¹ Mi ganv zaengc khou tei Guangh Herod^q rui phwamlingmei gaanv saekc ta rai thau khwan e. ² Kamei rui John chana Jakob ta baengsaeng rui swluai khwan e. ³ Mi tei rui Jihudimei guay ta tipianlou e twmei how lana, Pitar ta ni nym dat the. (Mi tei Khay Lou Makmei Ntyan Ngai lungc khou khwan e.) ⁴ Pitar ta nymna kangkai khou lou the, kumna rihmei gaanv padeih padeih tuang kang padeih rui kata gaek khang tiilou the. Mi Kaanpatpui Ngai tei luai pwkhou rui kandihmei hu khou zay pat khang sw bam tuang e. ⁵ Kumna Pitar ta kangkai khou lou bam khou tei, Phwamling rui kakhang Ravguangc khou lunghgutna huayney bam khwan e.

⁶ Herod rui kata nthuanh thauna kandihmei khou zay pat nimei nungc zingbangc tei, Pitar tei rigaanv gaanv nei kak khou zip bam khwan e. Kata kangriang kanei rui bangclou khwan e khatni chaengmun khou rigaanv bam khwan e. ⁷ Khoutei Poubauhmei tuang baanchara thay mak liangna guang ding the, kumna kainung tei gaanc the. Kauh baanchara tei rui Pitar ta kanaek khou hiwna, "Thau tho! Katumc tho!" twna nchyang thau the. Mi dyng khou tei Pitar baanc khou naimei kangriang tei kathyng key kan the. ⁸ Khoutei, "Nang phey sianlangv langv tho, kumna nang tuang phaythuapc tuangc tho," twna kauh baanchara tei rui sa the. Pitar mi tei sw the. "Nang tuang pheychuanh nuna athei lay tho," twna kauh baanchara tei rui sa the. ⁹ Pitar mi tei kaling ny, ndawman ny thay makna kauh baanchara thei tei kangkai paengc khou lay pat the. Kamei thu ndawman lana khuangh the twna ning the. ¹⁰ Kaney rigaanv bamv reymei kaan pat the; kaneimei ni kaan pat the, kumna chaengdai khou pat rap nimei nkhamhmei ntanh kaikhamv chaengmun khou pat the. Mi kaikhamv tei kaney khang karana laanclouna kaney tat pat the. Kaney kaidai chaeng khou tei tat key pwkhou, thay mak liangna kauh baanchara tei maan kan the. ¹¹ Pitar kabah thay pat dat pwkhou, "Mi hei kaling di the twmei thay the! Kauh baanchara rui ata Herod baanc khou rui khatni Jihudimei nunc rui tiswlou nimei khou rui ata gulou tuang di the," twna sa the.

¹² Kamei mi tei thay nthan laa khou, meic mpeyna guang kaduaina huayney bampui bamv, John Mark pui Meri kai thangc tat the. ¹³ Pitar rui kaizaeng kaikhamv nchow tina thow cho twna Roda twna kawmei banghpui pat the. ¹⁴ Mi tei Pitar khwan e twmei thay lana, kamei neihla langvna, kaikhamv laanclou makna pak gut datna, kaizaeng khou Pitar ding bam the twna salou the. ¹⁵ "Nang mba lana di the," twna kaniw rui sa the. Kaling de twna kamei rui sa ranvna sa tikhou, "Katuang baanchara de," twna kaniw rui sa the.

¹⁶ Kum bam khou tei, Pitar tei kaikhamv nchow dat dat bam tii thena kaikhamv tei laanc pat pwkhou kaniw Pitar ta how lana ngak the. ¹⁷ Rimh rim keylou o twna kabaanc rui kabeylouna, akumhna Poubauhmei rui kata kangkai khou rui laa patlou tu cho twmei kamei rui kaniw khou raclou the. "Mi hei Jakob khatni lwmmei nunc baih baihmei khou tei ni dinclou ti tho," twna salou lana kamei kabamv baih thangc tat kan the.

¹⁸ Tinggaanc pat pwkhou, Pitar tei tabui sw kan lana the cho twna rigaanv nunc pang khou tei katuakc katit thau the. ¹⁹ Herod rui kata tiphu the; tiki kaniw phu tow mak khe. Kamei rui rigaanv nunc ta tei lat thanv lana kaniw ta swluai khang latdanv pat kan the.

Mi tangv Herod Judia khou rui tat dat lana Kaisarea khou bam kanaklou khwan e.

²⁰ Herod tei Turmei khatni Sidonmei nunc ta kalung puamc dai puamc bam khwan e. Kum tina kaniw kariuna Herod ta ariw khang guang khwan e. Guangh kai khou kapy Blastas ta rac kimlou rey lana, kaniw Herod daeng khou guangna chuzaengh khang huaycha the. Kalam thu kaniw kandic hei tu zangv khang Herod tuang kandic khou rui laa bam lana e.

²¹ Dingloumei nungc, Herod tei guangh pwan piuna, guanghbamvpaeng khou dungc the, kumna meicnunc khou pary rac the. ²² Khoutei, "Rav khwan di the; maansei khwan hamh the!" twna kaniw rui kauc the. ²³ Kadyng khou Poubauhmei tuang baanchara rui Herod ta bailuai the; kalam thu kamei Ravguangc ta chakhwang sw mak khe. Kata nchi rui tu luai kan the.

²⁴ Mi khou tei Ravguangc lat dinc lik pat the khatni mbu thau the.

²⁵ Barnabas lev John kaney taanv luailou lana, John Mark ta nduanghna Jerusalem thangc rui guang dat the.^a