¹ "Mi sa bammei hei kaling cho?" twna Tingkuh rui thanv tikhou, ² Stephen rui mundawna sa the, "Achana thiu khatni apu thiu, alat nkinglou o. Aniu pupouc Abraham kamei Haran thangc lungc tat mak khou, Mesopotamia khou bam khou, hymdaihmei Racguangc kakhou ndauhlouna, ³ 'Nang kai kaikhunc khatni nang kandic mpatlouna ai rui nang khou nchinlou punimei kandic thangc tat o,' twna kakhou sa khwan e. ⁴ Kumna kamei Khaldeamei kandic mpatlouna Haran thangc lungc tat the. Kapu theic kanmei tangv, Ravguangc rui kata ntaw nangniw lungc bammei kandic khou hei tiguang the. ⁵ Khoutei Ravguangc rui kakhang mi ramv hei kakiak na sini tiilou mak khwan he; tiki mi hei kakhang khatni kakikta guay khang tii puni twna Ravguangc rui nrianhlou khwan e. Mi ganv khou tei Abraham kanac maek khwan he.

⁶ "Mi ganv khou tei Ravguangc rui kakhou sa the, 'Nang kikta nunc ginramdic khou bangh swna tingkwm phay padeih lungclou puni; mi khou tei meicnunc rui rai kasicna sw puni. ⁷ Tiki kaniw ta bangh tisw nimei zaat ta tei ai rui latzan sw puni; mi tangv kiu mi kandic khou tei rui kaniw tat patna mi bamv khou hei kaniw ata kalum puni.' twna Ravguangc rui sa e. ⁸ Mi tangv Ravguangc rui latryan tuang gihruamhmei riak hei Abraham khou tiilou the. Kumna Abraham rui Isaak ta zaeng tachat nungc gihruamc the; Isaak rui kanac mpouh Jakob ta khatni Jakob rui kanac mpouh nunc aniu pupouc gaanv ruhna kanei ta gihruamc the.

⁹ "Aniu pupouc nunc tei rui kaniw kainac Joseph ta mamavna Ijipt thangc bangh khang zuanclou the. Tiki Ravguangc rui kata nkhavlouna, ¹⁰ kata ryanramei bamv guay khou rui zay kaanlou khwan e. Ravguangc rui kata Ijipt guangc Pharau hu khou meic nzianpui lwn khatni ningting tiilou tina guangh tei rui kata Ijipt khou khatni guanghkai khou guanghkhyn tiswlou the. ¹¹ Mi tangv Ijipt khatni Kanaan kandih kapwm khou nap nkowna ryanra sih bam khwan e. Aniu pupouc nunc tei tu khang maek laa thena, ¹² Ijipt khou nap nai e twmei chu lana, Jakob rui aniu pupouc nunc ta mi thangc tei ndiulou the. Mi tei tat reymei the. ¹³ Key dat kaneimei khou thu Joseph rui ka chana nunc khou kata tithaylou the, kumna Pharau rui ni kakai kaikhunc ta thay the. ¹⁴ Kumna Joseph rui kapu Jakob khatni kakai kaikhuncmei gaanv riakchaneina panguh ta Ijipt thangc key khang kaw the. ¹⁵ Jakob Ijipt khou key lungcna, mi khou tei kamei khatni kanac nunc theiclou the. ¹⁶ Kaniw ta Shekhem khou phungc guang datna, Abraham rui Hamor nac nunc khou rui liuloumei tarou khou tei mbeihlou the.

¹⁷ "Ravguangc rui Abraham khou nrianhloumei tei guang tangc khang na guang pwkhou, Ijipt khou aniu meic lungc kingc pat the. ¹⁸ Nkhamh khou Joseph ta thay makmei guangc rui Ijipt khou guangh sw the. ¹⁹ Kamei karoucsina aniu pupouc nunc ta swkasicna, kaniw nac ngasatna nunc tei theic kan khang kaniw kai khou rui ganc pat nina e twna latdanv pat the. ²⁰ Mi ganv khou tei Mousi puanc the, kumna kalwn gay khwan e.^a Kata kakai khou bw thumh makuatlou khwan e. ²¹ Kata ganc patlou pwkhou, Pharau nacpui rui khuaic thauna, kanac swna makuat thau the. ²² Kakhou Ijiptmei tuang ningting guay nchamlou the, kumna kamei lat khou ni, taanv khou ni ngammeipu akhat sw the.

