9
1 Panguhmei kauh baanchara tei katuang tiangka muan the. Khoutei gaanchuangcna akhat tingkauh thangc rui kandih khou taek key kanmei ta how e. Kumna kakhou kangkhunc a tuang khamvtaan tiilou kan e. 2 Kamei rui kangkhunc tei laanc pat pwkhou, maimangh daihmei khou rui patmei maikhou kumcna maikhou pat the. Mi khunc khou tei rui patmei maikhou tei rui neihmik zingc the. 3 Mi maikhou khou tei rui nkav pang patna kandih khou key the. Mi nkav pang khou tei ravga khou tiiloumei pumtan tei tiilou kan the. 4 Kaniw tei nuy, thing bang hamh e thei tabui tabui bang ta pwni swkasic lak nina e; tiki kaniw sanpiang khou Ravguangc tuang malac namlou makmei mei guay ta swkasic khang e twna salou kan e. 5 Mi nunc ta tei kaniw swluai khang hamh e, tiki bw panguh rai khang e. Mi raimei ramsu tei ravga sat ramsu kumc puni. 6 Mi bw panguh lungc khou tei kaniw theic nii puni the, tiki theic ni tu hamh e; kaniw theic nii puni, tiki theihmei hei kaniw khou rui duc tat kan the.
7 Mi nkav nunc tei rihbamv khou gut khang chamdaanv bammei takuanc nunc kumc e. Kaniw py khou kachaekc tuang guangh pykhim kumhmei run e, kumna kaniw zaw tei maansei zaw kumc e. 8 Kaniw sam tei ni ntumei sam kumc e khatni kaniw nei tei kamang nei kumc e. 9 Kaniw ngaengv tei ntanh tuang ngaengvthuapc kumhmei duap e, kumna kaniw sw kalaepcmei khwan tei takuanh pang taluanglai zayna rihbamv khou pak gutmei khwan kumc e. 10 Kaniw mai ravga mai kumcna nai e. Mi khou tei kaniw sat nai e. Meic nunc ta bw panguh sw kabiu nimei pumtan tei mi mai khou tei nai the. 11 Kangkhunc sinmei kauh baanchara tei rui kaniw ta guangh swna sin e. Mi pu zanc tei Ibri lat khou Abaddon, khatni Grikmei lat khou Apollion twna kaw e. (Mi kabac kiu thu "sw mutmei" twna e.)
12 Reymei meicpingmei tuang kiu luai kan the. Mi tangv hei guang dat nimei kaney nai he.
13 Mi tangv, charukmei kauh baanchara tei katuang tiangka muan the. Khoutei Ravguangc hu khou ding bammei kachaekc ravchapaeng tuang kwn padeih khou tei rui khwan akhat ai chu e. 14 "Daihmei Euphrates Duiriang khou bangclou bammei kauh baanchara padeih ta tei mpatlou ti tho!" twna tiangka sinmei charukmei kauh baanchara khou tei sa khwan e. 15 Mi kauh baanchara padeih ta tei mpatlou the. Maansei kadam kathumh khou akhat ta swluai khang, mi ganvdak, tingmik, bw khatni tingkwm hei tangh mak saanv bangclou bam tuang e. 16 Takuanhricmei kang tei kasing ching phay luan ching e twna ai chu e. 17 Takuanh nunc ta tei khatni mi khou tei tuangc bammei nunc ta tei ai mi ndawman khou tei how e: kaniw tuang ngaengvthuapc guay tei mai kumc haengc e, saphir tauc kumc nrym e, khatni maipu kumc nzinh e. Takuanh nunc py guay tei kamangliangpui py kumc e, kumna kaniw mwang khou rui mai, maikhou, khatni maipu mphiu pat e. 18 Mi takuanc guay mwang khou rui patmei tasiat kathumh—mai, maikhou, khatni maipu hei rui maansei kadam kathumh khou akhat ta swluai the. 19 Kalam thu takuanh guay tuang pumtan kaniw mwang khou khatni kaniw mai khou nai e. Kaniw mai tei kapy nai e, nrui kumc e, kumna mi tei rui meicnunc ta tikabiu e.
20 Mi ntaemhmei hei rui swluai nsaekcloumei maansei guay tei kaniw rui kasiamhloumei ravmaengc khourui lunghlaih mak e. Kaniw ravsic nunc ta kalummei khourui lunghlaih mak e. Kamik how makmei, kanu chu makmei, tat thay makmei daandi, kachaekc, kuanzinc, ntauh khatni thing rui kasiamhmei ravmaengc guay khourui lunghlaih mak e. 21 Kaniw tuang meicdowmei, duaih raengh, lungcmaanv lungcmowmei, khatni kaihouhmei khou rui lunghlaih mak e.