¹ Mi tangc, ramh ndatpui tuang builwang kumhmei akhat akhang tiina sa e, "Nang tatna Ravguangc tuang Ravkai khatni ravchabamv tei ndat o khatni mi khou tei kalummei nunc sing tei pac o. ² Tiki kapaengcmei kaisangc guay tei thu ganclou o; ndat rio. Kalam thu mi guay tei Jentailmei khou tiilou kan the; kaniw mi Nthanmei Kaidai khou tei bw riakdeina kanei ruan bam puni the. ³ Ai rui alat dinhmei gaanv nei ndiu guang puni, kumna kaney khaemseiphey piuna mi zaeng ching khat phay nei riakcharuk lungc khou tei ravmundinc puni.

⁴ Mi ravlat dinhmeipu nei hei, kandih Kaipouc hu khou ding bammei oliv bang nei khatni thauhmai nei tei e. ⁵ Thow pwni, kaney ta swkasic khang swpui mei ta, kaney mwang khou rui mai patna swmaan puni. Mi kumna kaney ta swkasic khang swmei guay ta swluai puni. ⁶ Kaney ravmundinc bammei lungc khou ting riu mak khang tingpuk ta khaemlou ngammei ngamv kaney khou nai e. Duithuak dui guay ta ni zei tiguanhlou khang kaney khou ngamv nai e. Kaney rui ningmei thei layna alun tiguangna ni kandih ta swkasic khang ngamv nai e.

⁷ Kaney rui dinc ndauh nimei lat guay dinc tang pwkhou, kangkhunc khou rui patmei khouringh tei rui kaney ta adowna ngam puni. Kumna kaney ta swluai puni. ⁸ Kaney pumc tei latgiam swna Sodom khatni Ijipt twna kawmei, kaney kaipouc ta chouhthaengc kanmei bamv daihmei kaidai tuang chaengluang khou nzilou puni. ⁹ Kaney pumc tei mbeih makna zaeng neih thumh paekri mi khou tei lou bam puni. Kumna guanghdic guay, zaatc guay, khatni lat guay tuang mei guay rui mi tei zauc bam puni. ¹⁰ Kaney theihmei khou tei kandihmei maansei guay neihla puni. Mi muczwng nei hei rui kandihmei ta hei di sw ryanralou timei khou tei rui, kaney theih khou tei khat khat khang kaipat tiina neihlamei ndauh puni. ¹¹ Zaeng neih thumh paekri tangv Ravguangc tuang ringhmei thiu kaney khou tiilou dat tina, kaney ringcna ding thau dat puni. Kumna mi tei howmei guay ping puni. ¹² "Mi khou hei ku o!" twna tingkauh thangc rui kauc keymei khwan kaney chu lana, kaney ta zauczihmei guay hu khou muangh khou rui tingkauh thangc ku kan the. ¹³ Mi dyng khou tei baengladaih zay the, kumna mi kaidai tei kadam ruh khou akhat swkasic the, khatni meic ching chanei swluai the. Ringc bam duhmei guay tei ping the, kumna tingkauh Racguangc hym thuanc the. ¹⁴ Kaneimei ryanra ryanriumei tei luai kan the; tiki kathumhmei ryanra ryanriumei tei guang nuangc puni the!

¹⁵ Mi tangv chaneimei kauh baanchara tei katuang tiangka muan the. Khoutei tingkauh thangc mi kumna kauc the, "Mi mbaanv guangcdic hei Poubauhmei khatni katuang Khrista tuang guagcdic sw the, kumna kamei tingsaengzaeng guangh swna sin puni!" ¹⁶ Khoutei Ravguangc hu khou kaniw tuang guanghbamvpaeng khou dungc bammei gaanvdaih nchuihna padeih tei nkhum laemv keyna Ravguangc ta kalum the. ¹⁷ Kaniw rui mi sa the:

¹⁹ Khoutei tingkauh thangc Ravguangc tuang ravkai laanc pat the, kumna mi khou tei Latryan Khuk tei how e. Khoutei tingpalik ganh key the; baengla zay the; nrihthai key dai key the.