¹ Jentailmei nunc ni Ravguangc lat laalou the twmei Latdiutatmei nunc khatni Judia khou bammei lwmmei guay chu the. ² Pitar Jerusalem khou guang dat pwkhou, Jentailmei guay ni gihruamc nina de twna samei nunc rui kata nuh makna, ³ "Tabui swna nang gihruamc makmei nunc kai khou bangvna kaniw lev tu zangv kariu tat tu cho," twna sa the. ⁴ Khoutei Pitar rui pat kanmei guay tei kadwan swna mi kumcna raclou the:

⁵ "Ai Joppa kaidai khou huayney bam khou, ndawman akhat khow khwan e. Phey paek daihmei kumhmei akhat katin padeih biancna tingkauh thangc rui mpat keymei ta how the, kumna mi tei adaeng khou keylou the. ⁶ Ai mi tei zauc diangc pw ki, mi khou tei kai khouringc, nwmbangc khouringc, tuicna tatmei khouringc, khatni nruayna mpeyna how the. ⁷ Khoutei, 'Pitar, thauna swluai tu tho!' twna khwan akhat rui samei ai chu the. ⁸ Tiki, 'Ai tu lak e, Poubauhmei! Nthan makmei puat ai amwang khou phalou zat mak e,' twna ai rui daw the. ⁹ 'Ravguangc rui nthan the twna samei tei nang rui nthan mak e twna ning dat ri tho,' twna mi khwan tei rui tingkauh thangc rui sa key dat e. ¹⁰ Mi hei kumcna lyanlou kathumh e, kumna tingkauh thangc zay ku dat kan the. ¹¹ Mi ganv khou tei ata kaw khang Kaisarea thangc rui ndiu guangmei gaanv thumh ai^a bammei kai khou tei guang the. ¹² Lwmsi makna kaniw thei lay tat o twna Bumaengh rui akhou sa the. Mi chana gaanv charuk ta hei Joppa khou rui nduanghna Kaisarea thangc tat the, kumna aniw Kornelias kai khou gut the. ¹³ Tingkauh baanchara akhat kakai khou guangna, 'Simon Pitar twna kawmeipu ta kaw khang Joppa thangc meic ndiulou tho. ¹⁴ Nang khatni nang kai kaikhunc ta gulou nimei lat nang khou kamei rui dinclou puni,' twna saloumei pary kamei rui raclou the. ¹⁵ Ai rui lat tei sa thau pwkhou, thau rey khou aniu khou keyloumei tei kumcna, kaniw khou Bumaengh Nthanmei keylou the. ¹⁶ Khoutei, 'John rui dui rui duiluplou the; tiki nangniw ta Bumaengh Nthanmei rui luplou puni,' twna Poubauhmei rui salou kanmei tei ai ningtow the. ¹⁷ Aniu Poubauhmei Jisu Khrista khou lwmmei ganv khou aniu khou tiilou kanmei kaipat tei Ravguangc rui mi Jentailmei nunc khou ni tiilou kan the. Kum e thei, Ravguangc ta sw nuh mak e twna sa dat bam khang ai thow na cho?"

¹⁸ Mi tei chu pwkhou, kaniw rey rey key kan the, kumna "Kum e thei Jentailmei nunc ni lunghlaicna ringhmei laa khang Ravguangc rui tiilou bu di the!" twna sana Ravguangc ta thuanc the.

¹⁹ Stephen ta sw luaimei ganv khou rairiumei pat khou tei rui pak phak tat kanmei lwmmei nunc tei gaanv saekc Phoinikia, Kupras khatni Antiokh nganv tat tangcna, Jihudimei nunc khou na lat tei dinclou the. ²⁰ Tiki Kupras khatni Kureni khou rui guangmei nunc thu Antiokh thangc tatna, Grikmei^p nunc khou ni Poubauhmei Jisu tuang Gaychamv tei dinclou the. ²¹ Poubauhmei tuang pumtan kaniw khou tiilouna meic mpeyna lwmna Poubauhmei khou guang the.

²² Mi chamv hei Jerusalem tuang phwamling khou chu guang tangc pwkhou, kaniw rui Barnabas ta Antiokh thangc ndiulou the. ²³ Kamei mi khou tei guang tangcna Ravguangc zauzian tei how pwkhou kamei neihla the. Kumna kaniw chalingc dingna Poubauhmei khou ntipna bam khang katiulou the. ²⁴ Barnabas tei meic gaymei, Bumaengh Nthanmei khatni lwmmei padikmeipu e, kumna kamei rui meic mpeyna ta Poubauhmei khou phungc guang the.

²⁵ Kumna Barnabas Saul ta phu khang Tarsas thangc tat the. ²⁶ Kamei Saul ta ariwna, Antiokh khou nduangh guang the. Kaney tingkwm khumna phwamling kariuna meic kangdai ta nchamlou the. Mi Antiokh khou rui lwmmei nunc ta Khristian twna kaw rey kan the.

²⁷ Mi ganv khou tei muhzwng gaanv saekc Jerusalem khou rui Antiokh khou key khwan e. ²⁸ Kaniw pang khou Agabas twmeipu rui dingthauna mbaanv kapwm khou ranv sihmei nap nkowmei guang puni twna Bumaengh paan rui dinc kasuakclou khwan e. (Mi tei Klaudias rui guanghdaihmei sw bammei douc pat kan the.) ²⁹ Judia khou bammei lwmmei guay ta nkhav khang meic katana, kamei kamei ngammei tii pat di kho twna ziap nunc tei dinglou the. ³⁰ Kaniw mi tei laa guang kaduaina syan tei Barnabas lev Saul rui phwamling gaandaic guay khou guang tiilou the.