―¡Esaú! seꞌi ―katyí ra.

―Maa yuꞌu iꞌya, tata ―katyí ra Esaú.

2 Ta katyí ra Isaac chi ra:

―Cha nyeꞌé maun tyi cha chaꞌnu xain, ta ña chité ama kukúvi. 3 Vityin, ke̱ꞌen nduvon, ta kua̱ꞌan chichi kuꞌu ta kaꞌñun noo kɨtɨ, 4 ta savaꞌun nyayu tɨ, noo kuꞌva cha taꞌán iñi mai, ta kichi nyakon nyayu kuan kachi, tyikuan ta kua nasoke chuun cha nɨɨ ri ka cha nyito ke ―katyí sutu ra chi ra.

5 Soko chiñí ku Rebeca cha kaꞌán ra Isaac chiꞌin ra Esaú. Ta cha yaꞌa̱ kuan ta kuaꞌan ra Esaú chichi kuꞌu kua nduku ra kɨtɨ cha kua chiñuꞌun chi ra, 6 tyikuan ta katyí ña chi ra Jacob, seꞌe ña:

―Nyeꞌe̱ xiꞌna, chiñi̱ cha kaꞌán sutun chiꞌin ra Esaú, yañun, ta katyí ra chi ra: 7 “Kua̱ꞌan kua kaꞌñi noo kɨtɨ ta sanduvaꞌun chi tɨ, ta satyiꞌyon chi tɨ, ta kachi nyayu tɨ, ta kunasoke chuun nuu ra Jehová cha nɨɨ ri ka cha nyito ke”, katyí sutun chi ra Esaú, yañun. 8 Yukuan chaꞌa tyaa soꞌo vaꞌun tuꞌun cha kua katyi chuun vityin. 9 Kua̱ꞌan kua keꞌen uvi taꞌan ndixiꞌyu yutya, cha xaꞌan vavaꞌa, chichi chaku kuan, ta kua savaꞌi nyayu kachi sutun, tari kuꞌva cha taꞌán iñi maa ra. 10 Ta maun kunyaka cha kachi sutun, tyikuan ta kua nasoko ra chuun cha nɨɨ ri ka cha nyito ka ra ―katyí ña chi ra Jacob.

11 Ta katyí ra Jacob chi ku Rebeca, sɨꞌɨ ra:

―Soko kuaꞌa xaan ixi iñí ra Esaú ta yuꞌu ñaꞌri ixi iñí. 12 Kuvi kuaka ndaꞌa suti chii, ta kua katyi ra tyi chakú nyai chi ra, ta chiꞌin kuan kua nduki nu taꞌnu nyati, ta ñaꞌri cha vaꞌa kua ñiꞌin chiꞌin kuan ―katyí ra Jacob.

13 Ta katyí sɨꞌɨ ra chi ra:

―Na taꞌnu nyatu mai kuendon, seꞌe luꞌli, soko tya̱soꞌo cha katyí chuun, kua̱ꞌan kua keꞌen ndixiꞌyu cha katyí chuun kuan ―katyí ña chi ra.

14 Tyikuan ta chaꞌa̱n ra chikeꞌe̱n ra chi kɨtɨ kuan ta chinyaka̱ ra chi sɨꞌɨ ra, ta sanduvaꞌa̱ ña nyayu kuan kuꞌva cha taꞌán iñi maa sutu ra. 15 Yaꞌa̱ kuan ta keꞌe̱n ku Rebeca saꞌma vaꞌa ra Esaú, seꞌe nuu ña, cha ñoꞌón vaꞌa, ta sandɨꞌvɨ̱ noo ña chi ra Jacob, seꞌe ña, ra tyivaa ka. 16 Ta suri maa chiꞌin ñɨɨ ndixiꞌyu kuan, kava̱ ña sukun ndaꞌa ra ta sukun ra nu ñaꞌri ixi iñí. 17 Ta chaꞌa̱ ña nyayu cha satyiꞌyo̱ ña chiꞌin paan chi ra Jacob, seꞌe ña.

18 Tyikuan ta kɨꞌvɨ̱ ra nu nyaá sutu ra ta katyí ra:

―Tata, maa yuꞌu iꞌya ―katyí ra.

―¿Yóó yoꞌo, seꞌe luꞌli? ―katyí sutu ra.

