Nu sasɨɨ̱n Nyoo kuꞌva kaꞌán ñáyɨvɨ
11
1 Ta cha naꞌa, ɨɨn ri noo saꞌan kaꞌa̱n ñáyɨvɨ sɨkɨ ñuꞌún ñayɨvɨ̱. 2 Ta kuvi̱ cha kita̱ ñáyɨvɨ nu chiyo̱ ñu ityi nu kañá ñanyii, ta kuaꞌan koyo ñu ta nañiꞌi̱n ñu noo nu ndaa kaꞌnu xaan nu kuví ñuꞌún Sinar, ta yukuan ndoo̱ ñu ka iyó ñu. 3 Ta kakatyí ra chi ra taꞌan ra: “Na savaꞌa yo ndoꞌo chiꞌin nyaꞌyu ta satyiꞌyo yo chiꞌin ñuꞌu̱n”, kakatyí ra. Ta ndoꞌo kuan chotyiño̱ ra tari yuu, ta sucha ñuꞌún chotyiño̱ ra tari ñiyɨtɨ kaka. 4 Ta kakatyí ra tyeꞌe kaa: “Na savaꞌa yo noo ñuu kaꞌnu, ta noo nyakaa kaꞌnu ta sukun ta kuchaa xiñi chi nya andɨvɨ. Tyikuan kaa ta ña chiñuꞌun ri cha nakutya kuatyi yo sɨkɨ ñuꞌún ñayɨvɨ̱”, kakatyí ra.5 Tyikuan ta noo̱ ra Jehová ta nyeꞌe̱ ra nyaka kaꞌnu cha kuaꞌan savaꞌá ñáyɨvɨ kuan. 6 Ta ndichi̱ xiñi ra tyeꞌe kaa: “Ɨɨn xaan ri kakuví ñáyɨvɨ ñuu iꞌya ta noo ri saꞌan kakaꞌán tandɨꞌɨ ñu, ta kichaꞌa̱ savaꞌá ñu tyiño cha katyiꞌi̱ taꞌan ñu tuꞌun, ta yori kuví kakasɨ chi ñu. 7 Vityin na noo yo, ta nasama yo kuꞌva kakaꞌán ñu, tyikuan ta ma kakutuñi ka iñi ñu tuꞌun kakaꞌan taꞌan ñu”, ndichi̱ xiñi ra.
8 Tyikuan kaa nakutya̱ kuatyi ra Jehová chi ñu nɨɨ kaꞌnu sɨkɨ ñuꞌún ñayɨvɨ̱, ta kasandɨꞌɨ̱ ñu cha kasavaꞌá ñu ñuu kaꞌnu kuan. 9 Yukuan kuenda nañí ñuu kuan Babel, vatyi yukuan nasama̱ ra Jehová saꞌan kaꞌán tandɨꞌɨ ñáyɨvɨ, ta yukuan nakutya̱ kuatyi ra chi ñu sɨkɨ ñuꞌún ñayɨvɨ̱.
Ñáyɨvɨ tata ra Sem
10 Ikan iꞌya kuví ñáyɨvɨ tata ra Sem. Cha yaꞌa̱ uvi kuiya cha koo̱n savi xaan kuan, ndɨꞌɨ ra Sem cientu kuiya, ta kaku̱ ra Arfaxad seꞌe ra. 11 Ta chiyo̱ ka ra Sem cha yaꞌa̱ kaku̱ ra Arfaxad, oꞌon cientu ka kuiya, ta chikoo̱ ka seꞌe ra, rayɨɨ ta ñusɨꞌɨ.
12 Ta ra Arfaxad oko chaꞌun kuiya ra, ta chikoo̱ ra Sala, seꞌe ra. 13 Ta chiyo̱ ka ra Arfaxad cha yaꞌa̱ kaku̱ ra Sala, kumi cientu uñi ka kuiya, ta chikoo̱ ka seꞌe ra, rayɨɨ ta ñusɨꞌɨ.
14 Oko uchi kuiya ra Sala ta chikoo̱ ra Heberb, seꞌe ra. 15 Ta chiyo̱ ka ra Sala, cha yaꞌa̱ kaku̱ ra Heber, kumi cientu uñi ka kuiya, ta chikoo̱ ka seꞌe ra, rayɨɨ ta ñusɨꞌɨ.
16 Oko uchi kumi kuiya ra Heber, ta chikoo̱ ra Peleg, seꞌe ra. 17 Ta chiyo̱ ka ra Heber, cha yaꞌa̱ kaku̱ ra Peleg, kumi cientu oko uchi kuiya ta chikoo̱ ka seꞌe ra, rayɨɨ ta ñusɨꞌɨ.
18 Oko uchi kuiya ra Peleg ta chikoo̱ ra Reu, seꞌe ra. 19 Ta chiyo̱ ka ra Peleg, cha yaꞌa̱ kaku̱ ra Reu, uvi cientu ɨɨn ka kuiya, ta chikoo̱ ka seꞌe ra, rayɨɨ ta ñusɨꞌɨ.
20 Oko uchi uvi kuiya ra Reu, ta chikoo̱ ra Serug, seꞌe ra. 21 Ta chiyo̱ ka ra Reu, cha yaꞌa̱ kaku̱ ra Serug, uvi cientu ucha ka kuiya ta chikoo̱ ka seꞌe ra, rayɨɨ ta ñusɨꞌɨ.
22 Oko uchi kuiya ra Serug ta chikoo̱ ra Nacor, seꞌe ra. 23 Ta chiyo̱ ka ra Serug, cha yaꞌa̱ kaku̱ ra Nacor, uvi cientu ka kuiya ta chikoo̱ ka seꞌe ra, rayɨɨ ta ñusɨꞌɨ.
24 Oko ɨɨn kuiya ra Nacor ta chikoo̱ ra Taré, seꞌe ra. 25 Ta chiyo̱ ka ra Nacor, cha yaꞌa̱ kaku̱ ra Taré, cientu chaꞌun kumi ka kuiya ta chikoo̱ ka seꞌe ra, rayɨɨ ta ñusɨꞌɨ.
26 Ta uñi xiko uchi kuiya ra Taré ta chikoo̱ ra Abram, ra Nacor ta ra Harán, seꞌe ra.
Ñáyɨvɨ tata ra Taré
27 Ikan iꞌya kuví seꞌe ra Taré: ra Abram, ra Nacor, ta ra Harán. Ra Harán kuví sutu ra Lot. 28 Ta iyó ka ra Taré ta chiꞌi̱ ra Harán, seꞌe ra, ñuu nu kaku̱ ra, ñuu Ur cha iyó ñuꞌún Caldea.
29 Ta ra Abram tandaꞌa̱ ra chiꞌin ku Sarai, ta ra Nacor tandaꞌa̱ ra chiꞌin ku Milca, ta seꞌe ra Harán kuví chi ku Milca chiꞌin taꞌan ña, ku Isca. 30 Soko ku Sarai ña kuví koo seꞌe ña.
31 Kita̱ ra Taré ñuu Ur ñuꞌún Caldea ta kuaꞌan ra ityi ñuꞌún Canaán chiꞌin ra Abram, seꞌe ra, ta ku Sarai, chono ra, ta chiꞌin ra Lot, seꞌe ñañi ra. Ta chaa̱ koyo ra ñuu Harán, ta kandoo̱ ra ka iyó ra ñuu yukuan. 32 Ta tandɨꞌɨ kɨvɨ cha chiyo̱ ra Taré kuvi̱ uvi cientu oꞌon kuiya, ta chiꞌi̱ ra ñuu Harán kuan.