¹ Pumtan daihmei kauh baanchara gaanv khat tingkauh thangc rui keymei ta ai how e. Kamei tei muangh rui duam e khatni kapy khou muangsingc souc e. Kazaw neihmik kumc e, khatni kaphay mai tiangc kumc e. ² Ric patloumei latrikzy launa kabaanc khou sin bam e. Kaphay nzat duipui khou khatni mbai phay ramkiang khou dingna, ³ kauc ranvna kamangliangpui ra kumcna kauc e. Kamei rui kauc tikhou ganh key luan chaneina mundaw e. ⁴ Ganh key luan chanei tangv rappuilev, ai hy khang sw the. Tiki, "Ganh chanei rui samei tei ndauh pat rio; mi tei hylou rio! " twna tingkauh thangc rui sa keymei ai chu the.

⁵ Khoutei kaphay duipui khatni ramkiang khou ding bammei baanchara tei kabaanc tingkauh biak thangc zay thauna, ⁶ tingpuk, kandih, duipui khatni mi khou lungc bammei katana damcloumeipu, tingsaengzaeng Racguangc zanc khou syangdyng swna sa the, "Nzaeng dat bam ni tu hamh the! ⁷ Chaneimei baanchara rui katuang tiangka muan pwkhou, kamei rui kabangc muhzwng guay khou dincloumei, meic thay makmei katuang raeng tei tiguang tangc puni the."

⁸ Ai chu kanmei tingkauh thangc rui sa keymei khwan tei rui, "Duipui khatni kandih khou ding bammei kauh baanchara tei rui sin bammei ric patloumei latrikzy tei nang guang laa tho," twna samei ai chu dat e.

⁹ Ai kauh baanchara daeng khou kiu guangna mi latrikzy launa tei ney the. Khoutei, "Laana tu tho; mi hei nang mwang khou thu nkhuaihdui kumcna ndeih puni, tiki nang bung khou thu nkhuc puni," twna sa the.

¹⁰ Ai mi latrikzy launa tei baanchara baanc khou tei rui laana tu the. Mi tei amwang khou thu nkhuaihdui kumcna ndeih e, tiki kaduk key tangv pwkhou thu abung khou nkhuc the. ¹¹ Mi tangv, "Zaatc guay, guanghdic guay, lat guay, khatni guangh guay lam khou Ravguangc rui samei lat hei, nang dinc dat nina e," twna akhou sa the.