Nu kana̱ Nyoo chi ra Abram
12
1 Ta noo kɨvɨ kaꞌa̱n Nyoo Jehová chiꞌin ra Abram, ta katyí ra chi ra: “Sa̱ndoo ñuun, ta ñáyɨvɨ chuun, ta veꞌe sutun nu iyón, ta kuaꞌan nu ñuꞌún nu kusañaꞌi chuun. 2 Ta chiꞌin ñáyɨvɨ taton cha kua koo ityi nuu kua sakuvi noo ñuu kaꞌnu xaan chiꞌin ñu, ta kunasoke chuun, ta kunatyiso sukin sɨvun, ta kua kuvun noo ñáyɨvɨ cha kua nasoko chi inga ñáyɨvɨ. 3 Kunasoke chi ñáyɨvɨ cha nasokó chuun, ta ñáyɨvɨ cha kaꞌán ña vaꞌa sɨkun, kua taꞌnu nyatu ñu. Ta cha kuendon kunasoke tandɨꞌɨ ñáyɨvɨ iyó nu ñuꞌún ñayɨvɨ̱”, katyí ra chi ra Abram.4 Ta kuaꞌan ra Abram tari kuꞌva katyí Nyoo chi ra, ta kuaꞌan ra Lot chiꞌin ra. Ta kɨvɨ kita̱ ra Abram nya Harán, uñi xiko chaꞌun kuiya ra. 5 Ta keꞌe̱n ra chi ku Sarai, ñasɨꞌɨ ra, ta chi ra Lot, sachin ra, chiꞌin tandɨꞌɨ ndaꞌa tyiño ra cha saꞌaganaa̱ ra chiꞌin tandɨꞌɨ ñáyɨvɨ cha ñiꞌi̱n ra ñuu Harán. Ta kakita̱ ra ta kuaꞌan koyo ra nya ñuu Canaán, ta yukuan chaa̱ koyo ra. 6 Ta kayaꞌa̱ ra ityi nu ñuꞌún Canaán kuan ta chaa̱ koyo ra Siquem, nu nanyaá tunyiia kaꞌnu nu kuví More. Ta kɨvɨ kuan ka iyó ñáyɨvɨ Canaán nu ñuꞌún kuan. 7 Ta tuvi̱ ra Jehová nuu ra Abram, ta katyí ra chi ra: “Tandɨꞌɨ maa ñuꞌún iꞌya kua kuꞌve chi ñáyɨvɨ taton”, katyí ra.
Tyikuan ta savaꞌa̱ ra Abram noo arta nu sakaꞌnú ra chi ra Jehová Nyoo vatyi tuvi̱ ra nuu ra yukuan. 8 Yaꞌa̱ kuan ta kuaꞌan ra yuku cha iyó xiin Bet-el ityi nu kañá ñanyii. Ta yukuan chiyo̱ ra yatyin ñuu Bet-el cha nyaá ityi nu kɨꞌvɨ́ ñanyii nu chikoo̱ ra, ta ñuu Hai nyaá chi ityi nu kañá ñanyii. Ta yukuan savaꞌa̱ ra inga chito, ta kaꞌa̱n ndaꞌvi ra chiꞌin Nyoo Jehová. 9 Yaꞌa kuan ta ra Abram keꞌe̱n ra ityi kuaꞌan ra kuee kuee ri nya ityi Neguev.
Nu chaa̱ ra Abram ñuu Egipto
10 Tyikuan ta kichaꞌa̱ iyó tama ñuꞌún kuan, ta kichaꞌa̱ nduñiꞌín iyó tama kuan, ta keꞌe̱n ra Abram ityi kuaꞌan ra kua koo ra nya Egipto. 11 Ta cha nyaá ra cha kua kɨꞌvɨ ra ñuu kuan, ta katyí ra chi ñasɨꞌɨ ra, ku Sarai: “Nye̱ꞌe xiꞌna, chité tyi yoꞌo tyakɨ xaun. 12 Ta kua nyeꞌe ra Egipto kuan chuun, ta kukatyi ra: ‘Ñasɨꞌɨ ra ikan kuví chi ñaꞌan kuan’, kukatyi ra. Ta kukaꞌñi ra chi yuꞌu. 13 Yukuan kuenda kukatyun tyi kuꞌva yuꞌu kuví chuun, ta tyikuan kaa ta ma kaꞌñi ra chii cha kuendon ta kuꞌva tyi kita vaꞌa tyiño cha kuaꞌan yo iꞌya”, katyí ra chi ña.
14 Ta kuꞌva cha kɨꞌvɨ̱ ra Abram ñuu Egipto kuan, ra Egipto kuan kanyeꞌe̱ ra tyi ku Sarai, tyakɨ xaan ña. 15 Ta ra kakuví tyiño chiꞌin ra faraón, kanyeꞌe̱ tuku ra chi ña ta kuaꞌan koyo ra kuakatyi ra chi ra faraón tyi tyakɨ xaan ña. Ta chinyaka̱ ra chi ña veꞌe ra faraón kuan.
16 Ta vaꞌa xaan keꞌe̱n kuenda ra faraón chi ra Abram cha kuenda ña. Chaꞌa̱ ra mbee, sɨndɨkɨ, chaꞌa̱ ra musu yɨɨ, ta musu sɨꞌɨ, ta chaꞌa̱ ra burru chiꞌin camellu chi ra Abram. 17 Soko tachi̱ tuñi Nyoo chi ra faraón ta chi ñáyɨvɨ chi ra chiꞌin kueꞌe xaan cha katyi ku Sarai, ñasɨꞌɨ ra Abram. 18 Tyikuan ta kana̱ ra faraón chi ra Abram, ta katyí ra: “¿Ñáá tuꞌun cha sakuvu̱n chii tyeꞌe kaa? ¿Ñáá tuꞌun cha ña katyu̱n chii tyi ñasɨꞌun kuví chi ña? 19 Ta ¿ñáá tuꞌun cha katyu̱n vatyi kuꞌvon kuví chi ña? Vatyi cha katyun tyikuan kaa, chaꞌu̱n kuꞌva cha nakeꞌe̱n yuꞌu chi ña vatyi kuvi ñasɨꞌi chi ña. ¡Ke̱ꞌen chi ñasɨꞌun ta kuꞌun chiꞌin ña!”, katyí ra chi ra. 20 Tyikuan ta tava̱ ra tyiño chi sɨndaro kuenda ra tyi na kuꞌun koyo ra kakusaña ra chi ra Abram chiꞌin ñasɨꞌɨ ra chiꞌin tandɨꞌɨ cha iyó chi ra.