¹ Mi tangv ai zauc pw ki, Lauziu Nac tei Zion Chyng khou ding bammei ta how e. Kaniw sanpiang khou kazanc khatni kapu zanc hyloumei gaanv 144,000 kadaeng khou ding bam e. ² Khoutei duipui duidai khwan kumhmei, ganhkeymei khwan kumhmei khwan akhat tingkauh thangc rui sa keymei ta ai chu e. Mi tei nrah zay thaymei nunc rui zay patmei nrac khwan kumc e. ³ Mi gaanv 144,000 tei ramhkui padeih khatni gaanvdaih nunc kadaeng khou bammei guangc bamvpaeng hu khou tei dingna lu thanh swan bam e. Kaniw na hamhna mi lu tei meic thay mak e. Kaniw hei mbaanv kapwm khou rui guangmei thuakpatloumei nunc e. ⁴ Kaniw hei ntumei rui sw-mphuam makmei nunc, ntumei ta kahi makmei nunc e. Kaniw hei Lauziu Nac thei tei kamei tat tat thangc lay tat bammei nunc e. Kaniw hei meic guay pang khou rui thuakpatloumei nunc khatni Ravguangc khatni Lauziu Nac khang katloumei nthai reymei thay kumhmei e. ⁵ Kaniw latsaraemc zat mak e; kaniw hei khuay maekmei nunc e.

⁶ Mi tangv, kauh baanchara akhat tingpuk laan khou samc bammei ta how e. Kandih khou lungc bammei zaatc kathuic, khwang kathuic, lat kathuic, khatni guanghdic kathuic khou dinclou khang tingsaengzaeng gaychamv kakhou nai e. ⁷ Kamei rui kauc ranvna sa e, "Ravguangc ta ping o khatni kata chakhwang champouh o! Kalam thu kamei rui latzan sw nimei ganv guang the! Tingpuk, kandih, duipui khatni duipuakkai guay damcloumeipu ta kalum o!" ⁸ Baihmei kaneimei kauh baanchara kathei lay patna sa e, "Daihmei Babilon tei bow kan the! Zaatc guayna ta katuang nthah boulahmei zouc, lungpuam tithaumei zouc tizangvloumeipui tei bow kan the.!"

⁹ Reymei khatni kaneimei tangv, kathumhmei kauh baanchara pat datna kauc ranvna sa e, "Khouringh khatni kamaengc ta tei kalummei guay ruc khou khatni kasanpiang khou hamh e thei kabaanc khou mi tuang madanhmei tei naimei guay ruc khou, ¹⁰ Ravguangc lungpuamdai, kasut tuang nai dat makmei lungpuam keylou puni. Kaniw ta tei maipu rui chuangc bammei mai khou nthanmei kauh baanchara nunc khatni Lauziu Nac hu khou rai puni. ¹¹ Kaniw ta rai bammei mai tei amit dat lak khe. Mi khouringc khatni kamaengc ta kalummei nunc, kazanc tuang madanhmei tei phunghmei nunc tei zingbangc kalaanv ryanramei nthaekc dat lak khe."

¹² Mi khou hei, Ravguangc latdanv guay piu bammei khatni Jisu khou lwmnuhmei sw bammei nthanmei guay khaengvthay khang kage nai e.

¹³ Mi tangv, "Mi hei hy o: Ntaw rui thauna Poubauhmei khou theicloumei nunc tei sangaymei e!" twna tingkauh thangc rui sa keymei ai chu e.

"Ngguay, kachangc e! Kaniw ryanra ryanriumei khou rui nthaekc puni the. Kalam thu kaniw tuang taanvthai kaniw thei lay guang e," twna Bumaengh rui daw e.

¹⁴ Mi tangv ai zauc dat pw ki, meic nac mpouh kumhmei gaanv khat kachaekc tuang guangh pykhim runna kabaanc khou ntukmei baengkhuai sinna muangh mphwanmei ruc khou dungc bammei ta how e. ¹⁵ Khoutei kauh baanchara baihmei akhat khwan ranvna, "Nang baengkhuai sinna law tei tay tho. Kalam thu taypui ganv tangc the; mbaanv laupuk hei minc the!" twna muangh khou dungc bammeipu khou tei sa the. ¹⁶ Khoutei muangh khou dungc bammeipu tei rui kabaengkhuai rui mbaanv laupuk tei tay the.

¹⁷ Mi tangv kauh baanchara baihmei akhat tingkauh thangc ravkai khou rui patmei ta ai how e. Kamei ni baengkhuai ntukmei sin e.

¹⁸ Mi tangv mai ruc khou kangamv naimei kauh baanchara baihmei akhat ravchapaeng khou rui pat the. Ntukmei baengkhuai sinmei kauh baanchara khou tei kamei rui kauc ranvna, "Nang tuang baengkhuai tei sin thau tho, mbaanv tuang luairyn lau khou rui kathai guay tei tay tho. Kalam thu luairyn thai guay tei minc the," twna sa the. ¹⁹ Kumna mi baanchara tei kabaengkhuai tei kandih nam ruc khou zay patna luairyn thai chuam guay tei tayna, Ravguangc lungpuam tuang daihmei luairyn thai niakpui bamv khou phaiclou kan the. ²⁰ Mi luairyn thai guay tei nipui bamv kaidai paengc khou ni the, kumna mi khou tei rui zei takuanh mwangkhap kauhmei saan nthukna mail phay nei dou luangc pat the.