Ñáyɨvɨ vachí tata ra kakuvi̱ seꞌe ra Noé
10
1 Ikan iꞌya kuví tata ra Sem, ra Cam, ta ra Jafet, seꞌe ra Noé. Ta kachikoo̱ seꞌe nduñi ra cha yaꞌa̱ koo̱n savi xaan kuan.2 Ta seꞌe ra Jafet kuví ra Gomer, ra Magog, ra Madai, ra Javán, ra Tubal, ra Mesec ta ra Tiras. 3 Ta seꞌe ra Gomer kuví ra Askenaz, ra Rifat ta ra Togarma. 4 Ta seꞌe ra Javán kuví ra Elisa, ra Tarsis, ra Quitim, ta ra Dodanim. 5 Ta tandɨꞌɨ tata ra Jafet kuan kuví ra kachikoo̱ yatyin yuꞌu tyañuꞌun, noo noo ñuu kuví ra chiꞌin ñáyɨvɨ chi ra, ta sɨɨn sɨɨn saꞌan kakaꞌán noo noo ñuu kuan.
6 Seꞌe ra Cam kuví ra chi ra Cus, ra Mizraim, ra Fut, ta ra Canaán. 7 Ta seꞌe ra Cus kuví chi ra Seba, ra Havila, ra Sabta, ra Raama ta ra Sabteca. Ta seꞌe ra Raama kuví chi ra Seba ta ra Dedán. 8 Ta inga seꞌe ra Cus kuví chi ra Nimrod. Ikan ra iꞌya kuvi̱ ra xiꞌna ri ta chaa̱ ra kuví ra noo ra kaꞌnu ta iyó xaan tunyee iñi chi ra ta chinyaka̱ ñaꞌan ra kuaꞌa xaan ñuu sɨkɨ ñuꞌún ñayɨvɨ̱. 9 Ikan ra iꞌya kuví ra nyaá tyiño cha chaꞌñi̱ kɨtɨ nuu ra Jehová, yukuan chaꞌa katyí chi tuꞌun ra tyeꞌe kaa: “Tari ra Nimrod, vatyi kuví ra noo rayɨɨ ra chaꞌñí kɨtɨ kuꞌu nuu ra Jehová”, katyí chi. 10 Ta ñuu cha chinyaka̱ ñaꞌan ra kuví ñuu Babel, ñuu Erec, ñuu Acad, ta ñuu Calne. Tandɨꞌɨ ñuu iꞌya kuvi chi ñuꞌún Sinar. 11 Ta kita̱ ra Nimrod nu ñuꞌún Sinar, ta kuaꞌan ra ityi ñuꞌún Asiria, yukuan savaꞌa̱ ra ñuu cha nañí Nínive, ñuu Rehobot, ta ñuu Cala, 12 ta ñuu Resén. Ta ñuu Resén kuan kuvi̱ noo ñuu kaꞌnu, cha nyaá xiin ñuu Nínive, ta xiin ñuu Cala.
13 Tata ra Mizraim ikan kakuví ñáyɨvɨ Lud, ñáyɨvɨ Anam, ñáyɨvɨ Lehab, ñáyɨvɨ Naftu, 14 ñáyɨvɨ Patrus, ñáyɨvɨ Caslu ta ñáyɨvɨ Caftor. Ta tata ñáyɨvɨ Caslu ta ñáyɨvɨ Caftor kakuví ñáyɨvɨ Filistia.
15 Ta seꞌe nuu ra Canaán kuví ra Sidón ta inga seꞌe ra nañí ra Het. 16 Ta inga tata ra Canaán kuan kuví ñáyɨvɨ Jebus, ñáyɨvɨ Amor, ñáyɨvɨ Gerges, 17 ñáyɨvɨ Hev, ñáyɨvɨ Arac, ñáyɨvɨ Sin, 18 ñáyɨvɨ Arvad, ñáyɨvɨ Zemar, ta ñáyɨvɨ Hamat. Ta yaꞌa̱ kuan ta kachitya̱ kuatyi tandɨꞌɨ ñáyɨvɨ chi ra Canaán. 19 Ta ñuꞌún tata ra Canaán chitaꞌa̱n nya ñuu Sidón, ityi ñuu Gerar, nyakua nya Gaza, ta nyakua nya ityi ñuu Sodoma, ñuu Gomorra, ñuu Adma, ñuu Zeboim, ta nyakua nya ñuu Lasa. 20 Ikan iꞌya kuví tandɨꞌɨ seꞌe ra Cam, chiꞌin tandɨꞌɨ ñáyɨvɨ chi ra, cha noo noo ñuu kuví ñu chiꞌin ñuꞌún ñu, ta cha sɨɨn sɨɨn saꞌan kaꞌán noo noo ñuu kuan.
21 Ta ra Sem, yañi chaꞌnu ra Jafet, ikan kuví chii chaꞌnu ra Hebera chiꞌin tandɨꞌɨ seꞌe ra. 22 Ta seꞌe ra Sem kuví ra Elam, ra Asur, ra Arfaxad, ra Lud ta ra Aram. 23 Ta seꞌe ra Aram kuví ra Uz, ra Hul, ra Geter, ta ra Mas. 24 Ta seꞌe ra Arfaxad kuví chi ra Sala, ta seꞌe ra Sala kuví chi ra Heber. 25 Ta uvi taꞌan seꞌe ra Heber chiyo̱. Noo ra nañí Peleg, vatyi tyembu cha kaku̱ ra nataꞌvi̱ ñuꞌún ta kusɨɨ̱n ñáyɨvɨ. Ta yañi ra nañi̱ ra Joctán. 26 Ta tandɨꞌɨ seꞌe ra Joctán kuví ra Almodad, ra Selef, ra Hazar-mavet, ra Jera, 27 ra Adoram, ra Uzal, ra Dicla, 28 ra Obal, ra Abimael, ra Seba, 29 ra Ofir, ra Havila ta ra Jobab. Tandɨꞌɨ ra iꞌya kuví seꞌe ra Joctán. 30 Ta ñuꞌún nu chikoo̱ ra chiꞌin ñáyɨvɨ tata ra kuví tandɨꞌɨ ityi ñuꞌún Mesa nyakua nya ityi ñuꞌún Sefer, nyakua nya ityi nu kuaꞌa xaan yuku iyó ityi nu kañá ñanyii. 31 Tandɨꞌɨ maa ra iꞌya kakuví tata ra Sem, ta sɨɨn sɨɨn saꞌan kakaꞌa̱n ra cha kakuví ra noo noo ñuu.
32 Ikan ra iꞌya kakuví tandɨꞌɨ ñáyɨvɨ chi noo noo seꞌe ra Noé, chiꞌin noo noo tata ra, chiꞌin noo noo ñuu ra. Ta ikan ra iꞌya kuví ra kachitya̱ nu ñuꞌún ñáyɨvɨ cha yaꞌa̱ koo̱n savi xaan kuan.