¹ Kumna kata sw luaimei khou tei Saul ni nuhna kazauh the.

Mi nungc tei rui Jerusalem tuang phwamling khou rai riu daihmei kahouh kan the. Latdiutatmei nunc na hamhna, baihmei lwmloumei guay tei thu Judia khatni Samaria ramv kapwm khou pak ntamv ngam kan the. ² Ravning nthukmei nunc gaanv saekc rui Stephen ta mbeihlouna kap ranvna latlu khwan e.

³ Tiki Saul tei thu phwamling ta swmaan khang sw khwan e. Kamei kai kai khou tatna, lwmmei ntumei ta ni, nggaanvmei ta ni zay patna kangkai khou lou khwan e.

⁴ Pak phak tat kanmei nunc tei tat lik sikh sikna gaychamv tei dinclou the. ⁵ Philip Samaria tuang kaidai khou^a keyna, kaniw khou Khrista lam dinclou the. ⁶ Meic kangdai tei Philip lat chu pwkhou khatni kamei rui sw nchinmei taanv guay tei how pwkhou, kamei rui samei tei lunghgutna nking the. ⁷ Simei bumaengc nunc meic mpeyna khou rui kauc ranvna kauclou ducna pat kan khwan e, khatni kapaektheihmei khatni kaphay chuanchaymei mpeyna ta tigaylou khwan e. ⁸ Kumna mi kaidai khou tei neihlamei padik khwan e.

⁹ Mi kaidai khou tei katuang duaic ta Samariamei zaat guay ngak sak bammeipu, kazanc Simon twna kawmeipu gaanv khat nai khwan e. Kamei hei meic akhat di the twna karana kata sa bam khwan e. ¹⁰ Meic daihmei ni nthyammei ni, meic naina kata ning kauhna, "Kamei hei 'Pumtan Daihmei' twna kawmei Ravguangc pumtan kiu di the," twna kaniw rui sa the. ¹¹ Mi kumcna tingsaengc sihna kaduaic rui kaniw ta tingak guang tipui zaeng rui meicnunc tei kakhou lungc gut ngam bam khwan e. ¹² Tiki Philip rui Ravguangc Guangcdic tuang gaychamv khatni Jisu Khrista lam khou dinclou pwkhou, lwmna kaniw ntumei ni, nggaanvmei ni duilup the. ¹³ Simon ni lwm the, kumna duilup tangna, Philip daeng khou bam khwan e. Philip rui sw-nchinmei khatni charynmei taanv daih taancloumei guay tei how laa khou, kamei ngak the.

¹⁴ Samariamei nunc ni Ravguangc lat laalou the twmei Jerusalem khou bammei Latdiutatmei nunc chu lana, Pitar lev John ta kaniw daeng thangc ndiulou the. ¹⁵ Kaney keyna, lwmloumei nunc tei Bumaengh Nthanmei laatow kan khang huayneylou the. ¹⁶ Kalam thu kaniw gaanv khat na khou sini Bumaengh Nthanmei keylou mak he; kaniw ta Poubauhmei Jisu zanc khou duiluploumei na di he. ¹⁷ Khoutei kaney rui kaney baanc kaniw ruc khou bouclou pwkhou kaniw Bumaengh Nthanmei laatow the.

¹⁸ Latdiutatmei nei tei rui kaniw ruc khou kaney baanc bouclou pwkhou, Bumaengh tiilou e twmei Simon tei how the. Kumna kamei rui Pitar lev John khang syan tiina, ¹⁹ "Ai rui ni abaanc bouclou pwkhou meicnunc Bumaengh Nthanmei laatow kan khang, mi pumtan hei akhou ni tiilou o," twna Simon rui sa the.

