyí Nyoo Jehová chi ñaꞌan sɨꞌɨ kuan:

―¿Ñáá cha chinyakuvu̱n? ―katyí ra.

Ta nakaꞌa̱n ña:

―Koo iꞌya sandavi̱ ñaꞌan chii ta chachi̱ chɨtɨ yutun kuan ―katyí ña

14 Ta katyí Nyoo Jehová chi koo kuan:

―Cha kuenda cha tyeꞌe kaa sakuvu̱n, kua kuvun noo kɨtɨ taꞌnu̱ nyatu nuu tandɨꞌɨ maa kɨtɨ, ta chiꞌin chichun kukakon, ta ñiyaka ñuꞌún kukachun tandɨꞌɨ maa kɨvɨ cha kukoun, vityin ta nu kuaꞌan chi ityi nuu. 15 Kusakuvi cha ma kuñi nyeꞌe ñaꞌan sɨꞌɨ iꞌya chuun, ta nɨɨ ri tata ña. Ta yoꞌo chiꞌin tandɨꞌɨ tata maun, ma kuñi nyeꞌe ndo tata maa ña, vatyi noo tata ñaꞌan iꞌya, kukuañi ra xiñun, ta maun kukachi yɨꞌun sɨyɨ ra.

16 Ta chi ñaꞌan sɨꞌɨ kuan katyí ra:

―Ta yuꞌu kusakuvi vatyi kunyeꞌun cha uꞌvi kɨvɨ koꞌon seꞌun, ta kaꞌnu xaan cha uꞌvi kunyeꞌun kɨvɨ kukaku seꞌun. Ta vasɨ kaꞌnu tɨndoꞌo kunyeꞌun soko kua kuñun koun chiꞌin yɨun, ta maa ra kukunyaka ñaꞌan ra chuun ―katyí ra chi ña.

17 Ta chi rayɨɨ kuan katyí ra:

―Ta cha kuenda cha kichaꞌu̱n tuꞌun kaꞌa̱n ñasɨꞌun, ta chachu̱n chɨtɨ yutun cha katyi̱ chuun cha ma kachun, vityin ñaꞌri cha vaꞌa kukuvi ñuꞌún ñayɨvɨ̱, cha katyi kuatyun, ñiꞌin xaan kusaꞌatyiñon nu ñuꞌún, ta chiꞌin tɨndoꞌo kuñiꞌun cha kachun tandɨꞌɨ kɨvɨ cha kua koun. 18 Ta kua kaña tandɨꞌɨ nuu iñu sɨkɨ ñuꞌún ñayɨvɨ̱, ta yoꞌo yuku kukachun. 19 Ta chiꞌin tyeun, ta chiꞌin tatun kusaꞌatyiñon ta ñiꞌun kachun koun sɨkɨ ñuꞌún ñayɨvɨ̱ nyakua nya kɨvɨ kúvun ta kunanduvun ñuꞌún, vatyi chiꞌin ñuꞌún chino̱n ta suri ñuꞌún kunanduvun ―katyí Nyoo chi ra Adán.

20 Ta ra Adán sakunañi̱ ra chi ñasɨꞌɨ ra, Eva, vatyi ikan ña kua kuvi sɨꞌɨ tandɨꞌɨ ñáyɨvɨ cha kukoo sɨkɨ ñuꞌún ñayɨvɨ̱. 21 Ta savaꞌa̱ Nyoo Jehová uvi taꞌan saꞌma kañi chiꞌin ñɨɨ kɨtɨ, ta sandɨꞌvɨ̱ noo ra chi nɨnduvi ñu. 22 Ta katyí ra: “Vityin cha nanduvi̱ ñáyɨvɨ iꞌya tari maa yo, vatyi chitó ñu ñáá cha kuví cha vaꞌa ta ñáá cha kuvi cha ña vaꞌa. Vityin ma kuꞌva yo cha tɨɨn ñu ta kachi ñu chɨtɨ yutun cha kuꞌva cha koo ñu tyikuan ri maa”, katyí ra.

23 Yukuan chaꞌa tava̱ Nyoo Jehová nɨnduvi taꞌan ñu chichi yutun yuku vixi kuan. Ta kichaꞌa̱ saꞌatyiñó ñu nuu ñuꞌún, ta suri chiꞌin ñuꞌún kuan chino̱ ñu. 24 Ta cha yaꞌa̱ tava̱ ra chi ñu chichi yutun yuku vixi kuan, ta kuatyaa̱ ra suꞌva ángel yuꞌu chaku kuan ityi nu kaña ñanyii, ta tyaa̱ ra noo mityi cha kayú ñuꞌu̱n nuu, ta mityi kuan nakuikó tandɨꞌɨ ityi takuꞌva vatyi yori kuvi nañiꞌin ityi nu nanyaá yutun cha chaꞌá chɨtɨ cha konyito ñu tyikuan ri maa.