²³ "Kamei tingkwm riakdei tangh khou, kachana Israelmei nunc ta tei akumhna sw bam bu cho twmei zauc khang kachwn khou ning pat the. ²⁴ Khoutei, Ijiptmei gaanv khat rui Israelmei gaanv khat ta swkasicna sw bammei ta how lana, mi pu khwm khangcna, kamei rui Izipmeipu ta tei swluai the. ²⁵ (Mousi kapaan rui Ravguangc rui kaniw ta gu patlou puni twmei kachana nunc thay pungh e twna kamei ning khwan e; tiki kaniw thay mak khe.) ²⁶ Nthuanh thau dat khou, Israelmei gaanv nei abay bammei ta ariw the, kumna kaney ta guatc tisw khang kamei karamc the. 'Alat nking o, tabui swna nang kai chana nei agay bam tu cho?' twna Mousi rui sa the. ²⁷ Tiki nkhuaimei swloumeipu tei rui Mousi ta thui patna, 'Thow rui nang ta aniw dihsinpouc khatni latzanpouc tiswlou pwna cho? ²⁸ Nang douclaneic Izipmeipu ta swluai kanmei tei kumcna ata ni swluai ni twna cho?' twna sa the. ²⁹ Mousi mi tei chu laa khou Ijipt mpatlouna Midia kandih thangc lungc tat kan the. Mi khou tei kanac mpouh gaanv nei puanclou the.

³⁰ "Tingkwm riakdei tangv, Sinai Chyng tuang ramvkaengv ramv khou maibwang chuangc bammei thing phwam khou rui kauh baanchara khat rui Mousi ta ariw the. ³¹ Mousi mi tei how pwkhou ngak the, kumna zauc diangh khang tat na guang pwkhou, ³² 'Ai hei nangniw pupouc nunc Racguangc e, Abraham, Isaak, khatni Jakob Racguangc e,' twna Poubauhmei rui samei khwan chu the. Mousi ping kadunh the, zauc bauh mak khe. ³³ 'Nang tuang phaythuapc luak ganc o, nang ding bammei bamv hei nthanmei bamv e. ³⁴ Amei nunc ta Ijipt khou rai kasic bammei ta ai how the khatni kaniw kalangh bammei khwan ai chu the, kumna kaniw ta gulou khang ai guang tuang e. Guang tho, ai nang ta Ijipt thangc ndiulou puni the,' twna Poubauhmei rui sa the.

³⁵ "Mousi hei, 'Nang ta thow rui aniw tuang dihsinpouc khatni latzanpouc tiswlou pwna cho?' twna sana meicnunc rui laalou makmeipu e. Kamei hei meicnunc tuang kaipouc sw khang khatni maibwang chuangc bammei thing phwam khou kata ariw kanmei kauh baanchara tei rui nkhavlouna kaniw ta tiduak patlou kanmei Ravguangc rui ndiu guangmeipu e. ³⁶ Kamei rui Ijipt khou, Ntou Duipui khou khatni tazikramv khou tingkwm riakdei charynmei khatni sw nchinmei taanv taanclouna meicnunc ta tei Ijipt khou rui nduangh patlou khwan e. ³⁷ 'Ravguangc rui ata ndiuloumei kumcna,^b nangniw chana khou rui Ravguangc rui nangniw khou muhzwng akhat ndiu guang puni,' twna Israel khou saloumei tei Mousi rui e. ³⁸ Israelmei nunc tazikramv khou kaduai bammei ganv khou tei, kaniw ta nduanghloumei tei kamei hei e; kamei mi khou tei aniu pupouc nunc khatni kata Sinai Chyng khou kachucmei kauh baanchara tei lev bam khwan e; kamei rui ringhmei Racguangc lat laa lana aniu khou tiilou the.

