¹ Khoutei khouringh akhat duipui khou tei rui thaumei ta ai how e. Mi tei kachei ruh khatni kapy chanei nai e. Kapy guay khou tei guanghpyrun runlou e, khatni kapy guay tei Ravguangc hym sw kachanhpui zanc phungc e. ² Mi khouringc tei kamang kumc e, katan chagamh tan kumc e, khatni kamwang kamangliangpui mwang kumc e. Kumna thaanngangc tei rui kapumtan, kaguangc bamvpaeng, khatni daihmei ngamv mi khouringh khang tei tii kan the. ³ Mi khouringh py akhat khou tei theic biuhmei zamvdai kumhmei akhat how e; tiki mi tei gay dat kan the. Mbaanv kapwm ngakna mi khouringc thei tei lay the. ⁴ Meic nunc tei mi thaanngangc ta tei kalum the, kalam thu mi tei rui khouringh khang tei ngamv tiilou kan the. "Mi khouringc kumhmei thow naina cho? Mi ta hei adow ngam nimei thow naina cho?" twna sana kaniw mi khouringc ta tei ni kalum the.

⁵ Kagaengh swna Ravguangc hym sw kachanhpui lat sa khang kakhou tiilou the, kumna bw riakdeina kaney ngamv sin khang ni kakhou tiilou the. ⁶ Mi tei Ravguangc ta, kazanc ta, kamei bammei bamv ta khatni tingkauh khou bammei guay ta sakasic thau the. ⁷ Nthanmei guay ta adowna ngam khang kakhou tiilou the, kumna zaatc guay, guanghdic guay khatni, lat guay ta sin khang kakhou ngamv tiilou the. ⁸ Sw luai kanmei Lauziu Nac tuang ringhmei latrik khou mbaanv damh mak khou rui kaniw zanc hylou kanmei nunc na hamhna, mbaanv khou lungc bammei meic katana rui kata kalum puni.

⁹ Nukuanc naimei kathuic chu laa tho! ¹⁰ Nym nipui mei ta tei nym puni the; baengsaeng hu khou theic nipui mei ta tei baengsaeng rui dowluai puni the. Mi khou hei nthanmei guay khaengthay khang khatni lwm ntip khang kage nai e.

¹¹ Mi tangv, kandih khou rui khouringh akhat kumei ta ai how e. Mi tei lauziu nac chei kumhmei kachei kanei nai e, khatni mi tei thaanngangc kumcna lat sa e. ¹² Mi tei rui reymei khouringh tuang ngamv guay tei mi khouringc hu khou tei sinsw the. Mi tei rui kandih khatni mi khou lungc bammei guay ta kazam gay dat kanmei reymei khouringc ta tei tikalum the. ¹³ Kaneimei khouringc tei rui charynmei taanvdaih mpeyna taanc the. Kamei rui meic guay hu khou tingkauh thangc rui kandih khou mai tikey the. ¹⁴ Reymei khouringc hu khou sw lyanlou khang nuhlou tina swloumei charynmei taanv guay tei rui mbaanv khou lungc bammei meic guay ta guat the. Baengsaeng zam phungc laki ringc bammei khouringc maengc tei mi khouringc tei rui tikasiamh the. ¹⁵ Kumna mi maengc khou tei kaneimei khouringc tei rui ringhmei thiula laalou khang nuhlou the. Mi tei mi maengc tei lat sa thay khang khatni kata kalum makmei guay ta swluai khang e. ¹⁶ Meic daihmei, nthyammei, lungcsimei lungcgaymei, bangh khatni nyngswmei—meic katana ta kabaanzat khou hamh e thei kasanpiang khou timadanclou the. ¹⁷ Mi khouringc zanc tei hamh e thei mi zanc tuang sing tei madanclou makmei meic gaanv khat na sini ramh zuanc nuh mak e; liu ni liu nuh mak e.

¹⁸ Mi hei thay khang ningting kage nai e. Mi khouringc zanc tuang sing kabac tei ningtyngpui mei rui chak pat ngam puni. Kalam thu mi sing hei meic zanc phaan e. Mi sing kiu thu 666 e.