19 Ta katyí ra Jacob chi sutu ra:

―Seꞌun, ra Esaú, ra kuví seꞌe nuun kuví yuꞌu. Cha yaꞌa̱ savaꞌi̱ cha katyu̱n chii. Ndu̱kuita ta kunyaun ta kachun nyayu kɨtɨ cha satyiꞌye̱, ta na̱soko chii ―katyí ra Jacob.

20 Tyikuan ta katyí ra Isaac chi ra Jacob seꞌe ra:

―¿Yoso kaa cha numi xaan ñiꞌu̱n chi kɨtɨ iꞌya, seꞌe luꞌli? ―katyí ra.

Ta nakaꞌa̱n ra Jacob, ta katyí ra:

―Maa ra Jehová, Nyoun, sakuvi̱ cha numi ri ñiꞌi̱n chi tɨ ―katyí ra.

21 Ta katyí ra Isaac chi ra Jacob:

―Tu̱ꞌva nu nyaí iꞌya, tyi kuñí kuaka ndaꞌi chuun tatun ndicha tyi ra Esaú, seꞌi, kuvún ta ñima ra Jacob ―katyí ra.

22 Ta tuꞌva̱ ra Jacob nu nyaá sutu ra, ta chaka̱ ndaꞌa ra chi ra, ta katyí ra: “Ndusu ra Jacob kuví ndusun, soko sokon, soko ra Esaú kuví”, katyí ra Isaac. 23 Ta ña tuvi̱ iñi ra cha ra Jacob kuví ra, tyi iñí xaan ixi ndaꞌa ra, tari iñí ixi ndaꞌa ra Esaú, yañi ra. Ta ndaka̱ tuꞌun ra chi ra inga chaꞌa 24 cha kumañi ka nasoko ra chi ra, ta katyí ra chi ra:

―¿Atu ndichon tyi ra Esaú, seꞌi, kuvún?

―Ndicha, Tata, ra Esaú kuví yuꞌu ―katyí ra.

25 Tyikuan ta katyí sutu ra chi ra:

―Sa̱yaꞌa cha ñiꞌun vatyi kachi, ta kua nasoke chuun ―katyí ra.

Tyikuan ta chaꞌa̱ ra Jacob nyayu kuan chi sutu ra, ta chachi̱ sutu ra ta chiꞌi̱ ra vinu cha chaꞌa̱ ra chi ra. 26 Yaꞌa̱ kuan ta katyí ra Isaac chi ra:

―Tu̱ꞌva ta koꞌun xɨtin vityin, seꞌe luꞌli ―katyí ra.

27 Ta tuꞌva̱ ra Jacob ta chiꞌi̱ ra xɨtɨn sutu ra. Ta ñiꞌi̱n ra Isaac xiko saꞌma ñiꞌnó ra, tyikuan ta nasoko̱ ra chi ra chiꞌin tuꞌun iꞌya:

30 Ndɨꞌɨ̱ nasoko̱ ra chi ra, ta kuaꞌan ra Jacob, ta nɨ yaꞌa kuii ri kita̱ ra nu nyaá ra Isaac, sutu ra, ta nachaa̱ ra Esaú, yañi ra, cha chaꞌa̱n ra chinduku̱ ra kɨtɨ chichi kuꞌu. 31 Ta satyiꞌyo̱ ra nyayu kɨtɨ ñiꞌi̱n ra ta chinyaka̱ ra chi sutu ra ta katyí ra chi ra:

―Ndu̱kuita Tata, ka̱chi koño kɨtɨ cha chinduki̱ vityin kachun, ta na̱soko chii vityin ―katyí ra.

32 Tyikuan ta katyí ra Isaac, sutu ra, chi ra:

―¿Yóó ra kuvi yoꞌo? ―katyí ra.

Ta katyí ra Esaú:

―Ra Esaú, seꞌe nuun kuví yuꞌu, ―katyí ra.

33 Ta iyo xaan kuñí ra Isaac sutu ra ta nakɨkɨ chi chi ra, ta katyí ra:

―¿Ta yóó ra kuví ra kichi̱ ndari, ndaꞌá ra cha ñiꞌi̱n ra ta chachi̱ tandɨꞌɨ, ta nasoke̱ chi ra cha nɨɨ ri ka cha kumañi chaun? Ta vityin cha nyaa̱ cha nasoko̱ Nyoo chi ra ―katyí ra.