³⁹ "Tiki aniu pupouc nunc kabiang piu zihna, kata thui patna, Ijipt ta ning khwan e. ⁴⁰ Kumna, 'Aniu hu khou tat khang rav kasiamhlou tho, aniu ta Ijipt khou rui nduangh patloumeipu Mousi tei tabui sw kan thena cho, aniw thay mak khe,' twna kaniw rui Aaron khou sa the. ⁴¹ Kumna kaniw guaichic launa maengc kasiamhna, mi ta tei kalum the, kumna kaniw rui kasiamhmei puat khang khaengna nngay the. ⁴² Kumna Ravguangc rui kaniw ta ganc patlou the; muhzwng nunc latrik khou mi kumcna hyloumei kumcna kaniw tingpuk gaanchuangcna ta kalum khang ganclou the:

⁴⁴ "Aniu pupouc nunc tei kaniw tazikramv khou bam khou, kaniw pang khou Ravguangc tuang Pheykai nai khwan e. Mi kai tei Ravguangc rui mi kumcna sw o twna lyanloumei kahak tei swlou tuang e. ⁴⁵ Aniu pupouc nunc rui mi Pheykai tei kaniw pu nunc khou rui laa lana kaniw Joshua thei layna kaniw guang pwkhou, Ravguangc rui Jentailmei guay ta nthau gancloumei kandic khou hei guang lou the. Kumna mi kai tei David kin nganv nai bam khwan e. ⁴⁶ Kamei Ravguangc zauzian laatowmeipu khwan e, kumna Jakob Racguangc khang^h kai akhat swlou nii e twna Ravguangc khou ney khwan e. ⁴⁷ Tiki mi kai tei thu Solomon rui sw khwan e.

⁴⁸ "Tiki Kauh Liangmei Racguangc thu maansei rui swloumei kai khou lungh mak e; muhzwng rui mi kumcna salou e:

⁵¹ "Nangniw nu hei adih taanc tu cho! Nangniw lung khatni nangniw nu hei gihruamc makmei di the. Nangniw pupouc nunc kumcna nangniw hei Bumaengh Nthanmei lat ta laalou mak khe! ⁵² Nangniw pupouc nunc rui sina swlou kan makmei muczwng thow naina cho? Ntaw nangniw rui tinymna swluai kanmei, katuang ravchaptatmei Bangcpu hei guang nimei chamv dinc ndauh kanmei Ravguangc latdiutatmei nunc ta kaniw swluai kan the. ⁵³ Nangniw hei kauh baanchara guay rui phungc guangmei Ravguangc tuang Riakdanv laatowmei nunc the; tiki nangniw mi tei piu mak e."

⁵⁴ Kaniw mi tei chu pwkhou, kaniw reic thauna kaniw huc khaic ndyang kariakh riak thau the. ⁵⁵ Tiki Stephen tei Bumaengh Nthanmei rui padikna tingkauh thangc zauc ku the, kumna Ravguangc hymdaihmei khatni Jisu Ravguangc baanzat khou ding bammei ta how the. ⁵⁶ Kumna, "Zauc lo! Tingkauh laanc patloumei ta ai how the, khatni Meic Nac Mpouh Ravguangc baanzat khou ding bammei ta how the!" twna kamei rui sa the.

⁵⁷ Tiki kaniw tei kaniw nu nkatna kauc ranvna kadaeng khou pak guang the, ⁵⁸ kumna kata kaidai paengc thangc katun patna ntauh kwam the. Sakhi nunc tei kaniw tuang pheybaan, kazanc Saul twna kawmei chabwanpu khou nsinlou the. ⁵⁹ Kaniw rui Stephen ta ntauh kwam bam khou, "Poubauhmei Jisu, abumaengc laa thaulou o!" twna kamei huayney the. ⁶⁰ Kamei khuksun keyna, "Poubauhmei, mi paap hei kaniw ruc khou tikeylou rio!" twna kauc ranvna kauc the. Kamei mi hei salouna theic kan the.