Tuꞌun cha natyiꞌi̱ taꞌan Nyoo chiꞌin ra Noé
9
1 Ta nasoko̱ Nyoo chi ra Noé ta chi seꞌe ra. Ta katyí ra tyeꞌe kaa: “Ko̱o kuaꞌa seꞌe ndo ta tata ndo, ta na̱kuña ndo ta ko̱o ndo nɨɨ kaꞌnu sɨkɨ ñuꞌún ñayɨvɨ̱. 2 Tandɨꞌɨ maa kɨtɨ cha iyó sɨkɨ ñuꞌún ñayɨvɨ̱ iꞌya kukoo cha yuꞌví tɨ nyeꞌé tɨ chi ndo, tandɨꞌɨ saa, tandɨꞌɨ kɨtɨ cha chiká noo ta kandá iꞌya sɨkɨ ñuꞌún ñayɨvɨ̱, ta tandɨꞌɨ tiyaka cha iyó chichi tyañuꞌun, tandɨꞌɨ maa tɨ natyaa̱ kuende chi tɨ ndaꞌa ndo. 3 Chaꞌá yuꞌu tandɨꞌɨ kɨtɨ ta tandɨꞌɨ chɨtɨ, tandɨꞌɨ kuꞌu kuii, vatyi kachi ndo ta chiꞌin kuan kua konyito ndo. 4 Soko koño cha yɨꞌɨ́ nɨñɨ, ma kuvi kachi ndo, vatyi nɨñɨ kuan chaꞌá cha konyito kɨtɨ ta ñáyɨvɨ ñandɨꞌɨ. 5 Cha ndicha katyí chi ndo, tatu noo ñáyɨvɨ chaꞌñi̱ ñu chi inga taꞌan ñu, kunandaken kuenda chi ñu. Tyikuan kaa tuku kɨtɨ, tatu chaꞌñí tɨ chi noo ñáyɨvɨ, kunandaken kuenda nɨñɨ kuan chi tɨ.6 ”Noo ra cha kaꞌñi noo ñáyɨvɨ,
inga ñáyɨvɨ kukaꞌñi chi ra.
Vatyi tandɨꞌɨ ñáyɨvɨ ta chino̱ ñu tari kuꞌva kaá maa yuꞌu cha kuví Nyoo.
7 Soko nyoꞌo kua koo kuaꞌa seꞌe ndo vatyi ndukuaꞌa tata ndo,
ta nakutya ndo sɨkɨ ñuꞌún ñayɨvɨ̱”, katyí Nyoo chi ra Noé.
8 Ta katyí tuku Nyoo chi ra Noé chiꞌin seꞌe ra tyeꞌe kaa: 9 “Vityin kua tyiꞌi taꞌin noo tuꞌun chiꞌin ndo, ta chiꞌin tandɨꞌɨ tata ndo, 10 ta chiꞌin tandɨꞌɨ kɨtɨ cha kita̱ chuꞌun chichi tundoo kuan: tandɨꞌɨ saa, tandɨꞌɨ kɨtɨ sana ndo, nyakua nya kɨtɨ kuꞌu. 11 Ta ikan iꞌya kuvi tuꞌun cha kua natyiꞌi taꞌan yuꞌu chiꞌin ndo: Ma sakunaa ke chiꞌin ndutya tandɨꞌɨ cha nyito, ta nɨɨ ri ma koon ka savi xaan cha kusakunaa cha iyó nu ñuꞌún ñayɨvɨ̱”, katyí Nyoo. 12 Ta katyí tuku Nyoo: “Ikan iꞌya kuví noo seña tuꞌun cha kua natyiꞌi taꞌin chiꞌin ndo, ta chiꞌin tandɨꞌɨ nuu kɨtɨ, tandɨꞌɨ tyembu cha kua koo ñuꞌún ñayɨvɨ̱: 13 Kuatyai̱ koo yaꞌnyi nu viko, vatyi kuví chi cha ndaa tuꞌun cha natyiꞌí taꞌin chiꞌin ndo. 14 Ta kuꞌva cha kua kɨꞌvɨ viko, cha kua koon savi, tyikuan ta kukita koo yaꞌnyi kuan nuu viko. 15 Ta kunɨkoꞌon iñi tuꞌun cha ndoi̱ chiꞌin ndo, chiꞌin tandɨꞌɨ nuu kɨtɨ, ta ña kua koon ka savi xaan cha kusakunaa tandɨꞌɨ maa cha nyito sɨkɨ ñuꞌún ñayɨvɨ̱. 