34 Ta kuꞌva cha chiñi̱ ra Esaú cha kaꞌa̱n sutu ra, uꞌvi xaan kuvi̱ chi ra, kichaꞌa̱ chakú chaa vavaꞌa ra ta katyí ra:

―¡Na̱soko tuku chi yuꞌu, Tata!―katyí ra.

35 Ta katyí sutu ra chi ra:

―Kichi̱ yañun ta sandavi̱ ñaꞌan ra chii ta keꞌe̱n ra cha taꞌán chi nasoke chuun ―katyí ra.

36 Ta nakaꞌa̱n ra Esaú:

―Yukuan chaꞌa sakunañi̱ ndo Jacob chi ra vatyi cha kuaꞌan uvi chaꞌa nakeꞌe̱n ra cha taꞌán chi chii: Cha xiꞌna ri nakeꞌe̱n ra nyatu cha kuví seꞌe nuu, ta vityin iꞌya nakeꞌe̱n ndɨꞌɨ ra cha taꞌán chi nasokon chii. ¿Atu ña nakeꞌe̱n vaꞌun noo kuii ri ka cha kua nasokon chii? ―katyí ra chi sutu ra.

37 Ta katyí ra Isaac chi ra Esaú:

―Mai tyiso̱ chi ra vatyi kunyaka ñaꞌan ra chuun, ta chaꞌi̱ cha sakuvi tandɨꞌɨ ñáyɨvɨ chi ra tyiño nuu ra. Ta nasoke̱ chi ra vatyi koo kuaꞌa trigu ta vinu chi ra. ¿Ñáá ka cha kuvi sakuvi chiꞌin yoꞌo vityin, seꞌe luꞌli?―katyí sutu ra chi ra.

38 Ta nakaꞌa̱n ra Esaú chiꞌin sutu ra:

―¿Atu ña ndoo noo kuii ri ka nyatu cha kuví nasokon chii, tata? ¡Na̱soko tuku chi yuꞌu ñandɨꞌɨ, tata! ―katyí ra Esaú.

Ta chaa xaan kichaꞌa̱ chakú chaa ra Esaú inga chaꞌa.

39 Tyikuan ta kichaꞌa katyí sutu ra chi ra:

41 Ta kɨꞌvɨ̱ tɨsɨꞌɨ iñi ra Esaú nyeꞌé ra chi ra Jacob, yañi ra, cha kuenda cha nasoko̱ sutu ra chi ra, ta katyí ra chichi añima ra: “Na yaꞌa̱ kúvi sutu ndi, ta cha yaꞌa̱ tukuiꞌya iñi chi ndi, tyikuan kɨvɨ, ta kukaꞌñi chi ra Jacob, yañi”, katyí ra.

42 Cha chito̱ ku Rebeca sɨꞌɨ ra tuꞌun cha chiká xiñi ra Esaú, seꞌe ña, ra cha ñiꞌin ka, cha kua sakuvi ra chi yañi ra, ta tachi̱ ña tyiño na kukana ñu chi ra Jacob, seꞌe ña, ra tyivaa ka, ta katyí ña chi ra:

―Nye̱ꞌe xiꞌna, ra yañun, ra Esaú, chiká xiñi ra cha kaꞌñi ra chuun, vatyi tyikuan kaa kutyiyaꞌvun cha sakuvu̱n chi ra, na. 43 Vityin, seꞌe luꞌli, tya̱a soꞌo tuꞌun kua kaꞌin chuꞌun. Kua̱ꞌan nya Harán veꞌe ra Labán, kuꞌve. 44 Ndo̱o yukuan suꞌva tyembu, na yaꞌa̱ tɨsɨꞌɨ chi yañun 45 cha katyi cha sakuvu̱n chi ra, na naa xiꞌna iñi ra, tyikuan ta kusakuꞌin tyiño chuun na ndichun. ¡Ña kuñí cha kunaa nduvi taꞌan seꞌi cha noo ri kɨvɨ! ―katyí ña chi ra.

46 Ta katyí ku Rebeca chi ra Isaac, yɨɨ ña:

―Ña sɨɨ ka maa kuñí iyé cha katyi ñu seꞌe ra Het, ñaꞌan cha keꞌe̱n ra Esaú. Tatu ra Jacob ta keꞌen ra chi seꞌe ñáyɨvɨ Canaán iꞌya, ñaꞌri ka tuꞌun cha koi, vaꞌa taxin ka na kúvi ―katyí ña chi yɨɨ ña.