¹ Kaisarea khou kazanc Kornelias twna kawmeipu nai khwan e. Kamei hei "Italimei Rihphianh nunc" twna kawmei Rommei ricmei kang akhat tuang rihpy khwan e. ² Kamei hei ravning nthukmeipu e; kamei khatni kakai kaikhunh kapwm Ravguangc ta pingmei kai e. Kamei hei lungcsimei Jihudimei nunc ta mpeyna nkhavloumeipu e khatni Ravguangc khou huayney tanh tan bammeipu e. ³ Zaeng neih khat tingzyn ganvdak kathumh zaengc khou, ndawman akhat how khwan e. Khoutei Ravguangc baanchara guangna, "Kornelias," twna kawmei ta kamei how nthan thiakh thiakna how the.

⁴ Kamei kauh baanchara ta tei pingna kaluang the. Kumna, "Poubauhmei, tabui cho?" twna kamei rui sa the.

Khoutei kauh baanchara tei rui sa the, "Nang rui huayney bammei khatni tii pat bammei tei Ravguangc thaylou the, kumna dawlou the. ⁵ Ntaw Joppa thangc meic ndiulouna Simon Pitar twna kawmeipu ta kaw o. ⁶ Duipui daeng khou lungc bammei guaih gic nuaihmei Simon kai khou kamei bangv bam e." ⁷ Kauh baanchara tei tat dat kan pwkhou, Kornelias rui kabangc gaanv nei lev khatni kadaeng khou bammei ravning nthukmei rihmei gaanv khat ta kawna, ⁸ pat kanmei guay tei raclou the, kumna kaniw ta Joppa thangc ndiulou the.

⁹ Nthuanh thauna, kaniw Joppa na guangpui ganv khou, kalaanv neih ndyng zaengc khou Pitar huayney khang kainam khou ku bam khwan e ¹⁰ Kamei ndaepc the, kumna ramh tu nii tuang ning pat the; tiki nap gan kasiamh luai mak he. Khoutei Pitar ndawman how the, ¹¹ Khoutei tingkauh laanc patna phey paek daihmei kumhmei akhat kakwn padeih biancna kandih khou mpat keymei ta how the. ¹² Mi khou tei khouringh zaat guay—tuihmei khouringc zaat guay khatni nruayna zaat guay nai khwan e. ¹³ Khoutei khwan akhat rui, "Pitar, thau tho, sw luaina tu tho!" twna sa the.

¹⁴ Tiki, "Ai tu lak e, Poubauhmei! Nthan makmei puat ai khat sini tu mak e," twna Pitar rui daw the.

¹⁵ "Ravguangc rui nthan the twna samei ta tei, mphuam e twna laa rio," twna mi khwan tei rui sa dat khwan e. ¹⁶ Mi hei kumcna lyanlou liang kathumh khwan e, kumna tingkauh thangc laa ku dat kan the.

¹⁷ Mi hei tabui kabac cho twna Pitar kakhanh bam khou, Kornelias rui ndiu guangmei nunc tei Simon kai phu guangna kairaengv mun daeng khou ding bam khwan the. ¹⁸ Kumna Simon Pitar bangv bam bu cho twna kaniw rui mi kai khou tei kaucna kakhi the.

¹⁹ Mi ndawman lam khou Pitar kakhanh bam khou, Bumaengh tei rui kakhou sa the, "Zauc lo! Meic gaanv thumh^a nang ta kakhi bam e. ²⁰ Nang thauna kabangc thangc key tho, kumna lwmsi makna kaniw thei lay tat tho; kaniw ta ai rui ndiu guang tuang e," twna Bumaengh tei rui sa the. ²¹ Kumna Pitar tei keyna, "Nangniw phu bammeipu kiu ai the. Tabui lam khang nangniw guang tu cho?" twna kaniw khou sa the.

²² Kaniw rui mundawna sa the, "Rihpy Kornelias rui aniw ta ndiulou pwna guang tuang e. Kamei hei meicgaymei e, Ravguangc ta pingmei mei e khatni Jihudimei zaat nunc rui sa chuy bammeipu e. Nang rui sa nimei lat tei kamei nking khang nang ta kakai khou kaw guang o twna Ravguangc baanchara rui kakhou sa tina aniw ta ndiulou pwna e." ²³ Khoutei kamei rui kaniw ta kaw gutna tibangvlou the.

