¹ Lauziu Nac tei rui chaneimei seal tei swbakna laanc pat pwkhou, tingkauh thangc ganvdak paekri dou rimh rim bam khwan e. ² Khoutei, Ravguangc hu khou ding bammei baanchara chanei ta ai how the, kumna kaniw khou tiangka chanei tiilou kan the.

³ Baihmei kauh baanchara gaanv khat, kachaekc tuang agawkuak sinna ravchabamv daeng khou guang ding the. Nthanmei nunc tuang ravsuai mi khou tei louna, guanghbamvpaeng hu khou naimei kachaekc ravchapaeng khou tei katlou khang, kakhou agaw mpeyna tiilou kan the. ⁴ Agaw maikhou tei, Ravguangc hu khou ding bammei kauh baanchara baanc khou tei rui nthanmei nunc tuang ravsuai thei lay khou ku the. ⁵ Mi tangv kauh baanchara tei agawkuak akhat laana, mi khou tei ravchabamv tuang maithyn lou padikna, mi tei kandih ramc khou bun key the. Khoutei ganhkeymei khwan rui kachin karo the. Ting palik the khatni baengla zay the.

⁶ Khoutei kauh baanchara gaanv chanei tiangka chanei muan khang chamdaanv bam the.

⁷ Reymei kauh baanchara tei rui katuang tiangka muan the. Khoutei nrihthai khatni mai, zei kazauhna kandih ramc khou bun key the. Kandih kadam kathumh patna akhat thu, thing bang khatni nuy ndiakcmei guay raw ngam the.

⁸ Kaneimei kauh baanchara tei rui katuang tiangka muan the. Mai chuangc bammei chyng but tadirapmei kumhmei akhat duipui khou phaic key kan the. Khoutei duipui kadam kathumh khou akhat zei guanh the. ⁹ Khoutei duipui khou naimei khouringc kadam kathumh khou akhat theic the, rungh kadam kathumh khou akhat swmaan the.

¹⁰ Kathumhmei kauh baanchara rui katuang tiangka muan pwkhou, gaanchuangcna daihmei, mairam bwang kumcna tingpuk thangc rui taek keyna duiriang guay kadam kathumh khou akhat, khatni duipuakkai guay kadam kathumh khou akhat khou keylou the. ¹¹ (Mi gaanchuangcna zanc tei "Nkhucmei" twna kaw e.) Dui guay kadam kathumh khou akhat thu nkhuc the. Dui tei nkhuc tipui zaeng rui, mi dui tei zangvmei meic mpeyna theic the.

¹² Padeihmei kauh baanchara tei rui katuang tiangka muan the. Neihmik kadam kathumh khou akhat, bw kadam kathumh khou akhat, khatni gaanchuangcna kadam kathumh khou akhat kabiu the. Kumna kalaanv ni, zingbangc ni kadam kathumh khou akhat thu gaanh mak khe.

¹³ Mi tangv, tingpuk kauh khou moucriang akhat samc bammei ta ai how e. Mi tei rui kaucna sa the, "He meicpingpui tuang e! Meic pingpui tuang e! Baihmei baanchara kathumh rui tiangka kathumh hei muan pwkhou mbaanv ramc khou lungc bammei guay khou patlou punimei hei meicpingpui tuang e!