16 Ta kua kunyaa koo yaꞌnyi kuan nuu viko, ta kua nyeꞌi ta kua nɨkoꞌon iñi tuꞌun cha ndoi̱ chiꞌin ndo, chiꞌin tandɨꞌɨ nuu kɨtɨ cha iyó sɨkɨ ñuꞌún ñayɨvɨ̱, ta iꞌya kua kuvi noo seña tandɨꞌɨ kɨvɨ, ta tandɨꞌɨ tyembu cha kua koo ñuꞌún ñayɨvɨ̱”, katyí Nyoo. 17 Katyí tuku Nyoo chi ra Noé: “Ikan iꞌya kuví seña tuꞌun cha ndoi̱ chiꞌin tandɨꞌɨ cha nyito cha iyó sɨkɨ ñuꞌún ñayɨvɨ̱”, katyí ra chi ra.
Nu chiñi̱ ra Noé
18 Ta seꞌe ra Noé cha kita̱ chiꞌin ra chichi tundoo kuan kuví ra Sem, ra Cam, ta ra Jafet. Ta ra Cam kuví sutu ra Canaán. 19 Ikan uñi taꞌan ra iꞌya kuví seꞌe ra Noé ta chiꞌin nɨnduñi tata ra iꞌya kanakuña̱ ra ta kasakutu̱ ra nu ñuꞌún ñayɨvɨ̱.
20 Yaꞌa̱ kuan ta kichaꞌa̱ saꞌatyiñó ra Noé nuu ñuꞌún, ta tachi̱ ra noo itu yoꞌo tichaꞌa ndɨvɨ. 21 Ta chiꞌi̱ ra vinu ndutya tichaꞌa ndɨvɨ kuan, ta chiñí xaan ra ta naa̱ iñi ra, ta katuví maa ra maꞌñu sava chichi veꞌe ra ta vityiyaa ra. 22 Ta ra Cam, sutu ra Canaán, nyeꞌe̱ ra nu vityiyaa sutu ra, ta chaꞌa̱n ra chikatyi̱ ra chi nduvi yañi ra cha kanyikú nu keꞌe. 23 Tyikuan ta ra Sem, ta ra Jafet, kakeꞌe̱n ra noo saꞌma. Ta nduvi ra katyiso̱ ra saꞌma kuan soko ra, ta kachika̱ chata ra kɨꞌvɨ̱ ra nu katuví sutu ra chichi veꞌe kuan, ta kanasaꞌvi̱ ra saꞌma kuan chi sutu ra. Tyikuan kaa ta ña kanyeꞌe̱ ra nu vityiyaa sutu ra.
24 Cha ndukachi̱ iñi ra Noé, ta chito̱ ra cha chinyakuvi̱ seꞌe ra, ra tyivaa ka, chiꞌin ra. 25 Ta katyí ra:
“Ñaꞌri cha vaꞌa kukuvi ra Canaán
musu yañi ra kukuvi ra,
tandɨꞌɨ kɨvɨ cha kukoo ra ñayɨvɨ̱”, katyí ra.
26 Ta katyí tuku ra:
“Jehová, ra kuví Nyoo yuꞌu, na nasoko chi ra Sem, ta ra Canaán kukuvi musu ra.
27 Nyoo kua kuꞌva nyatu chi ra Jafet,
ta ɨɨn ri koo ra chiꞌin ra Sem.
ta ra Canaán kukuvi musu nɨnduvi ra”, katyí ra Noé.