Nthuanh thauna, Joppa khou rui lwmmei nunc gaanv saekc ta nduanghna Pitar tei kaniw lev tat the. ²⁴ Kumna neih neipui neic, Kaisarea guang tangc the. Mi khou tei Kornelias tei kariang kaluaic nunc khatni kapam dianghmei nunc ta kaw guanglouna kata nkhwan bam khwan the. ²⁵ Pitar tei kainung kaemc gut ni khou, Kornelias pat riuna khuksun keyna kalum the. ²⁶ "Ding thau o, ai ni maansei de," twna sana Pitar rui kata zay thau the. ²⁷ Pitar tei Kornelias khou lat sana sana kainung kaemc gut pwkhou, meic mpeyna guang kaduai bammei ta ariw the. ²⁸ Khoutei kamei rui kaniw khou sa the, "Jihudimei hei zaatc baihmei kai khou tatlou khang khatni kaniw pang khou kariu karav tat khang katuang ravchap rui nuh mak e twmei nangniw thay e. Tiki ai meic gaanv khat na ta sini nthan makmei e twna ning nuh mak e twna Ravguangc rui akhou lyanlou the. ²⁹ Kum thena nangniw rui ata kaw pwkhou rouh tuang maekna guang tuang e. Nangniw ata kawmei kiu tabui khang cho, salou o."

³⁰ Khoutei Kornelias rui sa the, "Zaeng neih thumh hu thangc, mi ganv zaengc khou, tingzyn ganvdak kathumh khou, ai akai khou huayney bam khou,^b titah tamei pwan piumeipu gaanv khat ahu khou guang dingna, ³¹ 'Kornelias, Ravguangc rui nang huayneymei chulou the khatni nang rui tii patmei tei thaylou the. ³² Joppa thangc meic ndiulouna Simon Pitar twmeipu ta kaw o. Duipui daeng khou lungc bammei guaih gic nuaihmei Simon kai khou kamei bangv bam e,' twna sa the. ³³ Kumna ai rui kadyng khou nang ta kaw khang ndiulou tuang the. Kumna nang nzianlouna guanglou dyng the. Poubauhmei rui nang ta sa o twna saloumei lat kiu nking khang ntaw aniw mi khou hei Ravguangc hu khou guang bammei tuang the."

³⁴ Pitar rui mi kumcna sa thau the, "Ravguangc thu guhsw gahsw makna meic guayna ta nchamcna swmeipu de twmei nchumh e twmei ai ntaw thu thay the. ³⁵ Kata pingmei khatni nchumhmei taanhpui mei ta thu zaatc kapah makna kamei laalou de. ³⁶ Meic katana Kaipouc Jisu Khrista paan rui chuzaenghmei phungc guangmei Gaychamv—Ravguangc kamei rui Israelmei khou tii guang kanmei chamv tei nangniw thay the. ³⁷ John rui duilup khang chamvdinhmei tangv tei rui Galili khou rui thauna, Israel kandih kapwm khou pat kanmei pary tei nangniw thay the. ³⁸ Nazareth mei Jisu lam tei nangniw thay e. Ravguangc rui kakhou Bumaengh Nthanmei khatni pumtan bun keylou kanmei tei nangniw thay e. Kamei kabamv kathuic khou tatlouna gaytaanv taanclou khwan e khatni Ravsic rui rai bammei nunc ta tigaylou khwan e. Kalam thu kata Ravguangc rui nduanghlou khwan e. ³⁹ Kamei rui Israel kandih khou khatni Jerusalem khou taanclou kanmei guay tei howmei kiu aniw hei the. Kaniw rui kata theihchouc khou thaengc luai kan the. ⁴⁰ Tiki Ravguangc rui kata zaeng neih thumh nungc tiringcthaulou dat kan the, kumna kata tihowlou the. ⁴¹ Mi tei meic guayna khou hamh e; Ravguangc rui mi lam khou tei dinh khang kapahloumei aniw khou e. Kamei ringcthaumei tangv, aniw kamei lev tu nchamc zangv nchamc the. ⁴² Meic nunc khou lat hei dinc o khatni kamei hei ringc bammei ta ni theic kanmei ta ni latzan sw khang Ravguangc rui langloumeipu e twmei sa tat o twna kamei rui aniw ta ndiulou the. ⁴³ Kakhou lwmmei kathuic paap guay tei kazanc paan rui kuaklou puni twna muhzwng guay rui kalam khou sa guang tuang the."

⁴⁴ Pitar rui sa bammei dyng khou, nking bammei guay khou tei Bumaengh Nthanmei keylou the. ⁴⁵ Ravguangc rui katuang kaipat—Bumaengh Nthanmei Jentailmei nunc khou ni tii keyloumei khou tei Joppa thangc rui Pitar thei lay guangmei lwmmei nunc tei ngak the. ⁴⁶ Kalam thu kaniw lat baih baihmei sana, Ravguangc ta thuanc bammei ta kaniw chu the. Khoutei Pitar rui sa the, ⁴⁷ "Aniu kumcna kaniw ni Bumaengh Nthanmei laatow lana the. Kaniw ta dui rui duilup khang thow rui thingc dat ngam ni thena cho?" twna Pitar rui sa the. ⁴⁸ Kumna kaniw ta Jisu Khrista zanc khou duiluplou ti tho twna sa the. Mi khou tei tingmik asaekc bam keylou dat khang kaniw rui sa the.