²⁰ Tiki Pitar rui mundawna sa the, "Nang ni, nang syan ni maan tho; Ravguangc kaipat ta syan rui liu ni twna nang ning laa bu the! ²¹ Mi siamruaimei taanv bamv khou hei nang dam maek e; kalam thu nang lungning hei Ravguangc hu khou ntwn mak e. ²² Mi nang tuang simei lungning khou rui nang lunghlaic o. Mi kumhmei lungning ning patlou kanmei khang tei kuaklou khang Poubauhmei khou huayney o. ²³ Nang khou mamavmei padik the, khatni nang simei bangc sw bam the twmei ai how the."

²⁴ "Nang ney rui sa kanmei tei aruc khou keylou mak khang, akhang Poubauhmei khou huayneylou o," twna Simon rui Pitar lev John khou sa the.

²⁵ Kaney rui Jisu Khrista lam khou thaymei tei dinclou lana khatni Poubauhmei lat dinclou lana Jerusalem thangc ngangh dat the. Kaney ngangh datmei chaenglwan khou, Samariamei namv mpeyna khou Gaychamv dinclou khwan e.

²⁶ "Nang thauna dihba^b thangc, Jerusalem khou rui Gaza tatmei chaeng thangc tei tat o," twna Poubauhmei tuang baanchara rui Philip khou sa the. (Mi hei meic tat taanmei chaeng di the.)^{c 27} Kamei thauna tat the. Khoutei Ethiopiamei liammav Kandaki tuang lanv sinmei meicdaihmei, kapumcsiammeipu gaanv khat, Jerusalem thangc Ravguangc ta kalum tat lana, ²⁸ kakai tat dat khang taluanglai tuangcna key khwan e. Kamei luanglai khou tuangcna, muhzwng Isaia tuang latrik pac tat bam khwan e. ²⁹ Khoutei, "Nang mi luanglai daeng thangc tei tatna, mi khou tei lay kazauh tho," twna Bumaengh Nthanmei rui Philip khou sa the. ³⁰ Philip tei pak guang pwkhou, kamei muhzwng Isaia tuang latrik tei pac bammei ta chu the.

Khoutei, "Nang pac bammei tei kabah thay daih?" twna Philip rui thanv the.

³¹ "Meic gaanv khat rui dinclou mak e thei ai akumhna thay nina cho?" twna mi meicdaihmeipu tei rui daw the. Khoutei Philip ta katuang luanglai khou ku dungh khang huaycha the. ³² Kamei rui pac bammei nthanmei latrik chyam kiu mi hei e:

³⁴ "Muhzwng rui mi hei thow lam khou sa bam tu cho, dinclou o. Karana kalam khou sa bam tu ni, meic baihmei lam khou sa bam tu cho?" twna meicdaihmeipu tei rui Philip khou sa the. ³⁵ Khoutei Philip tei sa thau the; mi nthanmei latrik chyam khou rui kahouhna Jisu tuang Gaychamv kakhou dinclou the. ³⁶ Kaney mi kumcna tat key pwkhou, dui asaekc naimei bamv khou key the. Khoutei, "Mi khou hei dui nai the, ata duiluplou nuh makmei tuang tabui nai he cho?" twna mi pu tei rui sa the. ³⁷ Kumna, "Nang lungc kapwm rui lwmlou e thei, nang duilup nuh the," twna Philip rui sa tikhou, "Jisu Khrista hei Ravguangc Nac Mpouh e twmei ai lwm the," twna kamei rui mundaw the.^d

³⁸ Luanglai tei nthaekc khang meicdaihmeipu tei rui sa the, kumna kaney dui khou tei keyna Philip rui kata duiluplou the. ³⁹ Kaney dui khou tei rui ku dat pwkhou, Poubauhmei tuang Bumaengc rui Philip ta laa tat kan the. Mi pu tei Philip ta how dat mak khe; tiki kamei neihlamei rui padikna tat kan the. ⁴⁰ Khoutei Philip kamei Azotas khou bam khwan the, kumna kamei kaidai kathuic khou Gaychamv dincna Kaisarea khou guang the.